ᐁᐠᓴᑕᐢ 35
35
1ᒧᓯᐢ ᒫᑲ ᑭ ᒫᐊᐧᒋᐦᐁᐤ ᑲᐦᑭᔭᐤ ᐁ ᒫᒪᐁᐧᔭᑎᔨᐟ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᐁᑯᓯ ᑭ ᐃᑌᐤ, ᐁᐊᐧᑯᓂ ᐅᐦᐃ ᐃᑌᐧᐃᐧᓇ ᑳ ᑎᐯᔨᐦᒋᑫᐟ ᑳ ᑭ ᐃᑕᓱᐁᐧᐟ ᑭᑕ ᐃᐦᑐᑕᒣᐠ. 2#ᐁᐠᓴᑕᐢ 20:8-11; 23:12; 31:15; 34:21; ᓬᐃᐱᑎᑲᐢ 23:3; ᑎᔪᑕᕒᐊᓇᒥ 5:12-14ᓂᑯᑖᐧᓱᑭᓱᑳᐤ ᐊᑐᐢᑫᐃᐧᐣ ᑭᑕ ᐃᐦᑐᒋᑳᑌᐤ, ᒫᑲ ᑌᐸᑯᑊ ᐁ ᑕᐦᑐᑭᓯᑳᐠ ᐁᑯᑕ ᑭ ᑲ ᑲᓈᒋᑭᓯᑲᓂᑖᓈᐋᐧᐤ, ᐊᔦᐧᐱᐃᐧ ᑭᓯᑳᐤ ᑭᑕ ᐯᔭᑕᑭ ᐊᔦᐧᐱᐢᑕᐋᐧᔦᐠ ᑳ ᑎᐯᔨᐦᒋᑫᐟ; ᐱᑯ ᐊᐃᐧᔭᐠ ᑫ ᐃᑐᑕᒧᑫᐧ ᓈᐣᑕᐤ ᐊᑐᐢᑫᐃᐧᐣ ᐁᑯᑕ ᑭᑕ ᓂᐸᐦᐋᐤ. 3ᓇᒪᐃᐧᔭ ᑭ ᑲ ᑯᑕᐋᐧᓈᐋᐧᐤ ᐁ ᐊᔦᐧᐱᐃᐧᑭᓯᑳᐠ ᓈᐣᑕᐤ ᑭᑭᐊᐧᕽ.
4ᒧᓯᐢ ᒫᑲ ᑭ ᐊᔭᒥᐦᐁᐤ ᑲᐦᑭᔭᐤ ᐁ ᒫᒪᐁᐧᔭᑎᔨᐟ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᐁ ᐃᑌᐧᐟ, ᐁᐊᐧᑯᒪ ᑳ ᑎᐯᔨᐦᒋᑫᐟ ᑳ ᑭ ᐃᑕᓱᐁᐧᐟ ᐁ ᐃᑌᐧᐟ, 5ᐅᑎᓇᒧᐠ ᑭᔭᐋᐧᐤ ᐅᐦᒋ ᐸᑭᑎᓈᓱᐃᐧᐣ ᑭᑕ ᐸᑭᑎᓇᒪᐋᐧᔦᐠ ᑳ ᑎᐯᔨᐦᒋᑫᐟ; ᐱᑯ ᐊᐃᐧᔭᐠ ᐁ ᒋᐦᑫᔨᑕᕽ ᐅᑎᐦᐃᕽ, ᑭᔮᒼ ᑭᑕ ᐯᑖᐤ ᐁᐊᐧᑫᐧᔨᐤ ᐁ ᐸᑭᑎᓇᒪᐋᐧᐟ ᑳ ᑎᐯᔨᐦᒋᑫᔨᐟ; ᐅᓵᐃᐧᓱᓂᔭᐤ, ᒥᓇ ᐋᐧᐱᐢᑭᓱᓂᔮᐤ, ᒥᓇ ᐅᓵᐋᐧᐱᐢᐠ; 6ᒥᓇ ᒋᐯᑕᑫᐧᑭᐣ, ᒥᓇ ᒋᐯᑕᑯᒥᑫᐧᑭᐣ, ᒥᓇ ᐸᑲᐢᑭᒥᑫᐧᑭᐣ, ᒥᓇ ᐁ ᒥᔮᐧᓯᐠ ᐋᐧᐱᐢᑫᑭᐣ, ᒥᓇ ᐋᐧᐸᑎᑯᐱᐊᐧᔭ; 7ᒥᓇ ᔮᐯᒫᔭᑎᑲᐧᔮᓇᐠ ᐁ ᒥᐦᑲᐧᑎᓱᒋᐠ, ᒥᓇ ᐋᐦᑭᑲᐧᔮᓇᐠ, ᒥᓇ ᐋᑫᓯᔭ ᑐᐋᐧᑎᐠ; 8ᒥᓇ ᐱᒥ ᐋᐧᓴᐢᑯᑌᓂᑲᓂᕽ ᑭᑕ ᐋᐸᑕᕽ, ᒥᓇ ᒪᐢᑭᑭᔭ ᑐᒥᓂᑲᓂ ᐱᒥᕽ ᑭᑕ ᐋᐸᑕᕽ ᒥᓇ ᐃᐧᑭᒫᓯᑲᓂᕽ; 9ᒥᓇ ᐋᓂᐠᐢ ᐊᓯᓂᔭᐠ, ᒥᓇ ᐊᓯᓂᔭᐠ ᑭᑕ ᑭᑲᒧᐃᐦᒋᐠ, ᐁᐦᐸᑎᕽ ᒥᓇ ᐋᐧᐢᑭᑲᓈᐱᐢᑯᕽ.
10ᒥᓇ ᑭᔮᒼ ᑲᐦᑭᔭᐤ ᓈᐯᐤ ᑳ ᐃᔨᓂᓯᐃᐧᑌᐦᐁᐟ ᑳ ᐃᐦᑕᓯᔦᐠ ᑭᑕ ᐯ ᐃᑐᐦᑌᐤ ᒥᓇ ᑭᑕ ᐅᓯᐦᑖᐤ ᑲᐦᑭᔭᐤ ᑳ ᑎᐯᔨᐦᒋᑫᐟ ᑳ ᑭ ᐃᑕᓱᐁᐧᐟ. 11ᐊᓂᒪ ᒥᑭᐋᐧᑊ, ᐁ ᐃᓯ ᐊᐸᑳᐧᑌᐠ ᒥᓇ ᐁ ᐃᓯ ᐊᑲᐧᓇᐃᑳᑌᐠ, ᓴᑭᐹᒋᑲᓇ, ᒥᓇ ᓇᐸᑭᑕᑲᐧ, ᒥᓇ ᓯᑖᐧᐢᑯᐃᑲᓈᑎᑲᐧ, ᒥᓇ ᒋᒥᒋᑲᓇ, ᒥᓇ ᑖᐱᑎᑖᑲᓇ; 12ᐊᓂᒪ ᒥᐢᑎᑯᐊᐧᐟ, ᒥᓇ ᐊᐸᓱᔭ ᐁᑯᑕ ᑭᑕ ᐋᐸᑕᑭ, ᑭᓭᐋᐧᑎᓯᐃᐧᓂᐊᐱᐃᐧᐣ, ᒥᓇ ᐋᑯᔦᑲᐦᐃᑲᐣ; 13ᒥᒋᓱᐃᐧᓈᑎᐠ ᒥᓇ ᐊᐸᓱᔭ ᐁᑯᑕ ᑳ ᐋᐸᑕᑭ ᒥᓇ ᑲᐦᑭᔭᐤ ᐊᓯᐊᐧᒋᑲᓇ, ᒥᓇ ᐋᐧᐹᑕᐃᐁᐧᐃᐧ ᐸᐦᑫᐧᓯᑲᐣ. 