ᑎᔪᑕᕒᐊᓇᒥ 28
28
1 #
ᑎᔪᑕᕒᐊᓇᒥ 11:13-17
ᐁᑯᓯ ᑭᑕ ᐃᐦᑭᐣ, ᑭᐢᐱᐣ ᐋᐦᑲᒥ ᓇᑐᐦᑕᒪᓂ ᐅᐟ ᐃᑌᐧᐃᐧᐣ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ ᑭᑕ ᓈᑲᑌᔨᑕᒪᐣ ᑭᑕ ᐃᑐᑕᒪᐧᐟ ᑲᐦᑭᔭᐤ ᐅᐟ ᐃᑕᓱᐁᐧᐃᐧᓇ ᑳ ᐃᑕᓱᐊᐧᑎᑖᐣ ᐊᓄᐦᐨ ᑳ ᑭᓯᑳᐠ, ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ ᐊᔨᐋᐧᐠ ᑭ ᑲ ᐃᐢᐯᔨᑖᑯᐃᐠ ᐃᔨᑯᕽ ᑲᐦᑭᔭᐤ ᓇᓈᑐᑯᐢᑳᐣ ᐊᔨᓯᔨᓂᐊᐧ ᐊᐢᑭᕽ; 2ᑲᐦᑭᔭᐤ ᒫᑲ ᐅᐦᐃ ᓴᐁᐧᔨᑖᑯᓯᐃᐧᓇ ᑭ ᑲ ᐅᑎᐦᑎᑯᐣ ᒥᓇ ᑭ ᑲ ᐊᑎᒥᓀᐅᑯᐣ, ᑭᐢᐱᐣ ᓇᑐᐦᑕᒪᓂ ᐅᐟ ᐃᑌᐧᐃᐧᐣ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ. 3ᑭ ᑲ ᓴᐁᐧᔨᑖᑯᓯᐣ ᐅᑌᓈᕽ, ᒥᓇ ᑭ ᑲ ᓴᐁᐧᔨᑖᑯᓯᐣ ᑭᐢᑎᑳᓂᕽ. 4ᑭ ᑲ ᓴᐁᐧᔨᑖᑯᓯᐣ ᐁ ᐃᓯ ᓂᐦᑖᐃᐧᑭᑖᔭᐣ ᑭᔭᐃᐧᕽ ᐅᐦᒋ, ᒥᓇ ᐁ ᐃᓯ ᓂᐦᑖᐃᐧᑭᕽ ᑭᐟ ᐊᐢᑭᕽ, ᒥᓇ ᐁ ᐃᓯ ᓂᐦᑖᐃᐧᑭᐃᑐᒋᐠ ᑭ ᐱᓯᐢᑭᒪᐠ, ᐁ ᐃᓯ ᔭᑭᐃᑐᒋᐠ ᑭ ᒧᐢᑐᓱᒪᐠ, ᒥᓇ ᐁ ᐅᐢᑳᔨᐃᐧᒋᐠ ᑭ ᒫᔭᑎᐦᑯᒪᐠ. 5ᑭᑕ ᓴᐁᐧᔨᑖᑲᐧᐣ ᑭ ᐃᐧᑯᐱᐃᐧᐊᐧᐟ ᒥᓇ ᑭᐟ ᐊᐢᑖᓱᓂᑲᒥᐠ. 6ᑭ ᑲ ᓴᐁᐧᔨᑖᑯᓯᐣ ᐱᔨᑐᑫᔭᓂ, ᒥᓇ ᑭ ᑲ ᓴᐁᐧᔨᑖᑯᓯᐣ ᐁᐧᔭᐃᐧᔭᓂ. 7ᑳ ᑎᐯᔨᐦᒋᑫᐟ ᑭᑕ ᐃᑐᑕᐁᐧᐤ ᑭ ᓄᑎᓈᑲᓇ ᑳ ᐸᓯᑯᐢᑖᐢᑭᐠ ᑭᑕ ᓂᐸᐃᒥᐦᐟ ᑭ ᓂᑳᓂᒥᕽ; ᐯᔭᑲᐧᔭᐠ ᑭ ᑲ ᐯ ᐃᓯ ᒪᐃᐧᓀᐢᑳᑲᐧᐠ, ᐁᑯᓯ ᑌᐸᑯᑊ ᑕᐦᑕᐧᔭᐠ ᑭ ᑲ ᑕᐸᓯᐦᐃᑲᐧᐠ. 8ᑳ ᑎᐯᔨᐦᒋᑫᐟ ᑭᑕ ᐃᑕᓱᐋᐧᑕᒼ ᓴᐁᐧᔨᑖᑯᓯᐃᐧᐣ ᑭᑕ ᐅᑎᐦᑎᑯᔭᐣ ᑭ ᒫᐊᐧᒋᒋᑫᐃᐧᑲᒥᑯᕽ, ᒥᓇ ᑲᐦᑭᔭᐤ ᑫᑲᐧᐩ ᑳ ᐊᑐᐢᑲᑕᒪᐣ; ᐁᑯᓯ ᑭ ᑲ ᓴᐁᐧᔨᒥᐠ ᐁᑯᑕ ᐊᐢᑭᕽ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ ᑳ ᒥᔨᐢᐠ. 9ᑳ ᑎᐯᔨᐦᒋᑫᐟ ᑭ ᑲ ᐋᔮᑕᔨᐠ ᐃᐧᔭ ᑭᑕ ᑲᓈᒋ ᐅᐟ ᐊᔨᓯᔨᓂᒥᐟ, ᑳ ᑭ ᐃᓯ ᑭᐦᒋᐃᑎᐢᐠ; ᑭᐢᐱᐣ ᑭ ᑲᓀᐧᔨᑕᒫᐧᐣ ᐅᐟ ᐃᑕᓱᐁᐧᐃᐧᓇ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ ᒥᓇ ᑭ ᐱᒧᑖᑐᑕᒫᐧᐣ ᐅᐟ ᐃᑖᑎᓯᐃᐧᓇ. 