ᐁᐠᓴᑕᐢ 36
36
1ᐯᓴᓬᐃᓬ ᒫᑲ ᒥᓇ ᐊᐦᐋᓬᐃᔮᑊ ᑭᑕ ᐊᑐᐢᑫᐊᐧᐠ, ᒥᓇ ᑲᐦᑭᔭᐤ ᐊᔨᓯᔨᓂᐤ ᑳ ᐃᔨᓂᓯᐃᐧ ᑌᐦᐁᐟ, ᑳ ᑎᐯᔨᐦᒋᑫᔨᐟ ᑳ ᑭ ᒥᔨᑯᐟ ᐃᔨᓂᓯᐃᐧᐣ ᒥᓇ ᓂᓯᑐᐦᑕᒧᐃᐧᐣ ᑭᑕ ᑭᐢᑫᔨᑕᕽ ᑖᓂᓯ ᑭᑕ ᐃᓯᑖᐟ ᑲᐦᑭᔭᐤ ᐊᓂᒪ ᐊᑐᐢᑫᐃᐧᐣ ᑭᑕ ᐃᓯ ᐋᐸᑕᕽ ᑲᓈᒋᑲᒥᑯᕽ, ᑖᐱᐢᑯᐨ ᑲᐦᑭᔭᐤ ᐊᓂᒪ ᑳ ᑎᐯᔨᐦᒋᑫᐟ ᑳ ᑭ ᐃᑕᓱᐁᐧᐟ.
2ᒧᓯᐢ ᒫᑲ ᑭ ᓇᑐᒣᐤ ᐯᓴᓬᐃᓬ ᒥᓇ ᐊᐦᐋᓬᐃᔮᑊ, ᒥᓇ ᑕᐦᑐ ᑳ ᐃᔨᓂᓯᐃᐧᑌᐦᐁᔨᐟ ᐊᔨᓯᔨᓂᐊᐧ, ᐅᑌᐦᐃᔨᕽ ᑳ ᑎᐯᔨᐦᒋᑫᐟ ᑳ ᑭ ᐊᐢᑖᐋᐧᐟ ᐃᔨᓂᓯᐃᐧᐣ, ᑲᐦᑭᔭᐤ ᐊᐃᐧᔭᐠ ᐅᑎ ᐅᑌᐦ ᑳ ᓯᑭᐢᑳᑯᐟ ᑭᑕ ᐯ ᓈᑕᕽ ᐊᓂᒪ ᐊᑐᐢᑫᐃᐧᐣ ᑭᑕ ᐃᐦᑐᑕᕽ. 3ᑭ ᒥᔨᑲᐧᐠ ᒫᑲ ᒧᓯᓴ ᑲᐦᑭᔭᐤ ᐊᓂᒪ ᐸᑭᑎᓈᓱᐃᐧᐣ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑳ ᑭ ᐯᑖᔨᐟ ᑭᑕ ᐅᓯᐦᒋᑳᑌᐠ ᐊᓂᒪ ᑫ ᐋᐸᑕᕽ ᑲᓈᒋᑲᒥᑯᕽ, ᒥᓇ ᑭᑕ ᐅᓯᐦᒋᑳᑌᐠ ᐁᐊᐧᑯ. ᑫᔮᐱᐨ ᒫᑲ ᑭ ᐯ ᒥᔮᐋᐧᐠ ᑌᐯᔨᒧᐃᐧ ᐸᑭᑎᓇᓱᐃᐧᓇ ᑕᐦᑐ ᑫᑭᓭᐹᔮᐤ. 4ᑲᐦᑭᔭᐤ ᒫᑲ ᐊᓂᑭ ᑳ ᐃᔨᓂᓯᒋᐠ ᐊᔨᓯᔨᓂᐊᐧᐠ ᑳ ᐊᑐᐢᑳᑕᐦᑭᐠ ᐊᓂᒪ ᐊᑐᐢᑫᐃᐧᐣ ᑲᓈᒋᑲᒥᑯᕽ, ᑭ ᐯ ᐃᑐᐦᑌᐊᐧᐠ ᑲᐦᑭᔭᐤ ᓈᐯᐤ ᐅᐟ ᐊᑐᐢᑫᐃᐧᓂᕽ ᐅᐦᒋ ᑳ ᐊᑐᐢᑳᑕᐦᑭᐠ.
