ᓂᐢᑕᒼ ᓵᒼᔪᐃᓬ 6
6
1ᐊᓂᒪ ᒫᑲ ᐅ ᑭᐢᑭᓇᐋᐧᒋᐅᐃᐧᓂᐊᐧᐟ ᑳ ᑎᐯᔨᐦᒋᑫᐟ ᑭ ᐊᔮᔨᐤ ᐅᐟ ᐊᐢᑭᐋᐧᕽ ᐱᓬᐃᐢᑎᓇᐠ ᑌᐸᑯᑊ ᑕᐦᑐ ᐱᓯᒼ. 2ᐱᓬᐃᐢᑎᓇᐠ ᒫᑲ ᑭᐦ ᓇᑐᒣᐊᐧᐠ ᐊᔭᒥᐦᐁᐃᐧᔨᓂᐊ ᒥᓇ ᐅᐸᑯᓇᐋᐧᑖᐊᐧ, ᐁ ᐃᑖᒋᐠ, ᑖᓂᓯ ᑫ ᑐᑕᒫᐧᔮᕽ ᐅ ᑭᐢᑭᓇᐋᐧᒋᐅᐃᐧᓂᐊᐧᐟ ᑳ ᑎᐯᔨᐦᒋᑫᐟ? ᐃᐧᐦᑕᒪᐃᐧᓈᐣ ᑫᑲᐧᐩ ᑫ ᑭᑭ ᐃᓯᑎᓴᐦᐊᒫᕽ ᐃᑕ ᑳ ᑭ ᐊᔮᐠ. 3ᑭᐦ ᐃᑌᐧᔨᐊᐧ ᒫᑲ, ᑭᐢᐱᐣ ᑭ ᓯᐯᐧᑎᓴᐦᐊᒫᐧᓈᐋᐧᐤ ᐅ ᑭᐢᑭᓇᐋᐧᒋᐅᐃᐧᓂᐊᐧᑎᔨᐤ ᐅ ᑭᓭᒪᓂᑐᒪ ᐃᐢᕒᐁᐃᓬ, ᐁᑳᐃᐧᔭ ᐱᓯᓯᐠ ᓯᐯᐧᑎᓴᐦᐊᒪᐧᕽ; ᒫᑲ ᔮᔨᑌ ᑭᐁᐧᑕᑕᒫᕽ ᐊᐧᓂᑐᑕᒧᐃᐧᓂ ᐸᑭᑎᓈᓱᐃᐧᐣ; ᐁᑲᐧ ᑭ ᑲ ᐃᔨᓂᐦᑲᐦᐃᑲᐃᐧᓈᐋᐧᐤ, ᒥᓇ ᑭ ᑲ ᑭᐢᑫᔨᑌᓈᐋᐧᐤ ᑫᑲᐧᐩ ᐅᐦᒋ ᐁᑳ ᐳᓇ ᐹᐦᑕᑯᓂᑯᔦᑯ. 4ᐁᑲᐧ ᑭ ᐃᑌᐧᐊᐧᐠ, ᑫᑲᐧᐩ ᒫᑲ ᐅᒪ ᐊᐧᓂᑐᑕᒧᐃᐧᓂ ᐸᑭᑎᓇᓱᐃᐧᐣ ᑫ ᑭᐁᐧᑎᓴᐊᒪᐊᐧᑭᐦ? ᐁᑯᓯ ᑭ ᓇᐢᑫᐧᐊᐧᓯᐃᑲᐧᐠ, ᓂᔮᓇᐣ ᐅᓵᐃᐧᓱᓂᔮᐃᐧ ᐋᐦᑯᓯᐃᐧᓂᑳᓇᐠ, ᒥᓇ ᓂᔮᓇᐣ ᐅᓵᐃᐧᓱᓂᔮᐃᐧ ᐊᐸᑯᓯᓯᑳᓇᐠ, ᐁ ᐃᐦᑕᓯᔨᐟ ᐅᑭᒫᒥᐋᐧᐊᐧ ᐱᓬᐃᐢᑎᓇᐠ; ᒋᑫᒫ ᐯᔭᐠ ᐊᐦᑯᓯᐃᐧᐣ ᑭ ᑭ ᐊᔮᓈᐋᐧᐤ ᑭᔭᐋᐧᐤ ᒥᓇ ᑯᑭᒫᒥᐋᐧᐊᐧᐠ. 