Насигьятар 11
11
1Ариш-веришдиъ кучӀал апӀуб РАББИЙИЗ хяви ву,
хъа дугъри терезар Дугъаз кьабулди ву.
2Фурс кайирикна гъибди аьйиб,
хъа фурс ктрурихьна гъибди аькьюл.
3Дугъри ксар гъахура чпин марццивали,
хъа хаинкрар йихура чпин кьастари.
4Кюмек апӀидар девлетну Диван апӀру Йигъан,
аммаки гьякьлували ккадаиди аьжаликкан.
5Гьякьлувалина марццивали гъахура диши рякъди,
хъа гьякьсуз алдакиди чан гьякьсузвалиъ.
6Гьякьлували уьрхюра дугъридар,
хъа чпин тямягьярин чулариъ а хаинкрар.
7Гьякьсузрихъди сабси, чан умудра йибкӀиди,
чӀуру касарин, чпи ккилигурайиб, убтӀиди.
8КубкӀидар бала, гьякьлуйик,
хъа ккахъди гьякьсуз дидикк.
9Аллагьсузрин мучӀмучӀи адми йикӀуб мумкин ву,
хъа аьгъювалари гьякьлу кас уьрхиди.
10Гьякьлуйиз ужуйи ву – шагьурра шад шула,
гъакӀну гьякьсузар – шадвалин гьарай ипна.
11Ужувлари тикмиш апӀура шагьур дугъри ксарин,
ва дабгъурира ву, улхбари гьякьсузарин.
12Абдли чӀур апӀура жарарин намус,
хъа гъавриъ айири эйвал апӀиди чан ушвнин.
13Жарадарин сирар ачухъ апӀура футнакри,
хъа гафкьан удубчӀвидар касдиан дугъри.
14Насигьят адру халкь йибкӀиди,
хъа теклиф дебккрудар бегьемди аш, уьбхиди.
15Жарарихъан буржар тувуз гаф тувиш, ккахъди балайикк,
гьялак дарур жарарихъан жаваб тувуз, ккахъидар дидикк.
16КӀваз мани дишагьлийи ад гъазанмиш апӀура,
хъа пис ксари девлет хъчӀюбхюра.
17Рягьимлувал кайири чаз хайир хуру,
хъа инсафсузри, чан чаина бала жалб апӀуру.
18Писуриз рубкьру пешкеш – кучӀлинуб,
хъа гьякьвал убзруриз – дугъривалинуб.
19Гьякьлувал – уьмур ву,
хъа писвалихъ хъайидар, аьжалихьна гъягърудар ву.
20Хяви ву РАББИЙИЗ иблис адмийир
ва кьабулди ву жилгъа ктрабцӀдар.
21Аьгъю йибхь: писуриз жаза гьададабтӀди гъибтдар,
хъа гьякьлуйирин насил дюрюбхди гъибтдар.
22Слин хъюхъниъ – гъизилин ппул,
гьациб ву фагьумсуз дишагьлийин уччвувалра.
23Гьякьлударин умудар илтӀикӀиди ужувлаз,
хъа гьякьсузарин миж – Заанурин хъюлаз.
24Сари пай апӀура – дугъан артухъ шула,
хъа жарар хъичӀихна – дугъан кам шула.
25АцӀди – хил хъибтнайир,
харгидар – жарариз убхъуз туврайир.
26Ризкь, кьимат за хьайиз, гьитӀибкӀну гъитуриз агьрар апӀиди,
хъа масу туврайир – ужувлакк ккахъди.
27Гъяниб абгруриз – гьюрмат бихъура,
чӀурубдихъ хъайири – дидиз чаина дих апӀура.
28Чан девлетнахъ йирфар хъирчнайир – ахъди,
хъа гьякьлудар чру шулайи гьарси хьиди.
29Чан ужагъдиина бала хрурин ирс ичӀи микӀтан хьибдар,
хъа ахмакь аькьюл айирин лукӀ хьиди.
30Гьякьвалин йимишдикан, уьмрин гьар ктубчӀвура,
ва юкӀварра инсанарин, аькьюл айири мютӀюгъ апӀура.
31Эгер гьякьлуйиз жилиин пешкеш тувраш,
гьелбетда гьякьсузризна гуннагькриз чпиз рубкьрубра тувди.
Currently Selected:
Насигьятар 11: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
