ᐅᔭᓱᐁᐧᐊᐧᐠ 13
13
1ᒥᓇ ᒫᑲ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭ ᐃᑐᑕᒪᐧᐠ ᐊᓂᒪ ᑳ ᒫᔮᑕᓂᔨᐠ ᐁ ᐃᑖᐱᓯᒥᑯᐟ ᑳ ᑎᐯᔨᐦᒋᑫᐟ; ᐁᑯᓯ ᑳ ᑎᐯᔨᐦᒋᑫᐟ ᑭ ᐸᑭᑎᓀᐤ ᐅᒋᐦᒋᔨᕽ ᐱᓬᐃᐢᑎᓇ ᓀᒥᑕᓇᐤ ᑕᐦᑐ ᐊᐢᑭ.
2ᑭ ᐃᐦᑖᐤ ᒫᑲ ᐯᔭᐠ ᓈᐯᐤ ᓵᕒᐊ ᐅᐦᒋ, ᑖᓇᐃᑕ ᐁ ᐃᓯ ᐋᐧᑯᑕᕽ, ᒫᓄᐊ ᐁ ᐃᓯᔨᐦᑳᓱᐟ; ᐊᓂᐦᐃ ᒫᑲ ᐃᐧᐊᐧ ᓇᒪᐃᐧᔭ ᑭ ᐊᔮᐁᐧᔨᐊᐧ ᐊᐋᐧᓯᓴ ᐁᑯᓯ ᓇᒪᐃᐧᔭ ᑭ ᐅᐟ ᐊᐋᐧᓯᒥᓯᐤ. 3ᑳ ᑎᐯᔨᐦᒋᑫᐟ ᒫᑲ ᐅᑭᓯᑯᒪ ᑭ ᓄᑯᐦᐃᓱᐢᑖᐠ ᐊᓇ ᐃᐢᑫᐧᐤ, ᐁᑯᓯ ᑭ ᐃᑎᐠ, ᒫᑎᑲ ᐁᑲᐧ, ᓇᒪᐃᐧᔭ ᑭᐟ ᐊᔮᐋᐧᐤ ᐊᐋᐧᓯᐢ, ᒥᓇ ᓇᒪᐃᐧᔭ ᑭ ᓂᐦᑖᐃᐧᑭᐦᐋᐊᐧᓱᐣ; ᒫᑲ ᑭ ᑲ ᐊᔮᐋᐧᐤ ᐊᐋᐧᓯᐢ ᒥᓇ ᑭ ᑲ ᓂᐦᑖᐃᐧᑭᐦᐋᐤ ᑭᑕ ᐅᑯᓯᓯᔭᐣ. 4ᐁᑲᐧ ᒫᑲ ᒣᔭᑳᐧᒼ ᑳ ᐃᓯ ᓇᑕᐁᐧᔨᒥᑖᐣ, ᐁᑳᐃᐧᔭ ᒥᓂᐦᑫᐧ ᓱᒥᓈᐳ ᐊᐦᐳ ᑳ ᒪᐢᑲᐋᐧᐠ ᒥᓂᐦᑫᐧᐃᐧᐣ, ᒥᓇ ᐁᑳᐃᐧᔭ ᒥᒋ ᑫᑲᐧᐩ ᐁᑳ ᐁ ᐯᑲᕽ; 5#ᓇᒼᐸᕒᐢ 6:1-5ᒋᑫᒫ, ᒫᑎᑲ, ᑭ ᑲ ᐊᔮᐋᐧᐤ ᐊᐋᐧᓯᐢ ᒥᓇ ᑭ ᑲ ᓂᐦᑖᐃᐧᑭᐋᐤ ᑫ ᐅᑯᓯᓯᔭᐣ; ᓇᒪᐃᐧᔭ ᒫᑲ ᐃᐧᑳᐨ ᑭᑕ ᑳᐢᑭᐹᑕᒫᐧᐣ ᐅᐢᑎᑳᐧᐣ; ᒋᑫᒫ ᐊᓇ ᐊᐋᐧᓯᐢ ᓈᓯᕒᐊᐃᐟ ᑭᑕ ᐃᑕᑭᒫᐤ ᑭᓭᒪᓂᑐᕽ ᐃᓯ ᒥᒋᒫᐨ ᐁ ᓄᑯᓯᐟ ᐅᐦᒋ; ᐁᑯᓯ ᑭᑕ ᒫᒋ ᐸᐢᐱᐦᐁᐤ ᐃᐢᕒᐁᐃᓬᐊ ᐅᒋᐦᒋᔨᕽ ᐅᐦᒋ ᐊᓂᐦᐃ ᐱᓬᐃᐢᑎᓇ.
