ᐅᔭᓱᐁᐧᐊᐧᐠ 16
16
1ᓵᒼᓴᐣ ᒫᑲ ᑭ ᐃᑐᐦᑌᐤ ᑫᓴᐃᕽ, ᐁᑯᑕ ᒫᑲ ᑭ ᐋᐧᐸᒣᐤ ᐱᓯᑳᐧᑎᐢᑫᐧᐊᐧ ᐁᑯᓯ ᑭ ᐱᑐᑲᐁᐧᐤ. 2ᑭ ᐃᐧᐦᑕᒪᐋᐊᐧᐠ ᒫᑲ ᑫᓴᐃᑕᐠ ᐁ ᐃᑌᐧᕽ, ᓵᒼᓴᐣ ᐅᑕ ᑕᑯᓯᐣ. ᑭ ᐋᐧᐢᑳᐢᑲᐁᐧᐊᐧᐠ ᒫᑲ, ᒥᓇ ᑭ ᐊᓱᐁᐧᐊᐧᐠ ᑲᐯᑎᐱᐢᐠ ᑭᐦᒋᐃᐢᑳᐧᑌᒥᕽ ᐅᑌᓈᕽ, ᒥᓇ ᑭ ᑭᒥᐊᔮᐊᐧᐠ ᑲᐯᑎᐱᐢᐠ, ᐁ ᐃᑌᐧᒋᐠ, ᑫᑭᓭᐸᔮᑭ ᐃᐢᐱ ᑭᓯᑳᓈᑲᐧᑭ ᐁᑲᐧ ᑭ ᑲ ᓂᐸᐦᐋᓇᐤ. 3ᓵᒼᓴᐣ ᒫᑲ ᑭ ᐱᒥᓯᐣ ᐃᐢᑯ ᐁ ᐋᐱᑖᑎᐱᐢᑳᔨᐠ, ᐁᑯᓯ ᑭ ᐊᐧᓂᐢᑳᐤ ᐁ ᐋᐱᑖᑎᐱᐢᑳᔨᐠ, ᐁ ᑭ ᐅᑎᑎᓇᕽ ᒫᑲ ᑭᐢᑐᑲᓇ ᑭᐦᒋᐃᐢᑳᐧᑌᒥᕽ ᐅᑌᓈᕽ, ᒥᓇ ᐊᓂᐦᐃ ᓂᓱ ᒋᒥᒋᑲᓇ, ᐁᑯᓯ ᑭ ᒪᓂᐱᑕᒼ, ᐋᒋᑭᐸᐃᑲᓈᑎᐠ ᑭᑭ, ᑭ ᐅᓂᑳᑕᒼ ᒫᑲ ᐅᑎᑎᒪᓂᕽ, ᒥᓇ ᑭ ᐃᑐᑕᑖᐤ ᑕᐦᑯᑖᒪᑎᐣ ᐊᐧᒋ ᑎᐱᐢᑯᐨ ᐦᐁᐸᕒᐊᐣ ᑳ ᐊᔮᐠ.
4ᑭ ᐊᔨᑭᐣ ᒫᑲ ᒣᐧᐢᑕᐢ ᐃᔨᑯᕽ, ᑭ ᓵᑭᐦᐁᐤ ᐃᐢᑫᐧᐊᐧ ᓵᕒᐃᐠ ᐋᐧᔮᒪᑎᓈᕽ, ᑎᓬᐊᐃᓬᐊ ᐁ ᐃᓯᔨᐦᑳᓱᔨᐟ. 5ᐱᓬᐃᐢᑎᐣ ᐅᑭᒫᐊᐧ ᒫᑲ ᑭ ᐯ ᓈᑎᐠ, ᒥᓇ ᑭ ᐃᑎᐠ, ᑲᑫᐧ ᓵᑯᒋᒼ, ᐁᑯᓯ ᐋᐧᐸᐦᑕ ᑖᓂᑕ ᐁᐢᑌᔨᐠ ᐅ ᑭᐦᒋ ᒪᐢᑲᐃᐧᓯᐃᐧᐣ, ᒥᓇ ᑖᓂᓯ ᐃᓯ ᑫ ᑭ ᓵᑯᒋᐋᔮᕽ, ᑭᑕ ᑭ ᒪᒫᒋᑲᐧᐱᑖᔮᕽ ᑭᑕ ᑯᑕᑭᐋᔭᕽ; ᐁᑯᓯ ᑭ ᑲ ᒥᔨᑎᓈᐣ ᑲᐦᑭᔭᐤ ᐁ ᐃᑕᓯᔮᕽ ᒥᑖᑕᐦᐟ ᐯᔭᑯᓵᑊ ᑕᐦᑖᐧᐤ ᒥᑖᐦᑐᒥᑕᓇᐤ ᑕᐦᑖᐧᐱᐢᐠ ᐋᐧᐱᐢᑭᓱᓂᔮᐤ.