14ᐋᐧᓴᐢᑯᑌᓂᑲᓈᑎᐠ ᒥᓇ ᑭᑕ ᐋᐧᐢᑌᐠ, ᒥᓇ ᐊᓯᐊᐧᒋᑲᓇ ᐁᑯᑕ ᑳ ᐋᐸᑕᑭ, ᒥᓇ ᐋᐧᓴᐢᑯᑌᓂᑲᓇ, ᒥᓇ ᐱᒥ ᐋᐧᓴᐢᑯᑌᓂᑲᓂᕽ ᑭᑕ ᐋᐸᑕᕽ; 15ᒥᓇ ᐃᐧᑭᒫᓯᑲᓂ ᐸᑭᑎᓈᓱᐃᐧᓈᐱᐢᐠ ᒥᓇ ᐊᐸᓱᔭ ᐁᑯᑕ ᑫ ᐋᐸᑕᑭ, ᒥᓇ ᑐᒥᓂᑲᓂ ᐱᒥ, ᒥᓇ ᐃᐧᑭᒫᓯᑲᐣ, ᒥᓇ ᐊᓂᒪ ᑫ ᐊᑯᑌᐠ ᐃᐢᑳᐧᑌᒥᕽ ᐁ ᐃᐢᑳᐧᑌᒥᐋᐧᕽ ᒥᑭᐋᐧᑊ. 16ᐸᑭᑎᓈᓱᐃᐧᓈᐱᐢᐠ ᐃᑕ ᒪᒍᐢᑌᐦᐊᒫᑫᐃᐧᐣ ᑳ ᐸᑭᑎᓂᑳᑌᐠ, ᑭᑭ ᐊᓂᒪ ᑳ ᐊᔮᐹᐱᐢᑳᐠ ᐅᓵᐋᐧᐱᐢᐠ, ᐊᓯᒋ ᐊᐸᓱᔭ, ᒥᓇ ᑲᐦᑭᔭᐤ ᐊᓯᐊᐧᒋᑲᓇ, ᑳᓯᑫᐧᐃᐧᔭᑲᐣ ᒥᓇ ᐅᐢᑳᑎᑲᒋᑲᐣ. 17ᐊᑯᒋᑲᓇ ᐱᐢᑭᑖᔭᐃᐧᑲᒥᑯᕽ, ᒋᒪᒋᑲᓇ ᐁᑯᑕ ᑭᑕ ᐋᐸᑕᑭ, ᒥᓇ ᑖᐱᑎᑖᑲᓇ, ᒥᓇ ᑳ ᐊᑯᑌᐠ ᐁ ᐃᐢᑳᐧᑌᒥᐊᐧᕽ ᐱᐢᑭᑖᔭᐃᐧᑲᒥᐠ. 18ᒋᐢᑌᑲᐦᐃᑲᓇ ᒥᑭᐋᐧᐱᕽ ᑭᑕ ᐋᐸᑕᑭ, ᒥᓇ ᒋᐢᑌᑲᐦᐃᑲᓇ ᐱᐢᑭᑖᔭᐃᐧᑲᒥᑯᕽ, ᑭᑭ ᑕᐦᑯᐱᒋᑲᓇ. 19ᑳ ᒥᔪᒋᑳᑌᑭ ᑭᑭᐢᑳᒋᑲᓇ, ᑭᑕ ᐋᐸᑕᑭ ᐁ ᐸᒥᑖᓱᕽ ᐃᑕ ᑳ ᑲᓈᑕᕽ, ᐊᓂᐦᐃ ᑲᓈᒋ ᑭᑭᐢᑳᒋᑲᓇ ᐁᕒᐊᐣ ᐊᔭᒥᐦᐁᐃᐧᔨᓂᐤ ᑭᑕ ᑭᑭᐢᑲᕽ, ᒥᓇ ᑭᑭᐢᑳᒋᑲᓇ ᐅᑯᓯᓴ ᑭᑕ ᑭᑭᐢᑲᒥᔨᐟ, ᑭᑕ ᐊᑐᐢᑳᑕᐦᑭᐠ ᐊᔭᒥᐦᐁᐃᐧᔨᓂᐤ ᐅᐟ ᐊᑐᐢᑫᐃᐧᐣ.
