ᓂᐢᑕᒼ ᓵᒼᔪᐃᓬ 20
20
1ᑌᐱᐟ ᒫᑲ ᑭ ᓯᐯᐧᔮᒧ ᓀᔮᐦᑎᕽ ᐅᐦᒋ ᕒᐁᒪᐃᕽ, ᒥᓇ ᑭ ᐯ ᓇᑕᐃᐧ ᐃᑌᐧᐤ ᐁ ᐅᐦᑎᐢᑲᐃᐧᐢᑲᐋᐧᐟ ᒑᓇᐦᑕᓇ, ᑫᑲᐧᐩ ᑳ ᑐᑕᒫᐣ, ᑖᓈᓂᒪ ᓂ ᐊᐧᓂᑐᑕᒧᐃᐧᐣ? ᒥᓇ ᑫᑲᐧᐩ ᐁ ᑭ ᒪᒋᑐᑕᒫᐣ ᐃᐧᔮᐸᐦᑕᕽ ᑯᑖᐃᐧ, ᑳ ᓇᑐᓇᕽ ᓂ ᐱᒫᑎᓯᐃᐧᐣ? 2ᑭ ᐃᑎᐠ ᒫᑲ, ᓇᒪᐃᐧᔭ ᑭᑕ ᑭ ᐃᐦᑭᐣ; ᓇᒪᐃᐧᔭ ᑭ ᑲ ᓂᐱᐣ; ᒫᑎᑲ ᓇᒪᐃᐧᔭ ᑫᑲᐧᐩ ᐃᑐᑕᒼ ᓄᑖᐃᐧ ᐁ ᑭᐦᒉᔨᑖᑲᐧᓂᔨᐠ ᐊᐦᐳ ᐁ ᐊᐱᐢᑌᔨᑖᑲᐧᓂᔨᐠ, ᒫᑲ ᐱᑯ ᑭᑕ ᑭᐢᑫᔨᑕᒧᐃᐟ; ᑫᑲᐧᐩ ᒫᑲ ᐅᐦᒋ ᓄᑖᐃᐧ ᑫ ᑳᑐᐃᐧᐟ ᐅᒪ? ᓇᒪᐃᐧᔭ ᐁᑯᓯ ᐃᐦᑭᐣ. 3ᑌᐱᐟ ᒫᑲ ᑭ ᑭᐦᒋᐃᑌᐧᐤ ᒥᓇ, ᐁᑯᓯ ᑭ ᐃᑌᐧᐤ, ᑯᑖᐃᐧ ᒥᑐᓂ ᑭᐢᑫᔨᑕᒼ ᐁ ᑭ ᒥᐢᑲᒫᐣ ᑭᑕ ᒥᔪᑲᓇᐋᐧᐸᒥᔭᐣ; ᐁᑯᓯ ᐃᑌᐧᐤ, ᐁᑳᐃᐧᔭ ᒑᓇᐦᑕᐣ ᑭᑕ ᑭᐢᑫᔨᑕᒼ ᐅᒪ, ᒋᑫᒫ ᑭᑕ ᒥᐦᑖᑕᒼ; ᒫᑲ ᑖᐯᐧ ᐁ ᐱᒫᑎᓯᐟ ᑳ ᑎᐯᔨᐦᒋᑫᐟ ᒥᓇ ᐁ ᐱᒫᑎᓯᐟ ᑭᐟ ᐊᐦᒑᕽ, ᐱᑯ ᐯᔭᐠ ᐅᑕᐦᐊᒣᐃᐧᐣ ᓂᐟ ᐃᐢᐱᓵᐸᑌᐣ ᓂᐳᐃᐧᐣ. 4ᒑᓇᐦᑕᐣ ᒫᑲ ᐅᒥᓯ ᑭ ᐃᑌᐤ ᑌᐱᑕ, ᐱᑯ ᑫᑲᐧᐩ ᐁ ᓇᑕᐁᐧᔨᑕᒪᐣ ᑭᐟ ᐊᐦᒑᐦᑯᕽ ᑭ ᑲ ᐃᑐᑕᒫᑎᐣ. 5#ᓇᒼᐸᕒᐢ 28:11ᑌᐱᐟ ᒫᑲ ᑭ ᐃᑌᐤ ᒑᓇᐦᑕᓇ ᒫᑎᑲ, ᐋᐧᐸᐦᑭ ᐅᐢᑲᑯᒋᐣ ᐱᓯᒼ, ᐁᑯᓯ ᐃᑕᐢᑌᐤ ᑭᑕ ᐃᐧᑕᐱᒪᐠ ᑭᐦᒋ ᐅᑭᒫᐤ ᐁ ᒥᒋᓱᐟ; ᒫᑲ ᑭᔮᒼ ᐸᑭᑎᓂᐣ ᑭᑕ ᑲᓱᔮᐣ ᑭᐢᑎᑳᓂᕽ ᐃᐢᑯ ᐁ ᓂᐢᑐᑭᓯᑳᐠ ᐅᑖᑯᓯᑭ. 6ᑭᐢᐱᐣ ᒫᑲ ᑯᑖᐃᐧ ᑭᐧᑕᐁᐧᔨᒥᒋ, ᐁᑲᐧ ᐃᑌᐧ, ᑌᐱᐟ ᓱᐦᑭ ᓂ ᑭ ᑲᑫᐧᒋᒥᐠ ᑭᑕ ᐸᑭᑎᓇᐠ ᑭᑕ ᐃᐢᐸᑖᐟ ᐯᐟᓬᐃᐊᒥᕽ ᐅᐟ ᐅᑌᓈᕽ; ᒋᑫᒫ ᐅᑎᐦᒋᐸᔨᐤ ᑕᐦᑐ ᐊᐢᑭ ᑳ ᐸᑭᑎᓈᓱᒋᐠ ᒫᒪᐃᐧ ᐁ ᐃᓯ ᐋᐧᑯᑐᒋᐠ. 7ᑭᐢᐱᐣ ᒫᑲ ᐅᒥᓯ ᐃᑌᐧᒋ, ᐁᑯᓯ ᑲᐧᔭᐢᐠ; ᐯᔭᐦᑕᑫᔨᒧᐃᐧᐣ ᑭᑕ ᐊᔮᐤ ᑭᐟ ᐊᑐᐢᑫᔮᑲᐣ; ᒫᑲ ᐃᐧᔭ ᑭᐢᐱᐣ ᑭᓯᐋᐧᓯᒋ, ᐁᑲᐧ ᑭᐢᑫᔨᑕ ᒪᒋ ᑫᑲᐧᐩ ᐁ ᑭᓭᔨᑕᕽ. 8ᐁᑯᓯ ᒫᑲ ᑭᓭᐋᐧᑐᑕᐤ ᑭᐟ ᐊᑐᐢᑫᔮᑲᐣ; ᒋᑫᒫ ᑭ ᑭ ᐱᑐᑲᐋᐤ ᑭᐟ ᐊᑐᐢᑫᔮᑲᐣ ᑭᑕ ᐃᐧᒉᐃᐧᐢᐠ ᐅ ᐃᐧᒋᐦᐃᓯᒋᑫᒥᑐᐃᐧᓂᕽ ᑳ ᑎᐯᔨᐦᒋᑫᐟ; ᒫᑲ ᑭᐢᐱᐣ ᑫᑭᐢᑳᑯᐋᐧᓀ ᐊᐧᓂᑐᑕᒧᐃᐧᐣ, ᑭᔭ ᑭᔮᒼ ᓂᐸᐃᐣ; ᒋᑫᒫ ᑫᑲᐧᐩ ᐅᐦᒋ ᑫ ᐃᑐᑕᐃᔭᐣ ᐃᑕ ᐁ ᐊᔮᐟ ᑯᑖᐃᐧ? 9ᒑᓇᐦᑕᐣ ᒫᑲ ᑭ ᐃᑌᐧᐤ, ᓇᒪᐃᐧᔭ ᐁᐊᐧᑯ ᑭ ᑲ ᓭᓯᑫᐢᑳᑯᐣ; ᒋᑫᒫ ᑭᐢᐱᐣ ᓈᐣᑕᐤ ᑭᐢᑫᔨᑕᒫᐣ ᒪᒋ ᑫᑲᐧᐩ ᐁ ᑭᓭᔨᑕᕽ ᓄᑖᐃᐧ ᑭᑕ ᐅᑎᐦᑎᑯᔭᐣ ᓇᒪ ᒋ ᐁᑲᐧ ᑭ ᑲ ᐃᐧᐦᑕᒫᑎᐣ? 10ᐁᑲᐧ ᑌᐱᐟ ᑭ ᐃᑌᐤ ᒑᓇᐦᑕᓇ, ᐊᐁᐧᓇ ᑫ ᐃᐧᐦᑕᒪᐃᐧᐟ ᑭᐢᐱᐣ ᓈᐣᑕᐤ ᐃᓯ ᑯᑖᐃᐧ ᑭᓯᓇᐢᑫᐧᐊᐧᓯᐃᐢᑭ? 11ᒑᓇᐦᑕᐣ ᒫᑲ ᑭ ᐃᑌᐤ ᑌᐱᑕ, ᒫᐦᑎ ᑭᔮᒼ ᐃᑐᐦᑌᑖᐠ ᑭᐢᑎᑳᓂᕽ ᐁᑯᓯ ᑖᐱᐢᑯᐨ ᑭ ᐃᑐᐦᑌᐊᐧᐠ ᑭᐢᑎᑳᓂᕽ.