6ᑎᓬᐊᐃᓬᐊ ᒫᑲ ᑭ ᐃᑌᐤ ᓵᒼᓴᓇ, ᐃᐧᐦᑕᒪᐃᐧᐣ ᑭ ᐸᑯᓭᔨᒥᑎᐣ, ᑖᓂᑕ ᑭ ᑭᐦᒋ ᒪᐢᑲᐃᐧᓯᐃᐧᐣ ᐁᐢᑌᐠ, ᒥᓇ ᑫᑲᐧᐩ ᑫ ᑭ ᐅᐦᒋ ᒪᒫᒋᑲᐧᐱᑎᑲᐃᐧᔭᐣ ᑭᑕ ᑯᑕᑭᐦᐃᑲᐃᐧᔭᐣ. 7ᓵᒼᓴᐣ ᒫᑲ ᑭ ᐃᑌᐤ, ᑭᐢᐱᐣ ᒪᒫᒋᑲᐧᐱᓯᑖᐧᐃᐧ ᑌᐸᑯᑊ ᐊᐢᑳᑎᑯᓂᐱᓯᔭ ᐅᐦᒋ ᐁᑳ ᐃᐧᑳᐨ ᑳ ᑭ ᐅᐦᒋ ᐹᐢᑌᑭ, ᐁᑲᐧ ᑫ ᓂᔭᒥᓯᔮᐣ, ᒥᓇ ᓂ ᑲ ᐃᓯ ᐊᔮᐣ ᑖᐱᐢᑯᐨ ᑯᑕᐠ ᐊᔨᓯᔨᓂᐤ. 8ᐁᑲᐧ ᒫᑲ ᐊᓂᑭ ᐱᓬᐃᐢᑎᐣ ᐅᑭᒫᐊᐧ ᑭ ᐯ ᒥᔨᐠ ᑌᐸᑯᑊ ᐊᐢᑳᑎᑯᓂᐱᓯᔭ ᐁᑳ ᐃᐧᑳᐨ ᐁ ᑭ ᐅᐦᒋ ᐹᐢᑌᑭ, ᐁᑯᓯ ᑭ ᒪᒫᒋᑲᐧᐱᑌᐤ ᐁᐊᐧᑯᓂ ᐅᐦᒋ. 9ᑭ ᐊᔮᐁᐧᐤ ᒫᑲ ᐅᑕᐢᑲᒫᒋᑫᐊᐧ ᐁ ᐯᐦᐅᔨᐟ ᐱᐢᑭᐦᒋᑲᒥᑯᕽ. ᐅᒥᓯ ᒫᑲ ᑭ ᐃᑌᐤ, ᐱᓬᐃᐢᑎᓇᐠ ᑯᑎᑎᓂᑲᐧᐠ ᓵᒼᓴᐣ. ᐁᑯᓯ ᑭ ᐱᑯᓇᒼ ᐊᓂᐦᐃ ᓂᐱᓯᔭ, ᑖᐱᐢᑯᐨ ᐱᓭᐧᐱᒋᑲᓀᔮᐱ ᑳ ᐃᓯ ᐸᐢᑭᐸᔨᐠ ᐃᐢᑯᑌᕽ ᐁ ᑳᐦᒋᒋᐸᔨᐠ. ᐁᑯᓯ ᒫᑲ ᐅ ᒪᐢᑲᐃᐧᓯᐃᐧᐣ ᓇᒪᐃᐧᔭ ᑭᐢᑫᔨᑕᒫᐧᐣ. 10ᑎᓬᐊᐃᓬᐊ ᒫᑲ ᑭ ᐃᑌᐤ ᓵᒼᓴᓇ, ᒫᑎᑲ ᑭ ᑭ ᒣᑕᐋᐧᑳᓯᐣ, ᒥᓇ ᑭᔮᐢᑭᐃᐧᓇ ᑳ ᐃᐧᐦᑕᒪᐃᐧᔭᐣ; ᐁᑲᐧ ᒫᑲ ᐃᐧᐦᑕᒪᐃᐧᐣ ᑭ ᐸᑯᓭᔨᒥᑎᐣ, ᑫᑲᐧᐩ ᐅᐦᒋ ᑭᑕ ᑭ ᒪᒫᒋᑲᐧᐱᑎᑲᐃᐧᔭᐣ. 