6ᐁᑲᐧ ᐊᓇ ᐃᐢᑫᐧᐤ ᑭ ᐯ ᓇᑕᐃᐧ ᐃᐧᐦᑕᒪᐁᐧᐤ ᐅᓈᐯᒪ, ᐁ ᐃᑌᐧᐟ, ᑭᓭᒪᓂᑐ ᐅᐟ ᐊᔨᓯᔨᓂᒪ ᓂ ᑭ ᐯ ᐅᑎᐦᑎᐠ, ᐁᑯᓯ ᐅᐦᑳᐧᑲᓂᕽ ᑭ ᐃᓯᓈᑯᓯᐤ ᑖᐱᐢᑯᐨ ᐅᐦᑳᐧᑲᐣ ᑭᓭᒪᓂᑐ ᐅᑭᓯᑯᒪ, ᒥᑐᓂ ᐁ ᑯᐢᑖᓯᓈᑯᓯᐟ; ᓇᒪᐃᐧᔭ ᒫᑲ ᓄᐦ ᑲᑫᐧᒋᒫᐤ ᑖᓂᑌ ᐁᐧᐦᒋᐟ, ᐊᐦᐳ ᓇᒪᐃᐧᔭ ᓄᐦ ᐃᐧᐦᑕᒫᐠ ᐅ ᐃᐧᔪᐃᐧᐣ; 7ᒫᑲ ᓂ ᑭ ᐃᑎᐠ, ᒫᑎᑲ, ᑭ ᑲ ᐊᔮᐋᐧᐤ ᐊᐋᐧᓯᐢ, ᒥᓇ ᑭ ᑲ ᓂᐦᑖᐃᐧᑭᐦᐋᐤ ᑫ ᐅᑯᓯᓯᔭᐣ; ᐁᑳᐃᐧᔭ ᒫᑲ ᒥᓂᐦᑫᐧ ᓱᒥᓈᐳ ᐊᐦᐳ ᑳ ᒪᐢᑲᐋᐧᐠ ᒥᓂᑫᐧᐃᐧᐣ, ᒥᓇ ᐁᑳᐃᐧᔭ ᒥᒋ ᑫᑲᐧᐩ ᐁᑳ ᐁ ᐯᑲᕽ; ᒋᑫᒫ ᑭᐟ ᐊᐋᐧᓯᒥᐢ ᑭᑕ ᓈᓯᕒᐊᐃᑎᐃᐧᐤ ᑭᓭᒪᓂᑐᕽ ᐃᓯ ᒥᒋᒫᐨ ᐁ ᓄᑯᓯᐟ ᐅᐦᒋ ᐃᐢᑯ ᐊᓂᒪ ᑭᓯᑳᐤ ᐃᔨᑯᕽ ᑭᑕ ᓂᐱᐟ.
8ᐁᑲᐧ ᒫᓄᐊ ᑭ ᑳᑭᓯᒧᑐᑕᐁᐧᐤ ᑳ ᑎᐯᔨᐦᒋᑫᔨᐟ, ᒥᓇ ᑭ ᐃᑌᐧᐤ, ᑌᐯᔨᐦᒋᑫᔭᐣ, ᑭ ᐸᑯᓭᔨᒥᑎᐣ, ᑭᔮᒼ ᐊᓇ ᑭᓭᒪᓂᑐ ᐅᐟ ᐊᔨᓯᔨᓂᒪ ᑳ ᑭ ᐃᓯᑎᓴᐦᐊᐧᐟ ᒥᓇ ᑭᐦᑖᐧᒼ ᓂ ᑲ ᐯ ᓇᑕᐊᐧᐸᒥᑯᓈᐣ, ᒥᓇ ᓂ ᑲ ᑭᐢᑭᓄᐦᐊᒫᑯᓈᐣ ᑫ ᐃᓯ ᐸᒥᐋᔮᕽ ᐊᓇ ᐊᐋᐧᓯᐢ ᑫ ᓂᐦᑖᐃᐧᑭᐟ. 