10ᐁᑯᓯ ᑲᐦᑭᔭᐤ ᐊᔨᓯᔨᓂᐊᐧᐠ ᐊᐢᑭᕽ ᑭᑕ ᐋᐧᐸᐦᑕᒪᐧᐠ ᐅ ᐃᐧᔪᐃᐧᐣ ᑳ ᑎᐯᔨᐦᒋᑫᐟ ᐁ ᐃᓯ ᐃᐧᐦᒋᑳᓱᔭᐣ; ᐁᑯᓯ ᑭ ᑲ ᑯᐢᑎᑲᐧᐠ. 11ᑳ ᑎᐯᔨᐦᒋᑫᐟ ᒫᑲ ᑭ ᑲ ᐁᐧᔪᒋᐃᐠ ᒥᔪᓄᕽ ᐃᓯ, ᐁ ᐃᓯ ᓂᐦᑖᐃᐧᑭᑖᒪᑲᕽ ᑭᔭᐤ, ᒥᓇ ᐁ ᐃᓯ ᓂᐦᑖᐃᐧᑭᐃᑐᒋᐠ ᑭ ᐱᓯᐢᑭᒪᐠ, ᒥᓇ ᐁ ᐃᓯ ᓂᐦᑖᐃᐧᑭᒋᑫᒪᑲᕽ ᑭᐟ ᐊᐢᑭ, ᐊᓂᑕ ᐊᐢᑭᕽ ᑳ ᑎᐯᔨᐦᒋᑫᐟ ᑳ ᑭ ᑭᐦᒋᐃᑖᐟ ᑯᑖᐃᐧᐸᓇ ᑭᑕ ᒥᔨᐢᐠ. 12ᑳ ᑎᐯᔨᐦᒋᑫᐟ ᑭ ᑲ ᔪᑌᓇᒫᐠ ᒣᔮᐧᓯᓂᔨᐠ ᐅ ᐁᐧᔪᑎᓯᐃᐧᐣ ᑭᓯᑯᕽ ᑭᑕ ᐅᐦᒋ ᑭᒥᐊᐧᕽ ᐋᔮᐢᑳᐤ ᑭᐟ ᐊᐢᑭᕽ, ᒥᓇ ᑭᑕ ᓴᐁᐧᔨᑕᒪᐣ ᑲᐦᑭᔭᐤ ᑳ ᐃᑕᑐᐢᑫᔭᐣ ᑭᒋᐦᒋᕽ; ᑭ ᑲ ᐊᐃᐧᐋᐊᐧᐠ ᒫᑲ ᒥᐦᒉᐟ ᓇᓈᑐᑯᐢᑳᐣ ᐊᔨᓯᔨᓂᐊᐧᐠ ᒫᑲ ᑭᔭ ᓇᒪᐃᐧᔭ ᑭ ᑲ ᐊᐃᐧᐋᓱᒫᐊᐧᐠ. 13ᑳ ᑎᐯᔨᐦᒋᑫᐟ ᑭ ᑲ ᐅᐢᑎᑳᐧᓂᐃᐠ, ᓇᒪᐃᐧᔭ ᑭ ᑲ ᐅᓱᑳᑎᐠ; ᐁᑯᓯ ᑕᐦᑯᐨ ᐱᑯ ᑭ ᑲ ᐊᔮᐣ ᓇᒪᐃᐧᔭ ᐊᑖᒥᕽ; ᑭᐢᐱᐣ ᑭ ᓇᑐᐦᑕᒫᐧᐣ ᐅᐟ ᐃᑕᓱᐁᐧᐃᐧᓇ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ, ᑳ ᐃᑕᓱᐋᐧᑎᑖᐣ ᐊᓄᐦᐨ ᑳ ᑭᓯᑳᐠ, ᑭᑕ ᓈᑲᑌᔨᑕᒪᐣ ᒥᓇ ᑭᑕ ᐃᑐᑕᒪᐣ; 14ᒥᓇ ᑭᐢᐱᐣ ᐁᑳ ᐅᐦᐱᒣ ᐃᑐᐦᑌᔭᓂ ᓈᐣᑕᐤ ᐊᓂᐦᐃ ᐃᑌᐧᐃᐧᓇ ᑳ ᐃᑕᓱᐋᐧᑎᑖᐣ ᐊᓄᐦᐨ ᑳ ᑭᓯᑳᐠ, ᑭᐦᒋᓂᐢᑭᕽ ᐃᑌᐦᑫ ᐊᐦᐳ ᓇᒪᑎᓂᕽ ᐃᑌᐦᑫ, ᑭᑕ ᐱᒥᑎᓴᐦᐊᐧᒋᐠ ᑯᑕᑲᐠ ᒪᓂᑐᐊᐧᐠ ᑭᑕ ᐊᑐᐢᑲᐊᐧᒋᐠ.
15ᒫᑲ ᑭᑕ ᐃᐦᑭᐣ ᑭᐢᐱᐣ ᐁᑳ ᐃᐧ ᓇᑐᐦᑕᒪᓂ ᐅᐟ ᐃᑌᐧᐃᐧᐣ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ, ᑭᑕ ᓈᑲᑌᔨᑕᒪᐣ ᑭᑕ ᐃᑐᑕᒪᐧᐟ ᑲᐦᑭᔭᐤ ᐅᐟ ᐃᑕᓱᐁᐧᐃᐧᓇ ᒥᓇ ᐅ ᑲᑫᐢᑫᐧᐃᐧᓇ ᑳ ᐃᑕᓱᐋᐧᑎᑖᐣ ᐊᓄᐦᐨ ᑳ ᑭᓯᑳᐠ; ᑲᐦᑭᔭᐤ ᐅᐦᐃ ᓈᓂᐳᒥᐁᐧᐃᐧᓇ ᑭ ᑲ ᐅᑎᐦᑎᑯᐣ ᒥᓇ ᑭ ᑲ ᐊᑎᒥᓀᐅᑯᐣ. 16ᑭ ᑲ ᓈᓂᐳᒥᑲᐃᐧᐣ ᐅᑌᓈᕽ, ᒥᓇ ᑭ ᑲ ᓈᓂᐳᒥᑲᐃᐧᐣ ᑭᐢᑎᑳᓂᕽ. 17ᑭᑕ ᒪᒐᑭᑌᐤ ᑭ ᐃᐧᑯᐱᐃᐧᐊᐧᐟ ᒥᓇ ᑭᐟ ᐊᐢᑖᓱᓂᑲᒥᐠ. 18ᑭ ᑲ ᓈᓂᐳᒥᑲᐃᐧᐣ ᐁ ᐃᓯ ᓂᐦᑖᐃᐧᑭᑖᔭᐣ ᑭᔭᐃᐧᕽ ᐅᐦᒋ, ᒥᓇ ᐁ ᐃᓯ ᓂᐦᑖᐃᐧᑭᕽ ᑭᐟ ᐊᐢᑭᕽ, ᐁ ᐃᓯ ᔭᑭᐃᑐᒋᐠ ᑭ ᒧᐢᑐᓱᒪᐠ, ᒥᓇ ᐁ ᐅᐢᑳᔨᐃᐧᒋᐠ ᑭ ᒫᔭᑎᐦᑯᒪᐠ. 19ᑭ ᑲ ᓈᓂᐳᒥᑲᐃᐧᐣ ᐱᔨᑐᑫᔭᓂ, ᒥᓇ ᑭ ᑲ ᓈᓂᐳᒥᑲᐃᐧᐣ ᐁᐧᔭᐃᐧᔭᓂ.
