Паччагьлугъар-3 21
21
Навотдин тӀумтӀин багъ
1Саб кьадар вахтналан гьамцдар гьядисйир гъахьнийи. Изреелиан вуйи Навотдиз Самарияйин паччагь Ахавдин Изреелиъ айи гъалайин гъвалахъ тӀумтӀин багъ айи. 2Ахавди Навотдиз гъапнийи:
– Яв тӀумтӀин багъ узуз бистан апӀуз ча, думу йиз гъалайин гъвалахъ ерлешмиш дубхьна аьхир. Дидин ерина узу увуз думутӀан ужуб тӀумтӀин багъ туварза. Эгер ккундуш, дидин кьимат туварзавуз.
3Навотди жаваб тувнийи:
– Узу йиз абйирин ирс тувуз РАББИЙИ узуз амур дарапӀри.
4Ахав хулаз маш чӀур дапӀну ва хъял кади гъушнийи, гьаз гъапиш Изреелиан вуйи Навотди гъапнийи: «Узу йиз абйирин ирс увуз тувидарза». Думу ахникк дахънийи, ва дугъу маш гьибицнийи, хураг ипӀуз ваъ кӀуйи.
5Дугъан хпир Изавел дугъахьна гъафнийи ва гьерхнийи:
– Гьаз дици маш чӀур дапӀнава? Гьаз хураг ипӀурдарва?
6Ахавди дугъаз жаваб тувнийи:
– Гьаз гъапиш узу Изреелиан вуйи Навотдиз гъапунза: «Узуз тӀумтӀин багъ масу тув, ясана, увуз ккундуш, дидин ерина жара багъ туварзавуз». Хъа дугъу гъапнийи: «Узу увуз тӀумтӀин багъ тувидарза».
7Дугъан хпир Изавели гъапнийи:
– Хъа Израилин паччагьси уву гъахурайвахъа? Гъудужв ва хураг ипӀин! Зирек йихь, узу Изреелиан вуйи Навотдин тӀумтӀин багъ явуб апӀидиза.
8Дугъу Ахавдин ччвурнахъан кагъзар гъидикӀнийи, дурарин зиин мугьур гъивнийи ва Навотдин шагьриъ яшамиш шулайи гьюрматлу яшлуйириз ва машгьур ксариз хътаънийи. 9Кагъзариъ дугъу гъидикӀнийи:
«Ушв бисру йигъ мялум апӀинай ва халкь уч апӀинай. Навот халкьдин арайиъ гьюрматлу йишвʼин дитай. 10Хъа дугъан гъаншариъ кьюр мердимазар дитай, ва гъит дурари шагьидвал апӀри, Навотди Заанурра, паччагьра биябур гъапӀну кӀури. Хъасин думу душвʼан адагъай ва йикӀайизкьан гъванар йивай».
11Навотдин шагьриъ яшамиш шулайи гьюрматлу яшлуйири ва машгьур ксари чпиз кагъзариъ Изавели амур гъапӀганси гъапӀнийи. 12Дурари ушв бисру йигъ мялум ва халкь уч гъапӀнийи. Навот халкьдин арайиъ гьюрматлу йишвʼин дитнийи. 13Хъасин кьюр мердимазар гъафнийи, дугъан гъаншариъ деънийи, ва дурари Навотдик халкьдин улихь тахсир кипнийи:
– Навотди Заанурра, паччагьра биябур гъапӀнийи.
Дидин кьяляхъ Навот шагьрин гъирагъдиз адагънийи ва гъванар йивури гъакӀнийи. 14Хъасин дурари Изавелиз хабар дебккуз гьаънийи:
– Навот гъвандихь гьитну, ва думу гъакӀну.
15Навот гъванар йивури йикӀбакан гъеебхьубси, Изавели Ахавдиз гъапнийи:
– Гъудужв ва Изреелиан вуйи Навотди увуз масу тутруву тӀумтӀин багъ бис. Навот сарун чӀивиди имдар, думу дукӀна.
16Навот дукӀнайиваликан гъеебхьиган, Ахав гъудужвнийи ва Навотдин тӀумтӀин багъ чаз бисуз гъушнийи.
Ахавдикан ва Изавеликан шлуб Илʼяс пайгъамбри вахт ккимиди пуб
17Тишбайиан вуйи Илʼяс пайгъамбрихьна РАББИЙИН гаф гъафнийи:
18– Самарияйиъ паччагьвал апӀурайи Израилин паччагь Ахавдиз гъаншарди гъарах. Думу гьамусяаьтна Навотдин тӀумтӀин багъдиз думу чаз бисуз дуфна. 19Дугъаз йип: «Уву инсан йивну гъакӀунва, хъа гьамус дугъан мутмура бисурава?» Хъасин йип дугъаз: гьамци кӀура РАББИЙИ: «Хуйири Навотдин ифдиз мелз гъиву йишвахь хуйири яв ифдизра мелз йивиди!»
20Ахавди Илʼяс пайгъамбриз гъапнийи:
– Гьаци, увуз узу гъидихъунвуз, йиз душман!
– Гъидихъунзуз, – жаваб тувнийи дугъу, – гьаз гъапиш уву РАББИЙИН уларикк писвал апӀуз кьаст гъапӀунва. 21Гьамци кӀура РАББИЙИ: «Узу увʼин бала алапӀидиза. Узу яв наслар тӀанкь апӀидиза ва Ахавдихъ хъайи фунур вушра жилижви – лукӀра, азадди вуйирра – терг апӀидиза. 22Узу яв тухум Наватдин бай Яравамдин тухумдиз ва Ахияйин бай Баашайин тухумдиз ухшар апӀидиза, гьаз гъапиш уву Узук хъял капӀунва ва Израилиз гунгьихьна ял гъапӀунва». 23Гьацира Изавеликан РАББИЙИ кӀура: «Хуйири Изавел Изреелин цаликк ккучӀвуркьиди». 24Ахавдин инсанарикан шагьриъ кечмиш гъахьидар хуйири ккучӀвуркьиди, хъа хутӀлиъ кечмиш гъахьидар жакьвари удудиди.
25(Чан хпир Изавели хъаъну, РАББИЙИН уларикк писвал апӀуз кьаст гъапӀу Ахавдиз барабар вуйир гьеле гъахьундайи. 26Израиларихьан РАББИЙИ гьутӀуркку амореяриси, бутариз ибадат апӀури, дугъу учв гизаф хявиди гъахуйи.)
27Ахавди, гьаму гафар гъеерхьиган, чаин али палтар гъячӀяргънийи, йирси палат алабхьнийи ва ушвар дисуйи. Думу йирси палатдиккди ахуйи ва маш чӀуруди лицуйи.
28Тишбайиан вуйи Илʼяс пайгъамбрихьна РАББИЙИН гаф гъафнийи:
29– Йиз улихь Ахав фици мютӀюгъ гъахьнуш, увуз гъябкъюнвуз? Йиз улихь мютӀюгъ хьувализ лигну, Узу дугъʼина учв чӀивиди имиди бала алапӀидарза, хъа дугъан тухумдиина дугъан балин уьмрин вахтна бала алапӀидиза.
Currently Selected:
Паччагьлугъар-3 21: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
