Коринф-1 16
16
Жара хъугърудариз кюмекар
1Гьамус Ерусалимдиъ айи Аллагьдин гирами халкьдиз кюмек вуди пул уч апӀбакан. Узу Галатдиъ айи хъугърудариз апӀин гъапиб учвура апӀинай. 2Гъит учвкан гьарсари, гьяфтайин садпи йигъан, шлихьан фукьан удукьуруш, ичв гъюру хайирназ дилигну, узу гъафиган уч апӀури, давди вахт гьадрапӀбан бадали, кюмекназ пул гьязур апӀинай. 3Хъа узу гъафиган, учву уч гъапӀу кюмек Ерусалимдиз гъабхбан бадали, учву ктагъу адмийир, насигьятнан кагъзарра тувну, гьаъдиза. 4Эгер узузра дина гъягъюб алабхъуруш, дурарра узухъди гъиди.
5Хъа узу учвухьна Македонияйиъ хьпан кьяляхъ гъидиза. Гъюрур гьадлин мина гъидиза. 6Учвухъди саб вахтназ гъузуз ният айиз, мумкин ву учвухь узу кьюрдра адапӀуз, хъасин, эгер узу дилинтина гъягъруси гъабшиш, рякъʼин апӀуз узуз кюмек апӀидичва. 7Узу гьаму ражари учвʼин улукьидарза, улукьнийишра, думу сацӀиб вахтназтӀан хьибдайи. Эгер Аллагьди гъитиш, учвухь гизаф вахт адапӀуз юкӀв хъайиз. 8Эфесдиъ узу ХьуцӀударин машквар хьайизкьан гъуздиза, 9Фицики мушваъ, хъуркьувалиинди гъуллугънаъ хьуз шлуси, йиз улихь яркьуди урчӀар арццна. Душмнарра цӀиб дар.
10Эгер Тимофей гъафиш, лигай, дугъаз учвухь хатӀасузди ибшри, фицики дугъура, узуси, Агъайин ляхин кӀули гъабхура. 11Думу гьяспикк ккадарди гьич фужкӀара даришри. Хъасин думу, узухьна кьяляхъ гъюз шлуси, мясляаьтниинди рякъюъ аай. Узу дугъазна гъардшариз ккилигураза.
12Аполлос гъардшикан. Узу дугъкан, гъардшарра хъади, учвухьна гъюб тӀалаб гъапӀнийза, амма гьаму ражари дугъан гъюз тямягь хътар. Думу, мумкинвал гъабхьиган, гъиди.
13Мугъаятди гъузай! Хъугъвалиъ ижмиди гъузай, кӀубанди ва кьувватлуди йихьай! 14Ичв апӀурайиб вари, масанвал ади, апӀинай!
15Сабсанубдикан учвкан тӀалаб апӀуз ккунди азуз, гъардшар: Стефанусдин хуландар аьгъячвуз, Ахаяйиъ дурари сарпидарди Месигь кьабул гъапӀну ва, Аллагьдин гирами халкьдин гъайгъушнаъ хьуз, чпин уьмрар бахш апӀура – 16гьацдар адмийирин, гъуллугънаъ айи вардарин ва дурариз кюмек апӀрударин гъайгъушнаъ йихьай. 17Узу Стефанусна, Фортунатна, Ахаик мина гъюбʼин гизаф рази гъахьунза. Дурар дуфнайиган, учву йиз гъвалахъ хъайиси шулазуз. 18Дурари узукра ва учвукра юкӀв капӀра. Гьацдар адмийирин гьюрмат уьбхяй.
19Азияйиъ хъугърудари учвуз саламар хътаура. Агъайихъ хъугънайивалиъ гъардашна чи вуйи Акилайина Прискилайи ва дурарин хулаъ уч шулайи хъугъру варидари мани саламар хътаурачвуз. 20Мушваъ вари гъардшари саламар хътаура. Чиб-чпиз гирами макниинди салам туври апӀинай.
21Гьамус узу, Павели, йиз хили бикӀураза: 22Шлиз Агъа ккундарш, гъит бала гъядябхъричаз. Эй, Агъа, гъач!
23Агъа Исайин ужʼвал учвухъди гъит ибшри! 24Йиз масанвал – вари учвуз, Иса Месигьдиндариз. Амин.
Currently Selected:
Коринф-1 16: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