11ᑭ ᐃᑌᐤ ᒫᑲ ᑭᐢᐱᐣ ᐱᑯ ᒪᒫᒋᑲᐧᐱᓯᑖᐧᐃᐧ ᐅᐢᑭ ᐱᒥᓇᑳᐧᓇ ᐅᐦᒋ ᐁᑳ ᐃᐧᑳᐨ ᐁ ᑭ ᐅᐦᒋ ᐋᐸᑕᑭ, ᐁᑲᐧ ᑫ ᓂᔭᒥᓯᔮᐣ ᒥᓇ ᓂ ᑲ ᐃᓯ ᐊᔮᐣ ᑖᐱᐢᑯᐨ ᑯᑕᐠ ᐊᔨᓯᔨᓂᐤ. 12ᐁᑯᓯ ᑎᓬᐊᐃᓬᐊ ᑭ ᐅᑎᓇᒼ ᐅᐢᑭ ᐱᒥᓇᑳᐧᓇ, ᒥᓇ ᑭ ᒪᒫᒋᑲᐧᐱᑌᐤ ᐁᐊᐧᑯᓂ ᐅᐦᒋ, ᑭ ᐃᑌᐤ ᒫᑲ, ᐱᓬᐃᐢᑎᓇᐠ ᑯᑎᑎᓂᑲᐧᐠ ᓵᒼᓴᐣ. ᐅᑕᓱᐃᑫᐊᐧᐠ ᒫᑲ ᑭ ᐊᔮᐊᐧᐠ ᐱᐢᑭᒋᑲᒥᑯᕽ. ᑭ ᐸᐢᑭᐱᑕᒼ ᒫᑲ ᐅᐢᐱᑐᓂᕽ ᐅᐦᒋ ᑖᐱᐢᑯᐨ ᓭᐢᑕᐠ. 13ᑎᓬᐊᐃᓬᐊ ᒫᑲ ᐅᒥᓯ ᑭ ᐃᑌᐤ ᓵᒼᓴᓇ, ᐊᓄᐦᐨ ᐃᐢᑯ ᑭ ᑭ ᒣᑕᐋᐧᑳᓯᐣ ᒥᓇ ᑭ ᑭ ᑭᔭᐢᑭᒥᐣ; ᐃᐧᐦᑕᒪᐃᐧᐣ ᑫᑲᐧᐩ ᐅᐦᒋ ᑭᑕ ᑭ ᒪᒫᒋᑲᐧᐱᑎᑲᐃᐧᔭᐣ. ᑭ ᐃᑎᐠ ᒫᑲ, ᑭᐢᐱᐣ ᐊᓯᒋ ᐱᒪᐢᑌᐊᒪᓂ ᓯᑫᑭᓄᑫᐃᐧᓂᕽ ᐊᓂᐦᐃ ᑌᐸᑯᑊ ᑕᐦᑖᐧᔨᐢᑳᐧᓇ ᓂᐢᑎᑳᐧᓂᕽ. 14ᑭ ᒥᒋᒪᐊᒼ ᒫᑲ ᓴᑳᐢᑯᐃᑲᐣ ᐅᐦᒋ, ᐁᑯᓯ ᑭ ᐃᑌᐤ, ᐱᓬᐃᐢᑎᓇᐠ ᑯᑎᑎᓂᑲᐧᐠ ᓵᒼᓴᐣ. ᑭ ᑯᐢᑯᐢᑳᐤ ᒫᑲ ᐁ ᑭ ᓂᐸᐟ, ᐁᑯᓯ ᑭ ᒪᓂᐱᑕᒼ ᓴᑳᐢᑯᐃᑲᐣ ᐱᒥᑕᑯᒋᑲᓂᕽ ᐅᐦᒋ ᑭᑭ ᐊᓂᒪ ᓯᑫᑭᓄᑫᐃᐧᐣ.