20ᑳ ᑎᐯᔨᐦᒋᑫᐟ ᑭ ᑲ ᐃᓯᑎᓴᐦᐊᒫᐠ ᓈᓂᐳᒥᑯᐃᐧᐣ, ᓵᑯᒋᐦᐃᑯᐃᐧᐣ, ᒥᓇ ᑭᓯᑭᑐᑎᑯᐃᐧᐣ ᑲᐦᑭᔭᐤ ᑫᑲᐧᐩ ᑳ ᐅᑎᑎᓇᒪᐣ ᑭᑕ ᑲᑫᐧ ᐃᑐᑕᒪᐣ, ᐱᔨᐢ ᑭᑕ ᓂᓯᐊᐧᓈᒋᐃᑲᐃᐧᔭᐣ, ᒥᓇ ᐱᔨᐢ ᑭᑕ ᑭᓯᐢᑳ ᓂᓯᐊᐧᓈᑎᓯᔭᐣ; ᒋᑫᒫ ᐁ ᒪᒑᔨᐊᐧᑭ ᑭᐟ ᐃᓯᐦᒋᑫᐃᐧᓇ, ᑳ ᑭ ᐃᓯ ᐁᐧᐱᓂᔭᐣ. 21ᑳ ᑎᐯᔨᐦᒋᑫᐟ ᑭᑕ ᐃᑐᑕᒼ ᐋᔨᒫᐢᐱᓀᐃᐧᐣ ᑭᑕ ᒥᒋᒥᓂᑯᔭᐣ, ᐱᔨᐢ ᑭᑕ ᓂᓯᐊᐧᓈᒋᐃᐢᐠ ᐊᐢᑭᕽ ᐅᐦᒋ, ᐃᑌ ᐊᓂᒪ ᑳ ᐃᑐᐦᑌᔭᐣ ᑭᑕ ᓇᑕᐃᐧ ᑎᐯᔨᐦᑕᒪᐣ. 22ᑳ ᑎᐯᔨᐦᒋᑫᐟ ᑭ ᑲ ᐸᑭᑎᓇᒫᐠ ᒥᔨᐋᐧᐢᐱᓀᐃᐧᐣ, ᒥᓇ ᑭᓯᓱᐋᐧᐢᐱᓀᐃᐧᐣ, ᒥᓇ ᐸᑭᐸᔨᐃᐧᐣ, ᒥᓇ ᐊᔨᐋᐧᐠ ᐁ ᑭᓯᑌᐠ, ᒥᓇ ᐃᓴᐁᐧᐢᐠ, ᒥᓇ ᑭᐢᑎᐣ, ᒥᓇ ᐱᑭᓭᑲᒥᐣ; ᐁᑯᓯ ᑭ ᑲ ᐱᒥᑎᓴᐦᐅᑯᐣ ᐱᔨᐢ ᑭᑕ ᓂᓯᐊᐧᓈᑎᓯᔭᐣ. 23ᐁᑯᓯ ᑭᓯᐠ ᐃᐢᐱᒥᕽ ᑭᐢᑎᑳᐧᓂᕽ ᑭᑕ ᐃᓯ ᐊᔮᐤ ᑖᐱᐢᑯᐨ ᐅᓵᐋᐧᐱᐢᐠ, ᒥᓇ ᐊᐢᑭ ᓂᐦᒋ ᑖᐱᐢᑯᐨ ᐱᐋᐧᐱᐢᐠ. 24ᑳ ᑎᐯᔨᐦᒋᑫᐟ ᑭᑕ ᑭᒥᐊᐧᓂᐦᑖᐤ ᑭᐟ ᐊᐢᑭᕽ ᐱᐦᑯᑌᐤ ᒥᓇ ᔦᑲᐤ; ᑭᓯᑯᕽ ᑭ ᑲ ᐯ ᐅᐦᒋ ᐸᑲᒥᐢᑳᑯᐣ, ᐱᔨᐢ ᑭᑕ ᓂᓯᐊᐧᓈᑎᓯᔭᐣ.
25ᑳ ᑎᐯᔨᐦᒋᑫᐟ ᑭ ᑲ ᐃᑐᑖᐠ ᑭᑕ ᓂᐸᐃᐢᑭᐠ ᑭ ᓄᑎᓈᑲᓇᐠ; ᐯᔭᑲᐧᔭᐠ ᑭ ᑲ ᐃᓯ ᒪᐃᐧᓀᐢᑲᐋᐧᐊᐧᐠ, ᒫᑲ ᑌᐸᑯᑊ ᑕᐦᑕᐧᔭᐠ ᑭ ᑲ ᐃᓯ ᑕᐸᓯᐋᐊᐧᐠ; ᑳᑫᐧᑯᐢᐠ ᑭ ᑲ ᐃᑖᒧᑳᑎᑲᐃᐧᐣ ᐃᑕ ᐁ ᐊᔮᒋᐠ ᑲᐦᑭᔭᐤ ᓇᓈᑐᕽ ᐅᑌᓇᐃᐧᐃᐧᓇ ᐊᐢᑭᕽ. 26ᐁᑯᓯ ᐁ ᓂᐳᒪᑲᕽ ᑭᔭᐤ ᑭᑕ ᐅ ᒥᒋᐃᐧᓂᐊᐧᐠ ᑲᐦᑭᔭᐤ ᑳ ᐸᐹᒥᔮᒋᐠ ᒥᓇ ᐱᓯᐢᑭᐊᐧᐠ ᐊᐢᑭᕽ ᑳ ᐊᔮᒋᐠ, ᐁᑯᓯ ᓇᒪᐃᐧᔭ ᐊᐃᐧᔭᐠ ᑭᑕ ᐃᐦᑖᐤ ᑭᑕ ᐅᓴᐋᐧᐟ. 27ᑳ ᑎᐯᔨᐦᒋᑫᐟ ᑭ ᑲ ᐸᑭᑎᓇᒫᐠ ᑳ ᐅᓯᑭᐱᒥᕽ ᐃᒋᑊᑎᕽ, ᒥᓇ ᐁᒪᕒᐋᑕ, ᒥᓇ ᐅᒥᑭᐃᐧᐣ, ᒥᓇ ᑭᔭᑭᓯᐃᐧᐣ ᐁᑳ ᑭᑕ ᑭ ᒥᓈᐧᒋᐃᑲᐦᐃᔭᐣ. 28ᑳ ᑎᐯᔨᐦᒋᑫᐟ ᑭ ᑲ ᐸᑭᑎᓇᒫᐠ ᐊᐧᓂᓀᐃᐧᐣ ᒥᓇ ᑲᐢᑳᐱᐸᔨᐃᐧᐣ ᒥᓇ ᒫᒪᐢᑳᒋᑌᐦᐁᐃᐧᐣ. 29ᐁ ᐋᐱᑖᑭᓯᑳᐠ ᑭ ᑲ ᓇᓈᑕᐃᐧ ᒥᐢᑯᓂᑳᐣ, ᑖᐱᐢᑯᐨ ᐁᑳ ᑳ ᐋᐧᐱᐟ ᑳ ᓇᓈᑐᓂᑫᐟ ᐊᐧᓂᑎᐱᐢᑳᕽ, ᐁᑯᓯ ᓇᒪᐃᐧᔭ ᑭ ᑲ ᓇᓇᐦᐃᐸᔨᐣ ᑭᐟ ᐃᓯᐦᒋᑫᐃᐧᓂᕽ; ᐱᓯᓯᐠ ᒫᑲ ᑭ ᑲ ᑭᑎᒪᐦᐃᑲᐃᐧᐣ ᒥᓇ ᑭ ᑲ ᒪᓂᐊᐧᑖᑎᑲᐃᐧᐣ, ᐁᑯᓯ ᓇᒪᐃᐧᔭ ᐊᐃᐧᔭᐠ ᑭᑕ ᐃᐦᑖᐤ ᑭᑕ ᓈᑕᒫᐢᐠ. 30ᑭ ᑲ ᑭᐢᑭᒫᐤ ᑭᑕ ᐃᐧᐃᐧᔭᐣ ᑯᑕᐠ ᒫᑲ ᓈᐯᐤ ᑭᑕ ᐃᐧᒉᐁᐧᐤ; ᑭ ᑲ ᐅᓯᐦᑖᐣ ᐋᐧᐢᑳᐦᐃᑲᐣ ᐁᑯᓯ ᑭᔭ ᓇᒪᐃᐧᔭ ᐁᑯᑕ ᑭ ᑲ ᐃᐧᑭᐣ; ᑭ ᑲ ᑭᐢᑎᑳᐣ ᓱᒥᓂᑭᐢᑎᑳᐣ, ᐁᑯᓯ ᓇᒪᐃᐧᔭ ᑭᔭ ᑭ ᑲ ᐋᐸᒋᐦᑖᐣ ᐁ ᒥᓂᓯᐊᐧᕽ. 31ᑭ ᒧᐢᑐᓱᒼ ᑭᑕ ᓂᐸᐦᐋᐤ ᐁ ᑭᑖᐸᑫᔭᐣ ᐁᑯᓯ ᓇᒪᐃᐧᔭ ᑭᔭ ᑭ ᑲ ᐅᐦᑕᒫᐤ; ᑭ ᓱᓱᒥᐢᑕᑎᒧᒼ ᑭ ᑲ ᒪᐢᑲᒥᑲᐃᐧᐣ ᐁ ᑭᑖᐸᑫᔭᐣ, ᐁᑯᓯ ᓇᒪᐃᐧᔭ ᑳᐃᐧ ᑭ ᑲ ᒥᔨᑲᐃᐧᐣ, ᑭ ᒫᔭᑎᐦᑯᒪᐠ ᑭᑕ ᒥᔮᐊᐧᐠ ᑭ ᓄᑎᓈᑲᓇᐠ, ᐁᑯᓯ ᓇᒪᐃᐧᔭ ᐊᐃᐧᔭᐠ ᑭ ᑲ ᐊᔮᐋᐧᐤ ᑭᑕ ᐱᒫᒋᑕᒫᐢᐠ. 32ᑭᑯᓯᓴ ᒥᓇ ᑭᑖᓂᓴ ᑯᑕᑲᐠ ᐊᔨᓯᔨᓂᐊᐧᐠ ᑭᑕ ᒥᔮᐊᐧᐠ, ᐁᑯᓯ ᑭ ᑲ ᐋᐦᑲᒥ ᐃᑖᐱᐣ, ᒥᓇ ᑭ ᑲ ᐊᑎ ᓀᓱᐃᐧᓯᐣ ᐁ ᐱᑭᐢᑳᑕᒋᐠ ᑲᐯᑭᓯᐠ; ᓇᒪᐃᐧᔭ ᒫᑲ ᓇᐣᑕᐤ ᑭᔭ ᑭ ᑲ ᐃᓯ ᑲᐢᑭᑖᐣ. 33ᑳ ᐅᐦᐱᑭᕽ ᑭᐟ ᐊᐢᑭᕽ, ᒥᓇ ᑲᐦᑭᔭᐤ ᑭᐟ ᐊᑐᐢᑫᐃᐧᓇ, ᐊᔨᓯᔨᓂᐊᐧᐠ ᐁᑳ ᑳ ᑭᐢᑫᔨᒪᒋᐠ ᑭᑕ ᑭᑖᐊᐧᐠ; ᐁᑯᓯ ᑭᔭ ᐃᐧᔭ ᐱᑯ ᑭ ᑲ ᑭᑎᒪᐦᐃᑲᐃᐧᐣ ᒥᓇ ᑭ ᑲ ᐊᐢᐱᐃᑲᐃᐧᐣ ᑕᐦᑭᓀ. 34ᐁᑯᓯ ᒫᑲ ᑭ ᑲ ᑭᐢᑫᐧᐃᑯᐣ ᐁ ᐃᓯ ᐋᐧᐸᐦᑕᒪᐣ ᑭᐢᑭᓯᑯᕽ ᐅᐦᒋ ᐊᓂᒪ ᑫ ᐋᐧᐸᐦᑕᒪᐣ. 35ᑳ ᑎᐯᔨᐦᒋᑫᐟ ᑭ ᑲ ᑕᑖᐢᐱᓇᑎᐠ ᑭᐦᒋᑲᐧᓂᕽ ᒥᓇ ᑭᐢᑳᑎᕽ ᑭᑕ ᐋᐦᑯ ᐅᓯᑭᐱᒥᔭᐣ, ᐁᑳ ᑭᑕ ᑭ ᒥᓈᐧᒋᐃᑲᐃᐧᔭᐣ, ᑲᔭᑳᐢᑭᓯᑖᓂᕽ ᐅᐦᒋ ᐃᐢᑯ ᑕᐦᑯᐨ ᑭᓴᑳᑎᐱᕽ.
