Насигьятар 8
8
Аькьвлин тяриф
1Му Аькьвлин дих дайкӀан, ебхьурайиб дугъан фагьумлу сес дайкӀан?
2Тепейин кӀакӀниин рякъюхъ хъайи, рякъяр жара шлушвʼин думу дийигъна;
3гимихъ дих апӀура, шагьризди учӀврушвахъ гьарай ипна:
4– Учвуз, инсанар, дих апӀураза, йиз гьарай вари инсаниятдиз вуйиз!
5Уьмрин тажруба цӀибди айидар, фагьум апӀуз дубгъай, абдлар, фикрихьди ацӀай!
6Хъебехъай йиз чӀалнахъ заан, даршуз йиз ушвниин ализ дюзвал,
7гьякьʼвал деебтура мелзну йиз, ва хявиди ву писвал йиз ушвниз.
8Гьякьлу ву вари йиз улхбар, я иблисвал ктар дурарик, я алдатмишʼвал;
9фикир айириз ачухъди ву вари дурар, хликк кка дурар агрударин аьгъювалар.
10Йиз насигьят заанди бисай арстӀанна, аьгъювалар – зина ву багьа гъизилтӀанна.
11Даршуз аькьюл успагьиб ву, гьар рангнан багьа гъванартӀан, жвуваз ккуниб фукӀара дидихь ттевуз шулдар.
12Узу Аькьюл вуза. Узухъди хъа фагьум, узу гъадагъунза аьгъюваларна аьяндарвал.
13РАББИЙИХЬАН гучӀ хьайивал – писвализ вуйи хъял ву. Къурзлувал ва кялхъюб, писвалин жилгъа ва кучӀлин ушвар, узуз дяркъну ккундар.
14Узухь хьазухь теклиф, узухь хьазухь хъуркьувал, узу вуза фагьум, ва узухъди хъа кьувват.
15Узʼинди паччагьвал апӀура паччгьари ва дюзвал дебккра гьюкумдрари;
16узʼинди гъахура ляхнар регьбрари – аьхюдари ва вари жилин диванчйири.
17Шлиз узу ккундуш, думу узузра ккундузуз, ва шли узу агураш – дихъиди.
18Девлет ва ад – узухъди хъа – ккудудубкӀру арбабвал ва гьякьʼвал.
19Ужудар ву йиз йимишар багьа гъизилтӀан, узу зина вуза марцци арстӀан.
20Узу гъягъюраза гьякьлу жилгъайиъди, дюзвалин рякъяр-хулариъ,
21узу ккунидариз лайикь вуйибси тувуз ва дурарин хазнаханйир ацӀуз.
22РАББИЙИ Чан жилгъайин эвел узу гъапӀну, вари Чан ляхнартӀанна улихьна, дегьзаманайианмина.
23Узу арайиз гъафунза вахтарин эвеларианмина, дегьзаманайианмина, дюнʼяйин бин ккиврайиган.
24Сифтейин кӀан адрушв хьайиз ва штарин булагъар арццайиз – узу гъахьунзу;
25мегьел дагълар ва тепйир дурснадайи – арайиз гъяйиз узу –
26мегьел Дугъу дапӀнадайи жилин яркьушнар, я жилин рюкъ – сабпи карккьан!
27Узу душвахь хьайза: Дугъу аьршар дюзмиш апӀурайиган; кӀан ккадрушван гъирагъ дебккрайиган;
28Дугъу зиин дифар дерккрайиган; кӀан ккадрушван булагъар мюгькам апӀурайиган;
29Дугъу, штарихьан улдучӀвуз даршлу гьюлин дарг дебккрайиган; жилин бин ккиврайиган –
30Дугъахъди устаси узура хъайза; Дугъан гьарйигъандин шадвал вуйза; сикин дарди Дугъан улихь шадвалиъ айза –
31шадвалиъ айза дюнʼяйикан ва зурба шадвал ипнийза инсаниятдикан.
32Хъа гьамус узухъ хъебехъай, жан веледар: хушбахтаврар ву йиз жилгъйирихъан хъичӀихнайидар!
33Хъебехъай насигьятнахъ – хьидичва аькьюл ади, думу нигь мапӀанай.
34Хушбахтавар ву узухъ хъпехъурайир, йиз урчӀарихъ йишв ва йигъ адапӀурайир, йиз раккнарилан ул алдадабгърайир.
35Узу чаз гъадагъури – гъадабгъну уьмур, ва РАББИ хьиди дугъʼин рази.
36Хъа узуз къаршу вуйири, апӀура чав учв пуч: узу даккун апӀрур аьжал ккун апӀрур ву.
Currently Selected:
Насигьятар 8: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
