Паччагьлугъар-3 22

Михей пайгъамбри Ахавдиин улубкьрубдикан вахт ккимиди пуб

1Шубуд йисан Арамдин ва Израилин арайиъ дяви гъабхьундайи. 2Хъа шубудпи йисан Ягьудайин паччагь Югьушафат Израилин паччагьдихьна гъушнийи.

3Израилин паччагьди чаз гъуллугъ апӀурайидариз гъапнийи:

– Галааддин Рамот ихьуб вуйиваликан учвуз аьгъдаричвузхъа, амма ухьу думу Арамдин паччагьдихьан тадабгъуз чарйиркьан зигурадархьа?

4Дугъу Югьушафатдихьан гьерхнийи:

– Галааддин Рамот бадали дяви апӀуз узухъди гъягъидива?

Югьушафатди Израилин паччагьдиз жаваб тувнийи:

– Уву фици вуш, узура гьаци, йиз халкь – яв халкь, йиз гьяйвнар – яв гьяйвнар.

5Гьацира Югьушафатди Израилин паччагьдиз гъапнийи:

– Сифте РАББИЙИХЬАН насигьят гъадабгъ.

6Израилин паччагьди пайгъамбрар уч гъапӀнийи – вари юкьудварж касдихьна – ва дурарихьан гьерхнийи:

– Галааддин Рамотдиз дяви апӀуз гъягъюза, дарш ваъ?

– Гъарах, – жаваб тувнийи дурари. – Раббийи думу паччагьдин хилиз тувиди.

7Амма Югьушафатди гьерхнийи:

– Мушваъ ухьу гьерхуз шлу РАББИЙИН пайгъамбар сарун адарин?

8Израилин паччагьди Югьушафатдиз жаваб тувнийи:

– Ухьхьан чаллантина РАББИЙИХЬАН гьерхуз шлу сарсана инсан а. Хъа узуз думу дяркънукьан ккундарзуз, гьаз гъапиш дугъу, узкан шлуб улихь ккимиди кӀуруган, гьеле саб вахтнара ужуб гъапундарзуз, анжагъ харжибтӀан. Думу Имлайин бай Михей ву.

– Паччагь, уву дици макӀан, – гъапнийи Югьушафатди.

9Думуган Израилин паччагьди кьушмин аьхюдарикан сариз дих гъапӀнийи ва гъапнийи:

– Тядиди Имлайин бай Михей хъади гъач.

10Паччгьарин палтар алахьнайи Ягьудайин паччагь Югьушафат ва Израилин паччагь Самарияйин урнарихъ раццаъ гьарсар чан тахтниин деънайи. Хъа вари пайгъамбрари дурариз шлубдикан вахт ккимиди кӀурайи.

11Гьаци, Кенаанайин бай Цедекияйи чаз рукьан кӀарчар ктаънийи ва гъапнийи:

– Гьамци кӀура РАББИЙИ: «Му кӀарчарихъди арамариз, дурар терг хьайизкьан, йивидива».

12Имбу вари пайгъамбрарира гьаддикан кӀуйи:

– Галааддин Рамотдиин алжагъ ва гъалибчи йихь. РАББИЙИ думу шагьур мумкинсузди паччагьдин хилиз тувиди.

13Михей пайгъамбриз дих апӀуз гьаънайири дугъаз гъапнийи:

– Хъебехъ, имбу пайгъамбрари варидари паччагьдиз хъуркьувал шлуваликан кӀура. Гъит, яв гафра гьадрарин гафнахъди сабси ибшри, ужуди шлуваликан йип.

14Амма Михейи гъапнийи:

– РАББИЙИИНДИ ху апӀурза, узукна РАББИЙИ фу гъапиш, гьадмутӀан пидарза.

15Михей гъафиган, паччагьди дугъхьан гьерхнийи:

– Михей! Галааддин Рамотдихъди дяви апӀуз гъягъюча, дарш гъягъюдарча?

– Гъарах, гьелбетда, ва гъалибчи йихь, – жаваб тувнийи дугъу. – РАББИЙИ мумкинсузди думу шагьур паччагьдин хилиз тувиди!

16Амма паччагьди дугъаз гъапнийи:

– РАББИЙИН амриинди вуйи гьякьтӀан фукӀа жараб дарпуз уву ху апӀуз швнубан мажбур апӀуза?

17Думуган Михейи жаваб тувнийи:

– Узуз вари Израил, марччлихъан хъадру марччарси, дагълариъ дарабгъну гъябкъюнзуз. Ва РАББИЙИ дупна: «Дурарин агъа адар. Гъит, гьарсар ислягьвалиинди чпин хулаз хъадаркри».

