Паччагьлугъар-4 1
1
Илʼяс пайгъамбар ва Ахазия паччагь
1Ахав кечмиш хьубхъан Муав уьлке Израилиз къаршуди удубчӀвнийи. 2Хъа Ахазия Самария шагьриъ айи чан хуларин заан мертебайин унчӀвʼан ахънийи ва дугъаз яман шикастар гъахьнийи. Дугъу чархачйир#1:2 Чархачи: табшуругъ хьади гьаънайир. гьаънийи ва гъапнийи:
– Гъарахай ва, гьаму шикастарихьан узу сагъ шулуш, Экрондин заанур Баал-Зевувдихьан гьерхай.
3Амма РАББИЙИН малайикди Тишбайиан вуйи Илʼяс пайгъамбриз гъапнийи:
– Самарияйин паччагьдин чархачйириз гъаншарди гъарах ва дурарихьан гьерх: «Учву Экрондин бут#1:3 Бут: Заанурси гьисаб апӀури гъахьир. Баал-Зевувдихьан#1:3 Баал-Зевув: китабдин автори, кялхъбан бадали, аьхириъ саб гьярф гьюдюхбиинди бут Баал-Зевуликан (эйси-агъа) «мизмизарин агъа» гъапӀну. гьерхуз гъягъюз, мегер Израилиъ Заанур адарин?» 4Гьаци, магьа РАББИЙИ фу кӀураш: «Уву дахънайи ахниккан гъудужвидарва. Уву мумкинсузди кечмиш хьидива!»
Ва Илʼяс пайгъамбар гъушнийи.
5Хъа чархачйир паччагьдихьна кьяляхъ гъафнийи, ва дугъу дурарихьан гьерхнийи:
– Гьаз ухди кьяляхъ гъафунчва?
6Дурари жаваб тувнийи:
– Учуз гъаншарди фуж-вуш сар инсан гъафнийи. Дугъу учуз гъапнийи: «Учву гьау паччагьдихьна кьяляхъ гъарахай ва дугъаз РАББИЙИ гьамци кӀура йипай: „Экрондин бут Баал-Зевувдихьан гьерхуз уву инсанар гьауз, мегер Израилиъ Заанур адарин? Гьаци, уву дахънайи ахниккан гъудужвидарва. Уву мумкинсузди кечмиш хьидива!“»
7Паччагьди дурарихьан гьерхнийи:
– Учвуз гъаншарди удучӀву ва гьаци гъапи инсан фициб юрушнан вуйи?
8Дурари жаваб тувнийи:
– Дугъʼин чӀар али гъидкьарин палтар алахьнайи, юкьваъ гъидкьин чӀул идибтӀнайи.
Паччагьди гъапнийи:
– Думу Тишбайиан вуйи Илʼяс ву.
9Дугъу Илʼяс пайгъамбрихьна хьуцӀур эскер хъади кьушмин аьхюр гьаънийи. Кьушмин аьхюр тепейин кӀакӀниин деънайи Илʼяс пайгъамбрихьна за гъахьнийи, ва дугъу Илʼяс пайгъамбриз гъапнийи:
– Заанурин инсан, паччагьди кӀура: «Исина кудучӀв!»
10Илʼяс пайгъамбри хьуцӀур эскрин аьхюриз жаваб тувнийи:
– Эгер узу Заанурин инсан вуш, гъит завариан цӀа гъюри, ва диди увуна яв инсанар ургри!
Ва цӀи, завариан дуфну, думу ва дугъан хьуцӀур эскер гъургнийи.
11Думуган паччагьди Илʼяс пайгъамбрихьна жара кьушмин аьхюр ва дугъан хьуцӀур эскер гьаънийи. Дугъу Илʼяс пайгъамбриз гъапнийи:
– Заанурин инсан, паччагьди гьамци кӀура: «Кьан дарапӀди, исина кудучӀв!»
12– Эгер узу Заанурин инсан вуш, – жаваб тувнийи Илʼяс пайгъамбри, – гъит завариан цӀа гъюри, ва диди увуна яв хьуцӀур кас ургри!
Ва Заанурин цӀи, завариан дуфну, думу ва дугъан хьуцӀур кас гъургнийи. 13Думуган паччагьди шубурпи кьушмин аьхюр чан хьуцӀур инсанар хъади гьаънийи.
Думу кьушмин аьхюр тепейиина за гъахьнийи ва Илʼяс пайгъамбрин улихь кьамкьарихъди дахънийи.
– Заанурин инсан, – ккарагнийи думу, – миннат вуйиз, яв гъаравашар вуйи йиз уьмриз ва гьаму хьуцӀур эскрин уьмрариз рягьим апӀин. 14Завариан гъафи цӀи садпи кьюр кьушмиш аьхюр ва дурарин эскрар гъургну аьхир. Йиз уьмриз рягьим апӀин!
15РАББИЙИН малайикди Илʼяс пайгъамбриз гъапнийи:
– Дугъахъди исина кудучӀв, дугъхьан гучӀ мапӀан.
Думуган Илʼяс пайгъамбар гъудужвнийи ва дугъахъди паччагьдихьна исина кудучӀвнийи. 16Илʼяс пайгъамбри паччагьдиз гъапнийи:
– Гьамци кӀура РАББИЙИ: «Мегер Израилиъ, Чахьан гьерхбан бадали, Заанур адарин? Уву чархачйир Экрондин бут Баал-Зевувдихьан гьерхуз гьауйва! Гьаддиз лигну уву яв дахънайи ахниккан гъудужвидарва. Уву мумкинсузди йикӀидива!»
17Ва Ахазия, Илʼяс пайгъамбри гъапи РАББИЙИН гафнаъси, кечмиш гъахьнийи. Ахазияйихъ бай хътарди хьпаз лигну, паччагьдин тахтниин Ахазияйин чве Юрам деънийи. Думу ляхин Югьушафатдин бай вуйи Ягьудайин паччагь Ярамдин паччагьвалин кьюдпи йисан гъабхьну.
18Ахазияйин паччагьвалин вахтнан жара гьядисйирикан ва дугъу гъапӀу ляхнарикан «Израилин паччгьарин тарихарин китабдиъ» дибикӀна.
Currently Selected:
Паччагьлугъар-4 1: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