15ᐁᑲᐧ ᒥᓇ ᐅᒥᓯ ᑭ ᐃᑌᐤ, ᑖᓂᓯ ᑫ ᑭ ᐃᓯ ᐃᑌᐧᔭᐣ, ᑭ ᓵᑭᐦᐃᑎᐣ, ᐃᐧᔭ ᑭᑌᐦᐃᕽ ᐁᑳ ᐁ ᐃᐧᒉᐃᐧᔭᐣ? ᐁᑲᐧ ᐅᒪ ᓂᐢᑖᐧᐤ ᐁ ᒣᑕᐋᐧᑳᓯᔭᐣ, ᐁᑯᓯ ᐁᑳ ᐁ ᐃᐧᐦᑕᒪᐃᐧᔭᐣ ᑖᓂᑕ ᑭ ᑭᐦᒋ ᒪᐢᑲᐃᐧᓯᐃᐧᐣ ᑳ ᐊᔮᐠ. 16ᑭ ᐊᔨᑭᐣ ᒫᑲ ᐁ ᒥᑯᐢᑳᒋᒥᑯᐟ ᑕᐦᑯᓀ, ᒥᓇ ᐁ ᓯᐦᑭᒥᑯᐟ, ᑭ ᐃᐦᑫᔨᑕᒥᔨᐊᐧ ᐅᐟ ᐊᐦᒑᐦᑲᐧ ᐱᔨᐢ ᐁ ᐃᐧ ᓂᐸᐁᔨᑕᕽ. 17ᑭ ᐃᐧᐦᑕᒪᐁᐧᐤ ᒫᑲ ᑲᐦᑭᔭᐤ ᐅᑌᐦᐃᕽ ᑳ ᐊᔮᔨᐠ, ᐁᑯᓯ ᑭ ᐃᑌᐤ, ᓇᒪᐃᐧᑳᐨ ᑲᐢᑭᐹᓱᐣ ᑭ ᓵᒥᑎᐣ ᓂᐢᑎᑳᐧᓂᕽ, ᒋᑫᒫ ᓈᓯᕒᐊᐃᐟ ᓂ ᑭ ᑐᐃᐧᑳᓂᐃᐧᐣ ᑭᓭᒪᓂᑐ ᐃᓯ ᐊᐢᐱᐣ ᓂᑳᐃᐧ ᑳ ᓂᐦᑖᐃᐧᑭᐃᐟ; ᑭᐢᐱᐣ ᑳᐢᑭᐹᓱᔮᓂ, ᐁᑲᐧ ᑫ ᓇᑲᑎᑯᔮᐣ ᓂ ᒪᐢᑲᐃᐧᓯᐃᐧᐣ, ᐁᑯᓯ ᓂ ᑲ ᓂᔭᒥᓯᐣ ᒥᓇ ᓂ ᑲ ᐃᓯ ᐊᔮᐣ ᑖᐱᐢᑯᐨ ᑯᑕᐠ ᐊᔨᓯᔨᓂᐤ. 18ᐃᐢᐱ ᒫᑲ ᑎᓬᐊᐃᓬᐊ ᐃᐧᔮᐸᐦᑕᕽ ᐁ ᑭ ᐃᐧᐦᑕᒫᑯᐟ ᑲᐦᑭᔭᐤ ᐅᑌᐦᐃᔨᕽ ᐁ ᐊᔮᔨᐠ, ᑭ ᐃᓯᑎᓴᐦᐅᐁᐧᐤ ᐁ ᓇᑐᒫᐟ ᐊᓂᐦᐃ ᐱᓬᐃᐢᑎᐣ ᐅᑭᒫᐊᐧ, ᐁ ᐃᑌᐧᐟ, ᐯ ᐃᑐᐦᑌᐠ ᑭᔮᒼ ᒥᓇ ᐯᔭᑳᐧᐤ, ᒋᑫᒫ ᓂ ᑭ ᐃᐧᐦᑕᒫᐠ ᑲᐦᑭᔭᐤ ᐅᑌᐦᐃᕽ ᑳ ᐊᔮᔨᐠ. ᐁᑲᐧ ᐊᓂᐦᐃ ᐱᓬᐃᐢᑎᐣ ᐅᑭᒫᐊᐧ ᑭ ᐯ ᓈᑎᐠ, ᒥᓇ ᑭ ᐯ ᑕᐦᑯᓀᔨᐊᐧ ᓱᓂᔮᐊᐧ ᐅᒋᐦᒋᔨᕽ. 19ᑭ ᓂᐯᐦᐁᐤ ᒫᑲ ᐅᐦᒋᑲᐧᓂᕽ, ᐁᑲᐧ ᑭ ᓇᑐᒣᐤ ᐯᔭᐠ ᓈᐯᐊᐧ, ᐁᑯᓯ ᑭ ᑳᐢᑭᐹᑕᒣᐧᐤ ᐊᓂᐦᐃ ᑌᐸᑯᑊ ᐅᑕᐦᑖᐧᔨᐢᑳᐧᓂᔨᐊᐧ ᐅᐢᑎᑳᐧᓂᔨᕽ; ᐁᑲᐧ ᑭ ᐊᑎ ᒥᑯᐢᑳᒋᐁᐤ, ᐁᑯᓯ ᐅ ᒪᐢᑲᐃᐧᓯᐃᐧᓂᔨᐤ ᑭ ᓇᑲᑎᑯᔨᐊ. 20ᐁᑲᐧ ᑭ ᐃᑌᐤ, ᐱᓬᐃᐢᑎᓇᐠ ᑯᑎᑎᓂᑲᐧᐠ ᓵᒼᓴᐣ. ᑭ ᑯᐢᑯᐢᑳᐤ ᒫᑲ ᐁ ᑭ ᓂᐹᐟ, ᐁᑯᓯ ᑭ ᐃᑌᐧᐤ, ᓂ ᑲ ᐊᐧᔭᐃᐧᐣ ᑖᐱᐢᑯᐨ ᑲᔭᐦᑌ, ᒥᓇ ᓂ ᑲ ᐸᐦᐸᐃᐧᐣ. ᓇᒪᐃᐧᔭ ᒫᑲ ᑭᐢᑫᔨᑕᒼ ᑳ ᑎᐯᔨᐦᒋᑫᔨᐟ ᐁ ᓇᑲᑎᑯᐟ.
21ᐁᑲᐧ ᐱᓬᐃᐢᑎᓇ ᑭ ᐅᑎᑎᓂᐠ, ᒥᓇ ᑭ ᑫᒋᑳᐧᐸᐦᐅᐠ; ᑭ ᐃᑐᑕᐃᐠ ᒫᑲ ᐊᓂᑕ ᑫᓴ, ᐁᑯᓯ ᑭ ᒪᒫᒋᑯᓭᑲᐦᐅᐠ ᐅᓵᐊᐧᐱᐢᑯ ᒪᒫᒋᑳᐧᐱᐢᑲᐦᐃᑲᓇ ᐅᐦᒋ; ᑭ ᐱᓂᐳᒋᑫᐤ ᒫᑲ ᑭᐸᐦᐅᑐᐃᐧᑲᒥᑯᕽ. 22ᒫᑲ ᐁᐧᐢᑕᑲᔭ ᐅᐢᑎᑳᐧᓂᕽ ᑭ ᐊᑎ ᓂᐦᑖᐃᐧᑭᓂᔨᐊᐧ ᒥᓇ ᐊᓂᒪ ᑳ ᑭ ᑳᐢᑭᐹᑎᐦᐟ.