5ᑭ ᑭᑐᑌᐊᐧᐠ ᒫᑲ ᒧᓯᓴ ᐁ ᐃᑌᐧᒋᐠ, ᐊᔨᓯᔨᓂᐊᐧᐠ ᐯᑖᐊᐧᐠ ᒥᐢᑕᐦᐃ ᐊᐊᐧᓯᒣ ᐃᔨᑯᕽ ᐊᓂᒪ ᑳ ᓇᑕᐁᐧᔨᑖᑲᐧᕽ ᐊᑐᐢᑫᐃᐧᐣ ᐅᐦᒋ ᐊᓂᒪ ᑳ ᑎᐯᔨᐦᒋᑫᐟ ᑳ ᑭ ᐃᑕᓱᐁᐧᐟ ᑭᑕ ᐅᓯᐦᒋᑳᑌᐠ. 6ᒧᓯᐢ ᒫᑲ ᑭ ᐃᑕᓱᐁᐧᐤ, ᐁᑯᓯ ᑭ ᑌᐹᐧᒋᑳᑌᐤ ᒥᓯᐁᐧ ᑲᐯᓯᐃᐧᓂᕽ, ᐁ ᐃᑌᐧᕽ, ᐁᑳᐃᐧᔭ ᐊᐃᐧᔭᐠ ᓈᐯᐤ ᐊᐦᐳ ᐃᐢᑫᐧᐤ ᐊᐊᐧᓯᒣ ᑭᑕ ᐅᓯᐦᑖᐤ ᓈᐣᑕᐤ ᑫᑲᐧᐩ ᑭᑕ ᐸᑭᑎᓈᓱᕽ ᑲᓈᒋᑲᒥᐠ ᐅᐦᒋ. ᐁᑯᓯ ᒫᑲ ᐊᔨᓯᔨᓂᐊᐧᐠ ᑭ ᐳᓂ ᐯᑖᐊᐧᐠ. 7ᒋᑫᒫ ᐊᓂᒪ ᐃᔨᑯᕽ ᑳ ᐊᔮᒋᐠ ᐁᑯᔨᑯᕽ ᑭ ᑌᐱᐸᔨᐤ ᑲᐦᑭᔭᐤ ᑳ ᐊᑐᐢᑲᐦᐃᐦᒋᐠ ᑭᑕ ᐅᓯᐦᑖᒋᐠ, ᒥᓇ ᐊᐦᐳ ᐊᔨᐋᐧᐠ.
8ᑕᐦᑐ ᒫᑲ ᑳ ᐃᔨᓂᓯᐃᐧᑌᐦᐁᐟ ᐊᔨᓯᔨᓂᐤ ᐁ ᐃᐦᑕᓯᒋᐠ ᑳ ᐊᑐᐢᑳᑕᕽ ᐊᑐᐢᑫᐃᐧᐣ ᑳ ᐅᓯᐦᑖᒋᐠ ᐊᓂᒪ ᒥᑭᐋᐧᑊ ᑭ ᐅᓯᐦᑖᐊᐧᐠ ᒥᑖᑕᐦᐟ ᐋᑯᔦᑲᐦᐃᑲᓇ; ᐁ ᒥᔪᒋᑳᑌᐠ ᐋᐧᐱᐢᑫᑭᐣ, ᒥᓇ ᒋᐯᑕᑫᐧᑭᐣ, ᒥᓇ ᒋᐯᑕᑯᒥᐦᑫᐧᑭᐣ, ᒥᓇ ᐸᑲᐢᑭᒥᐦᑫᐧᑭᐣ, ᐊᓯᒋ ᒉᕒᐊᐱᒼ ᐅᐟ ᐊᑐᐢᑫᐃᐧᐣ ᑳ ᑲᑫᐦᑖᐊᐧᑐᐢᑫᐟ ᑭ ᐃᓯᑖᐤ. 9ᐁ ᐋᐃᐢᑳᐧᑭ ᐅᐦᐃ ᐋᑯᔦᑲᐦᐃᑲᓇ ᓂᓯᑕᓇᐤ ᐊᔨᓈᓀᐤ ᐊᔨᐋᐧᐠ ᑯᐱᑕ, ᐁᑯᓯ ᐁ ᐃᐢᐱᑕᔭᑲᐢᑳᐠ ᐯᔭᐠ ᐋᑯᔦᑲᐦᐃᑲᐣ ᓀᐤ ᑯᐱᑕ; ᑲᐦᑭᔭᐤ ᐊᓂᐦᐃ ᐋᑯᔦᑲᐦᐃᑲᓇ ᑖᐱᐢᑯᐨ ᑭ ᐊᔮᐢᐱᑌᑲᓇᐧ. 10ᐁᑯᓯ ᒫᑲ ᑭ ᒫᒪᐃᐧ ᓴᑭᐹᑕᒼ ᓂᔮᓇᐣ ᐋᑯᔦᑲᐦᐃᑲᓇ; ᒥᓇ ᐊᓂᐦᐃ ᑯᑕᑲ ᓂᔮᓇᐣ ᐋᑯᔦᑲᐦᐃᑲᓇ ᑭ ᒫᒪᐃᐧ ᓴᑭᐹᑕᒼ. 11ᑭ ᐅᓯᐦᑖᐤ ᒫᑲ ᓇᐳᑳᐧᒋᑲᓇ ᐁ ᒋᐯᑕᑳᐧᑭ ᐁ ᑭᑫᔦᑲᕽ ᐊᓂᒪ ᐯᔭᐠ ᐋᑯᔦᑲᐦᐃᑲᐣ ᑎᑎᐱᐢᑕᐦᐃᑲᓂᕽ ᐃᑕ ᐁ ᓇᐳᐊᔮᑭ; ᐁᑯᓯ ᒥᓇ ᑭ ᐃᓯ ᐅᓯᐦᑖᐤ ᐁ ᑭᑫᔦᑲᓂᔨᐠ ᐊᓂᒫ ᐋᑯᔦᑲᐦᐃᑲᐣ ᐊᐧᔭᐃᐧᑎᒫᔨᕽ ᑳ ᐊᔮᐠ ᑭᐦᑖᐧᒼ ᐁ ᐊᑎ ᓴᑭᐹᑌᑭ. 12ᓂᔮᓇᓄᒥᑕᓇᐤ ᓇᐳᑳᐧᒋᑲᓇ ᑭ ᐅᓯᐦᑖᐤ ᐯᔭᐠ ᐊᓂᒪ ᐋᑯᔦᑲᐦᐃᑲᐣ, ᒥᓇ ᓂᔮᓇᓄᒥᑕᓇᐤ ᓇᐳᑳᐧᒋᑲᓇ ᑭ ᐅᓯᐦᑖᐤ ᐁ ᑭᑫᔭᑲᕽ ᐊᓂᒪ ᐋᑯᔦᑲᐦᐃᑲᐣ ᐊᐢᑯᐦᐨ ᑳ ᐊᑎ ᒫᒪᐃᐧ ᓴᑭᐹᑌᐠ; ᓇᐳᑳᐧᒋᑲᓇ ᑖᑎᐱᐢᑯᐨ ᑭ ᐊᔮᐊᐧ. 13ᑭ ᐅᓯᐦᑖᐤ ᒫᑲ ᓂᔮᓇᓄᒥᑕᓇᐤ ᓴᑭᐹᒋᑲᓇ ᐅᓵᐃᐧᓱᓂᔮᐤ ᐅᐦᒋ, ᐁᑯᓯ ᑭ ᒫᒪᒪᐃᐧ ᓴᑭᐹᑕᒼ ᐋᑯᔦᑲᐦᐃᑲᓇ ᓴᑭᐹᒋᑲᓇ ᐅᐦᒋ; ᐁᑯᓯ ᑭ ᒫᒪᐊᐧᐣ ᐊᓂᒪ ᒥᑭᐋᐧᑊ.