9ᑭᓭᒪᓂᑐ ᒫᑲ ᑭ ᓇᑐᐦᑕᒣᐧᐤ ᐅᐟ ᐃᑌᐧᐃᐧᓂᔨᐤ ᒫᓄᐊᐊᐧ; ᐊᓇ ᒫᑲ ᑭᓭᒪᓂᑐ ᐅᑭᓯᑯᒪ ᒥᓇ ᑭ ᐅᑎᐦᑌᐤ ᐊᓂᐦᐃ ᐃᐢᑫᐧᐊᐧ ᐁ ᐊᐱᔨᐟ ᑭᐢᑎᑳᓂᕽ; ᒫᑲ ᒫᓄᐊᐊᐧ ᐅ ᓈᐯᒪ ᓇᒪᐃᐧᔭ ᐃᐧᒉᐃᐧᐠ. 10ᐊᓇ ᒫᑲ ᐃᐢᑫᐧᐤ ᑭ ᑲᑫᐧᔮᐦᐅ, ᐁᑯᓯ ᑭ ᐃᐢᐸᑖᐤ, ᒥᓇ ᑭ ᐃᐧᐦᑕᒪᐁᐧᐤ ᐅᓈᐯᒪ, ᐁ ᐃᑖᐟ ᒫᑲ, ᒫᑎᑲ, ᐊᓇ ᓈᐯᐤ ᓂ ᑭ ᓄᑯᓱᐢᑖᐠ ᑳ ᑭ ᐯ ᓇᑕᐋᐸᒥᐟ ᐅᔦ ᐁ ᑲᑭᓯᑳᐠ. 11ᒫᓄᐊ ᒫᑲ ᑭ ᐸᓯᑯ, ᐁᑯᓯ ᑭ ᐱᒥᑎᓴᐁᐧᐤ ᐃᐧᐊᐧ, ᒥᓇ ᑭ ᐅᑎᐦᑌᐤ ᐊᓂᐦᐃ ᓈᐯᐊᐧ, ᐁᑯᓯ ᑭ ᐃᑌᐤ, ᑭᔭ ᒋ ᐊᓇ ᓈᐯᐤ ᑳ ᑭ ᐊᔭᒥᐦᐊᐟ ᐊᐊᐧ ᐃᐢᑫᐧᐤ? ᑭ ᐃᑎᐠ ᒫᑲ, ᓂᔭ ᐁᐊᐧᑯ. 12ᐁᑯᓯ ᒫᓄᐊ ᑭ ᐃᑌᐤ, ᑭᐟ ᐃᑌᐧᐃᐧᓇ ᑭᑕ ᐃᐧ ᑎᐱᐸᔨᐊᐧ; ᑖᓂᓯ ᑫ ᐃᓯ ᐸᒥᐋᔮᕽ ᐊᓇ ᐊᐋᐧᓯᐢ, ᒥᓇ ᑖᓂᓯ ᑫ ᐃᑕᑐᐢᑫᐟ? 13ᐊᓂᐦᐃ ᒫᑲ ᑳ ᑎᐯᔨᐦᒋᑫᐟ ᐅᑭᓯᑯᒪ ᑭ ᐃᑌᐤ ᒫᓄᐊᐊᐧ, ᑲᐦᑭᔭᐤ ᐊᓂᒪ ᑳ ᑭ ᐃᑕᐠ ᐊᓇ ᐃᐢᑫᐧᐤ ᑭᔮᒼ ᑭᑕ ᐊᔮᑳᐧᒥᓯᐢᑕᒼ. 14ᓇᒪᐃᐧᔭ ᑭᑕ ᒥᒋᐤ ᓈᐣᑕᐤ ᑫᑲᐧᐩ ᓱᒥᓈᑎᑯᕽ ᑳ ᐅᐦᒋᐠ, ᐁᑳᐃᐧᔭ ᒥᓇ ᑭᑕ ᒥᓂᐦᑫᐧᐤ ᓱᒥᓈᐳ ᐊᐦᐳ ᑳ ᒪᐢᑲᐋᐧᐠ ᒥᓂᐦᑫᐧᐃᐧᐣ, ᐊᐦᐳ ᐁᑳᐃᐧᔭ ᑭᑕ ᒥᒋᐤ ᑫᑲᐧᐩ ᐁᑳ ᐁ ᐯᑲᓂᔨᐠ; ᑲᐦᑭᔭᐤ ᑳ ᑭ ᐃᑕᓱᐋᐧᑕᐠ ᑭᑕ ᓈᑲᑌᔨᑕᒼ.