23ᐊᓂᐦᐃ ᒫᑲ ᐱᓬᐃᐢᑎᓇᐠ ᐅᑭᒫᒥᐋᐧᐊᐧ ᑭ ᒫᒪᐃᐧ ᓇᑐᒥᑲᐧᐠ ᐁ ᐃᐧ ᐸᑭᑎᓇᒪᐋᐧᒋᐠ ᑭᐦᒋ ᐸᑭᑎᓈᓱᐃᐧᐣ ᑌᑲᓇ ᐅ ᒪᓂᑐᒥᐋᐧᐊᐧ, ᒥᓇ ᑭᑕ ᒥᔭᐋᐧᑕᐦᑭᐠ; ᒋᑫᒫ ᑭ ᐃᑌᐧᐊᐧᐠ, ᑭ ᒪᓂᑐᒥᓇᐤ ᑭ ᐸᑭᑎᓀᐤ ᓵᒼᓴᓇ ᑭ ᓄᑎᓈᑲᓂᓇᐊᐧ ᑭᒋᐦᒋᓈᕽ. 24ᐃᐢᐱ ᒫᑲ ᐊᔨᓯᔨᓂᐊᐧᐠ ᐃᐧᔮᐸᒫᒋᐠ ᑭ ᒪᒥᐦᒋᒣᐊᐧᐠ ᐅ ᒪᓂᑐᒥᐋᐧᐊᐧ; ᒋᑫᒫ ᑭ ᐃᑌᐧᐊᐧᐠ, ᑭ ᒪᓂᑐᒥᓇᐤ ᑭ ᐸᑭᑎᓀᐤ ᑭᒋᐦᒋᓈᕽ ᑭ ᓄᑎᓈᑲᓂᓇᐊᐧ, ᒥᓇ ᐊᓂᐦᐃ ᑳ ᑭ ᓂᓯᐊᐧᓈᒋᐦᑖᔨᐟ ᑭᐟ ᐊᐢᑭᓇᐤ, ᒥᓇ ᒥᐦᒉᐟ ᑳ ᑭ ᓂᐸᐦᐃᑯᔭᕽ. 25ᑭ ᐊᔨᑭᐣ ᒫᑲ ᒣᑳᐧᐨ ᐁ ᒥᔭᐋᐧᑕᐦᑭᐠ, ᑭ ᐃᑌᐧᐊᐧᐠ, ᓇᑐᒥᕽ ᓵᒼᓴᐣ ᑭᑕ ᒣᑕᐋᐧᑳᑖᔭᕽ. ᑭ ᓇᑐᒣᐊᐧᐠ ᒫᑲ ᓵᒼᓴᓇ ᑭᐸᐦᐅᑐᐃᐧᑲᒥᑯᕽ ᐅᐦᒋ; ᐁᑯᓯ ᑭ ᒣᑕᐋᐧᑳᑌᐊᐧᐠ. ᑭ ᓂᐸᐃᐧᐦᐁᐊᐧᐠ ᒫᑲ ᑕᐢᑕᐃᐧᐨ ᒋᒪᒋᑲᓇ. 26ᓵᒼᓴᐣ ᒫᑲ ᑭ ᐃᑌᐤ ᐊᓂᐦᐃ ᐅᐢᑭᓂᑭᓴ ᑳ ᓴᑭᓂᐢᑫᓂᑯᐟ, ᑭᔮᒼ ᓂ ᑲ ᒥᐢᑯᓈᐊᐧᐠ ᒋᒪᒋᑲᓇᐠ ᑳ ᓯᑐᓂᑫᒋᐠ ᐅᒪ ᐋᐧᐢᑳᐦᐃᑲᐣ, ᑭᑕ ᑭ ᐋᐢᐸᒋᔮᐣ. 27ᐊᓂᒪ ᒫᑲ ᐋᐧᐢᑳᐦᐃᑲᐣ ᑭ ᒧᐢᑭᓀᐤ ᓈᐯᐊᐧᐠ ᒥᓇ ᐃᐢᑫᐧᐊᐧᐠ; ᐁᑯᓯ ᑲᐦᑭᔭᐤ ᐱᓬᐃᐢᑎᐣ ᐅᑭᒫᐊᐧᐠ ᐁᑯᑕ ᑭ ᐊᔮᐊᐧᐠ; ᒥᓇ ᑕᐦᑯᐨ ᐋᐧᐢᑳᐦᐃᑲᓂᕽ ᑭ ᐊᔮᐊᐧᐠ ᓈᐣᑕᐤ ᓂᐢᑖᐧᐤ ᑭᐦᒋᒥᑖᐦᑐᒥᑕᓇᐤ ᓈᐯᐊᐧᐠ ᒥᓇ ᐃᐢᑫᐧᐊᐧᐠ ᐁ ᑭᑖᐸᑫᒋᐠ ᓵᒼᓴᓇ ᐁ ᒣᑕᐋᐧᑳᑎᒥᐦᐟ.
