Насигьятар 7
7
1Жан бай, йиз гафарин гъайгъу зиг ва йиз насигьятар уьрх.
2Тамам апӀин йиз табшуругъар – хьидива яшамиш, йиз насигьятар уьрх – улин ниниси.
3Хъаъ дурар тӀубланси, дикӀ дурар яв кӀваъ.
4Аькьвлиз йип: «Уву узуз чиси вува!», ва фагьмихъди дуствал ккебгъ.
5Гьамци уьрхидива жвув жарарин хпирихьан, жилирихь хьайирин мани гафарихьан.
6Саб фици-вуш йиз улдариан гъилигунза, улдарин рукьаригъянтина лигуб гатӀабхьунза,
7ва авамарин арайиъ гъяркъюнзуз, жигьиларин арайиъ ккархьниз уларикк сар жигьил фагьумсуз.
8Думу ахънайи кючейиъ, гьацир дишагьли яшамиш шулайи, гьадму хуларихьинди дугъу рякъ дибиснайи –
9йигъ ккудубкӀуради лавландин вахтна, йишвандин чарчнаккди мучӀушнаъ.
10Хъа дугъан гъаншаризди дишагьли гъафи – чӀат ул айи дишагьлийин палат алди, кьаст ади,
11самбал алдрур, ягь адрур, ва хулаъра деъну сикин дарур:
12гагь думу гъюлягъ гъя, гагь гьар раццариъ а, ккеъну, гьарсаб мурччвахъ хъа.
13Думу жигьилихъан хъчӀиху, мак гъапӀу, ва гьяясузди атӀабццу машниинди гъапи:
14«Узу шадлугъназ вуди гъурбан#7:14 шадлугънан гъурбан – РАББИЙИЗ шадлугъназ вуди гъурбан гъапӀу гьяйванатдин саб пай убгури, хъа тмуну пай шадлугъариз гьадабгъури гъахьну. дапӀназа, РАББИЙИЗ туву гафар гъи тамам дапӀназа.
15Гьаддиз узу яв гъаншариз удучӀвназа, агури гъахьунзаву – гъидихъунзуз магьа.
16Чарчар илирчназа дахърушвʼин, египтарин гьар рангнан парчйирин.
17Ахниз йирчназа миррайин, алоэйин ва корицайин ниъ хъайи аьтрар.
18Гъач, кьукьнаъ ицциди гьириз хьидихьа, ккуниваликан бегьем кефер ктагъидихьа.
19Даршуз жилир адариз хулаъ: думу йишвариз душна ярхла,
20гъадабгъна чахьна кюсе пул айи, гъидар хулаз шайиз ваз цӀийи».
21Гьадму дишагьлийи гизаф уйинариинди думу жигьил чахьинди илтӀикӀу, кбалгру улхбари чахъинди гъапӀу.
22Гьадмусяаьт думу дугъахъди гъушу, йицси, убккуз гъабхурайи, миршси, ичӀазди абхърайи,
23абсрушваз кӀару ликӀраъ чӀимир; жакьвси, чулизди тӀибхурайи, учв уьмрихьан шулайиб дарди хабар.
24Гьаддиз магьа, хъебехъай узухъ, жан веледар, иб хъивай йиз гафарихъ:
25ваъ, илбибицри ичв юкӀв дугъан рякъюзди, мюуьргъянай дугъан жилгъйириъ!
26Гьаз гъапиш дахьну дугъхьан гизафдар, цӀиб адмийир дугъу пуч гъапӀундар.
27Дугъан хал – ву гъачӀидарин дюнʼяйиз жилгъа, аьжалин йишван ужагъарихьна рякъ.
Currently Selected:
Насигьятар 7: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
