Рим 10
10
Жугьдарихьан уьрхювал абгуз шулу
1Гъардшар, узуз йиз кӀваантӀан жугьдар дюрхну ккундузуз, ва Аллагьдиз гьадрарихъан ккарагураза. 2Фицики узу шагьидвал апӀураза, чпи Аллагьдихъ юкӀв хъипну янашмиш шулашра, дурариз дюз рякъ аьгъдар. 3Гьаз гъапиш дурариз Аллагьди багъиш апӀру гьякьвал аьгъдайи, хъа чпин хусуси гьякьвал арайиз адабгъуз чарйир зигури, Аллагьдин гьякьвализ мютӀюгъ гъахьундар. 4Месигьди, гьарсар хъугъу кас Аллагьдин улихь гьякь апӀбан бадали, Къанундиз аьхир дебккну.
5Мусайи Къанундин гьякьваликан бикӀура:
«Къанундин табшуругъар тамам апӀрур
яшамиш хьиди».
6Гирами китабариъ хъугъувализ дилигну туврайи гьякьлували гьамци кӀура:
«Учву учвхьан мегьерханай: „Фуж аьршариз гъягъиди?“
душвʼан Месигь хъади гъюз?
7ва мегьерханай: Месигь гъийихдарин паччагьлугъдиан хъади гъюз,
„Фуж кӀан адрушваз гъягъиди?“»
8Фу дупна Гирами китабариъ? «Аллагьдин Гаф увухъди хъа, яв багахь хьа, думу яв ушвниин ал ва яв кӀваъ а», ва думу Гаф ухьу адмийириз улупурайи хъугъувал ву. 9Эгер уву яв ушвниинди: «Иса Агъа ву», – кӀури, Аллагьди Думу гъачӀидаригъян чӀиви гъапӀубдихъ, юкӀв хъипну, хъугъиш, уьрхидиву. 10Гьарсар, юкӀв хъипну, хъугърур, Аллагьдин улихь гьякь хьиди; ушвниинди чан хъугъуваликан ктибтрур уьрхиди. 11Фицики, Гирами китабари кӀура:
«Дугъахъ хъугърур беябур апӀуз хьибдар».
12Жугьдарна жара миллетар саб ву, фицики Агъара варидариз Сар ву, ва Чаз дих апӀру варидариз Дугъу ужʼвал тувру. 13«Гьарсар, Агъайиз дих апӀрур, уьрхиди».
14Хъа дурари чпи Хътругъруриз фици дих апӀиди? Фици чпиз Дерерхьрурихъ хъугъди? Хъа дурариз, Дугъкан сарикьан дарпиган, фици ебхьиди? 15Хъа фици Дугъкан ктибтиди, ктибтрур гьадраиш? Гирами китабариъ дибикӀнайиси:
«Фукьан гюрчег дарин Ужувлан хабар рабгърударин ликар!»
16Аммаки вари жугьдари му Ужувлан хабар ибак апӀури гъахьундар. Ишаяйи гъапну:
«Агъа, фуж хъугъну учу улупу аьгъюваларихъ?»
17Гьаци вуйиган, Ужувлан хабар гъеебхьиган, хъугъвал гъюру. Хъа Ужувлан хабар, Месигьдикан ктибтруган, гъюру.
18Амма узу кӀураза: «Дурариз Ужувлан хабар гъеебхьундарин?» ИкибаштӀан, гъеебхьну!
«Вари дюнʼя вуйибси дурарин дихар гъарагънийи
ва дурарин гафар
дюнʼяйин тлихъан кӀулихъна гъурукьнийи».
19Хъана кӀураза: «Израилин халкь мидин гъавриъ ахъундайкӀан?» Сифте Мусайин китабдиъ кӀура:
«Узу учвуъ гъизгъинвал ачмиш апӀидиза,
халкь ву дупну гьисаб апӀуз даршлу халкьдиинди.
Узу увук хъял капӀдиза,
шулайибдин гъавриъ адру халкьдиинди».
20Хъасин Ишаяйин китабдиъ кӀубанди кӀура:
«Узу дарагди гъахьидариз Узу гъидихъну.
Узу гьедрерхри гъахьидариз
Узу ачмиш гъахьунза»,
21хъа Израилин халкьдикан душваъ кӀура:
«МютӀюгъ даршлу ва хъпебехъру халкьдиз
вари йигъди Узу, хилар гьачӀаккну,
дих апӀури гъахьунза».
Currently Selected:
Рим 10: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