14ᑭ ᐅᓯᐦᑖᐤ ᒥᓇ ᐋᑯᔦᑲᐦᐃᑲᓇ ᐋᐧᐸᑎᑯᐱᐊᐧᔭ ᐅᐦᒋ, ᑭᑕ ᐊᐸᑳᐧᓱᓂᐃᐧᐠ ᒥᑭᐋᐧᐱᕽ; ᒥᑖᑕᐦᐟ ᐯᔭᑯᓵᑊ ᐋᑯᔦᑲᐦᐃᑲᓇ ᑭ ᐅᓯᐦᑖᐤ. 15ᐯᔭᐠ ᐋᑯᔦᑲᐦᐃᑲᐣ ᓂᐢᑐᒥᑕᓇᐤ ᑯᐱᑕ ᑭ ᐃᐢᑳᐧᐤ, ᒥᓇ ᓀᐤ ᑯᐱᑕ ᑭ ᐃᐢᐱᑕᔭᑲᐢᑳᐤ ᐯᔭᐠ ᐋᑯᔦᑲᐦᐃᑲᐣ; ᐊᓂᐦᐃ ᒥᑖᑕᐦᐟ ᐯᔭᑯᓵᑊ ᐋᑯᔦᑲᐦᐃᑲᓇ ᑭ ᐯᔭᑲᐧᐣ ᐁ ᐃᐢᐱᑌᑲᑭ. 16ᐁᑯᓯ ᓂᔮᓇᐣ ᐋᑯᔦᑲᐦᐃᑲᓇ ᐱᐢᑭᐢ ᑭ ᒫᒪᐃᐧ ᓴᑭᐹᑕᒼ ᒥᓇ ᐊᓂᐦᐃ ᓂᑯᑖᐧᓯᐠ ᐋᑯᔦᑲᐦᐃᑲᓇ ᐱᐢᑭᐢ. 17ᑭ ᐅᓯᐦᑖᐤ ᒫᑲ ᓂᔮᓇᓄᒥᑕᓇᐤ ᓇᐳᑳᐧᒋᑲᓇ ᐁ ᑭᑫᔦᑲᕽ ᐊᓂᒪ ᐋᑯᔦᑲᐦᐃᑲᐣ ᐊᐧᔭᐃᐧᑎᒫᔨᕽ ᑳ ᐊᔮᐠ ᐁ ᒫᒪᐃᐧ ᓴᑭᐸᑌᑭ, ᒥᓇ ᓂᔮᓇᓄᒥᑕᓇᐤ ᓇᐳᑳᐧᒋᑲᓇ ᑭ ᐅᓯᐦᑖᐤ ᐁ ᑭᑫᔦᑲᕽ ᐊᓂᒪ ᐋᑯᔦᑲᐦᐃᑲᐣ ᒫᐊᐧᒋ ᐊᐧᔭᐃᐧᑎᒫᔨᕽ ᑳ ᐊᔮᐠ ᑭᐦᑖᐧᒼ ᑳ ᒫᒪᐃᐧ ᓴᑭᐸᑌᑭ. 18ᑭ ᐅᓯᐦᑖᐤ ᒫᑲ ᓂᔮᓇᓄᒥᑕᓇᐤ ᐅᓵᐋᐧᐱᐢᐠ ᓴᑭᐹᒋᑲᓇ ᑭᑕ ᒫᒪᐃᐧ ᓴᑭᐹᑌᐠ ᒥᑭᐋᐧᑊ, ᑭᑕ ᐯᔭᑲᐧᕽ. 19ᑭ ᐅᓯᐦᑖᐤ ᒫᑲ ᑭᑕ ᐊᐸᑳᐧᑌᐠ ᒥᑭᐋᐧᑊ ᔮᐯᒫᔭᑎᑲᐧᔮᓇᐠ ᐁ ᒥᐦᑲᐧᑎᓱᒋᐠ, ᐁᑯᓯ ᐊᐸᑳᐧᓱᐣ ᐋᐦᑭᑲᐧᔮᓇᐠ ᑕᐦᑯᐨ.