28ᐁᑲᐧ ᓵᒼᓴᐣ ᑭ ᒪᐃᐧᒧᐢᑕᐁᐧᐤ ᑳ ᑎᐯᔨᐦᒋᑫᔨᐟ, ᒥᓇ ᑭ ᐃᑌᐧᐤ, ᑌᐯᔨᐦᒋᑫᔭᐣ ᑭᓭᒪᓂᑐ, ᑭᐢᑭᓯᑐᑕᐃᐧᐣ ᑭ ᐸᑯᓭᔨᒥᑎᐣ, ᒥᓇ ᒪᐢᑲᐃᐧᓯᐃᐣ, ᑭ ᐸᑯᓭᔨᒥᑎᐣ, ᐅᒪ ᐱᑯ ᐯᔭᑳᐧᐤ, ᑭᓭᒪᓂᑐ, ᐊᔭᐃᐧᐢ ᑭᑕ ᐋᐯᐅᔮᐣ ᐱᓬᐃᐢᑎᓇᐠ ᑳ ᑭ ᑐᑕᐦᑭᐠ ᐁ ᓂᓯᑭ ᓂᐢᑭᓯᑲᐧ. 29ᓵᒼᓴᐣ ᒫᑲ ᑭ ᐅᑎᐦᑎᓀᐤ ᐊᓂᐦᐃ ᓂᓱ ᑖᐊᐧᔨᕽ ᒋᒪᒋᑲᓇ ᑳ ᓯᑐᓂᑫᒋᐠ ᐊᓂᒪ ᐋᐧᐢᑳᐦᐃᑲᐣ, ᒥᓇ ᑭ ᐋᐢᐸᒋᐤ, ᐯᔭᐠ ᐅᑭᐦᒋᓂᐢᐠ ᐅᐦᒋ ᒥᓇ ᐊᓂᒪ ᑯᑕᐠ ᐅ ᓇᒪᑎᓂᕽ ᐅᐦᒋ. 30ᓵᒼᓴᐣ ᒫᑲ ᑭ ᐃᑌᐧᐤ, ᑭᔮᒼ ᓂᐢᑕ ᓂ ᑲ ᓂᐱᐣ ᐊᓯᒋ ᐱᓬᐃᐢᑎᓇᐠ. ᑭ ᐃᐧᐦᑯ ᒫᑲ ᒥᓯᐁᐧ ᐁ ᐃᐢᐱᓯᐟ; ᐁᑯᓯ ᐋᐧᐢᑳᐦᐃᑲᐣ ᑭ ᑕᓱᔨᑲᐧᐠ ᐅᑭᒫᐊᐧᐠ, ᒥᓇ ᑲᐦᑭᔭᐤ ᐊᔨᓯᔨᓂᐊᐧᐠ ᐁᑯᑕ ᑳ ᐊᔮᒋᐠ. ᐁᑯᓯ ᑳ ᓂᐱᒋᐠ ᑳ ᑭ ᓂᐸᐦᐋᐟ ᐃᑕ ᐃᐧᐢᑕ ᐁ ᓂᐱᐟ ᓇᐊᐧᐨ ᑭ ᒥᐦᒉᑎᔨᐊᐧ ᐃᔨᑯᕽ ᐊᓂᐦᐃ ᑳ ᑭ ᓂᐸᐦᐋᐟ ᒣᑳᐧᐨ ᐁ ᐱᒫᑎᓯᐟ. 31ᐁᑲᐧ ᐅᒋᐋᐧᒪ ᒥᓇ ᑲᐦᑭᔭᐤ ᐅ ᐋᐧᐢᑳᐦᐃᑲᓂᔨᕽ ᐅᑖᐃᐧᔭ ᑭ ᐯ ᐃᑐᐦᑌᔨᐊᐧ, ᒥᓇ ᑭ ᐅᑎᓂᐠ, ᒥᓇ ᑭ ᐯᓯᐠ ᐁᑯᓯ ᑭ ᓇᐦᐃᓂᐠ ᑕᐢᑕᐋᐧᔨᕽ ᓵᕒᐊ ᒥᓇ ᐁᐢᑌᐊᓬ ᐃᑕ ᐁ ᑭ ᓇᐦᐃᓂᑐᐃᐧᓂᑫᔨᐟ ᒫᓄᐊᐊᐧ ᐅᑖᐃᐧᔭ. ᑭ ᐅᔭᓱᐋᐧᑌᐤ ᒫᑲ ᐃᐢᕒᐁᐃᓬᐊ ᓂᓯᑕᓇᐤ ᑕᐦᑐ ᐊᐢᑭ.
Currently Selected:
ᐅᔭᓱᐁᐧᐊᐧᐠ 16: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
