Паччагьлугъар-4 10

Ахавдин тухум терг апӀуб

1Самарияйиъ Ахавдин ургцӀур бай айи. Егьуйи кагъзар гъидикӀнийи ва дурар Самарияйиз Изреелин гьюкумдрариз, гьюрматлу яшлуйириз ва Ахавдин баярин тербиячйириз хътаънийи. Дугъу кагъзиъ дибикӀнайи:

2– Учвухъди ичв паччагьдин баяр хъачвухъди, ичв дявдин фургънар ва гьяйвнар, мюгькам дапӀнайи шагьур ва яракь айичв. 3Гьаддиз ичв агъайин баярикан ужурсир ва лайикьлу вуйирсир кадагъай ва чан адашдин тахтниин дитай. Хъасин ичв агъайин тухум бадали дяви апӀинай.

4Амма дурариз лапра гизаф гучӀ гъабхьнийи, ва дурари гъапнийи:

– Кьюр паччагьдихьан дугъаз къаршуди дийигъуз гъабхьундар, хъа ухьхьан фици хьибди?

5Гъалайин ляхнариз лигрури, шагьрин гьюкумдри, гьюрматлу яшлуйири ва паччагьдин баярин тербиячйири Егьуйиз гьамци пуз гьаънийи:

– Учу яв гъаравашар вуча ва, уву фу гъапиш, гьадму апӀидича. Учу сарра паччагьди дерккидарча, уву лазим вуди гьисаб апӀруб вари апӀин.

6Думуган Егьуйи дурариз кьюбпи кагъаз гъибикӀнийи. Дидик кайи:

– Эгер учву йиз терефнаъ аш ва узухъ хъпехъуруш, ичв агъайин баярин кӀулар хьади закур гьаму вахтназ Изреелиз узухьна гъачай.

Паччагьдин ургцӀур бай дурариз тербия тувуб ихтибар дапӀнайи шагьрин варитӀан гьюрматлу инсанарихъди хъайи. 7Кагъаз гъафиган, думу гьюрматлу инсанари паччагьдин вари баяр гъурккнийи. Дурари паччагьдин баярин кӀулар гъярзинкйириъ ивнийи ва Егьуйихьна Изреелиз хътаънийи. 8Чархачийи, хъуркьиган, Егьуйиз хабар дебккнийи:

– Паччагьдин баярин кӀулар духна.

Егьуйи амур гъапӀнийи:

– Дурар шагьрин урнарин улихь кьюб чӀвеъди гвачӀниндиз дивай.

9Хъайигъан гвачӀнинган Егьуйи, халкьдихьна удучӀвну, гъапнийи:

– Учвук тахсир ктарчвук. Йиз агъайиз къаршуди удучӀвур ва думу йивну гъакӀир узу вуза, хъа гьамрар шли йивну гъакӀну? 10Гьаци, аьгъю йибхьай, Ахавдин тухумдиз къаршуди РАББИЙИ гъапи гьич саб гафра тамам дархьиди гъубзнадар. Чан гъараваш Илʼясдин мелзналан туву гаф РАББИЙИ тамам гъапӀну.

11Ва Егьуйи Изреелиъ Ахавдин тухумдикан гъузнайидар, дурарин заан гъуллугъчйирра, багахьлу дустарра ва бутариз гъуллугъ апӀурайидарра кади, йивну гъакӀнийи, сарра чӀивиди гъитундайи.

Егьуйи Ахазияйин ва Ахавдин багахьлуйир йивну йикӀуб

12Дидин кьяляхъ Егьу Самарияйиз рякъюъ учӀвнийи. Думу Бет-Экед-Гьаруим кӀуру йишвахь дийигънийи. 13Душвахь дугъаз Ягьудайин паччагь Ахазияйин багахьлуйир алахънийи. Дугъу дурарихьан гьерхнийи:

– Учву фужар вучва?

Дурари гъапнийи:

– Учу Ахазияйин багахьлуйир вуча ва паччагьдин баяриин ва Изавелин баяриин улуркьуз гъягъюрача.

14– Мурар чӀивиди имиди дисай! – амур гъапӀнийи дугъу.

Дурар – ягъчӀвурна кьюр кас – чӀивиди имиди гъидиснийи ва Бет-Экеддихь гъуйдихъ гъурккнийи. Дурарикан сарра дугъу чӀивиди гъитундайи.

15Душвхьан гъушган, дугъаз чаз гъаншарди гъюрайи Юнадав, Рехавдин бай, алахънийи. Егьуйи дугъаз салам тувнийи ва гъапнийи:

– Йиз юкӀв яв кӀваз фици вафалу вуш, гьаци яв юкӀв йиз кӀваз вафалу вуйинхъа?

– Ав, – жаваб тувнийи Юнадавди.

– Дици вуш, ча узухьна хил, – гъапнийи Егьуйи.

Юнадавди дугъахьна хил тувнийи, ва Егьуйи дугъаз дявдин фургъниъ учӀвуз кюмек гъапӀнийи. 16Егьуйи гъапнийи:

– Узухъди гъягъидихьа. Увуз, РАББИЙИХЬНА йиз гьисс фукьан гужлиб вуш, рябкъидивуз, – дугъу думу чан дявдин фургъниъди гъурхнийи.

17Егьуйи, Самарияйиз хъуркьиган, душваъ Ахавдин тухумдихъан гъузнайидар вари гъийихнийи. Дугъу дурар, РАББИЙИ Илʼяс пайгъамбриз гафнаъ дупнайиганси, гъийихнийи.