20ᑭ ᐅᓯᐦᑖᐤ ᒫᑲ ᓇᐸᑭᑕᑲᐧ ᑭᑕ ᐋᐸᑕᑭ ᒥᑭᐋᐧᐱᕽ ᐊᑫᓯᔭ ᑐᐋᐧᑎᐠ ᐅᐦᒋ, ᐁ ᒋᒪᑌᑭ. 21ᒥᑖᑕᐦᐟ ᑯᐱᑕ ᑭ ᐃᐢᑳᐧᐤ ᓇᐸᑭᑕᐠ, ᒥᓇ ᐯᔭᐠ ᑯᐱᐟ ᒥᓇ ᐋᐱᑕᐤ ᑭ ᐃᐢᐱᑕᔭᑲᐢᑳᐊᐧ ᑲᐦᑭᔭᐤ ᓇᐸᑭᑕᑲᐧ. 22ᐯᔭᐠ ᓇᐸᑭᑕᐠ ᑭ ᓂᓯᓇᐧ ᑖᐱᐦᒋᒋᑲᓇ ᐁ ᓂᓱᒧᑭ; ᐁᑯᓯ ᐅᒪ ᑭ ᐃᓯᑖᐤ ᑲᐦᑭᔭᐤ ᓇᐸᑭᑕᑲᐧ ᒥᑭᐋᐧᐱᕽ. 23ᑭ ᐅᓯᐦᑖᐤ ᒫᑲ ᓇᐸᑭᑕᑲᐧ ᑫ ᐋᐸᑕᓂᔨᑭ ᒥᑭᐋᐧᐱᕽ; ᓂᓯᑕᓇᐤ ᓇᐸᑭᑕᑲᐧ ᓵᐊᐧᓄᕽ ᐃᑌᐦᑫ. 24ᒥᓇ ᓀᒥᑕᓇᐤ ᑖᐱᑎᑖᑲᓇ ᐊᐧᐱᐢᑭᓱᓂᔮᐤ ᑭᑕ ᐊᐢᐸᐢᑌᑭ ᐊᓂᐦᐃ ᓂᓯᑕᓇᐤ ᓇᐸᑭᑕᑲᐧ; ᓂᓱ ᑖᐱᑎᑖᑲᓇ ᐯᔭᐠ ᓇᐸᑭᑕᐠ ᐃᑕ ᑭᑕ ᑖᐱᑎᑭ ᐁ ᓂᓯᑭ ᑖᐱᐦᒋᒋᑲᓇ, ᒥᓇ ᓂᓱ ᑖᐱᑎᑖᑲᓇ ᑯᑕᐠ ᓇᐸᑭᑕᐠ ᑭᑕ ᑖᐱᑎᑭ ᐁ ᓂᓯᑭ ᑖᐱᐦᒋᒋᑲᓇ. 25ᐁᑯᓯ ᑫᐧᐢᑭ ᐊᓂᒪ ᒥᑭᐋᐧᑊ, ᑭᐁᐧᑎᓄᕽ ᐃᑌᐦᑫ, ᑭ ᐅᓯᐦᑖᐤ ᓂᓯᑕᓇᐤ ᓇᐸᑭᑕᑲᐧ, 26ᐁᑯᓯ ᐁ ᓀᒥᑕᓇᐁᐧᑭ ᑖᐱᑎᑖᑲᓇ ᐋᐧᐱᐢᑭᓱᓂᔮᐤ; ᓂᓱ ᑖᐱᑎᑖᑲᓇ ᐯᔭᐠ ᓇᐸᑭᑕᐠ, ᐁᑯᓯ ᓂᓱ ᑖᐱᑎᑖᑲᓇ ᒥᓇ ᑯᑕᐠ ᓇᐸᑭᑕᐠ. 27ᑭᓯᐹᔨᕽ ᒫᑲ ᒥᑭᐋᐧᐱᕽ, ᓀᑳᐯᐊᓄᕽ ᐃᑌᐦᑫ ᑭ ᐅᓯᐦᑖᐤ ᓂᑯᑖᐧᓯᐠ ᓇᐸᑭᑕᑲᐧ. 