20ᑲᐦᑭᔭᐤ ᒫᑲ ᐁ ᒫᒪᐁᐧᔭᑎᒋᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭ ᓯᐯᐧᑌᐊᐧᐠ ᐃᑕ ᐊᓂᒪ ᐅᐦᒋ ᑳ ᑭ ᐋᐧᐸᒥᑯᒋᐠ ᒧᓯᓴ. 21ᐁᑲᐧ ᒫᑲ ᑭ ᐯ ᐃᑐᐦᑎᐊᐧᐠ ᑲᐦᑭᔭᐤ ᐊᐃᐧᔭᐠ ᐅᑌᐦ ᑳ ᓯᑭᐢᑳᑯᐟ ᒥᓇ ᑲᐦᑭᔭᐤ ᐊᐃᐧᔭᐠ ᑳ ᒋᐦᑫᔨᑕᒥᐃᑯᐟ ᐅᐟ ᐊᐦᒑᐦᑲᐧ, ᑭ ᐯᑖᐊᐧᐠ ᑳ ᑎᐯᔨᐦᒋᑫᔨᐟ ᐁ ᐸᑭᑎᓇᒪᐋᐧᒋᐠ, ᑭᑕ ᐋᐸᑕᕽ ᐁ ᐊᑐᐢᑳᑕᒥᕽ ᒫᐊᐧᒋᐦᐃᑐᐃᐧ ᒥᑭᐋᐧᑊ, ᒥᓇ ᑲᐦᑭᔭᐤ ᐁᑯᑕ ᐁ ᐃᓯ ᐋᐸᑕᕽ, ᒥᓇ ᐊᓂᐦᐃ ᑲᓈᒋ ᑭᑭᐢᑳᒋᑲᓇ ᑭᑕ ᐅᓯᐦᒋᑳᑌᑭ. 22ᑭ ᐯ ᐃᑐᐦᑌᐊᐧᐠ ᒫᑲ ᓈᐯᐊᐧᐠ ᒥᓇ ᐃᐢᑫᐧᐊᐧᐠ, ᑕᐦᑐ ᐁ ᒋᐦᑫᔨᑕᐦᑭᐠ ᐅᑎᐦᐃᐋᐧᕽ, ᑭ ᐯᑖᐊᐧᐠ ᒫᑲ ᓴᑳᐢᑯᐅᓇ, ᒥᓇ ᑖᐱᐦᑌᐱᓱᓇ, ᒥᓇ ᐊᑯᐢᑭᐊᐧᓯᑲᓂ ᐊᐦᒐᓂᓴ, ᒥᓇ ᒥᐢᐱᑐᓈᐱᐢᑲᐧ, ᑲᐦᑭᔭᐤ ᐅᓵᐃᐧᓱᓂᔮᐤ ᐊᐧᐁᐧᓯᐃᐧᓇ; ᑲᐦᑭᔭᐤ ᐊᔨᓯᔨᓂᐤ ᑳ ᐸᑭᑎᓈᓱᐟ ᐅᓵᐃᐧᓱᓂᔮᐊᐧ ᐁ ᐸᑭᑎᓇᒪᐋᐧᐟ ᑳ ᑎᐯᔨᐦᒋᑫᔨᐟ. 23ᑲᐦᑭᔭᐤ ᐊᔨᓯᔨᓂᐤ ᒫᑲ ᑳ ᐊᔮᐟ ᒋᐯᑕᑫᐧᑭᐣ, ᒥᓇ ᒋᐯᑕᑯᒥᐦᑫᐧᑭᐣ, ᒥᓇ ᐸᑲᐢᑭᒥᐦᑫᐧᑭᐣ, ᒥᓇ ᑳ ᒥᔮᐧᓯᐠ ᐋᐧᐱᐢᑫᑭᐣ, ᒥᓇ ᐋᐧᐸᑎᐦᑯᐱᐊᐧᔭ, ᒥᓇ ᔮᐯᒫᔭᑎᑲᐧᔮᓇ ᐁ ᒥᐦᑲᐧᑎᓱᔨᐟ, ᒥᓇ ᐊᐦᑭᑯᔮᓇ ᑭ ᐯᓯᐁᐧᐤ. 24ᑲᐦᑭᔭᐤ ᐊᐃᐧᔭᐠ ᑳ ᐸᑭᑎᓈᕽ ᐸᑭᑎᓈᓱᐃᐧᐣ ᐋᐧᐱᐢᑭᓱᓂᔮᐊᐧ ᒥᓇ ᐅᓵᐋᐧᐱᐢᑲᐧ ᑭ ᐯᓯᐁᐧᐤ ᐁ ᐸᑭᑎᓇᒪᐋᐧᐟ ᑳ ᑎᐯᔨᐦᒋᑫᔨᐟ; ᒥᓇ ᑲᐦᑭᔭᐤ ᐊᔨᓯᔨᓂᐤ ᑳ ᐊᔮᐋᐧᐟ ᐊᑫᓯᔭ ᑐᐃᐧ ᒥᐢᑎᑲᐧ ᓈᐣᑕᐤ ᑭᑕ ᑭ ᐃᑖᐸᑎᓯᔨᐟ ᐁᑯᑕ ᐊᑐᐢᑫᐃᐧᓂᕽ, ᑭ ᐯᓯᐁᐧᐤ. 25ᒥᓇ ᑲᐦᑭᔭᐤ ᐃᐢᑫᐧᐊᐧᐠ ᑳ ᐃᔨᓂᓯᐃᐧᑌᐦᐁᒋᐠ ᑭ ᐱᒪᐢᑌᐃᑫᐊᐧᐠ ᐅᒋᐦᒋᐋᐧᐊᐧ ᐅᐦᒋ, ᒥᓇ ᑭ ᐯᑖᐊᐧᐠ ᐊᓂᒪ ᑳ ᑭ ᐱᒪᐢᑌᐊᑭᐠ, ᒋᐯᑕᑫᐧᑭᐣ, ᒥᓇ ᒋᐯᑕᑯᒥᐦᑫᐧᑭᐣ, ᒥᓇ ᐸᑲᐢᑭᒥᐦᑫᐧᑭᐣ, ᒥᓇ ᑳ ᒥᔮᐧᓯᐠ ᐋᐧᐱᐢᑫᑭᐣ. 26ᑲᐦᑭᔭᐤ ᒫᑲ ᐃᐢᑫᐧᐊᐧᐠ ᑳ ᒋᐦᑫᔨᑕᒥᐃᑯᒋᐠ ᐅᑌᐦᐃᐋᐧᐤ ᐃᔨᓂᓯᐃᐧᓂᕽ ᑭ ᐱᒪᐢᑌᐊᒪᐧᐠ ᐋᐧᐸᑎᑯᐱᐊᐧᔭ. 27ᐅᔭᓱᐁᐧᐃᐧᔨᓂᐊᐧᐠ ᒫᑲ ᑭ ᐯᓯᐁᐧᐊᐧᐠ ᐊᓂᐦᐃ ᐋᓂᐠᐢ ᐊᓯᓂᔭ, ᒥᓇ ᐊᓂᑭ ᐊᓯᓂᔭᐠ ᑭᑕ ᑭᑲᒧᐃᐦᒋᐠ, ᐁᐦᐸᑎᕽ ᑭᑕ ᐋᐸᑎᓯᒋᐠ, ᒥᓇ ᐋᐧᐢᑭᑲᓈᐱᐢᑯᕽ. 28ᒥᓇ ᓯᐊᐧᔭᑫᐢᐠ, ᒥᓇ ᐱᒥ; ᑭᑕ ᐋᐧᓴᐢᑯᑌᓂᑳᑫᕽ ᒥᓇ ᑐᒥᓂᑲᓂᐱᒥ, ᒥᓇ ᐃᐧᑭᒫᓯᑲᐣ. 29ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭ ᐯ ᐸᑭᑎᓇᒪᐁᐧᐊᐧᐠ ᑳ ᑎᐯᔨᐦᒋᑫᔨᐟ ᑌᐯᔨᒧᐃᐧ ᐸᑭᑎᓈᓱᐃᐧᐣ; ᑲᐦᑭᔭᐤ ᓈᐯᐤ ᒥᓇ ᐃᐢᑫᐧᐤ ᐅᑌᐦ ᑳ ᒋᐦᑫᔨᑕᒥᐃᑯᐟ ᑭᑕ ᐯᑖᐟ ᑲᐦᑭᔭᐤ ᐊᓂᒪ ᐊᑐᐢᑫᐃᐧᐣ ᐅᐦᒋ, ᑳ ᑎᐯᔨᐦᒋᑫᐟ ᑳ ᑭ ᐃᑕᓱᐁᐧᐟ ᑭᑕ ᐅᓯᐦᒋᑳᑌᐠ ᐅᒋᐦᒋᔨᕽ ᐅᐦᒋ ᒧᓯᓴ.