36ᑳ ᑎᐯᔨᐦᒋᑫᐟ ᑭ ᑲ ᐃᑐᑕᐃᐠ ᒥᓇ ᑭ ᑭᐦᒋ ᐅᑭᒫᒪ ᑫ ᐅᑎᓇᐟ ᑭᑕ ᑎᐯᔨᒥᐢᐠ, ᐃᑕ ᐁ ᐱᑐᓯᐢᑳᓀᓯᒋᐠ ᐊᔨᓯᔨᓂᐊᐧᐠ ᐁᑳ ᑳ ᑭ ᑭᐢᑫᔨᒪᒋᐠ, ᑭᔭ ᐊᐦᐳ ᑯᑖᐃᐧᔭᐠ; ᐁᑯᑕ ᒫᑲ ᑭ ᑲ ᐊᑐᐢᑲᐋᐧᐊᐧᐠ ᑯᑕᑲᐠ ᒪᓂᑐᐊᐧᐠ, ᒥᐢᑎᐠ ᒥᓇ ᐊᓯᓂ. 37ᐁᑯᓯ ᒫᑲ ᑭ ᑲ ᒫᒪᐢᑳᑎᑯᓯᐣ, ᒥᓇ ᑭ ᑲ ᐋᐁᐧᒋᑲᓂᐃᐧᐣ, ᒥᓇ ᑭ ᑲ ᐋᔨᒧᒋᑲᓂᐃᐧᐣ, ᒣᑳᐧ ᓇᓈᑐᕽ ᐊᔨᓯᔨᓂᓈᕽ ᐃᑌ ᑳ ᑎᐯᔨᐦᒋᑫᐟ ᑫ ᐃᑐᑕᐃᐢᐠ. 38ᒥᐢᑕᐦᐃ ᑭᐢᑎᑳᒋᑲᐣ ᑭ ᑲ ᐃᑐᑕᑕᐣ ᑭᐢᑎᑲᓂᕽ, ᐁᑯᓯ ᒥᑐᓂ ᐊᐱᓯᐢ ᑭ ᑲ ᒫᐊᐧᒋᐦᑖᐣ, ᒋᑫᒫ ᑳᐧᐢᑯᑎᓯᓴᐠ ᑭᑕ ᑭᑖᐊᐧᐠ. 39ᑭ ᑲ ᑭᐢᑎᑳᑌᐣ ᓱᒥᓂᑭᐢᑎᑳᓇ ᒥᓇ ᑭ ᑲ ᓈᓇᐹᒋᐦᑖᐣ ᒫᑲ ᓇᒪᐃᐧᔭ ᑭ ᑲ ᒥᓂᑳᐧᐣ ᓱᒥᓈᐳ ᐊᐦᐳ ᓇᒪᐃᐧᔭ ᑭ ᑲ ᒪᐃᐧᓱᐣ ᓱᒥᓂᓴᐠ; ᐊᔨᐢ ᒪᓂᒍᐢ ᑭᑕ ᒧᐁᐧᐤ. 40ᑭ ᑲ ᐊᔮᐋᐧᐊᐧᐠ ᐋᓬᐃᑊ ᐱᒥᐋᐧᑎᑲᐧᐠ ᒥᓯᐁᐧ ᑭᐟ ᐊᐢᑭᕽ ᒫᑲ ᓇᒪᐃᐧᔭ ᑭ ᑲ ᑕᒪᐢᑯᐣ ᐁ ᐱᒥᐃᐧᒋᐠ ᐅᐦᒋ; ᒋᑫᒫ ᑭ ᒥᐢᑎᑯᒼ ᑭᑕ ᐸᑭᑎᓂᔨᐊᐧ ᐁ ᒥᓂᓯᐃᐧᐟ. 41ᑭ ᑲ ᐅᑯᓯᓯᐣ ᒥᓇ ᑭ ᑲ ᐅᑖᓂᓯᐣ, ᒫᑲ ᓇᒪᐃᐧᔭ ᑭᔭ ᑭ ᑲ ᐊᔮᐋᐧᐊᐧᐠ; ᒋᑫᒫ ᐊᐊᐧᑳᑎᑯᐃᐧᓂᕽ ᑭᑕ ᐃᑐᑕᐋᐊᐧᐠ. 42ᑲᐦᑭᔭᐤ ᑭ ᒥᐢᑎᑯᒪᐠ ᒥᓇ ᑳ ᓂᐦᑖᐃᐧᑭᑭ ᑭᐟ ᐊᐢᑭᕽ ᐅᑳᐧᐢᑯᑎᓯᓴᐠ ᑭᑕ ᒥᒋᐊᐧᐠ. 43ᒫᓂᑌᐤ ᑳ ᐃᐧᒋᐊᔮᒥᐢᐠ ᐊᑐᐢᑲᒼ ᑭᑕ ᐊᑎ ᐃᐢᐹᑫᓈᑯᒋᑫᐤ; ᐁᑯᓯ ᐃᐧᔭ ᑭᔭ ᐊᑐᐢᑲᒼ ᑭ ᑲ ᐊᑎ ᓂᐦᒋᐸᔨᐣ. 44ᑭ ᑲ ᐊᐃᐧᐃᐠ, ᐁᑯᓯ ᑭᔭ ᓇᒪᐃᐧᔭ ᑭ ᑲ ᐊᐃᐧᐋᐤ; ᐃᐧᔭ ᑭᑕ ᐅᐢᑎᑳᐧᓂᐋᐤ, ᑭᔭ ᑭ ᑲ ᐅᓱᑳᑎᑲᐃᐧᐣ. 45ᐁᑯᓯ ᑲᐦᑭᔭᐤ ᐅᐦᐃ ᓈᓂᐳᒥᐁᐧᐃᐧᓇ ᑭ ᑲ ᐅᑎᐦᑎᑯᐣ, ᒥᓇ ᑭ ᑲ ᐱᒥᑎᓴᐦᐅᑯᐣ, ᒥᓇ ᑭ ᑲ ᐊᑎᒥᓀᐅᑯᐣ, ᐱᔨᐢ ᑭᑕ ᓂᓯᐊᐧᓈᑎᓯᔭᐣ; ᒋᑫᒫ ᐁᑳ ᐁ ᓇᑐᐦᑕᒪᐧᐟ ᐅᐟ ᐃᑌᐧᐃᐧᐣ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ, ᑭᑕ ᑲᓀᔨᑕᒪᐧᐟ ᐅᐟ ᐃᑕᓱᐁᐧᐃᐧᓇ ᒥᓇ ᐅ ᑲᑫᐢᑫᐧᐃᐧᓇ ᑳ ᑭ ᐃᑕᓱᐋᐧᑎᐢᐠ. 46ᑭ ᑲ ᐸᑲᒥᐢᑳᑯᐣ ᒫᑲ ᑭᑕ ᑭᐢᑭᓇᐊᐧᒋᐦᐃᑯᔭᐣ ᒥᓇ ᑭᑕ ᒫᒪᐢᑳᑎᑲᐃᐧᔭᐣ, ᒥᓇ ᑭᐟ ᐊᐋᐧᓯᒥᓴᐠ ᑲᑭᑫ.
