Насигьятар 6
6
1Йиз бай! Эгер уву тмунурихъанди буржар тувуз гаф тувнаш, «Дугъхъанди пул тувурза» дупнаш, –
2жвуван хусуси гафнакк ккахъунву, жвуван хусуси гафну йисирвализ гъидисунву.
3Гьамци апӀин, жан бай, ккудучӀв, фицики сарун уву жарарин гьюкмиъ ава: ликарикк ккархь, миннат апӀин, кьяляхъ миван,
4хъутӀубкк нивкӀ жвувхъан, ул мииливан,
5жвув уьрх, чахъ хъачӀарккнайи жейрандиси, учв бисурайирихьан – жакьвлиси.
6Темпел! Гъарах зимзрахьна, дубгъ увуз дидхъан аькьюл:
7алдар дидʼин я регьбер, я аьхюр, я гьюкумдар,
8хъа диди хьадʼантӀан чаз хураг апӀура гьязур, игнарин вахтнара артухъ апӀура сурсатар.
9Фукьан дахъну гъузру, я темпел, вахт дарин нивкӀʼан хъергуз?
10Хъана цӀиб ахарва, улар мани апӀарва, хил хилʼин иливну хъана дусарва –
11ва гъибди увухьна касибвал, тӀафалси, аьжузвал гъибди тӀарашчиси.
12ЧӀурурин ва писурин кам шулдар кучӀал мелзналан:
13дурари я улариинди, я ликариинди, я тӀубариинди кучӀлин ишарйир улупиди.
14Дугъан кӀваъ харживал а, дугъан фикрариъ – чӀуру кьаст, варишвариъ дугъу ккергъру гъалмагъалар.
15Мидин кӀуллан дугъак бала кубкӀди, йикӀиди хабарсузди, кьяляхъ дяргъруси.
16Йирхьуб мутму РАББИЙИЗ дяркъну ккундар, ургубпибра ву Дугъаз хявишин:
17кялхъру лигуб, мелз кучӀлин, тахсир ктру ифи удубзру хилар,
18писвалин кьаст гьязур апӀурайи юкӀв, чӀуруб апӀуз тяди жаргъурайи ликар,
19кучӀлин ил хътабгъурайи шагьид, ва чвйирин арайиъ гъярхьувалар урзру кас.
20Жан бай! Адашдин илим уьбх ва дадайин насигьят мапӀан нигь.
21Гьарган дурар яв кӀваъди гъайих, жавагьирси гардандиъ ахь.
22Гъягърур гьадрари хъади гъахидиву, дахъдива ахуз, гьадрари уьрхидиву, хъергиган, увухъди улхиди дурар.
23Даршуз табшуругъ – лампа ву, аьгъювалар – акв ву, хъа кьатӀʼи насигьят – уьмрин жилгъа.
24Дурари ккадаидиву намуссуз дишагьлийиккан, жарарин хпирин иблис гафариккан.
25Алдатмиш апӀуз мигъитан дугъан гюрчегʼвалихьди яв юкӀв, йисир махьан дугъан уччву лигбарин.
26Фицики лицру дишагьлийин кьимат – уьлин чӀилли чӀукӀ, хъа жарарин хпирихъанди вари уьмрин тувдива кьимат.
27ГъятӀнихъ цӀа гьитӀибкӀуз шулин, ва палатдик ктрабхъди гъубзрин?
28Аржлариинди гъягъюз шулин, ва ликар дурургди гъузрин?
29Гьаци ву гъягърурра хпирихьна жарарин: хьибдар жаза адарди дугъак куркӀуриз.
30Гашʼвалиан чаз ипӀуз гьитӀибкӀурикан, аьйиб апӀури шулдар;
31хъа гъидисиш – ургубан артухъди зарал ккебкди, чан айи вари мутму тувди.
32Жарарин хпирихъди шлуриз фикир гьубкӀрадар – гьязур апӀура дугъу хусуси аьжал чаз.
33Зийнар ва гьяясузвал ккилибгура дугъаз, ва аьйиб – марцц апӀуз даршлу.
34Фицики жилир ургура гъанихвалиан, ва дугъу язухъ зигидар хъял алдабгъру йигъан;
35ккадауз шлу гьич саб кьиматназра хьидар рази, фукьан багъишар туврушра, гъузди наразиди.
Currently Selected:
Насигьятар 6: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