28ᓂᓱ ᒫᑲ ᓇᐸᑭᑕᑲᐧ ᑭ ᐅᓯᐦᑖᐤ ᑭᑕ ᐋᐸᑕᑭ ᐊᔨᑕᐤ ᑭᑫᔮᕽ ᒥᑭᐋᐧᐱᕽ ᑭᓯᐸᓄᕽ ᐃᑌᐦᑫ. 29ᑭ ᓇᐸᐧᒧᓇᐧ ᒫᑲ ᑕᐸᓯᐢ ᐁᑯᓯ ᐃᓯ ᒫᑲ ᑭ ᒥᓯᐁᐧᔮᐊ ᐱᔨᐢ ᑕᐦᑯᐨ ᓂᐢᑕᒼ ᓵᐳᑕᐁᐧᔮᐱᐢᐠ ᐃᑕ ᐁ ᐊᔮᐠ; ᐁᑯᓯ ᐅᒪ ᑭ ᐃᑐᑕᒼ ᑖᐱᐢᑯᐨ ᐊᔨᑕᐤ ᐁ ᐃᓯ ᓂᓱ ᑭᑫᔮᐠ. 30ᐊᔨᓈᓀᐤ ᒫᑲ ᑭ ᐃᑕᐦᑎᓇᐧ ᓇᐸᑭᑕᑲᐧ, ᐁᑯᓯ ᐃᑕ ᑭᑕ ᑖᐱᑎᑭ ᐋᐧᐱᐢᑭᓱᓂᔮᐤ ᒥᑖᑕᐦᐟ ᓂᑯᑖᐧᓱᓵᑊ ᑖᐱᑎᑖᑲᓇ; ᓯᐹ ᑲᐦᑭᔭᐤ ᓇᐸᑭᑕᐠ ᓂᓱ ᑖᐱᑎᑖᑲᓇ.
31ᑭ ᐅᓯᐦᑖᐤ ᒫᑲ ᓯᑖᐧᐢᑯᐃᑲᓈᑎᑲᐧ ᐊᑫᓯᔭ ᑐᐋᐧᑎᐠ ᐅᐦᒋ; ᓂᔮᓇᐣ ᑭᑕ ᓯᑐᓇᒧᒪᑲᐦᑭ ᓇᐸᑭᑕᑲᐧ ᓇᐸᑌ ᒥᑭᐋᐧᐱᕽ, 32ᐁᑯᓯ ᓂᔮᓇᐣ ᓯᑖᐧᐢᑯᐃᑲᓈᑎᑲᐧ ᑭᑕ ᓯᑐᓇᒧᒪᑲᐦᑭ ᓇᐸᑭᑕᑲᐧ ᑫᐧᐢᑭ ᐃᑌᐦᑫ ᒥᑭᐋᐧᐱᕽ, ᒥᓇ ᓂᔮᓇᐣ ᓯᑖᐧᐢᑯᐃᑲᓈᑎᑲᐧ ᑭᑕ ᓯᑐᓇᒧᒪᑲᐦᑭ ᓇᐸᑭᑕᑲᐧ ᒥᑭᐋᐧᐱᕽ ᑭᓯᐸᓄᕽ ᓀᑳᐯᐊᓄᕽ ᐃᑌᐦᑫ. 33ᐊᓂᒪ ᒫᑲ ᑖᐊᐧᔨᕽ ᐁ ᐊᔮᐠ ᓯᑖᐧᐢᑯᐃᑲᓈᑎᐠ ᑭ ᐃᓯᑖᐤ ᑭᑕ ᓵᐹᐧᐢᑯᒧᐠ ᐊᐱᑕᐤ ᓇᐸᑭᑕᑯᕽ ᐋᔨᑕᐤ ᑭᑕ ᐅᑎᐦᑕᒧᐠ. 34ᑭ ᐁᐧᐁᐧᑲᒧᐁᐤ ᒫᑲ ᐅᓵᐃᐧᓱᓂᔮᐊᐧ ᓇᐸᑭᑕᑯᕽ, ᒥᓇ ᓵᐳᑕᐁᐧᔮᐱᐢᑲᐧ ᐅᓵᐃᐧᓱᓂᔮᐊᐧ ᑭ ᐋᐸᒋᐁᐤ ᐃᑕ ᑭᑕ ᑖᐸᒧᑭ ᓯᑖᐧᐢᑯᐃᑲᓈᑎᑲᐧ, ᐁᑯᓯ ᓯᑖᐧᐢᑯᐃᑲᓈᑎᑯᕽ ᑭ ᐁᐧᐁᐧᑲᒧᐁᐤ ᐅᓵᐃᐧᓱᓂᔮᐊᐧ.