47ᒋᑫᒫ ᐁᑳ ᐁ ᐊᐢᑲᐊᐧᐟ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ ᒥᔭᐋᐧᑕᒧᐃᐧᓂᕽ ᒥᓇ ᒪᒪᐦᑖᑯᑌᐦᐁᐃᐧᓂᕽ, ᐁ ᐃᓯ ᐁᐧᔪᑕᑭ ᑲᐦᑭᔭᐤ ᑫᑲᐧᔭ; 48ᐁᐊᐧᑯ ᐅᐦᒋ ᑭ ᑲ ᐊᑐᐢᑲᐋᐧᐊᐧᐠ ᑭ ᓄᑎᓈᑲᓇᐠ ᐊᓂᐦᐃ ᑳ ᑎᐯᔨᐦᒋᑫᐟ ᑫ ᐃᑎᓴᐊᒫᐢᐠ, ᓄᐦᑌᑲᑌᐃᐧᓂᕽ, ᒥᓇ ᓄᐦᑌᔮᐸᑫᐧᐃᐧᓂᕽ, ᒥᓇ ᒧᓭᐢᑲᑌᐃᐧᓂᕽ, ᒥᓇ ᑲᐦᑭᔭᐤ ᑫᑲᐧᐩ ᐁ ᑭᐧᑕᒫᔭᐣ; ᑭ ᑲ ᑖᐱᐢᑲᐦᐃᐠ ᒫᑲ ᐱᐋᐧᐱᐢᑯ ᑖᐱᐢᑳᑲᐣ ᑭᑲᐧᔮᕽ ᐱᔨᐢ ᑭᑕ ᓂᓯᐊᐧᓈᒋᐃᐢᐠ. 49ᑳ ᑎᐯᔨᐦᒋᑫᐟ ᑭᑕ ᐯᓯᐁᐧᐤ ᑭᑕ ᒪᐃᐧᓀᐢᑳᐢᑭᐠ ᐊᔨᓯᔨᓂᐊᐧ ᐋᐧᔭᐤ ᐅᐦᒋ, ᐁ ᑭᓯᐱᐊᔭᐠ ᐊᐢᑭ ᐅᐦᒋ, ᑳ ᐃᓯ ᐱᒥᔮᐟ ᒥᑭᓯᐤ; ᐊᔨᓯᔨᓂᐊᐧᐠ ᐁᑳ ᑫ ᓂᓯᑐᐦᑕᐊᐧᒋᐠ; 50ᐊᔨᓯᔨᓂᐊᐧᐠ ᐁ ᑭᓯᐃᐧᓈᑯᓯᒋᐠ, ᐁᑳ ᑫ ᒪᓈᒋᐋᒋᐠ ᑳ ᑭᓭᔨᓂᐃᐧᔨᐟ, ᒥᓇ ᐁᑳ ᑫ ᒥᔪᑐᑕᐋᐧᒋᐠ ᑳ ᐅᐢᑳᑎᓯᔨᐟ; 51ᑭᑕ ᒧᐁᐧᐤ ᒫᑲ ᑳ ᐃᓯ ᓂᐦᑖᐃᐧᑭᐃᑐᔨᐟ ᑭ ᐱᓯᐢᑭᒪ, ᒥᓇ ᑳ ᓂᐦᑖᐃᐧᑭᕽ ᑭᐟ ᐊᐢᑭᕽ, ᐱᔨᐢ ᑭᑕ ᓂᓯᐊᐧᓈᑎᓯᔭᐣ; ᐁᐊᐧᑯ ᒥᓇ ᓇᒪᐃᐧᔭ ᑭ ᑲ ᐃᐢᑯᓇᒫᐠ ᐸᐦᑫᐧᓯᑲᓂᑳᓇ, ᓱᒥᓈᐳ, ᐊᐦᐳ ᐱᒥ, ᐁ ᐃᓯ ᔭᑭᐅᔨᐟ ᑭ ᒧᐢᑐᓱᒪ, ᐊᐦᐳ ᐁ ᐅᐢᑳᔨᐃᐧᔨᐟ ᑭ ᒫᔭᑎᐦᑯᒪ, ᐱᔨᐢ ᐃᔨᑯᕽ ᑭ ᓂᓯᐊᐧᓈᒋᐃᐢᑭ. 52ᑭ ᑲ ᐃᐧᑫᐧᐢᑳᐠ ᒫᑲ ᒥᓯᐁᐧ ᑭ ᑭᐦᒋᐃᐢᑳᑌᒥᕽ, ᐱᔨᐢ ᑭᑕ ᐸᑭᑎᑭ ᑳ ᐃᐢᐹᑭ ᑭᐟ ᐊᓯᓂᐃᐧᒣᓂᑲᓇ, ᐊᓂᐦᐃ ᑳ ᐊᐢᐯᔨᒧᔭᐣ, ᒥᓯᐁᐧ ᐁᐢᐱᒑᐠ ᑭᐟ ᐊᐢᑭ; ᑭ ᑲ ᐃᐧᑫᐧᐢᑳᐠ ᒫᑲ ᒥᓯᐁᐧ ᑭ ᑭᐦᒋᐃᐢᑳᐧᑌᒥᕽ ᐁᐢᐱᒑᐠ ᑭᐟ ᐊᐢᑭ, ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ ᑳ ᑭ ᒥᔨᐢᐠ. 53ᑭ ᑲ ᒥᒋᐣ ᒫᑲ ᑎᐱᔭᐤ ᑭᔭᐃᐧᕽ ᐅᐦᒋ ᑳ ᓂᐦᑖᐃᐧᑭᑖᔭᐣ, ᐅ ᐃᐧᔮᓯᐋᐧᐤ ᑭᑯᓯᓴᐠ ᒥᓇ ᑭᑖᓂᓴᐠ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ ᑳ ᑭ ᒥᔨᐢᐠ; ᐊᓂᒪ ᐁ ᐃᐧᑫᐧᐢᑲᑲᐃᐧᔭᐣ ᒥᓇ ᐁ ᑭᐳᑌᐁᐧᐢᑳᑲᐃᐧᔭᐣ, ᑭ ᓄᑎᓈᑲᓇᐠ ᑫ ᐃᓯ ᑭᐳᑌᐁᐧᐢᑲᐢᑭᐠ. 