15ᒫᓄᐊ ᒫᑲ ᑭ ᐃᑌᐤ ᐊᓂᐦᐃ ᐅᑭᓯᑯᒥᔨᐊᐧ ᑳ ᑎᐯᔨᐦᒋᑫᔨᐟ, ᑭ ᐸᑯᓭᔨᒥᑎᐣ ᑭᔮᒼ ᑭ ᑲ ᑭᑎᓂᑎᓈᐣ ᑭᑕ ᑲᐧᔮᒋᑕᒫᑖᕽ ᐋᐧᐸᑎᑯᓯᐢ. 16ᐊᓂᐦᐃ ᒫᑲ ᐅᑭᓯᑯᒪ ᑳ ᑎᐯᔨᐦᒋᑫᔨᐟ ᑭ ᐃᑌᐤ ᒫᓄᐊᐊᐧ, ᐋᑕ ᑭᑎᓂᔭᓂ ᓇᒪᐃᐧᔭ ᓂ ᑲ ᒧᐋᐧᐤ ᑭ ᐸᐦᑫᐧᓯᑲᓂᒼ; ᒥᓇ ᑭᐢᐱᐣ ᑲᐧᔮᒋᐦᑖᔭᓂ ᒪᒍᐢᑌᐦᐊᒫᑫᐃᐧᐣ ᑳ ᑎᐯᔨᐦᒋᑫᐟ ᐱᑯ ᑭᑕ ᐸᑭᑎᓇᒪᐊᐧᐟ, ᒋᑫᒫ ᒫᓄᐊ ᓇᒪᐃᐧᔭ ᑭᐢᑫᔨᑕᒼ ᐁᐊᐧᑯᓂ ᑳ ᑎᐯᔨᐦᒋᑫᐟ ᐅᑭᓯᑯᒪ. 17ᒫᓄᐊ ᒫᑲ ᑭ ᐃᑌᐤ ᐊᓂᐦᐃ ᑳ ᑎᐯᔨᐦᒋᑫᐟ ᐅᑭᓯᑯᒥᔨᐊᐧ, ᑖᓂᓯ ᐁᓯᔨᑳᓱᔭᐣ, ᑭᑕ ᑭᐢᑕᑭᒥᑖᕽ ᐃᐢᐱ ᐅᐦᐃ ᑭᐟ ᐃᑌᐧᐃᐧᓇ ᑎᐱᐸᔨᑳᐧᐃᐧ? 18ᐊᓂᐦᐃ ᒫᑲ ᑳ ᑎᐯᔨᐦᒋᑫᐟ ᐅᑭᓯᑯᒪ ᑭ ᐃᑎᐠ, ᑖᓀᐦᑭ ᑳ ᑲᑫᐧᒋᑫᒧᔭᐣ ᓂ ᐃᐧᔪᐃᐧᐣ, ᐃᐧᔭ ᐁ ᐊᐧᓂᒧᑕᕽ? 19ᐁᑯᓯ ᒫᑲ ᒫᓄᐊ ᑭ ᐅᑎᓀᐤ ᐊᓂᐦᐃ ᐋᐧᐸᑎᑯᓯᓴ ᐊᓯᒋ ᐸᐦᑫᐧᓯᑲᓂ ᐸᑭᑎᓈᓱᐃᐧᐣ, ᑭ ᐸᑭᑎᓇᒪᐁᐧᐤ ᒫᑲ ᑳ ᑎᐯᔨᐦᒋᑫᔨᐟ ᐁᑯᑕ ᐊᓂᒪ ᑭᐢᑖᐱᐢᑳᕽ: ᐊᓇ ᒫᑲ ᐅᑭᓯᑯ ᒫᒪᐢᑳᐨ ᑭ ᐃᓯᐦᒋᑫᐤ, ᒫᓄᐊ ᒫᑲ ᒥᓇ ᐃᐧᐊᐧ ᑭ ᑲᓇᐋᐧᐸᒣᐊᐧᐠ. 20ᒋᑫᒫ ᑭ ᐊᔨᑭᐣ, ᐃᐢᐱ ᑳᐧᑯᑌᐤ ᐁᑎ ᐃᐢᐹᑫᐸᔨᐠ ᐸᑭᑎᓈᓱᐃᐧᓈᐱᐢᑯᕽ ᐅᐦᒋ, ᐊᓇ ᑳ ᑎᐯᔨᐦᒋᑫᐟ ᐅᑭᓯᑯᒪ ᑭ ᐃᐢᐸᑫᐸᔨᐤ ᑳᐧᑯᑎᕽ ᐸᑭᑎᓈᓱᐃᐧᓈᐱᐢᑯᕽ ᐅᐦᒋ; ᒫᓄᐊ ᒫᑲ ᒥᓇ ᐃᐧᐊᐧ ᑭ ᑲᓇᐋᐧᐸᒣᐊᐧᐠ; ᐁᑯᓯ ᒧᐦᒋᕽ ᑭ ᐃᑎᐢᑫᐧᐸᔨᐦᐅᐊᐧᐠ.