12ᒑᓇᐦᑕᐣ ᒫᑲ ᑭ ᐃᑌᐤ ᑌᐱᑕ, ᑳ ᑎᐯᔨᐦᒋᑫᐟ ᐅ ᑭᓭᒪᓂᑐᒪ ᐃᐢᕒᐁᐃᓬ ᑭᑕ ᐋᐧᐸᐦᑕᒼ, ᐃᐢᐱ ᑭ ᑲᑫᐧᒋᒪᑭ ᓄᑖᐃᐧ ᓈᐣᑕᐤ ᐅᒪ ᐃᑭᑭ ᐋᐧᐸᐦᑭ, ᐊᐦᐳ ᓂᐢᑐᑭᓯᑳᑭ, ᒫᑎᑲ, ᑭᐢᐱᐣ ᒥᔪ ᐃᑌᔨᒥᐦᒋ ᑌᐱᐟ, ᓇᒪ ᒋ ᑭ ᑲ ᐃᓯᑌᓴᐊᒫᑎᐣ ᑭᑕ ᑭᐢᑫᔨᑐᒧᐃᑖᐣ? 13ᑳ ᑎᐯᔨᐦᒋᑫᐟ ᐁᑯᓯ ᑭᑕ ᐃᐧ ᐃᑐᑕᐁᐧᐤ ᒑᓇᐦᑕᓇ, ᐊᐦᐳ ᐊᔨᐋᐧᐠ, ᑭᐢᐱᐣ ᐃᑌᔨᑕᑭ ᓄᑖᐃᐧ ᑭᑕ ᒫᔨᑐᑖᐢᐠ, ᑭᐢᐱᐣ ᒫᑲ ᐁᑳ ᑭᐢᑫᔨᑕᒧᐃᑖᓂ, ᒥᓇ ᓯᐯᐧᑎᓴᐅᑖᓂ, ᐯᔭᐦᑕᑫᔨᒧᐃᐧᓂᕽ ᑭᑕ ᓯᐯᐧᑌᔭᐣ; ᐁᑯᓯ ᑳ ᑎᐯᔨᐦᒋᑫᐟ ᑭ ᑲ ᐃᐧ ᐃᐧᒉᐃᐧᐠ ᑳ ᑭ ᐃᓯ ᐃᐧᒉᐋᐧᐟ ᓄᑖᐃᐧᔭ. 14ᐁᑯᓯ ᓇᒪᐃᐧᔭ ᐱᑯ ᒣᑳᐧᐨ ᐁ ᐱᒫᑎᓯᔮᐣ ᑭ ᑲ ᐋᐧᐸᐦᑕᐦᐃᐣ ᐅ ᑭᓭᐋᐧᑎᓯᐃᐧᐣ ᑳ ᑎᐯᔨᐦᒋᑫᐟ, ᐁᑳ ᑭᑕ ᓂᐱᔮᐣ; 15#2 ᓵᒼᔪᐃᓬ 9:1ᒫᑲ ᒥᓇ ᓇᒪᐃᐧᔭ ᑭ ᑲ ᒪᓂᓭᐣ ᑭ ᑭᓭᐋᐧᑎᓯᐃᐧᐣ ᓂᑭᕽ ᐅᐦᒋ ᑳᑭᑫ; ᓇᒪ, ᓇᒪᐃᐧᔭ ᐃᐢᐱ ᑳ ᑎᐯᔨᐦᒋᑫᐟ ᑭ ᒪᓂᐁᐧᐸᐋᐧᒋ ᑲᐦᑭᔭᐤ ᑳ ᐸᑳᐧᑎᑯᐟ ᑌᐱᐟ ᐊᐧᐢᑭᑕᐢᑲᒥᐠ ᐅᐦᒋ. 16ᐁᑯᓯ ᒑᓇᐦᑕᐣ ᑭ ᐃᐧᒋᐦᐃᓯᒋᑫᒣᐤ ᐅ ᐋᐧᐢᑳᐦᐃᑲᓂᔨᕽ ᑌᐱᑕ ᐁ ᐃᑌᐧᐟ, ᑳ ᑎᐯᔨᐦᒋᑫᐟ ᒫᑲ ᑭᑕ ᓇᑐᐢᑲᒪᐁᐧᐤ ᐅᒋᐦᒋᔨᕽ ᑳ ᐸᑳᐧᑎᑯᐟ ᑌᐱᐟ.
