Паччагьлугъар-4 9
9
Егьуйикан Израилин паччагь хьуз ччим ктатуб
1Элиш пайгъамбри чахь урхурайидарикан сариз дих гъапӀнийи ва гъапнийи:
– Чухайин канчӀар чӀуликк ккитӀишв, ччим айи гьаму гъаб гъадабгъ ва Галааддин Рамот шагьриз гъарах. 2Дина хъуркьиган, душваъ Югьушафатдин бай, Нимшийин худул Егьу аг. Дугъан багахьна гъарах ва дустарихьан жаради думу айтӀан хулаз хъади гъарах. 3Гьаму гъаб гъадабгъ, дугъан кӀулʼин ччим улубз ва йип: «Гьамци кӀура РАББИЙИ: „Узу увкан Израилин паччагь хьуз ччим ктатураза“». Хъасин раккин абцц ва, кьан дарапӀди, гьерг!
4Жигьил пайгъамбар Галааддин Рамотдиз гъушнийи. 5Думу дина гъафиган, дугъаз сатӀиди деънайи кьушмин аьхюрар гъяркънийи.
– Увуз хабар казук, кьушмин аьхюр, – гъапнийи дугъу.
– Учкан шлиз? – гьерхнийи Егьуйи.
– Увуз, – жаваб тувнийи дугъу.
6Егьу гъудужвнийи ва хулан айитӀинди гъушнийи. Пайгъамбри Егьуйин кӀулʼин ччим улубзнийи ва гъапнийи:
– Гьамци кӀура Израилин Заанур вуйи РАББИЙИ: «Узу увкан РАББИЙИН халкьдин, Израилин паччагь хьуз ччим ктатураза. 7Яв агъа вуйи Ахавдин тухум терг апӀин. Думу Йиз кьисас хьибди, фицики Ахавдин хпир Изавели Йиз пайгъамбрарин ва жара Йиз гъаравашарин ифи удубзну. 8Ахавдин вари тухум йибхиди. Узу Израилиъ Ахавдин вари жилижвувар – лукӀра, азад вуйирра – терг апӀидиза. 9Узу Ахавдин тухум Наватдин бай Яравамдин тухумдиз ва Ахияйин бай Баашайин тухумдиз ухшар апӀидиза. 10Хъа Изавел Изреел кӀуру йишваъ хуйири итӀиди, ва сарира думу накьвдик кивидар».
Гьаму гафар гъапи пайгъамбар, раккин абццну, гьергнийи. 11Егьу агъайин гъаравашарихьна гъафиган, дурарикан сари дугъхьан гьерхнийи:
– Вари ужуйи вуйин? Гьадму авали увухьна гьаз гъафнийи?
– Думу фицир инсан вуш ва дугъхьан фу пуз шулуш, учвузра аьгъячвуз, – жаваб тувнийи Егьуйи.
12– Ваъ, дици дар! – гъапнийи дурари. – Кидибт учуз.
Егьуйи гъапнийи:
– Дугъу узуз гъапнийи: «Гьамци кӀура РАББИЙИ: „Узу увкан Израилин паччагь хьуз ччим ктатураза“».
13Дурар гьялак гъахьнийи, чухйир гъадагънийи ва Егьуйин улихь умбрариъ дурар ккирчнийи. Хъасин дурари кӀарчсиб зурна гъивнийи ва чӀигъар гъапӀнийи:
– Егьу паччагь гъахьну!
Юрам паччагь йивну йикӀуб
14Югьушафатдин бай, Нимшийин худул Егьуйи Юрамдиз къаршуди жини йикьрар гъапӀнийи. (Юрамди ва Израилин вари кьушми Галааддин Рамот шагьур Арамдин паччагь Хазаилихьан уьбхюрайи. 15Амма Юрам паччагь Изреелиз, чаз Арамдин паччагь Хазаилихъди дявдиъ гъахьи зийнар сагъ апӀбан бадали, кьяляхъ дуфнайи.) Егьуйи гъапнийи:
– Эгер учву йиз тереф бисуруш, гьич саризра шагьриан удучӀвуз ва Изреелиъ хабар дабгъуз мигъитанай.
16Егьу дявдин фургъниъ эънийи ва Изреелиз гъушнийи, гьаз гъапиш душваъ зийнар духьнайи Юрам дахънайи, Ягьудайин паччагь Ахазия дугъʼин улуркьуз дуфнайи. 17Изреелиъ чӀвурдʼин али гъаравли, чаз Егьуйин эскрар фици багахь шулаш гъяркъиган, чӀигъ гъапӀнийи:
– Узуз эскрар рякъюразуз.
Юрамди амур гъапӀнийи:
– Дурариз гъаншарди атлу гьаъ. Гъит гьерхри: «Ислягьвалиинди вучва?»
18Атлу Егьуйиз гъаншарди гъушнийи, ва дугъу гъапнийи:
– Учву ислягьвалиинди вуш, паччагьди гьерхра.
– Яв ислягьвалихъ фу хъаяв? – жаваб тувнийи Егьуйи. – Узухъди гъач.
Гъаравли хабар дебккнийи:
– Чархачи дурарихьна гъурукьну, амма кьяляхъ хътаркурадар.
19Думуган паччагьди кьюрпи атлу гьаънийи. Дурарин багахь духьну, дугъу гъапнийи:
– Учву ислягьвалиинди вуш, паччагьди гьерхра.