21ᒫᑲ ᐅᑭᓯᑯᒪ ᑳ ᑎᐯᔨᐦᒋᑫᐟ ᓇᒪᐃᐧᔭ ᒥᓇ ᑭᐦᑖᐧᒼ ᑭ ᓄᑯᐦᐃᓱᐢᑕᐁᐧᐤ ᒫᓄᐊᐊᐧ ᐊᐦᐳ ᐃᐧᐃᐧᔨᐊᐧ. ᐁᑲᐧ ᒫᓄᐊ ᑭ ᑭᐢᑫᔨᑕᒼ ᐁᐊᐧᑯᓂ ᑳ ᑎᐯᔨᐦᒋᑫᐟ ᐅᑭᓯᑯᒪ. 22ᒫᓄᐊ ᒫᑲ ᑭ ᐃᑌᐤ ᐃᐧᐊᐧ, ᑫᐦᒋᓈ ᑭ ᑲ ᓂᐱᓈᓇᐤ ᐃᐧᔭ ᐁ ᑭ ᐋᐧᐸᒫᔭᕽ ᒪᓂᑐ. 23ᒫᑲ ᐃᐧᐊᐧ ᑭ ᐃᑎᐠ, ᑭᐢᐱᐣ ᑳ ᑎᐯᔨᐦᒋᑫᐟ ᑭ ᐃᑌᔨᑕᕽ ᑭᑕ ᓂᐸᐦᐃᑯᔭᕽ, ᓇᒪᐃᐧᔭ ᐅ ᑲ ᐃᑌᔨᑌᐦ ᑭᑕ ᐅᑎᓇᕽ ᒪᒍᐢᑌᐦᐊᒫᑯᐃᐧᐣ ᒥᓇ ᐸᐦᑫᐧᓯᑲᓂ ᐸᑭᑎᓈᓱᐃᐧᐣ ᑭᒋᐦᒋᓈᕽ ᐅᐦᒋ, ᓇᒪᐃᐧᔭ ᒥᓇ ᑭ ᑲ ᑭ ᐋᐧᐸᐦᑕᐦᐃᑯᑖᓇᐤ ᑲᐦᑭᔭᐤ ᐅᐦᐃ, ᐊᐦᐳ ᓇᒪᐃᐧᔭ ᐅᒪ ᑳ ᐃᑭᕽ ᑭ ᑲ ᑭ ᐃᐧᐦᑕᒫᑯᑖᓇᐤ ᐁᑯᑐᐊᐧ ᑖᐱᐢᑯᐨ ᐅᐦᐃ.
24ᐊᓇ ᒫᑲ ᐃᐢᑫᐧᐤ ᑭ ᓂᐦᑖᐃᐧᑭᐦᐁᐤ ᐅᑯᓯᓴ, ᐁᑯᓯ ᓵᒼᓴᐣ ᑭ ᐃᓯᔨᐦᑳᑌᐤ; ᐊᓇ ᒫᑲ ᐊᐋᐧᓯᐢ ᑭ ᐅᐦᐱᑭᐤ, ᒥᓇ ᑳ ᑎᐯᔨᐦᒋᑫᔨᐟ ᑭ ᓴᐁᐧᔨᒥᐠ. 25ᐅᐟ ᐊᐦᒑᐦᑯᔨᐊᐧ ᒫᑲ ᑳ ᑎᐯᔨᐦᒋᑫᔨᐟ ᑭ ᒫᒋ ᐊᐧᐢᑲᐃᐧᐢᑳᐠ ᐊᓂᑕ ᐅ ᑲᐯᓯᐃᐧᓂᔨᕽ ᑖᐣ, ᑕᐢᑕᐊᐧᔨᕽ ᓵᕒᐊ ᒥᓇ ᐁᐢᑌᐊᓬ.
Currently Selected:
ᐅᔭᓱᐁᐧᐊᐧᐠ 13: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