17ᐁᑯᓯ ᒑᓇᐦᑕᐣ ᑭ ᑭᐦᒋᐃᑌᐧᐁᐤ ᒥᓇ ᑌᐱᑕ, ᐊᓂᒪ ᐅᐦᒋ ᐁ ᐃᓯ ᓵᑭᐦᐋᐟ; ᒋᑫᒫ ᑭ ᓵᑭᐦᐁᐤ ᐁ ᐃᓯ ᓵᑭᐦᐋᐟ ᐃᐧᔭ ᐅᐟ ᐊᐦᒑᐦᑲᐧ. 18ᐁᑲᐧ ᒫᑲ ᒑᓇᐦᑕᐣ ᑭ ᐃᑌᐤ, ᐋᐧᐸᐦᑭ ᐁᐊᐧᑯ ᐁ ᐅᐢᑲᑯᒋᕽ ᐱᓯᒼ; ᐁᑯᓯ ᑭ ᑲ ᑭᐧᑕᐁᐧᔨᒥᑲᐃᐧᐣ, ᒋᑫᒫ ᑭᐟ ᐊᐱᐃᐧᐣ ᑭᑕ ᑕᐋᐧᐤ. 19ᐃᐢᐱ ᒫᑲ ᓂᐢᑐ ᑭᓯᑳᐊᐧ ᑭ ᐃᑕᓯ ᐊᔮᔭᓂ, ᑭᔨᐸ ᑭ ᑲ ᐃᑐᐦᑖᐣ, ᒥᓇ ᑭ ᑲ ᐅᑎᑌᐣ ᐃᑕ ᐊᓂᒪ ᑳ ᑭ ᑳᓱᔭᐣ ᒣᑳᐧᐨ ᐅᔦ ᑳ ᑭ ᐃᓯᐦᒋᑫᔭᕽ ᐁᑯᓯ ᑭ ᑲ ᐊᔮᐣ ᐊᓂᑕ ᒋᑭ ᐃᓯᓬ ᐊᓯᓂᕽ. 20ᓂ ᑲ ᐃᓯ ᐱᒧᑕᑳᐧᐣ ᒫᑲ ᓂᐢᑐ ᐊᑐᓯᓴ ᐅᐦᐱᒣ, ᑖᐱᐢᑯᐨ ᐁ ᑯᑕᐋᐢᑫᐧᔮᐣ. 21ᐁᑯᓯ ᒫᑎᑲ ᓂ ᑲ ᐃᓯᑎᓴᐋᐧᐤ ᐅᐢᑭᓂᑭᐢ, ᐁ ᐃᑕᐠ, ᓂᔮ, ᓂᑕᐃᐧ ᒥᐢᑲ ᐊᑐᓯᓴ. ᑭᐢᐱᐣ ᒫᑲ ᐃᑕᑭ ᐊᓇ ᐅᐢᑭᓂᑭᐢ, ᒫᑎᑲ, ᐊᑐᓯᓴ ᐅᑌ ᐃᑌᐦᑫ ᐊᔮᐊᐧ; ᐅᑎᓇ ᒥᓇ ᐯ ᐃᑐᐦᑌ, ᒋᑫᒫ ᐯᔭᐦᑕᑫᔨᒧᐃᐧᐣ ᑭᑕ ᐊᔮᔭᐣ ᓇᒪᐃᐧᔭ ᒫᑲ ᓈᐣᑕᐤ ᑭᑕ ᐃᑐᑖᑲᐃᐧᔭᐣ, ᐁ ᐃᓯ ᐱᒫᑎᓯᐟ ᑳ ᑎᐯᔨᐦᒋᑫᐟ. 22ᒫᑲ ᑭᐢᐱᐣ ᐅᒥᓯ ᐃᑕᑭ ᐊᓇ ᐅᐢᑭᓂᑭᐤ, ᒫᑎᑲ, ᐊᑐᓯᓴ ᐸᓯᐨ ᐊᔮᐊᐧ; ᓯᐯᐧᐦᑌ ᑭᔮᒼ; ᒋᑫᒫ ᑳ ᑎᐯᔨᐦᒋᑫᐟ ᑭ ᑭ ᓯᐯᐧᑎᓴᐦᐅᐠ. 23ᒫᑲ ᐃᐧᔭ ᐊᓂᒪ ᑳ ᑭ ᐊᔨᑎᑐᔭᕽ, ᒫᑎᑲ ᑳ ᑎᐯᔨᐦᒋᑫᐟ ᑭ ᑕᐢᑕᐃᐧᐢᑳᑯᓇᐤ ᑭᔭ ᒥᓇ ᓂᔭ ᑳᑭᑫ.