– Яв ислягьвалихъ фу хъаяв? – жаваб тувнийи Егьуйи. – Узухъди гъач.
20Гъаравли хабар дебккнийи:
– Чархачи дурарихьна гъурукьну, амма кьяляхъ хътаркурадар. Хъа улихьди гьяйвниинди жаргъурайи инсан Нимшийин худул Егьуйиз ухшар ву. Дугъу деллу духьнайириси гьяйван хъапӀра.
21– Йиз дявдин фургъникк гьяйвнар ккитӀай, – амур гъапӀнийи Юрамди.
Фургъникк гьяйвнар ккитӀиган, Израилин паччагь Юрам ва Ягьудайин паччагь Ахазия дявдин фургънариъди Егьуйиз гъаншарди гъушнийи. Дурариз Егьу Изреелиан вуйи Навотдин вуди гъабхьи хутӀлиин алахънийи. 22Егьу дяркъну, Юрамди гьерхнийи:
– Уву ислягьвалиинди вува, Егьу?
– Бутариз ибадат апӀувал ва яв дада Изавелин сюгьюрчивал артухъ шули имиди, гьапӀру ислягьвал? – жаваб тувнийи Егьуйи.
23Юрам кьяляхъ илдицнийи ва, «Хаинвал гъапӀну, Ахазия!» чӀигъар апӀури, гьергуз хъюгънийи.
24Егьуйи деккуйиз гъизигнийи ва Юрамдин йирфарин арайиъ чӀимир гъивнийи. ЧӀимир дугъан кӀвак кубкӀнийи, ва думу дявдин фургъниъ кьамкьарихъди деънийи. 25Егьуйи чан гъуллугъчи Бидхъариз гъапнийи:
– За апӀин думу ва Изреелиан вуйи Навотдин вуди гъабхьи хутӀлиина гатӀахь. КӀваин илмияв, узуна уву дугъан адаш Ахавдихъди дявдин фургънарихъди гъягъюрайиган, РАББИЙИ дугъкан гьамцдар улихь ккимиди вуйи гафар гъапнийи. 26РАББИЙИ дугъаз гъапнийи: «Накь Узуз Навотдин ва дугъан баярин ифи гъябкъюнзуз, ва Узу увлан дидин кьисас чарасузди гьаму хутӀлиин алдабгъидиза». Гьаци вуйиган, за апӀин думу ва гьадму хутӀлиина гатӀархь, РАББИЙИН гафнаъ дупнайиганси.
Ахазияйин аьжал
27Гъабхьи ляхин дябкъну, Ягьудайин паччагь Ахазия Бет-Хагган шагьриз вуйи рякъюъди гьергнийи. Егьу дугъахъ, «Гьамура йивну йикӀай!» чӀигъар апӀури, хъергнийи. Инсанари Ахазияйиз Ивлеам шагьрин багахь хьайи Гур кӀуру машнакна за шлу рякъюъ зиян гъапӀнийи. Амма думу Мегиддо шагьриъ жин гъахьнийи. Душваъ думу гъакӀнийи. 28Гъаравашари думу дявдин фургъниъди Ерусалимдиз гъурхнийи ва Давуддин Шагьриъ чан архйирихъди гюмбетдиъ кивнийи. 29(Ахавдин бай Юрамдин паччагьвалин йицӀисадпи йисан Ягьудайин паччагь Ахазия вуди гъахьнийи.)
Изавел йикӀуб
30Егьу Изреелиз гъушнийи. Дидин гьякьнаан Изавелиз гъеебхьиган, дугъу уларикан рангар ктатнийи, кушар гъужвурхнийи, ва думу унчӀвхъан лигуз хъюгънийи. 31Егьу урнариан учӀвиган, Изавели гьерхнийи:
– Ислягьвалиинди уву дуфнава, чан агъа йивну гъакӀи кьюрпи Зимри#9:31 Зимри: Израилин паччагь Эла йивну гъакӀи ва дугъан ерина паччагь гъахьи кас (лиг 3 Пачч. 16:9-20).?
32Егьу унчӀваз гъилигнийи, ва дугъу гъапнийи:
– Узхъан фуж ву? Фуж?
УнчӀвʼан кьюр ясана шубур гъараваш гъилигнийи.
33– Думу исизди гатӀахьай! – гъапнийи Егьуйи.
Дурари Изавел унчвӀʼан исизди гатӀархьнийи, ва дугъан ифи цаларик ва гьяйвнарик кибчнийи. Гьяйвнари думу ликариккан гъапӀнийи.
34Егьу шагьриъ учӀвнийи, уьл гъипӀнийи, гъубхънийи. Хъасин дугъу гъапнийи:
– Гьадму няняти агай ва накьвдик кивай, фици вушра думу паччагьдин риш ву.
35Изавел накьвдик кивуз гъушиган, дугъан келлетӀан, ликартӀан ва хиларин кабартӀан фукӀа гъибихъундайи. 36Кьяляхъ гъафидари Егьуйиз ктибтнийи. Егьуйи гъапнийи:
– Му РАББИЙИ Тишбайиан вуйи Чан гъараваш Илʼясдин мелзналан гъапи гаф ву: «Изреелин жилʼин хуйири Изавелин жандак ипӀиди. 37Изавелин майит Изреелин жилиин хутӀлиъ айи пейинси хьибди, гьаци вуйиган, гьич сарира „Му Изавел ву“ пидар».
Currently Selected:
Паччагьлугъар-4 9: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