35ᑭ ᐅᓯᐦᑖᐤ ᒫᑲ ᐋᑯᔦᑲᐦᐃᑲᐣ ᐁ ᐋᐸᒋᐦᑖᐟ ᒋᐯᑕᑫᐧᑭᐣ, ᒥᓇ ᒋᐯᑕᑯᒥᐦᑫᐧᑭᐣ, ᒥᓇ ᐸᑲᐢᑭᒥᐦᑫᐧᑭᐣ, ᒥᓇ ᐁ ᒥᔪᒋᑳᑌᐠ ᐋᐧᐱᐢᑫᑭᐣ; ᐊᓯᒋ ᒉᕒᐊᐱᒼ, ᐅᐟ ᐊᑐᐢᑫᐃᐧᐣ ᑳ ᑲᑫᑖᐊᐧᑐᐢᑫᐟ ᑭ ᐃᓯ ᐅᓯᐦᑖᐤ. 36ᐁᑯᑕ ᒫᑲ ᑭ ᐅᓯᐦᑖᐤ ᓀᐤ ᒋᒪᒋᑲᓇ ᐊᑫᓯᔭ ᑐᐋᐧᑎᐠ ᐅᐦᒋ, ᐁᑯᓯ ᐅᓵᐃᐧᓱᓂᔮᐊᐧ ᐁ ᑭ ᐁᐧᐁᐧᑲᒧᐋᐟ; ᐅᒋᑳᐧᒋᑲᓈᐱᐢᑯᓴ ᒥᓇ ᐅᓵᐃᐧᓱᓂᔮᐤ; ᐁᑯᓯ ᐁᐊᐧᑯᓂ ᐅᐦᒋ ᑭ ᐅᓯᐦᑖᐤ ᑎᑳᐱᐢᑭᓯᑲᓂᕽ ᓀᐤ ᑖᐱᑎᑖᑲᓇ ᐋᐧᐱᐢᑭᓱᓂᔮᐤ.
37ᐁᑯᓯ ᑭ ᐅᓯᐦᑖᐤ ᑭᑕ ᒪᓂ ᐊᑯᑌᐠ ᐁ ᐃᐢᑳᐧᑌᒥᐊᐧᕽ ᒥᑭᐋᐧᑊ, ᐁ ᐋᐸᒋᐦᑖᐟ ᒋᐯᑕᑫᐧᑭᐣ, ᒥᓇ ᒋᐯᑕᑯᒥᐦᑫᐧᑭᐣ, ᒥᓇ ᐸᑲᐢᑭᒥᐦᑫᐧᑭᐣ, ᒥᓇ ᐁ ᒥᔪᒋᑳᑌᐠ ᐋᐧᐱᐢᑫᑭᐣ, ᐅᓯᐦᒋᑫᐃᐧᐣ ᐅᒪᓯᓂᐢᑕᐃᑫᐤ; 38ᒥᓇ ᐊᓂᐦᐃ ᓂᔮᓇᐣ ᒋᒪᒋᑲᓇ ᑭᑭ ᐅᒋᑳᐧᒋᑲᓈᐱᐢᑲᐧ; ᐁᑯᓯ ᐁ ᐅᐢᑎᑳᐧᓂᑳᒋᑳᑌᑭ ᒥᓇ ᐁ ᐋᐧᐢᑳ ᐊᐧᐁᐧᓯᒋᑳᑌᑭ ᑭ ᐁᐧᐁᐧᑲᒧᐁᐤ ᐅᓵᐃᐧᓱᓂᔮᐊᐧ; ᐁᑯᓯ ᐃᐧᔭ ᐁ ᓂᔮᓇᓂᑭ ᑖᐱᑎᑖᑲᓇ ᐅᓵᐋᐧᐱᐢᐠ ᑭ ᐋᐸᒋᐋᐤ.
Currently Selected:
ᐁᐠᓴᑕᐢ 36: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
