Паччагьлугъар-4 3
3
Израилин паччагь Юрам
1Ахавдин бай Юрам Ягьудайин паччагь Югьушафатдин паччагьлугъвалин йицӀимиржидпи йисан Израилин паччагь гъахьнийи. Дугъу Самарияйиъ йицӀикьюд йисан паччагьвал гъапӀнийи. 2Дугъу РАББИЙИН уларикк писвал апӀуйи, амма чан адашдиси ва дадайиси ваъ. Дугъу чан адашди диву Баалин#3:2 Баал: ханаанарин кӀулин бут, чаз кюгьне вахтари ханаанари ибадат апӀури гъахьи завар рахбан бут. Думу гафнан мяна – «агъа, эйси». гирами гъван гатӀабхьнийи. 3Гьаци вушра, дугъу Наватдин бай Яравамди гъапӀу ва дугъу Израил чина ял гъапӀу гунгьар апӀуйи. Думу дурарихьан ярхла шулдайи.
Муав магълуб хьувал
4Муавдин паччагь Мешайи чарвйир уьрхюйи ва Израилин паччагьдиз варж агъзур ччил ва варж агъзур якъралан хьа харж тувну ккундийи.
5Амма Ахав кечмиш хьубхъан Муавдин паччагь Израилин паччагьдиз къаршуди удучӀвнийи. 6Думуган Юрам паччагь Самарияйиан удучӀвнийи, ва дугъу израил вари кьушум уч гъапӀнийи. 7Гьацира дугъу Ягьудайин паччагь Югьушафатдикна гьамци пуз чархачйир гьаънийи:
– Муавдин паччагь узуз къаршуди удучӀвна. Узухъди Муавдиз къаршуди дяви апӀуз гъягъидива?
– Гъидиза, – жаваб тувнийи дугъу. – Уву фу апӀуруш, узура гьадму апӀурза, йиз халкь – яв халкь, йиз гьяйвнар – яв гьяйвнар.
8Хъасин дугъу гьерхнийи:
– Ухьу фуну рякъюъди гъягъиди?
Юрамди жаваб тувнийи:
– Эдум вилаятдин буш чюлиъди.
9Израилин паччагь Ягьудайин паччагьдихъди ва Эдумдин паччагьдихъди рякъюъ учӀвнийи. Хълицбахъ вуйи рякъюъди ургуд йигъан гъягъбахъан кьушмиз я чпиз, я чпихъди хъайи гьяйванатариз шид имдайи.
10– Бала! – гьарай гъапӀнийи Израилин паччагьди. – РАББИЙИ учу, шубур паччагь, Муавдин хилиз тувуз уч гъапӀну!
11Амма Югьушафатди гьерхнийи:
– Мегер мушвахь чалантина РАББИЙИХЬАН гьерхуз РАББИЙИН пайгъамбар хьтарин?
Израилин паччагьдин гъаравашарикан сари жаваб тувнийи:
– Мушвахь Шафатдин бай Элиш пайгъамбар хьа. Думу Илʼяс пайгъамбрин кюмекчи вуди гъахьну.
12Югьушафатди гъапнийи:
– Дугъахь РАББИЙИН гаф хьа.
Думуган Израилин паччагь, Югьушафат ва Эдумдин паччагь дугъахьна гъушнийи.
13Элиш пайгъамбри Израилин паччагьдиз гъапнийи:
– Ич увухъди сатӀланди вуйиб фу а? Яв адашдин ва яв дадайин пайгъамбрарихьна гъарах.
– Ваъ, – жаваб тувнийи Израилин паччагьди, – мина учу, шубур паччагь, Муавдин хилариз тувбан бадали РАББИЙИ уч дапӀна аьхир.
14Элиш пайгъамбри жаваб тувнийи:
– Узу гъуллугъ апӀурайи Заварин Кьувватарин Аьхюриинди ху апӀурза, Ягьудайин паччагь Югьушафатдиз узу гьюрмат апӀури адайиш, увухьинди улкьан гатӀабхьидайза, гьятта лигидикьан дайза. 15Хъа гьамус узухьна арфа йивру кьавал акъинай.
Ва кьавли арфа йивруган, Элиш пайгъамбрихьна РАББИЙИН кьувват гъафнийи. 16Ва дугъу гъапнийи:
– Гьамци кӀура РАББИЙИ: «Гьаму вари дерейиъ ичӀар ерккай». 17Гьаз гъапиш, гьамци кӀура РАББИЙИ: «Учвуз я микӀ, я мархь рякъидарчвуз, амма му дере шту абцӀиди, ва учвура, ичв мал-къарайира шид убхъидичва». 18Дици апӀуз РАББИЙИЗ рягьятди ву, Дугъу Муавра ичв хилариз тувиди. 19Учву вари мюгькам дапӀнайи ва аьхю шагьрар дисидичва. Учву ужудар гьарар алдатӀидичва, шид айи гъуййир пуч апӀидичва ва ужудар хутӀлариз гъванар гатӀархьидичва.
20Хъайигъан гвачӀнинган, гъурбан апӀру вахтна, Эдумдин терефнаан шид гъафнийи. Ва жил шту абцӀнийи. 21Хъа Муавдин халкьдиз паччгьар чпихъди дяви апӀуз гъюрайиваликан деебхьнайи. Вари жилижвувар, кьабидарра, жигьиларра, уч гъапӀнийи ва сяргьятдихъ дерккнийи. 22ГвачӀнин ухди дурар гъудужвиган, ригъди шидʼин акв туврайи, ва шид муавариз ифиси уьруди гьугъубжвнийи.
23– Му ифи ву! – гъапнийи дурари. – Паччгьари дяви гъапӀну хьиди ва сари сар йивну гъакӀну хьиди. Гьан, хюрчʼин алабхь, Муав!
24Хъа муавар израиларин бинайихьна гъафиган, израилар гъудужвнийи ва дурар йивну йикӀуз хъюгънийи, ва муавар гьергнийи. Муавдиъ учӀвну, израилари дурар йивну йикӀувал давам гъапӀнийи. 25Дурари шагьрар гъарагънийи, ва гьарсар эскру гьарсаб ужуб хутӀлиина са-саб гъван гатӀахьнийи, дурар гъванари алацӀайизкьан. Дурари шид айи гъуййир пуч гъапӀнийи ва ужудар гьарар алдатӀнийи. Анжагъ Кир-Харасетдиъ гъвандин цалар чӀвегьентариан гъванар гатӀахьрудари думу шагьур кьялаъ апӀайиз ва дидʼин алархьайиз гъузнайи.
26Муавдин паччагьдиз дявдиъ учв магълуб шулайиб гъябкъиган, дугъу, Эдумдин паччагьдихьинди гъютӀурччвбан бадали, чахъди тур йивуз шлу ургудварж инсан гъадагънийи, амма дугъхьан гъабхьундайи. 27Думуган дугъу чан ерина паччагь духьну ккуни чан сарпи бай гъадагънийи ва шагьрин цалʼин думу гъурбан гъапӀнийи. Думу ляхни израилариз къаршуди зурба ажугълувал арайиз гъабхнийи. Израилари кьяляхъ гъизигнийи, ва дурар чпин жилиина хътаркнийи.
Currently Selected:
Паччагьлугъар-4 3: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
