Рим 9
9
Аллагь ва жугьдар
1Месигьдин гьякьнииндира гьякь кӀураза. Узу кучӀлар апӀурадарза, Гирами Рюгьну абцӀнайи йиз намус узуз шагьид ибшри: 2йиз кӀваъ зурба дерд ва кудудубкӀру иццрушин айиз. 3Йиз гъардшар, йиз миллет уьрхбан бадали, Узу Месигьдихьан гьудучӀвузра гьязур вуза. 4Йиз миллет Израил халкь ву. Дурариз Аллагьди Чан веледар кӀура. Аллагьдин ад, Аллагьдихъди гъийитӀу йикьрар, Мусайин Къанун, Аллагьдиз гъуллугъ апӀувал ва Аллагьдин Гаф гьаму халкьдиз тувнийи. 5Гьамрар ву ихь зурба абйирин наслар. Гьамрар ву варибдин зиин Аллагь вуйи, аьсрариан аьсрариз ужувлакк ккайи Месигьдин жилин хизан. Амин!
6Хъа му, Аллагьди Чав тувнайи гаф тамам гъапӀундар, кӀуру гаф дар. Дарди хьуз, Израиликан гъахьидар гьякь вуйи израил халкь ву, хъа вари ваъ. 7Гьеле дурар Ибрагьимдин наслар вушра, сабан, мици хьувалиинди, дурар вари Ибрагьимдин гьякь наслар дар. Фицики, Аллагьди гъапиганси, «Яв гьякь наслар ИсакьдикантӀан хьидар». 8Му гьаци кӀуру гаф вуки: Ибрагьимдилан бабкан гъахьи вари наслар Аллагьдин гьякь веледар дар, хъа анжагъ Ибрагьимдиз туву Аллагьдин гафналантина гъахьи веледар гьякь веледар ву. 9Туву гафнаъ магьа фу кӀураш: «Улупнайи вахтна Узу гъидиза ва Сарайиз бай хьиди».
10Хъа му сабан вариб дар. Гьацира Ревекайиз баяр айи ва дурарин сар адашра вуйи – ихь аба, Исакь. 11-12Ва кьюрид баяр бабкан хьайиз, дурари фукӀа-мукӀа ужуб, я харжиб апӀайиз улихьна, Аллагьди Ревекайиз гъапну: «Аьхюну бай бицӀирнурин гъуллугънаъ хьиди». Аллагьди мици дурар бабкан хьайиз улихьна гъапнийи, гьаз гъапиш, Аллагьди кадагънайи бай, Чав ният дапӀнайиганси кадагънайир хьпан бадали, хъа бали чав гъапӀубдиинди кадагъну дархьбан бадали. 13Гирами китабариъ дупнайиси: «Узуз Якьуб ккун гъахьунзуз, хъа Исаф – даккун».
14Гьамус фу пухьа? Аллагь дюз дарур шлуб дарки, гьаци дарин? ИкибаштӀан, шлуб дар! 15Фицики, Дугъу Мусайиз гъапну:
«Узу Узуз ккунириз ужʼвал дебккдиза
ва Узу Узуз ккунирин язухъ зигидиза».
16Гьаддиз, адмийирикан шлиз, чан тӀалабариз вая гъапӀу ляхнариз дилигди, ужʼвал апӀуруш, Аллагьди Чав гьял апӀуру. 17Гирами китабариъ дупнайиси, Аллагьди Египетдин паччагьдиз гъапну:
«Увлантина варидариз Йиз кьувват улупбан
ва Йиз ччвур вари дюнʼя вуйибси рабгъбан бадали,
увкан паччагь ктаур Узу вуза».
18Магьа гьамци Аллагьди, Чаз ккуниси, сариз ужʼвал апӀуру, сарик хъял капӀру.
19Мумкин ву, учву узуз гьамци пубра: «Эгер Аллагьди ихь ляхнариин аьхювал апӀураш, гьаз Дугъу ухьу тахсиркрар апӀура? Аллагьдин ниятариз фуж къаршу удучӀвидихъа?» 20Уву фуж вувахъа, инсан, Аллагьдихъди гьюжатар апӀуз? Мутмуйи учв гъапӀурихьан гьерхдар, аьхир, узу гьамциб уву гьаз гъапӀунва, кӀури? 21БатӀур гъабар апӀрурин хилиъ адаринхъа? Дугъу чаз ккун гъабшиш, гьадму гъурдсиб батӀрикан багьайин гъаб, ясана ужуз гажин апӀуру.
22Аллагьдиз Чан хъял улупуз ва Чан кьувват улупуз ккун гъабхьну, аммаки хъял капӀру, тӀанкь апӀуз гьязур вуйи ляхнар Дугъу сабурлуди аьгь гъапӀну. 23Дугъу мици Чан ккудудубкӀру ад, рягьимлувализ лайикь вуйи ва адлувал кьабул апӀуз гьязур дапӀнайи касариз улупуз гъапӀундайкӀан, яраб? 24Гьадму касар ухьу вухьа. Дугъу ухьу неинки жугьдаригъян, хъа миди вуйи халкьаригъян, дих дапӀну, гъядягъну. 25Гирами китабарикан Осийин китабдиъ дупна:
«Йиз халкь дарудариз
Узу Йиз халкь пидиза,
ва Узуз даккнириз
Йиз ккунир пидиза».
26«Аллагьди: „Учву Йиз халкь дарчва“
гъапи гьадму йишвʼин
дурариз чӀиви Аллагьдин веледар пиди».
27Ишаяйира Израилин халкьдихъанди гьарай апӀура:
«Гьеле Израилин веледарин кьадар
гьюлин кӀанаъ айи гъумкьан вушра,
дурарикан цӀиб кьадартӀан уьрхидар,
28фицики Аллагьди Чан ахиримжи суд
адмийирин зиин
ухди апӀиди».
29Ва Ишаяйи улихьмиди гъапиганси:
«Эгер Вариудукьру Агъайи ухьуз наслар гъитундайиш,
ухьуз шлубра
Содом ва Гомор шагьрариз гъабхьиб хьибдийи».
30Гьамус фу кӀуру? Гьякьвал дарабграйи жара миллетариз чпин хъугъувалилантина гьякьвал гъабхьну. 31Хъа Къанун тамам апӀури гьякьвал абгурайи Израилин халкьдиз гьякьвал гъабхьундар. 32Гьаз? Гьаз гъапиш дурариз гьякьвал ляхнарилантина абгуз ккун гъабхьну, хъа хъугъувалилантина ваъ. Дурар ликарикк ккабхъру гъвандихъ хъарсну, 33Гирами китабариъ дупнайиси:
«Лиг гьа,
Узу Сион дагъдиин
ликарикк ккабхъру Гъван дивдиза,
Гъван, гунагькрар хъарсру Гъван,
аммаки фуж Гьадгъахъ хъугъиш,
думу швумал хьидар».
Currently Selected:
Рим 9: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