24ᐁᑯᓯ ᒫᑲ ᑌᐱᐟ ᑭ ᑳᓱ ᑭᐢᑎᑳᓂᕽ; ᐃᐢᐱ ᒫᑲ ᐁ ᐅᐢᑭ ᐱᓯᒧᐊᐧᕽ ᐁᐧᑎᐦᒋᐸᔨᐠ, ᑭᐦᒋ ᐅᑭᒫᐤ ᑭ ᓇᐦᐊᐱᐤ ᑭᑕ ᒥᒋᓱᐟ. 25ᑭᐦᒋ ᐅᑭᒫᐤ ᒫᑲ ᑭ ᐊᐱᐤ ᐅᐟ ᐊᐱᐃᐧᓂᕽ ᑖᐱᐢᑯᐨ ᑲᔭᐦᑌ, ᐊᓯᒋᑕᑳᕽ ᐃᓴ ᐱᑯ ᐊᐱᐃᐧᐣ ᑳ ᐊᔮᐠ; ᒑᓇᐦᑕᐣ ᒫᑲ ᑭ ᐸᓯᑯ, ᒥᓇ ᐋᑊᓇᕒ ᑭ ᐃᐧᑕᐱᒣᐤ ᓵᓬᐊ; ᒫᑲ ᑌᐱᐟ ᐅᐟ ᐊᐱᐃᐧᐣ ᑭ ᑕᐋᐧᔨᐤ. 26ᐁᔨᐁᐧᕽ ᒫᑲ ᓵᓬ ᓇᒪ ᓈᐣᑕᐤ ᑭ ᐃᑌᐧᐤ ᐁᑯᐢᐱ ᐁ ᑭᓯᑳᔨᐠ; ᒋᑫᒫ ᑭ ᐃᑌᔨᑕᒼ, ᓈᐣᑕᐤ ᑫᑲᐧᐩ ᑭ ᐃᐢᐸᔨᐃᐠ, ᓇᒪᐃᐧᔭ ᐯᑭᓯᑐᑫ, ᑫᐦᒋᓈ ᓇᒪᐃᐧᔭ ᐯᑭᓯᑐᑫ. 27ᒫᑲ ᑭ ᐊᔨᑭᐣ ᐃᐧᔮᐸᕽ, ᐁ ᑭ ᐳᓂ ᐅᐢᑲᑯᒋᕽ ᐱᓯᒼ ᐁᐊᐧᑳᐧᓂᒪ ᐁ ᓂᓱᑭᓯᑫᐧᓯᐟ, ᑌᐱᐟ ᐅᐟ ᐊᐱᐃᐧᐣ ᑭ ᑕᐋᐧᔨᐤ; ᐁᑯᓯ ᓵᓬ ᑭ ᐃᑌᐤ ᒑᓇᐦᑕᓇ ᐅᑯᓯᓴ, ᑖᓀᐦᑭ ᒉᓯ ᐅᑯᓯᓴ ᐁᑳ ᑳ ᐯ ᓇᑕᐃᐧ ᒥᒋᓱᐟ, ᐅᑖᑯᓯᕽ ᒥᓇ ᐊᓄᐦᐨ ᑳ ᑭᓯᑳᐠ? 28ᐁᑯᓯ ᒑᓇᐦᑕᐣ ᑭ ᓇᐢᑫᐧᐊᐧᓯᒣᐤ ᓵᓬᐊ, ᑌᐱᐟ ᓱᐦᑭ ᓂ ᑭ ᑲᑫᐧᒋᒥᐠ ᑭᑕ ᐸᑭᑎᓇᐠ ᑭᑕ ᐃᑐᐦᑌᐟ ᐯᐟᓬᐃᐊᒥᕽ; 29ᐅᒥᓯ ᒫᑲ ᑭ ᐃᑌᐧᐤ, ᐸᑭᑎᓂᐣ ᑭ ᐸᑯᓭᔨᒥᑎᐣ; ᒋᑫᒫ ᐁ ᐃᓯ ᐋᐧᑯᑐᔮᕽ ᐸᑭᑎᓈᓱᐃᐧᐣ ᓂᐟ ᐊᔮᓈᐣ ᐅᑌᓈᕽ; ᐁᑯᓯ ᓂᒋᐋᐧᒼ ᓂ ᑭ ᐃᑕᓱᐋᐧᑎᐠ ᐁᑯᑕ ᑭᑕ ᐊᔮᔮᐣ; ᐁᑲᐧ ᒫᑲ ᑭᐢᐱᐣ ᑳ ᒥᐢᑲᒧᐋᐧᓀ ᑭᑕ ᒥᔪ ᑲᓇᐋᐧᐸᒥᔭᐣ, ᑭᔮᒼ ᓂ ᑲ ᐸᑭᑎᓂᑲᐃᐧᐣ ᑭ ᐸᑯᓭᔨᒥᑎᐣ, ᑭᑕ ᓇᑕᐃᐧ ᐋᐧᐸᒪᑭᐠ ᓂᒋᐋᐧᒪᐠ. ᐁᐊᐧᑯ ᐅᐦᒋ ᓇᒪᐃᐧᔭ ᐯ ᐃᑐᐦᑌᐤ ᑭᐦᒋᐅᑭᒪᐊᐧ ᐅ ᒥᒋᓱᐃᐧᓈᑎᑯᔨᕽ.
30ᐁᑲᐧ ᓵᓬ ᑭ ᑭᓯᐢᑕᐁᐧᐤ ᒑᓇᐦᑕᓇ, ᑭ ᐃᑌᐤ ᒫᑲ, ᑭᔭ ᐅᑯᓯᓴ ᑳ ᒪᒋ ᒫᔦᔨᐦᒋᑫᐢᑭᐟ ᐃᐢᑫᐧᐤ ᓇᒪ ᒋ ᓂ ᑭᐢᑫᔨᑌᐣ ᐁ ᑭ ᓇᐊᐧᓱᓇᐟ ᐊᓇ ᒉᓯ ᐅᑯᓯᓴ ᑭᔭ ᑭᑕ ᓇᓀᐯᐃᐧᐦᐃᑲᐃᐧᔭᐣ ᒥᓇ ᑭᑕ ᓇᓀᐱᐃᐧᑖᐃᐧᐦᐟ ᑭᑳᐃᐧ ᐅ ᒧᓭᐢᑲᑌᐃᐧᐣ? 31ᒋᑫᒫ ᐃᐢᑯ ᐅᑯᓯᓴ ᒉᓯ ᐊᐧᐢᑭᑕᐢᑲᒥᐠ ᐁ ᐱᒫᑎᓯᐟ ᓇᒪᐃᐧᔭ ᑭ ᑲ ᐋᔮᑕᔨᑲᐃᐧᐣ ᒥᓇ ᑭ ᑭᐦᒋ ᐅᑭᒫᐃᐧᐃᐧᐣ. ᐁᑲᐧ ᒫᑲ ᐃᓯᑎᓴᐦᐅᐁᐧ ᑭᑕ ᐯᓯᐦᐟ ᐅᑕ ᑳ ᐊᔮᔮᐣ, ᒋᑫᒫ ᑫᐦᒋᓈ ᑭᑕ ᓂᐱᐤ. 32ᒑᓇᐦᑕᐣ ᒫᑲ ᑭ ᓇᐢᑫᐧᐊᐧᓯᒣᐤ ᓵᓬᐊ ᐅᑖᐃᐧᔭ, ᒥᓇ ᑭ ᐃᑌᐤ, ᑫᑲᐧᐩ ᐅᐦᒋ ᑫ ᓂᐸᐃᐦᐟ? ᑫᑲᐧᐩ ᑳ ᐃᑐᑕᕽ? 33ᓵᓬ ᒫᑲ ᑭ ᒋᑲᑳᐧᑌᐤ ᐅ ᑕᐦᑲᒋᑲᐣ ᑭᑕ ᓂᐸᐦᐋᐟ; ᐁᑯᑕ ᐅᐦᒋ ᒑᓇᐦᑕᐣ ᑭᐢᑫᔨᑕᒼ ᐁ ᑭᓭᔨᑕᒥᔨᐟ ᐅᑖᐃᐧᔭ ᑭᑕ ᓂᐸᐦᐋᔨᐟ ᑌᐱᑕ. 34ᐁᑯᓯ ᒑᓇᐦᑕᐣ ᑭ ᐸᓯᑯ ᒥᒋᓱᐃᐧᓈᑎᑯᕽ ᐅᐦᒋ ᐁ ᓵᐢᑭᔭᐁᐧᓯᐟ, ᐁᑯᓯ ᓇᒪᐃᐧᔭ ᑫᑲᐧᐩ ᒥᒋᐤ ᐊᓂᒪ ᐁ ᓂᓱᑭᓯᑫᐧᓯᔨᐟ ᐱᓯᒪᐧ; ᒋᑫᒫ ᑭ ᒥᐦᑖᑕᒪᐁᐧᐤ ᑌᐱᑕ, ᐃᐧᔭ ᐅᑖᐃᐧᔭ ᓇᓀᐱᐋᐧᑳᐨ ᐁ ᑭ ᐃᑐᑕᐋᐧᔨᐟ.
35ᑭ ᐊᔨᑭᐣ ᒫᑲ ᐁ ᑫᑭᓭᐹᔮᐠ, ᒑᓇᐦᑕᐣ ᑭ ᐊᐧᔭᐃᐧᐤ ᑭᐢᑎᑳᓂᕽ ᐃᑕ ᑳ ᑭ ᑭᐢᑭᑐᒋᐠ ᑌᐱᑕ, ᐁᑯᓯ ᐅᐢᑭᓂᑭᓴ ᐁ ᐃᐧᒉᐃᐧᑯᐟ. 36ᑭ ᐃᑌᐤ ᒫᑲ ᐅᐢᑭᓂᑭᒥᓴ, ᐃᐢᐸᑖ, ᓇᓈᑐᓇ ᐊᑐᓯᓴ ᑳ ᑭ ᐱᒧᑕᑫᐧᔮᐣ. ᐁᑯᓯ ᐁ ᐃᐢᐸᑖᔨᐟ ᐊᓂᐦᐃ ᐅᐢᑭᓂᑭᓴ, ᐹᓯᐨ ᓀᑌ ᑭ ᐃᓯ ᐳᒧᑕᑫᐧᐤ. 37ᐃᐢᐱ ᒫᑲ ᐊᓂᐦᐃ ᐅᐢᑭᓂᑭᓴ ᐁᐧᑎᑕᒥᔨᐟ ᐃᑕ ᒑᓇᐦᑕᐣ ᑳ ᑭ ᐃᓯ ᐱᒧᑕᑫᐧᐟ, ᒑᓇᐦᑕᐣ ᑭ ᑌᐹᐧᑌᐤ ᐅᐢᑭᓂᑭᓴ, ᓇᒪᒋ ᐹᓯᐨ ᑳ ᐊᔮᐠ ᐊᑐᓯᐢ? 38ᒑᓇᐦᑕᐣ ᒫᑲ ᑭ ᓄᓴᐃᐧ ᑌᐹᐧᑌᐤ ᐅᐢᑭᓂᑭᓴ, ᒥᐦᑲᐃᐧᑭ, ᑲᑫᐧᔮᐦᐅ, ᐁᑳᐃᐧᔭ ᐃᑕᓯ ᐊᔮ. ᒑᓇᐦᑕᐣ ᒫᑲ ᐅᐢᑭᓂᑭᒥᓴ ᑭ ᒧᓴᑭᓇᒼ ᐊᑐᓯᓴ, ᐁᑯᓯ ᑭ ᐯ ᓈᑌᐤ ᐅᐟ ᐅᑭᒫᒪ. 39ᒫᑲ ᐃᐧᔭ ᐊᓇ ᐅᐢᑭᓂᑭᓯᐢ ᓇᒪᐃᐧᔭ ᑫᑲᐧᐩ ᑭᐢᑫᔨᑕᒼ; ᐱᑯ ᒑᓇᐦᑕᐣ ᒥᓇ ᑌᐱᐟ ᑳ ᑭᐢᑫᔨᑕᐦᑭᐠ. 