Паччагьлугъар-4 2

Илʼяс пайгъамбар завуз гъахуб

1РАББИЙИЗ Илʼяс пайгъамбар кулкихьди завуз гъахуз ккун гъабхьиган, Илʼяс ва Элиш Гилгалиан гъюрайи. 2Илʼяс пайгъамбри Элишдиз гъапнийи:

– Хаиш вуйиз, гьамушвахь гъуз, РАББИЙИЗ узу Бет-Эл шагьриз гьауз ккунда.

Амма Элишди гъапнийи:

– РАББИЙИИНДИ ва увʼинди ху апӀурза – узу увхъан хътаркидарза!

Ва дурар Бет-Элиз гъушнийи. 3Бет-Элиъ пайгъамбрарихь урхурайидар Элишдин улихьна гъафнийи, ва дурари гьерхнийи:

– РАББИЙИ увхьан гъи яв агъа гьадагъруб аьгъявуз?

– Аьгъязуз, – жаваб тувнийи дугъу. – Ккебехъай.

4Илʼяс пайгъамбри Элишдиз гъапнийи:

– Элиш, хаиш вуйиз, гьамушвахь гъуз, РАББИЙИ узу Ерихон шагьриз гьаъра.

Дугъу жаваб тувнийи:

– РАББИЙИИНДИ ва увʼинди ху апӀурза – узу увхъан хътаркидарза!

Ва дурар Ерихондиз гъушнийи. 5Ерихондиъ пайгъамбрарихь урхурайидар Элишдин багахьна гъафнийи, ва дурари гьерхнийи:

– РАББИЙИ гъи увхьан яв агъа гьадагъруб аьгъявуз?

– Аьгъязуз, – жаваб тувнийи дугъу. – Ккебехъай.

6Илʼяс пайгъамбри Элишдиз гъапнийи:

– Хаиш вуйиз, гьамушвахь гъуз, РАББИЙИ узу Ярдан нирихъна гьаъра.

Дугъу жаваб тувнийи:

– РАББИЙИИНДИ ва увʼинди ху апӀурза – узу увхъан хътаркидарза!

Ва дурари сатӀиди рякъ давам гъапӀнийи. 7Дурар кьюрид Ярдан нирихъ дийигъиган, пайгъамбрарихь урхурайидарикан хьуцӀур кас гъафнийи ва дурарихьан тинаси гъаншарди дийигънийи. 8Илʼяс пайгъамбри чуха хътибтнийи, думу гъибиржнийи ва штулан гъивнийи. Шид гагвлахъинди ва арччлахъинди гьудубчӀвнийи, ва дурар кьюридра гъеебццу жилиинди тму терефназди ктучӀвнийи. 9Дурар ктучӀвиган, Илʼяс пайгъамбри Элишдиз гъапнийи:

– Йип, узу увхьан гьадагъайиз, фу апӀуза увуз?

– Яв рюгь кьюб кьадарнаъди узухьна гъюруганси апӀин, – жаваб тувнийи Элишди.

10– Читин тӀалаб апӀурава, – гъапнийи Илʼяс пайгъамбри. – Узу увхьан фици гьадагъуруш увуз гъябкъиш, уву кӀурубси хьибди, хъа эгер дярябкъиш, хьибдар.

11Гьеле дурар гъягъюри ва дурари гафар апӀури имиди, сабпну цӀин фургъун ва цӀин гьяйвнар ашкар гъахьнийи. Дурари Илʼяс пайгъамбарна Элиш жара гъапӀнийи, ва Илʼяс пайгъамбар кулкихьди завуз гъурхнийи. 12Элиш гьаддиз лигуйи, ва дугъу чӀигъар апӀуйи:

– Йиз адаш! Йиз адаш! Израилин дявдин фургънар ва атлуйирин кьушум!