54ᐁᑯᓯ ᒫᑲ ᐊᔨᓯᔨᓂᐤ ᐊᓇ ᑳ ᔪᐢᑳᑎᓯᐟ ᐃᑕ ᐁ ᐊᔮᔦᐠ, ᒥᓇ ᐊᔨᐋᐧᐠ ᑳ ᒪᓈᑎᓯᐟ, ᑭᑕ ᒫᔨᑲᓇᐋᐧᐸᒣᐤ ᐅᒋᐋᐧᒪ, ᒥᓇ ᐃᐧᐊᐧ ᑳ ᓵᑭᐦᐋᐟ, ᒥᓇ ᐊᓂᐦᐃ ᑳ ᐃᐢᑯᔨᐟ ᐅᐟ ᐊᐋᐧᓯᒥᓴ ᐊᓂᐦᐃ ᑳ ᐊᔮᐋᐧᐟ ᐁ ᐃᐢᑯᓀᔨᐟ; 55ᐁᑯᓯ ᓇᒪᐃᐧᔭ ᑭᑕ ᒥᔦᐤ ᓈᐣᑕᐤ ᐁᐊᐧᑯᓂ ᐅ ᐃᐧᔮᓯᔨᐤ ᐅᐟ ᐊᐋᐧᓯᒥᓴ ᑫ ᒧᐋᐧᐟ, ᒋᑫᒫ ᐁᑳ ᑫᑲᐧᐩ ᐁ ᐃᐢᑯᓇᒫᐦᐟ; ᐊᓂᒪ ᐁ ᐃᐧᑫᐧᐢᑳᑲᐃᐧᔭᐣ ᒥᓇ ᐁ ᑭᐳᑌᐁᐧᐢᑳᑲᐃᐧᔭᐣ ᑭ ᓄᑎᓈᑲᐣ ᑫ ᐃᓯ ᑭᐳᑌᐁᐧᐢᑳᐢᐠ ᑲᐦᑭᔭᐤ ᑭ ᑭᐦᒋᐃᐢᑳᑌᒥᕽ. 56#2 ᑭᐦᒋ ᐅᑭᒫᐊᐧᐠ 6:28,29; ᒥᐦᑖᑌᐧᐃᐧᓇ 4:10ᑳ ᔪᐢᑳᑎᓯᐟ ᒥᓇ ᑳ ᒪᓈᑎᓯᐟ ᐃᐢᑫᐧᐤ ᐃᑕ ᑳ ᐊᔮᔦᐠ, ᐊᓇ ᐊᐦᐳ ᑳ ᒪᓈ ᑕᐦᑯᐢᑫᐟ ᒧᐦᒋᕽ ᐁ ᐃᓯ ᔪᐢᑫᔨᑖᑯᓯᐟ ᒥᓇ ᒪᓇ ᐊᔮᐟ, ᑭᑕ ᒫᔨᑲᓇᐋᐧᐸᒣᐤ ᐅ ᓈᐯᒪ ᑳ ᓵᑭᐦᐋᐟ, ᒥᓇ ᐅᑯᓯᓴ, ᒥᓇ ᐅᑖᓂᓴ; 57ᒥᓇ ᐅᐢᑲᐋᐧᓯᓯᒪ ᐃᐧᔭᐃᐧᕽ ᑳ ᐅᐦᒋᔨᐟ, ᒥᓇ ᐅᐟ ᐊᐋᐧᓯᒥᓴ ᑫ ᓂᐦᑖᐃᐧᑭᐦᐋᐟ; ᒋᑫᒫ ᑭᑕ ᒧᐁᐧᐤ ᑭᒧᐨ ᑲᐦᑭᔭᐤ ᑫᑲᐧᐩ ᐁ ᑭᐧᑕᒫᐟ; ᐊᓂᒪ ᐁ ᐃᐧᑫᐧᐢᑳᑲᐃᐧᔭᐣ ᒥᓇ ᐁ ᑭᐳᑌᐁᐧᐢᑳᑲᐃᐧᔭᐣ, ᑭ ᓄᑎᓈᑲᐣ ᑫ ᐃᓯ ᑭᐳᑌᐁᐧᐢᑳᐢᐠ ᑭ ᑭᐦᒋᐃᐢᑳᐧᑌᒥᕽ.
58ᑭᐢᐱᐣ ᐁᑳ ᓈᑲᑌᔨᑕᒪᓂ ᑭᑕ ᐃᑐᑕᒪᐣ ᑲᐦᑭᔭᐤ ᐁ ᐃᑌᐧᒪᑲᕽ ᐅᒪ ᐅᔮᓱᐁᐧᐃᐧᐣ ᑳ ᒪᓯᓇᐃᑳᑌᐠ ᐅᑕ ᒪᓯᓇᐦᐃᑲᓂᕽ, ᑭᑕ ᑯᐢᑕᒪᐣ ᐅᒪ ᑳ ᑭᐢᑌᔨᑖᑲᐧᕽ ᒥᓇ ᑳ ᑯᐢᑖᑌᔨᑖᑲᐧᕽ ᐃᐧᔪᐃᐧᐣ, ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ. 59ᑳ ᑎᐯᔨᐦᒋᑫᐟ ᑭᑕ ᒫᒪᐢᑳᑌᔨᑖᑯᑖᐤ ᑭᐟ ᐋᔨᒪᐢᐱᓀᐃᐧᓇ, ᒥᓇ ᐅᐟ ᐋᔨᒫᐢᐱᓀᐃᐧᓂᐋᐧᐊᐧ ᑭ ᓂᐦᑖᐃᐧᑭᐦᐋᑲᓇᐠ, ᑭᐦᒋ ᐋᔨᒫᐢᐱᓀᐃᐧᓇ, ᒥᓇ ᑭᓀᐧᐢ ᐁ ᐱᒥᐸᔨᑭ, ᒥᓇ ᐁ ᐊᑲᐧᑭ ᐋᐦᑯᓯᐃᐧᓇ, ᒥᓇ ᑭᓀᐧᐢ ᐁ ᐱᒥᐸᔨᑭ. 60ᐁᑯᓯ ᒥᓇ ᑭ ᑲ ᐸᑭᑎᓇᒫᐠ ᑲᐦᑭᔭᐤ ᐃᒋᑊᐟ ᐃᑖᐢᐱᓀᐃᐧᓇ ᑳ ᑭ ᑯᐢᑕᒪᐣ; ᑭ ᑲ ᒥᒋᒥᐢᑳᑯᐣ ᒫᑲ. 61ᒥᓇ ᑲᐦᑭᔭᐤ ᐋᐦᑯᓯᐃᐧᐣ ᒥᓇ ᑲᐦᑭᔭᐤ ᐋᔨᒫᐢᐱᓀᐃᐧᐣ, ᐁᑳ ᑳ ᒪᓯᓇᐃᑳᑌᐠ ᒪᓯᓇᐦᐃᑲᓂᕽ ᐅᒪ ᐅᔭᓱᐁᐧᐃᐧᐣ, ᐁᐊᐧᑯᓂ ᑳ ᑎᐯᔨᐦᒋᑫᐟ ᑭ ᑲ ᐸᑭᑎᓇᒫᐠ, ᐱᔨᐢ ᑭᑕ ᓂᓯᐊᐧᓈᑎᓯᔭᐣ. 62ᐁᑯᓯ ᑭ ᑲ ᐃᐢᑯᐃᑲᐃᐧᓈᐋᐧᐤ ᐁ ᒐᑲᐊᐧᓯᓯᔦᐠ, ᐋᑕ ᑖᐱᐢᑯᐨ ᐊᒐᐦᑯᓴᐠ ᑭᓯᑯᐠ ᐁ ᑭ ᐃᓯ ᐅᓵᒣᔭᑎᔦᐠ; ᒋᑫᒫ ᐁᑳ ᐁ ᑭ ᓇᑐᐦᑕᒪᐧᐟ ᐅᐟ ᐃᑌᐧᐃᐧᐣ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ. 63ᐁᑯᓯ ᑭᑕ ᐃᐦᑭᐣ ᐊᓂᒪ ᑳ ᑎᐯᔨᐦᒋᑫᐟ ᑳ ᑭ ᐃᓯ ᒥᔦᐧᔨᑕᕽ ᑭᑕ ᒥᔪᑐᑖᐢᐠ, ᒥᓇ ᑭᑕ ᒥᐦᒉᑐᐃᐢᐠ; ᐁᑯᓯ ᑳ ᑎᐯᔨᐦᒋᑫᐟ ᑫ ᐃᓯ ᒥᔦᐧᔨᑕᕽ ᑭᑕ ᓂᓯᐊᐧᓈᒋᐃᐢᐠ ᒥᓇ ᑭᑕ ᒣᐦᒋᐃᐢᐠ; ᐁᑯᓯ ᑭ ᑲ ᒪᓂᐱᑎᑲᐃᐧᓈᐋᐧᐤ ᐁᑯᑕ ᐊᐢᑭᕽ ᐅᐦᒋ ᐃᑌ ᑳ ᐃᑐᐦᑌᔭᐣ ᑭᑕ ᑎᐯᔨᐦᑕᒪᐣ. 64ᑳ ᑎᐯᔨᐦᒋᑫᐟ ᒫᑲ ᑭ ᑲ ᓯᓭᐧᑎᓴᐦᐅᐠ ᒥᓯᐁᐧ ᐹᐱᑐᐢ ᐊᔨᓯᔨᓂᓈᕽ, ᓇᐸᑌ ᐁ ᑭᓯᐱ ᐊᔮᐠ ᐊᐢᑭ ᐅᐦᒋ ᐱᔨᐢ ᑫᐧᐢᑭ ᐁ ᑭᓯᐱ ᐊᔮᐠ; ᐁᑯᑕ ᒫᑲ ᑭ ᑲ ᐊᑐᐢᑲᐋᐊᐧᐠ ᑯᑕᑲᐠ ᒪᓂᑐᐊᐧᐠ, ᐁᑳ ᑳ ᑭ ᑭᐢᑫᔨᒪᒋᐠ, ᑭᔭ ᒥᓇ ᑯᑖᐃᐧᐸᓇᐠ, ᒥᐢᑎᐠ ᐅᑎ ᒥᓇ ᐊᓯᓂ. 65ᐃᑕ ᒫᑲ ᐁ ᐊᔮᒋᐠ ᐅᑭ ᐊᔨᓯᔨᓂᐊᐧᐠ ᓇᒪᐃᐧᔭ ᑭ ᑲ ᒥᐢᑫᐣ ᑕᑳᑫᔨᒧᐃᐧᐣ, ᒫᑲ ᑳ ᑎᐯᔨᐦᒋᑫᐟ ᑭ ᑲ ᒥᔨᐠ ᐁ ᓇᓇᒥᐸᔨᐠ ᒥᑌᐦ, ᒥᓇ ᐊᔦᐢᑳᐧᐱᐃᐧᐣ, ᒥᓇ ᒥᐦᒋᔭᐁᐧᔦᔨᑕᒧᐃᐧᐣ. 66ᐁᑯᓯ ᑭ ᐱᒫᑎᓯᐃᐧᐣ ᐊᐧᐋᐧᓀᔨᑕᒧᐃᐧᓂᕽ ᑭ ᑲ ᐅᐦᑎᐢᑲᐃᐧᐢᑳᑯᐣ; ᑭ ᑲ ᐊᐢᑖᓯᐣ ᒫᑲ ᐁ ᑎᐱᐢᑳᐠ ᒥᓇ ᐁ ᑭᓯᑳᐠ, ᓇᒪᐋᐧᐨ ᑭ ᑲ ᑫᐦᒋᓈᑖᐣ ᑭ ᐱᒫᑎᓯᐃᐧᐣ. 67ᐁ ᑫᑭᓭᐹᔮᐠ ᑭ ᑲ ᐃᑖᐧᐣ, ᐱᑕᓀ ᐅᑖᑯᓯᐠ! ᐁᑯᓯ ᐁ ᐅᑖᑯᓯᐠ ᑭ ᑲ ᐃᑖᐧᐣ, ᐱᑕᓀ ᑫᑭᓭᐹᔮᐠ! ᐊᓂᒪ ᓭᑭᓯᐃᐧᐣ ᐅᐦᒋ ᑭᑌᐦᐃᕽ ᑫ ᑯᐢᑕᒪᐣ, ᒥᓇ ᐊᓂᒪ ᑭᐢᑭᓯᑯᕽ ᑫ ᐅᐦᒋ ᐋᐧᐸᐦᑕᒪᐣ. 68ᑳ ᑎᐯᔨᐦᒋᑫᐟ ᒫᑲ ᑳᐃᐧ ᐃᒋᑊᑎᕽ ᑭ ᑲ ᐃᑐᑕᐃᐠ ᓈᐱᑳᐧᓂᕽ, ᐃᑌ ᐊᓂᒪ ᑳ ᑭ ᐃᑎᑖᐣ, ᓇᒪᐃᐧᑳᐨ ᒥᓇ ᑭ ᑲ ᐋᐧᐸᐦᑌᐣ; ᐁᑯᑕ ᒫᑲ ᑭ ᑲ ᐊᑖᐋᐧᑳᑎᓱᓈᐋᐧᐤ ᑭ ᓄᑎᓈᑲᓂᐋᐧᐊᐧᐠ ᑭᔭᐋᐧᐤ ᑭᑕ ᐅᐟ ᐊᐊᐧᑳᓂᒋᐠ ᒥᓇ ᑭᑕ ᐅᐟ ᐊᐊᐧᑳᓂᐢᑫᐧᒥᒋᐠ, ᐁᑯᓯ ᓇᒪᐃᐧᔭ ᐊᐃᐧᔭᐠ ᑭ ᑲ ᓄᐦᑌ ᑎᐸᐅᑯᐋᐧᐤ.
Currently Selected:
ᑎᔪᑕᕒᐊᓇᒥ 28: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