Егьуйи Баал бутдиз гъуллугъ апӀрудар терг апӀуб

18Дидин кьяляхъ Егьуйи вари халкь уч гъапӀнийи ва дурариз гъапнийи:

– Ахавди Баализ#10:18 Баал: ханаанарин кӀулин бут, чаз кюгьне вахтари ханаанари ибадат апӀури гъахьи завар рахбан бут. Думу гафнан мяна – «агъа, эйси». цӀибдитӀан гъуллугъ гъапӀундар – Егьуйи дидиз артухъди гъуллугъ апӀиди. 19Гьаци вуйиган, Баалин вари пайгъамбрариз, дидиз гъуллугъ апӀрудариз ва дидиз гъурбан апӀрудариз варидиз узухьна дих апӀинай. Лигай гьа, сарра гъидритди вари гъюри, гьаз гъапиш Баализ зурба гъурбан апӀуз ккундузуз.

Хъа Егьуйи, Баализ гъуллугъ апӀрудар вари терг апӀуз ккунди, аьмал ккайи ляхин апӀурайи. 20Дугъу гъапнийи:

– Баалин гьюрматназ машквран мярака мялум апӀинай.

Ва дурари машквран мяракайикан хабар тувнийи. 21Егьуйи вари Израилиъ хабар гъарабгънийи, ва Баализ гъуллугъ апӀрудар вари гъафнийи, дарфиди гъузур сарра гъахьундайи. Дурар Баалин ибадатханайиъ, думу саб кӀакӀнахъан тму кӀакӀнахъна абцӀайизкьан, уч гъахьнийи. 22Егьуйи палтар уьрхруриз гъапнийи:

– Баализ гъуллугъ апӀрудариз варидиз палтар акъин.

Ва дугъу дурариз палтар гъахнийи.

23Хъасин Егьу ва Рехавдин бай Юнадав Баалин ибадатханайиъ учӀвнийи. Егьуйи Баализ гъуллугъ апӀрудариз гъапнийи:

– Мушваъ РАББИЙИЗ гъуллугъ апӀрудар адарди, анжагъ Баализ гъуллугъ апӀрудар ади хьпан бадали, агай ва лигай.

24Хъасин Егьу ва Юнадав гъурбнар ва вариубгбан гъурбнар апӀуз ибадатханайиъ учӀвнийи. Хъа Егьуйи чӀат миржцӀур инсан дерккнийи. Дурариз улихьмиди гъапнийи:

– Эгер узу ичв хлиз туврайи гьаму инсанарикан фуж-вуш къутармиш хьуз учвкан шли гъитиш, дугъу чан уьмриинди жаваб тувиди.

25Чав вариубгбан гъурбан дапӀну ккудубкӀубси, Егьуйи гъаравлариз ва кьушмин аьхюрариз гъапнийи:

– УчӀвай ва вари йивну йихай, гъит, сарра къутармиш даришри.

Дурари Баализ гъуллугъ апӀрудар вари турарихъди гъийихнийи. Гъаравлар ва кьушмин аьхюрар, дурарин жандкар чӀатинди гатӀархьну, Баалин ибадатханайин айтӀан гирамишваз гъушнийи. 26Гъаравлари ва кьушмин аьхюрари Баалин ибадатханайиан гирами гъван адабгънийи ва думу цӀигъ гъипнийи. 27Дурари Баалин гирами гъван терг гъапӀнийи, Баалин ибадатхана гъарабгънийи ва думу гьяжатханайиз илтӀибкӀнийи. Гъира #10:27 Гъира: китаб гъибикӀу вахтнакан кӀура.думу йишв гьаци а.

28Израилиъ Баализ ибадатвал апӀувал Егьуйи гьаци арайиан терг гъапӀнийи. 29Амма думу Наватдин бай Яравамдин дугъу Израил ял гъапӀу гунгьарихьан ярхла гъахьундайи. Бет-Элин ва Дандин гъизилин жердюкьяриз ухшар айи бутариз ибадат апӀури имийи.

30РАББИЙИ Егьуйиз гъапнийи:

– Йиз улариъ уву дугъри ляхин, Ахавдин тухумдикан Узуз ккуниб, гъапӀунва. Гьаддиз яв наслар Израилин тахтниин юкьубпи кьамдихъна деиди.

31Амма Егьуйи Израилин Заанур вуйи РАББИЙИН Къанун кӀваантӀан тамам апӀурдайи. Думу Яравамдин дугъу Израил чпихьна ял гъапӀу гунгьарихьан гьидицундайи.

Егьуйи идара апӀбан аьхир

32-33Думу йигъари РАББИ Израилин жил цӀиб апӀуз хъюгънийи. Арамдин паччагь Хазаили Ярдан нирхъан ригъ гьудубчӀвру терефназ дурарин вари жилиин израилар дагъитмиш гъапӀнийи: Арнуна нирихъ хъайи Аруер шагьрихьан кафари терефнахъ хъайи Галаад ва Башан вилаятарин жилариин. Дурар Гаддин, Рувимдин ва Манасдин наслар яшамиш шулайи вилаятар вуйи.

34Егьуйи паччагьвал гъапӀу вахтнан жара гьядисйирикан ва дугъу гъапӀу ляхнарикан, дугъан вари гьунарарикан «Израилин паччгьарин тарихарин китабдиъ» дибикӀна.

35Егьу чан архйирихъди архаин гъахьнийи ва Самарияйиъ накьвдик кивнийи. Дугъан бай Яхаз дугъан кьяляхъ паччагь гъахьнийи. 36Самария шагьриъ яшамиш шули, Егьуйи Израилиин къанна миржид йисан паччагьвал гъапӀнийи.

Currently Selected:

Паччагьлугъар-4 10: ТабГК

Highlight

Copy