5ᐁᐊᐧᑯ ᐅᐦᒋ ᑭ ᑲ ᐅᓯᐦᑖᓈᐋᐧᐤ ᑭᐢᑭᓇᐋᐧᐨ ᐁ ᐃᓯᓈᑲᐧᑭ ᑭᐟ ᐋᐦᑯᓯᐃᐧᓂᐋᐧᐊᐧ, ᒥᓇ ᐁ ᐃᓯᓈᑯᓯᒋᐠ ᑭᐟ ᐋᐱᑯᓯᓯᒥᐋᐧᐊᐧᐠ ᑳ ᓂᓯᐊᐧᓈᒋᐦᑖᒋᐠ ᑭᐟ ᐊᐢᑭᐋᐧᐤ; ᑭ ᑲ ᒥᔮᐋᐧᐤ ᒫᑲ ᑭᐢᑕᑭᒥᑯᐃᐧᐣ ᐅ ᑭᓭᒪᓂᑐᒪ ᐃᐢᕒᐁᐃᓬ: ᑫᐧᓵᐧᐣ ᐁᑳ ᑫ ᔮᐦᑭᓇᒫᑯᔦᐠ ᐅᒋᐦᒋ, ᑭᔭᐋᐧᐤ ᒥᓇ ᑭ ᒪᓂᑐᒥᐋᐧᐊᐧᐠ ᒥᓇ ᑭᐟ ᐊᐢᑭᐋᐧᐤ. 6ᑖᓀᐦᑭ ᒫᑲ ᑳ ᒪᐢᑲᐃᐧᑖᔦᐠ ᑭ ᑌᐦᐃᐋᐧᐊᐧ, ᑖᐱᐢᑯᐨ ᐃᒋᑊᐟ ᐊᔨᓯᔨᓂᐊᐧᐠ ᒥᓇ ᐯᕒᐅ ᑳ ᑭᐦ ᐃᓯ ᒪᐢᑲᐃᐧᐦᑖᒋᐠ ᐅ ᑌᐦᐃᐋᐧᐊᐧ? ᐃᐢᐱ ᑳᐦ ᒪᒫᐦᑖᐃᐧ ᐊᑐᐢᑫᔨᐟ ᐃᑕ ᐁ ᐊᔮᒋᐠ ᓇᒪ ᒋ ᑭ ᐸᑭᑎᓀᐊᐧᐠ ᐊᓂᐦᐃ ᐊᔨᓯᔨᓂᐊᐧ, ᐁᑯᓯ ᑭ ᓯᐯᐧᐦᑌᔨᐊᐧ? 7ᐅᓯᐦᐃᕽ ᒫᑲ ᐅᐢᑭ ᑎᑎᐱᑖᐹᓇᐢᐠ, ᐁᑯᓯ ᐅᑎᓂᐦᑯᐠ ᓂᓱ ᐁ ᒣᑳᐧ ᔪᐦᔭᐊᐧᓱᒋᐠ ᐅᓂᒑᓂᐊᐧᐠ, ᐁᑳ ᐃᐧᐦᑳᐨ ᐁ ᐅᐦᒋ ᐅᑖᐸᐃᐦᒋᐠ, ᐅᔭᐱᑎᑯᐠ ᒫᑲ ᑎᑎᐱᑖᐹᓈᐢᑯᕽ, ᒫᑲ ᐃᐧᔭ ᒧᐢᑐᓱᓯᓴ ᐯ ᑭᐁᐧᑕᐃᒫᕽ: 8ᐁᑲᐧ ᐅᑎᓇᒫᐧᕽ ᐅ ᑭᐢᑭᓇᐋᐧᒋᐅᐃᐧᓂᐊᐧᐟ ᑳ ᑎᐯᔨᐦᒋᑫᐟ, ᒥᓇ ᐳᓯᑖᐠ ᑎᑎᐱᑖᐹᓈᐢᑯᕽ; ᐁᑯᑕ ᒫᑲ ᑭᑭ ᐊᐢᑖᐠ ᓱᓂᔮᐃᐧᐊᐧᑎᕽ ᐁ ᐊᓯᐊᐧᑌᑭ ᐊᓂᐦᐃ ᐅᓵᐃᐧᓱᓂᔮᐃᐧ ᐊᐧᐁᐧᓯᒋᑲᓇ ᑳ ᐃᐧ ᑭᐁᐧᑎᓴᐊᒣᐠ ᑭᑕ ᐊᐧᓂᑐᑕᒧᐃᐧᓂ ᐸᑭᑎᓈᓱᔦᐠ; ᓯᐯᐧᑎᓴᐦᐊᒧᐠ ᒫᑲ ᑭᑕ ᓯᐯᐧᑌᒪᑲᕽ. 9ᐋᐧᐸᐦᑕᒧᐠ ᒫᑲ, ᑭᐢᐱᐣ ᐃᑐᐦᑌᒪᑲᐦᑭ ᒥᑎᒣ ᐊᓂᒪ ᒣᐢᑲᓇᐤ ᑳ ᐃᑕᒧᔨᐠ ᐅᐟ ᐊᐢᑭᕽ ᐯᐟᓯᒣᓯᕽ, ᐃᐧᔭ ᐁᓵᓂ ᑲ ᑭ ᑐᑖᑯᔭᕽ ᐅᒪ ᑳ ᑭ ᑭᐦᒋ ᒫᔨᐸᔨᔭᕽ: ᒫᑲ ᑭᐢᐱᐣ ᓇᒪᐃᐧᔭ ᐁᑯᑌ ᐃᑐᐦᑌᒪᑲᐣ, ᐁᑲᐧ ᑭ ᑲ ᑭᐢᑫᔨᑌᓈᓇᐤ ᓇᒪᔦᐤ ᐃᐧᔭ ᐅᒋᐦᒋ ᑳ ᑭ ᑐᑖᑯᔭᕽ; ᓭᐦᑫ ᐁᓴ ᑳ ᑭ ᐃᓯ ᐅᑎᐦᑎᑯᔭᕽ.
10ᐊᓂᑭ ᐊᔨᓯᔨᓂᐊᐧᐠ ᒫᑲ ᐁᑯᓯ ᑭ ᐃᐦᑐᑕᒪᐧᐠ; ᐁ ᑭ ᐅᑎᓈᒋᐠ ᓂᓱ ᐅᓂᒑᓂᐊᐧ, ᒥᓇ ᐁ ᑭ ᐅᔭᐱᑖᒋᐠ ᑎᑎᐱᑖᐹᓈᐢᑯᕽ, ᒫᑲ ᑭ ᑭᐸᐁᐧᐊᐧᐠ ᒧᐢᑐᓱᓯᓴ ᐃᐧᑭᔨᕽ: 11ᑭ ᐳᓯᑖᐊᐧᐠ ᒫᑲ ᐅ ᑭᐢᑭᓇᐋᐧᒋᐅᐃᐧᓂᐊᐧᑎᔨᐤ ᑳ ᑎᐯᔨᐦᒋᑫᔨᐟ ᑎᑎᐱᑖᐹᓈᐢᑯᕽ, ᒥᓇ ᐊᓂᒪ ᓱᓂᔮᐃᐧᐊᐧᐟ ᐃᑕ ᐁ ᐊᓯᐊᐧᓱᔨᐟ ᐊᓂᐦᐃ ᐅᓵᐃᐧᓱᓂᔮᐃᐧ ᐋᐱᑯᓯᓯᑳᓇ, ᒥᓇ ᐋᑯᓯᐃᐧᓂᑳᓇ. 