18Израилин паччагьди Югьушафатдиз гъапнийи:

– Узу увуз гъапундайинхъа, дугъу узкан шлубдин гьякьнаан вахт ккимиди фукӀа ужуб кӀурдар, анжагъ харжибтӀан?

19Михейи гъапнийи:

– Гьаци, РАББИЙИН гафнахъ хъебехъ. Узуз РАББИ Чан тахтниин деънади гъяркъюнзуз, Дугъхьан арчул ва гагул терефнаъ дийибгънайи чан заварин кьушумра хъади. 20РАББИЙИ гъапнийи: «Ахав Галааддин Рамотдиз гъягъюз, душваъ думу йикӀбан бадали, шли алдатмиш апӀиди?» Сари саб, тмунури жараб кӀуйи. 21Аьхирки фициб-вуш жин удубчӀвнийи ва РАББИЙИН улихь дийибгънийи, ва диди гъапнийи: «Узу думу алдатмиш апӀидиза». 22«Фици?» – гьерхнийи РАББИЙИ. «Узу гъябгъидиза ва дугъан вари пайгъамбрарин мелзниин кучӀлин жин хьибдиза», – гъапнийи диди. «Ав, увхьан думу ляхин хъуркьувалиинди кӀулиз адабгъуз ва думу алдатмиш апӀуз хьибдивухьан, – гъапнийи РАББИЙИ. – Гъарабх ва гьаци апӀин». 23Ва магьа РАББИЙИ гьаму яв вари пайгъамбрарин мелзниин кучӀлин жин алапӀна. Хъа РАББИЙИ увуз бала улупна.

24Думуган Кенаанайин бай Цедекияйи, Михейихьна дуфну, дугъан гарцӀликкан бачӀ гъивнийи.

– Увухъди гафар апӀуз РАББИЙИН Рюгь, узхьан гьудучӀвну, увухьна фици гъафну? – гьерхнийи дугъу.

25Михейи жаваб тувнийи:

– Думу яв хуларин айтӀан хулаъ уву душмнарихьан жин гъахьи йигъан аьгъю хьибдивуз.

26Думуган Израилин паччагьди амур гъапӀнийи:

– Михей дисай ва шагьрин гьякимдар Амондихьна ва паччагьдин бай Юашдихьна кьяляхъ гъайихай. 27Дурариз йипай: «Гьамци кӀура паччагьди: гьаму кас зиндандиъ итай ва дугъаз, узу ягъурлувалиинди кьяляхъ хътаркайизкьан, гашу даркӀузситӀан уьл ва шид мутуванай».

28Михейи гъапнийи:

– Эгер уву ягъурлувалиинди кьяляхъ хътаркиш, РАББИЙИ йиз мелзналан дарпиб гьисаб ибшри.

Ва дугъу хъана гъапнийи:

– Гъит, вари халкьариз гьаму ебхьри!

Галааддин Рамотдиъ Ахав талаф хьуб

29Израилин паччагь Ягьудайин паччагь Югьушафатдихъди сатӀиди Галааддин Рамотдиин алархьнийи. 30Израилин паччагьди Югьушафатдиз гъапнийи:

– Узу дявдиъ палтар гьюдюхну учӀвидиза, хъа уву паччагьвалин палтар алахьну гъуз.

Израилин паччагьди палтар гьюдюхнийи, ва думу дявдиъ учӀвнийи.

31Хъа Арамдин паччагьди гьяйвнар ккитӀнайи дявдин фургънарин сумчӀурна кьюр аьхюриз амур гъапӀнийи:

– Израилин паччагьдихъдитӀан савайи, сарихъдира, я эскрарихъди, я аьхюдарихъди, дяви мапӀанай.

32Гьяйвнар ккитӀнайи дявдин аьрабйирин аьхюдариз Югьушафат гъяркъиган, дурари фикир гъапӀнийи: «Гьелбетда, гьаму ву Израилин паччагь». Дурар, дугъʼин алархьбан бадали, илтӀикӀнийи, хъа Югьушафатди чӀигъ гъапӀнийи. 33Гьяйвнар ккитӀнайи дявдин фургънарин аьхюдариз думу Израилин паччагь даруб гъябкънийи, ва дурари дугъахъ хъчӀарккувал дебккнийи. 34Амма шли-вуш дерккучӀимриз гъизигнийи ва дюшюшдиан Израилин паччагьдиз зиян гъапӀнийи, гьаз гъапиш чӀимир дявдин палатди дюбхну адру йишвак кубкӀнийи.

Паччагьди чан фургъунчийиз гъапнийи:

– Кьяляхъ илтӀикӀ ва узу дявдиан адагъ! Узуз зиян дубхьназуз.

35Амма кчӀихуб ярхи йигъ гъизгъинди гъубшнийи, ва паччагь арамарин улихь чан фургъниъ дийигъуз мажбур гъахьнийи. Зийниан фургънизди ифи удубзурайи, ва хябяхъган думу кечмиш гъахьнийи. 36Ригъ алабхъруган, кьушмин зиин гьарай тарабгънийи:

– Гъит, гьарсар чан шагьриз, гьарсар чан жилиина кьяляхъ хъадаркри!

37Паччагь гъакӀнийи ва Самарияйиз гъахнийи, душваъ думу накьвдик кивнийи. 38Хъа гьяйвнар ккитӀнайи дявдин фургъун Самарияйин кьяппйир жикӀру даграрикан сабдиъ гъижибкӀнийи. РАББИЙИХЬАН гъафи гафнаъ дупнайиганси, хуйири паччагьдин ифдикан мелзар ктатнийи.

39Ахавдин паччагьлугъвалин вахтнан жара гьядисйирикан ва дугъу гъапӀу ляхнарикан, гьадму гьисабнаан дугъу тикмиш гъапӀу ва филин кӀурбарихъди гъабалгу гъалайикан, ва дугъу тикмиш гъапӀу шагьрарикан «Израилин паччгьарин тарихарин китабдиъ» дибикӀна.

40Ахав чан архйирихъди фаракьат гъахьнийи. Дугъан ерина паччагь дугъан бай Ахазия гъахьнийи.

Югьушафат – Ягьудайин паччагь

41Асайин бай Югьушафат Израилин паччагь Ахавдин паччагьвалин юкьудпи йисан Ягьудайин паччагь гъахьнийи. 42Паччагь шлуган, Югьушафатдин сумчӀурна хьуд йис вуйи, ва дугъу Ерусалимдиъ къанна хьуд йисан паччагьвал гъапӀнийи. Дугъан дадайиз Шилхийин риш Азува кӀуйи. 43Думу варибдиъ чан адаш Асайин рякъяриъди гъягъюйи ва, РАББИЙИН уларикк гьякьди вуйиб апӀури, дурарилан улдучӀвурдайи. Амма тепйириин али гирами йишвар терг гъапӀундайи, ва халкьди душвариина гъурбнар хувал ва душвариин ицци ниъ хъайи шейʼар ургувал давам апӀуйи. 44Гьацира Югьушафатди Израилин паччагьдихъди ислягьвалин йикьрар гъийитӀнийи.

45Югьушафатдин паччагьвалин вахтнан жара гьядисйирикан ва дугъан хъуркьуваларикан, ва дугъан дявдиъ улупу гьунарарикан «Ягьудайин паччгьарин тарихарин китабдиъ» дибикӀна. 46Чан адаш Асайин вахтна ибадатханйириъ гъузу кьяппа жилар дугъу терг гъапӀнийи.

47Эдумдиъ паччагь адайи, душваъ гьюкумдарвал Ягьудайин паччагьди деркку регьбру апӀуйи.

48Гъизил хуз Офириз гъягъбан бадали, Югьушафатди Таршиш жюрейин гимйирин#22:48 Таршиш жюрейин гимйир: ярхлаз гъягъюз ва гизаф вахтна штуин гъузуз шлу гимйир. десте тикмиш гъапӀнийи, амма дурар гъягъюз хъуркьундайи, гьаз гъапиш багъри Эцион-Гевер портдиъ гъюргънийи.

49Думуган Ахавдин бай Ахазияйи Югьушафатдиз гъапнийи:

– Гъит, йиз инсанар яв инсанарихъди сатӀиди гьюлериина гимйириъди гъарахри.

Амма Югьушафатдиз думу ляхин ккун гъабхьундайи.

50Югьушафат чан архйирихъди фаракьат гъахьнийи ва чан арха Давуддин Шагьриъ дурарихъди кивнийи. Дугъан ерина паччагь дугъан бай Ярам гъахьнийи.

Ахазия – Израилин паччагь

51Ахавдин бай Ахазия Ягьудайин паччагь Югьушафатдин паччагьвалин йицӀиургудпи йисан Самарияйиъ Израилин паччагь гъахьнийи. Дугъу Израилиъ кьюд йисан паччагьвал гъапӀнийи. 52Дугъу РАББИЙИН уларикк писвал апӀуйи, гьаз гъапиш чан адашдинна дадайин рякъяриъди ва Израилиз гунгьихьна ял гъапӀу Яравамдин, Наватдин балин, рякъяриъди гъягъюйи. 53Чан адашдиси, Ахазияйира Баализ гъуллугъ ва ибадат апӀуйи ва Израилин Заанур вуйи РАББИЙИК хъял капӀуйи.

Currently Selected:

Паччагьлугъар-3 22: ТабГК

Highlight

Copy