40ᒑᓇᐦᑕᐣ ᒫᑲ ᑭ ᒥᔦᐤ ᐅᐟ ᐊᓱᐃᐧᓇ ᐊᓂᐦᐃ ᐅᐢᑭᓂᑭᓴ, ᒥᓇ ᑭ ᐃᑌᐤ, ᓂᔮ, ᐅᑌᓈᕽ ᐃᑐᑕᑖ.
41ᓭᒫᐠ ᒫᑲ ᐅᐢᑭᓂᑭᓴ ᐁ ᑭ ᓯᐯᐧᑌᔨᐟ, ᑌᐱᐟ ᑭ ᐊᐧᓂᐢᑳᐤ ᐃᑕ ᐁ ᑭ ᑳᓱᐟ ᐅᐦᒋ ᓵᐊᐧᓄᑖᐠ ᐃᑌᐦᑫ, ᐁᑯᓯ ᒧᐦᒋᕽ ᑭ ᐃᑎᐢᑫᐧᐸᔨᐦᐅ, ᒥᓇ ᑭ ᓇᐊᐧᑭᐸᔨᐦᐅ ᓂᐢᑖᐧᐤ; ᐁᑯᓯ ᑭ ᐊᐧᔪᒉᑐᐊᐧᐠ, ᒥᓇ ᑭ ᒫᑐᐊᐧᐠ ᑖᐱᐢᑯᐨ, ᐱᔨᐢ ᑌᐱᐟ ᐊᔨᐋᐧᐠ ᐁ ᒫᑐᐟ. 42ᒑᓇᐦᑕᐣ ᒫᑲ ᑭ ᐃᑌᐤ ᑌᐱᑕ, ᐯᔭᐦᑕᑫᔨᒧᐃᐧᓂᕽ ᓯᐯᐧᐦᑌ, ᒋᑫᒫ ᐁ ᑭ ᑭᐦᒋᐃᑌᐧᔭᕽ ᑖᐱᐢᑯᐨ ᐅ ᐃᐧᔪᐃᐧᓂᕽ ᑳ ᑎᐯᔨᐦᒋᑫᐟ ᐁ ᐃᑌᐧᔭᕽ, ᑳ ᑎᐯᔨᐦᒋᑫᐟ ᑭ ᑲ ᐃᐧ ᑕᐢᑕᐃᐧᐢᑳᑯᓇᐤ ᑭᔭ ᒥᓇ ᓂᔭ, ᒥᓇ ᓂ ᓂᐦᑖᐃᐧᑭᐦᐋᑲᓇᐠ ᒥᓇ ᑭᔭ ᑭ ᓂᐦᑖᐃᐧᑭᐦᐋᑲᓇᐠ ᑳᑭᑫ. ᑭ ᐸᓯᑯ ᒫᑲ ᒥᓇ ᑭ ᓯᐯᐧᑌᐤ, ᐁᑯᓯ ᒑᓇᐦᑕᐣ ᑭ ᐱᐦᑐᑫᐤ ᐅᑌᓈᕽ.
Currently Selected:
ᓂᐢᑕᒼ ᓵᒼᔪᐃᓬ 20: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