12ᐊᓂᑭ ᒫᑲ ᐅᓂᒑᓂᐊᐧᐠ ᑭ ᐊᑎ ᓯᐯᐧᐊᒣᐊᐧᐠ ᒣᐢᑲᓇᐤ ᑲᐧᔭᐢᐠ ᐁ ᐃᑕᒧᐠ ᐯᐟᓯᒣᓯᕽ, ᑭᐦᒋ ᒣᐢᑲᓇᐤ ᑭ ᐊᑎ ᒥᑎᒣᐊᐧᐠ, ᐁ ᐊᑎ ᑭᑐᒋᐠ ᐁᑳ ᐅᐦᐱᒣ ᐁ ᐃᑐᐦᑌᒋᐠ ᑭᐦᒋᓂᐢᑭᕽ ᐃᓯ ᐊᐦᐳ ᓇᒪᐦᑎᓂᕽ ᐁᓯ; ᐅᑭᒫᒥᐋᐧᐊᐧ ᒫᑲ ᐱᓬᐃᐢᑎᓇᐠ ᑭ ᐊᑎ ᓄᓴᐋᐧᐸᒣᔨᐊᐧ ᐱᔨᐢ ᐊᑎ ᐃᐢᑯ ᐯᐟᓯᒣᐢ ᐊᐢᑭ. 13ᐊᔨᓯᔨᓂᐊᐧᐠ ᒫᑲ ᐯᐟᓯᒣᓯᕽ ᑭ ᒣᑳᐧ ᒪᓂᓭᐧᐊᐧᐠ ᐅ ᐸᐦᑫᐧᓯᑲᓂᑳᓂᒥᐋᐧᐊᐧ ᐋᐧᔮᒪᑎᓈᕽ: ᑭ ᐃᑖᐱᐊᐧᐠ ᒫᑲ, ᐳᑎ ᐋᐧᐸᐦᑕᒪᐧᐠ ᑭᐢᑭᓇᐋᐧᒋᐅᐃᐧᓂᐊᐧᐟ, ᐁᑯᓯ ᒪᒪᐦᑖᑯᓯᐊᐧᐠ ᐁ ᐋᐧᐸᐦᑕᐦᑭᐠ. 14ᐊᓇ ᑎᑎᐱᑖᐹᓈᐢᐠ ᒫᑲ ᑭ ᐯ ᐃᐢᐸᔨᐤ ᐅ ᑭᐢᑎᑲᓂᕽ ᒑᐢᔪᐊ, ᐊᓇ ᐯᐟᓯᒥᓯᐃᐧᔨᓂᐤ, ᒥᓇ ᐁᑯᑕ ᑭ ᑭᐱᒋᐸᔨᐤ, ᐃᑕ ᒥᐢᑕᓯᓂ ᐁ ᐊᐱᐟ: ᑭ ᐱᑯᑲᐁᐧᐊᐧᐠ ᒫᑲ ᐊᓂᐦᐃ ᑎᑌᐱᑖᐹᓈᐢᑲᐧ ᐁ ᐳᓈᒋᐠ, ᐁᑯᓯ ᑭ ᐸᑭᑎᓈᓱᐊᐧᐠ ᐊᓂᐦᐃ ᐅᓂᒑᓂᐊᐧ ᐁ ᒪᒍᐢᑌᐊᒪᐋᐧᒋᐠ ᑳ ᑎᐯᔨᐦᒋᑫᔨᐟ. 15ᐁᑯᓯ ᓬᐃᐸᐃᑕᐠ ᑭ ᓂᐦᑎᓇᒪᐧᐠ ᐊᓂᒪ ᐅ ᑭᐢᑭᓇᐋᐧᒋᐅᐃᐧᓂᐊᐧᑎᔨᐤ ᑳ ᑎᐯᔨᐦᒋᑫᔨᐟ, ᒥᓇ ᐊᓂᒪ ᓱᓂᔮᐃᐧᐊᐧᐟ ᑳ ᑭᑲᐢᑎᔨᐠ, ᐃᑕ ᐊᓂᐦᐃ ᐅᓵᐃᐧᓱᓂᔮᐤ ᐅᓯᐦᒋᑲᓇ ᐁ ᐊᓯᐊᐧᑌᑭ, ᑭ ᐊᐢᑖᐊᐧᐠ ᒫᑲ ᒥᐢᑕᓯᓂᕽ: ᐁᑯᓯ ᐊᓂᑭ ᐊᔨᓯᔨᓂᐊᐧᐠ ᐯᐟᓯᒣᓯᕽ ᑭ ᒪᒍᐢᑌᐊᒪᐁᐧᐊᐧᐠ ᒪᒍᐢᑌᐦᐊᒫᑫᐃᐧᓇ ᒥᓇ ᑭ ᐸᑭᑎᓇᒪᐁᐧᐊᐧᐠ ᐸᑭᑎᓈᓱᐃᐧᓇ ᑳ ᑎᐯᔨᐦᒋᑫᔨᐟ ᐁᐊᐧᑳᓂᒪ ᐁ ᑭᓯᑳᐠ. 16ᐃᐢᐱ ᒫᑲ ᐊᓂᑭ ᓂᔮᓇᐣ ᐅᑭᒫᒥᐋᐧᐊᐧ ᐱᓬᐃᐢᑎᓇᐠ ᑳ ᐋᐧᐸᐦᑕᐦᑭᐠ, ᑭ ᑭᐁᐧᐊᐧᐠ ᐁᑲᕒᐊᓂᕽ ᐁᐊᐧᑳᓂᒪ ᐁ ᑭᓯᑳᐠ.
17ᐁᐊᐧᑲᐧᓂ ᒫᑲ ᐅᐦᐃ ᐅᓵᐃᐧᓱᓂᔮᐃᐧ ᐋᑯᓯᐃᐧᓂᑳᓇ ᐱᓬᐃᐢᑎᓇᐠ ᑳ ᑭᐦ ᑭᐁᐧᑎᓴᐊᒪᐋᐧᒋᐠ ᑳ ᑎᐯᔨᐦᒋᑫᔨᐟ ᐊᐧᓂᑐᑕᒧᐃᐧᓂ ᐸᑭᑎᓈᓱᐃᐧᐣ ᐁ ᐃᑕᑭᑕᑭᐠ, ᐯᔭᐠ ᐋᐢᑖᐟ ᐅᐦᒋ, ᐯᔭᐠ ᑫᓴ ᐅᐦᒋ, ᐯᔭᐠ ᐋᐢᑭᓬᐊᐣ ᐅᐦᒋ, ᐯᔭᐠ ᑳᐦᐟ ᐅᐦᒋ, ᐯᔭᐠ ᐁᑲᕒᐊᐣ ᐅᐦᒋ; 18ᒥᓇ ᐊᓂᐦᐃ ᐅᓵᐃᐧᓱᓂᔮᐃᐧ ᐋᐱᑯᓯᓯᑳᓇ, ᑕᐦᑐ ᒫᒪᐃᐧ ᐅᑌᓇᐃᐧᐋᐧᐊᐧ ᐱᓬᐃᐢᑎᓇᐠ ᐊᓂᑭ ᓂᔮᓇᐣ ᐅᑭᒫᐊᐧᐠ ᑳ ᑎᐯᔨᐦᑕᑭᐠ, ᐁ ᒣᓂᑭᑲᑌᑭ ᐅᑌᓇᐊᐧ, ᒥᓇ ᑭᐢᑎᑫᐃᐧ ᑭᐢᑕᐱᓈᓇ ᐱᔨᐢ ᐃᐢᑯ ᐊᓂᐦᐃ ᒥᐢᑕᓯᓂᔭ ᐃᑕ ᑳ ᑭ ᑌᐦᑕᐢᑖᐋᐧᒋᐠ ᐅ ᑭᐢᑭᓇᐋᐧᒋᐅᐃᐧᓂᐊᐧᑎᔨᐤ ᑳ ᑎᐯᔨᐦᒋᑫᔨᐟ; ᐁᐊᐧᑯ ᐊᓯᓂ ᑫᔮᐱᐨ ᐊᐱᐤ ᐅ ᑭᐢᑎᑳᓂᕽ ᒑᐢᔪᐊ ᐊᓇ ᐯᐦᐟᓯᒥᓯᐃᐧᔨᓂᐤ.
