Насигьятар 10
10
Сулеймандин мисаларин сабпи гъварч
1Сулеймандин мисалар.
Аькьюл айи бай шадвал ву адашдиз,
хъа абдал бай дерд ву дадайиз.
2Хайир ктар гьякь дару девлетнакан,
хъа гьякьлували уьрхюра аьжалихьан.
3Гъитдар РАББИЙИ гьякьлур гашди
хъа гьякьсузриз чаз ккуниб тувидар.
4ТӀагъру хилари касибвал хуру,
хъа ляхнихь хьайи хилари – девлет.
5Хьадну жафа зигрур – аькьюллу бай,
иган гъябгъюради даахну шлуриз – аьйиб.
6Гьякьлуйириз адмийири берекет хьувал ккун апӀуру.
Гьякьсузарин мучӀмучӀиъ инсафсузвал ккепӀна.
7Гьякьлурикан кӀваин апӀуб ужʼвал ву,
хъа гьякьсузрин ччвур убтӀруб ву.
8Аькьюл айири кьабул апӀура насигьятар,
хъа ахмакьрин мучӀмучӀи балайихъна хиди.
9Сикин ву гъярайир диши рякъди,
хъа дугъри дарурин тӀулар ачухъ хьиди.
10Улариинди кучӀлин лишан апӀували гиран арайиз хибди,
хъа ахмакьрин мучӀмучӀи балайихъна хиди.
11Гьякьлуйин ушв – булагъ ву чӀививалин,
хъа мучӀмучӀиъ ккепӀна инсафсузвал гьякьсузарин.
12Даккнивали гъярхьувалар даргъуз гъитра,
хъа масанвали вари гунгьар ликрикк ккивра.
13Мелзниин яшамиш шула аькьюл фагьумлуйирин,
хъа бихъиди чӀвякъи тӀул йирфариз абдларин.
14Аькьюл айидари аьгъювалар уьрхюру,
хъа ахмакьрин улхбари пучʼвалихъна гъахуру.
15Девлетлуйиз девлет ву гъаласи,
хъа касибариз касибвал ву гъюрдарси.
16Гьякьлурин жафйир уьмур хрудар ву,
гьякьсузрин девлет гуннагь хруб ву.
17Насигьятарихъди гъягъюб – уьмрин жилгъа ву,
хъа иб тувдарш тахсрариз – улдугидиву.
18КучӀлин мучӀмучӀиъ ккепӀна гъалмагъал,
футнийир хьади лицрур – абдал.
19Гизаф гафар апӀрурик гуннагь кабхъди,
хъа цӀиб гафар апӀрур фикирлу кас ву.
20Гьякьлурин мелз – марцци арс ву,
хъа гьякьсузрин фикрарин кьимат фукьан шуйкӀан яраб?
21Гафари гьякьлурин гизафдариз ипӀруб тувру,
хъа ахмакьар чпин ахмакьвали йикӀуру.
22РАББИЙИН ужʼвали уву девлетлу апӀиди,
дерд сарун аьгъю хьибдар увуз дидихъди.
23Абдал нягьякьвалиин шад шулу,
хъа фагьумлурин шадʼвал – аькьюл ву.
24Гьякьсузарин гучӀбар улуркьиди,
ва ниятарра гьякьлуйирин тамам хьиди.
25ТӀурфан утӀубччвиди – имдар гьякьсуз,
хъа гьякьлур аьсрариз гъузди, шаксуз.
26Ушвниъ сиркеси, улариъ кумси –
гьаци ву лихуз даккнирра – эйсийиз.
27РАББИЙИХЬАН гучӀруриз – ярхи уьмрар,
хъа гьякьсузарин кудухна йисар.
28Миж кайивал шадвал ву гьякьлударин,
хъа йибкӀиди умуд гьякьсузарин.
29КацӀну адруриз РАББИЙИН жилгъа – чав уьрхрушв,
хъа писуриз – яман гучӀ, чав ахърушв.
30Аьсрариъ гьякьлурик фукӀа кабхъидар,
хъа гьякьсузарихьан жилиин ктирсуз хьибдар.
31Удубзура аькьюл гьякьлурин ушвниан,
хъа пис мелз адабтӀиди кьаблиан.
32Гьякьлуйин ушвниз аьгъя хайирлуб,
хъа мучӀмучӀариз гьякьсузарин – зараллуб.
Currently Selected:
Насигьятар 10: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