30ᒧᓯᐢ ᒫᑲ ᑭ ᐃᑌᐤ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᒫᑎᑲ, ᑳ ᑎᐯᔨᐦᒋᑫᐟ ᑭ ᓇᑐᒣᐤ ᐁ ᐃᐧᔮᐟ ᐯᓴᓬᐃᓬ, ᐅᑯᓯᓴ ᔪᕒᐊᐩ, ᐅᑯᓯᓴ ᐦᐊᕒ, ᐅ ᐱᐢᑭᑐᑌᐃᐧᓯᐃᐧᓂᕽ ᒍᑕ ᐅᐦᒋ. 31ᒥᓇ ᑭ ᒧᐢᑭᓇᐃᐠ ᐅᐟ ᐊᐦᒑᐦᑯᔨᐊᐧ ᑭᓭᒪᓂᑐᐊᐧ, ᐃᔨᓂᓯᐃᐧᓂᕽ, ᓂᓯᑐᐦᑕᒧᐃᐧᓂᕽ, ᒥᓇ ᑭᐢᑫᔨᑕᒧᐃᐧᓂᕽ, ᒥᓇ ᑲᐦᑭᔭᐤ ᓇᓈᑐᕽ ᓂᐦᑖᐊᐧᑐᐢᑫᐃᐧᓂᕽ. 32ᑭᑕ ᒥᐢᑫᔨᑕᕽ ᑭᑕ ᐃᓯ ᒪᒥᔪᐟ, ᑭᑕ ᐊᑐᐢᑳᑖᐟ ᐅᓵᐃᐧᓱᓂᔮᐊᐧ, ᒥᓇ ᐋᐧᐱᐢᑭᓱᓂᔮᐊᐧ, ᒥᓇ ᐅᓵᐋᐧᐱᐢᑲᐧ. 33ᒥᓇ ᑭᑕ ᐊᐧᐁᐧᔨᐋᐟ ᐊᓯᓂᔭ ᑭᑕ ᑖᐸᒧᐋᐟ, ᒥᓇ ᐁ ᒪᓯᓂᑯᑕᕽ ᒥᐢᑎᐠ, ᑭᑕ ᑲᐢᑭᑖᐟ ᑲᐦᑭᔭᐤ ᓇᓈᑐᕽ ᑐᐃᐧ ᑲᑫᑖᐃᐧ ᐊᑐᐢᑫᐃᐧᐣ. 34ᑭ ᐊᐢᑖᐁᐧᐤ ᒫᑲ ᐅᑌᐦᐃᔨᕽ ᑭᑕ ᑭ ᑭᐢᑯᓄᐊᒫᑫᔨᐟ, ᐃᐧᔭ ᒥᓇ ᐊᐦᐋᓬᐃᔮᑊ ᐅᑯᓯᓴ ᐊᐦᐃᓭᒫᐠ, ᐅ ᐱᐢᑭᑐᑌᐃᐧᓯᐃᐧᓂᕽ ᑖᐣ ᐅᐦᒋ. 35ᐁᐊᐧᑯᓂ ᑭ ᒧᐢᑭᓇᑕᒪᐁᐧᐤ ᐃᔨᓂᓯᐃᐧ ᒥᑎᐦ, ᑭᑕ ᐊᑐᐢᑲᑕᒥᔨᐟ ᓇᓈᑐᕽ ᑐᐃᐧ ᓂᐦᑕᐃᐧᒋᑫᐃᐧᐣ, ᐁ ᐃᓯ ᐊᑐᐢᑫᐟ ᐅᒪᓯᓈᐱᐢᑲᐦᐃᑫᐤ, ᒥᓇ ᐅᑲᑫᑖᐊᐧᑐᐢᑫᐤ, ᒥᓇ ᐅᒪᓯᓂᐢᑕᐃᑫᐤ, ᒋᐯᑕᑫᐧᑭᓄᕽ, ᒥᓇ ᒋᐯᑕᑯᒥᐦᑫᐧᑭᓄᕽ, ᒥᓇ ᐸᑲᐢᑭᒥᐦᑫᐧᑭᓄᕽ, ᒥᓇ ᐁ ᒥᔮᐧᓯᐠ ᐋᐧᐱᐢᑫᑭᓄᕽ, ᒥᓇ ᐅᐱᒪᐢᑌᐃᑫᐤ, ᐊᓂᑭ ᐃᓴ ᐱᑯ ᓈᐣᑕᐤ ᐁ ᐃᓯ ᓂᐦᑖᐊᐧᑐᐢᑫᒋᐠ, ᒥᓇ ᐊᓂᑭ ᑳ ᒥᐢᑫᐧᔨᑕᐦᑭᐠ ᑲᑫᑖᐃᐧ ᐊᑐᐢᑫᐃᐧᓇ.
Currently Selected:
ᐁᐠᓴᑕᐢ 35: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