19ᑭ ᓂᓯᐊᐧᓈᒋᐁᐤ ᒫᑲ ᐊᔨᓯᔨᓂᐊᐧ ᐯᐟᓯᒣᓯᕽ, ᒋᑫᒫ ᐱᐦᒋ ᐁ ᑭ ᐃᑖᐱᔨᐟ ᐅ ᑭᐢᑭᓇᐋᐧᒋᐅᐃᐧᓂᐊᐧᑎᕽ ᑳ ᑎᐯᔨᐦᒋᑫᐟ, ᐃᐧᔭ ᑭ ᓂᓯᐊᐧᓈᒋᐁᐤ ᐊᔨᓯᔨᓂᐊ ᓂᔮᓇᓄᒥᑕᓇᐤ ᑕᐦᑐ ᑭᐦᒋ ᒥᑖᐦᑐᒥᑕᓇᐤ ᐊᔨᐋᐧᐠ ᑌᐸᑯᐦᐳᒥᑕᓇᐤ: ᐊᔨᓯᔨᓂᐊᐧᐠ ᒫᑲ ᒥᐢᑕᐦᐃ ᑭ ᒫᑐᐊᐧᐠ, ᒋᑫᒫ ᑳ ᑎᐯᔨᐦᒋᑫᔨᐟ ᐁ ᑭ ᓂᓯᐊᐧᓈᒋᐦᐋᔨᐟ ᒥᐦᒉᐟ ᐊᔨᓯᔨᓂᐊᐧ ᑭᐦᒋ ᓂᐸᑖᑫᐃᐧᐣ ᐅᐦᒋ. 20ᐯᐦᐟᓯᒣᐢ ᐊᔨᓯᔨᓂᐊᐧᐠ ᒫᑲ ᑭ ᐃᑌᐧᐊᐧᐠ, ᐊᐁᐧᓇ ᑫ ᑭ ᐅᐦᑎᐢᑲᐃᐧᑳᐸᐃᐧᐢᑕᐋᐧᐟ ᐅᐦᐃ ᑳ ᑲᓈᑎᓯᔨᐟ ᑳ ᑎᐯᔨᐦᒋᑫᔨᐟ ᑭᓭᒪᓂᑐᐊᐧ? ᒥᓇ ᐊᐁᐧᓂᐦᐃ ᑫ ᓈᑖᐟ ᑭᔮᓇᐤ ᑭ ᓇᑲᑎᑯᔭᑭ? 21ᑭ ᐃᑎᓴᐁᐧᐊᐧᐠ ᒫᑲ ᐊᐃᐧᔭ ᑭᑕ ᐃᐧᐦᑕᒪᐋᐧᔨᐟ ᐊᓂᐦᐃ ᑳ ᐅᐟ ᐊᐢᑭᔨᐟ ᑲᕒᒐᐦᐟᒋᐊᕒᐃᒥᕽ, ᐁ ᐃᑖᒋᐠ, ᐱᓬᐃᐢᑎᓇᐠ ᑭ ᐯᑖᐊᐧᐠ ᑳᐃᐧ ᐅ ᑭᐢᑭᓇᐋᐧᒋᐅᐃᐧᓂᐊᐧᑎᔨᐤ ᑳ ᑎᐯᔨᐦᒋᑫᔨᐟ: ᐯ ᐃᑐᐦᑌᐠ ᑭᔭᐋᐧᐤ, ᐯᒋ ᓈᑐᒣᐠ ᑭᑕ ᑭᐁᐧᑕᑖᔦᐠ.
Currently Selected:
ᓂᐢᑕᒼ ᓵᒼᔪᐃᓬ 6: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