Хъа чахьан сарун Илʼяс пайгъамбар рякъюз даршлуган, чан палтарихъан хъичӀихнийи ва дурар гъячӀяргънийи. 13Дугъу Илʼяс пайгъамбрихъан хътабхъу чуха за гъапӀнийи, думу кьяляхъ гъушнийи ва Ярдан нирин гъирагъдихъ дийигънийи. 14Дугъу хътабхъу чуха шидлан гъивнийи, «РАББИ, Илʼяс пайгъамбрин Заанур гьамус наан а?» – гъапнийи дугъу.

Дугъу шидлан чуха гъивган, шид арччлахъинди ва гагвлахъинди жара гъабхьнийи, ва думу ниркан ктучӀвнийи.

15Гьаму ляхин гъябкъю Ерихондиан вуйи пайгъамбрарихь урхурайидари гъапнийи:

– Илʼяс пайгъамбрин рюгь Элишдиъ убчӀвну.

Дурар Элиш пайгъамбриз гъаншарди гъушнийи, ва дурари дугъаз жилиинакьан икрам гъапӀнийи.

16Дурари Элиш пайгъамбриз гъапнийи:

– Яв гъаравашарин хьуцӀур гъудуркьу жилижви а, ихтияр тув, дурар гъягъиди ва яв агъа, Илʼяс пайгъамбар, агиди. Белки, РАББИЙИН Рюгьну думу завариз за гъапӀну ва дагъларикан сабдиина ясана дерйирикан сабдизди гатӀархьнашул?

– Ваъ, – жаваб тувнийи Элиш пайгъамбри. – Дурар магьаанай.

17Амма дурар думу табигъ хьайиз ва гьамци пайизкьан гафниин дийигънийи:

– Гьаай дурар.

Ва дурари хьуцӀур жилижви гьаънийи, дурари шубуд йигъан Илʼяс пайгъамбар гъагнийи, амма гъидихъундайи. 18Ерихондиъ гъузнайи Элиш пайгъамбрихьна дурар гъафиган, дугъу дурариз гъапнийи:

– Мегер узу учвуз мягъянай гъапундайин?

Элиш пайгъамбрин аьламатар

19Шагьрин агьалйири Элиш пайгъамбриз гъапнийи:

– Агъа, увуз рябкъюравузки, гьаму шагьур ужуйи ерлешмиш дубхьна, амма мушваъ шид ужуб дар ва жил бегьерсузуб ву.

20– Узухьна цӀийи зах абкъинай, – гъапнийи дугъу, – ва дидиъ кьил абхьай.

Дурари дугъахьна захаъди кьил гъабхнийи. 21Элиш пайгъамбри, булагъдихъна дуфну, дидизди кьил гатӀабхьну, гъапнийи:

– Гьамци кӀура РАББИЙИ: «Узу му шид марцц гъапӀунза. Гьамусдихъантина саб вахтнара дидлантина я аьжал, я бегьерсузвал хьидар».

22Гъийин йигъазра#2:22 Гъийин йигъазра: китаб гъибикӀу вахтнакан кӀура. душваъ шид Элиш пайгъамбри гъапи гафниинди марццибди гъубзна.

23Душвʼан Элиш пайгъамбар Бет-Элиз гъушнийи. Думу рякъюъди гъягъюрайиган, шагьриан бицӀидар удучӀвнийи ва дугъʼин аьлхъюз хъюгънийи:

– Гьамлин дург, кечел! – чӀигъар апӀуйи дурари. – Гьамлин дург!

24Элиш пайгъамбар кьяляхъ илдицнийи ва дурарихьинди гъилигнийи, ва дурариз, РАББИЙИН ччвур дибисну, агь гъапӀнийи. Думуган ярквраан кьюб хпи швеъ удучӀвнийи, ва дурари баярикан ягъчӀвурна кьюр бай гъячӀяргънийи. 25Хъа Элиш пайгъамбар Кармил дагъдихъна гъушнийи ва душвʼан Самарияйиз кьяляхъ гъафнийи.

Currently Selected:

Паччагьлугъар-4 2: ТабГК

Highlight

Copy