Коринф-1 15
15
Иса Месигь чӀиви хьуб
1Гъардшар, узу учвуз дебкку, учву кьабул гъапӀу ва мюгькам хьуз гъиту Ужувлан хабар ичв кӀваина хуз ккундузуз. 2Гьадму Хабарну уьрхидичву, эгер узу учвуз гъапибдихъан ижмиди хъчӀихиш, даршиш – учву гьавайиди хъугърачва.
3ВаритӀан важиблуб, узухьна тувуб, тувунзачвухьна: Гирами китабариъ улихьмиди дупнайиси, Месигь ихь гунгьарихъанди гъакӀну. 4Гирами китабариъ улихьмиди дупнайиси, Думу, накьвдик кивну, шубудпи йигъан чӀиви гъахьну. 5Думу, Петриз ачмиш гъахьну, хъа – йицӀикьюриз, 6хъасин хьудварждилан зиина гъардшариз сабси ачмиш гъахьну. Дурарикан сакьюдар гъийихну, гизафдар гьамусра чӀивиди ими. 7Хъасин Якьубдиз ачмиш гъахьну, хъасинси – Месигьдин вари вакилариз. 8Дурарикан варитӀан кьяляхъна узуз, лайикь даруриз, ачмиш гъахьунзуз.
9Фицики узу вакиларик варитӀан цӀибди вуйир вуза, узу вакилвалин ччвурназ лайикькьан дарза, гьаз гъапиш Аллагьдихъ хъугъру гирами халкьдихъ хъергри гъахьунза. 10Амма, Аллагьдин ужувлиинди, узу йиз вуйир вуза, ва Дугъан узухьна вуйи ужʼвал давди гъюдубчӀвундар: узу варидитӀан гизаф ляхин гъапӀунза, яни, гъилихур узу ваъ, хъа узухъди хъайи Аллагьдин ужʼвал ву. 11Узу вая жарари – учу гьациб Хабар дебккну, учву хъугъунчва.
ГъачӀидар чӀиви апӀуб
12Йипай гьеле, эгер Месигь, хабар дебккрайиси, чӀиви гъахьнуш, учвкан сакьюдари, гъийихдар чӀиви шлуб дар, фици кӀура? 13Эгер гъийихдар чӀиви шлуб дарш, Месигьра чӀиви хьидайи. 14Хъа эгер Месигь чӀиви гъахьундайиш, учу дебккрайи Хабар, дидихъди ичв хъугъвалра, дав хьибдайи. 15Дидланра гъайри учкан, эгер гъийихдар чӀиви шлуб дар кӀурубдиз лигуруш, Аллагьдиз къаршу кӀучӀлин шагьидар шула, фицики учу, чӀиви дархьи Месигь Аллагьди чӀиви гъапӀну, кӀурача. 16Эгер гъийихдар чӀиви шлуб дарш, Месигьра чӀиви гъахьундар. 17Месигь чӀиви гъахьундарш, ичв хъугъувалра дав ву, ичв гунгьарра учвук ками. 18Дици вуш, Месигьдихъ хъугъну гъийихдар, гьаммишандиз гъачӀну. 19Эгер Месигьдиин али ихь умуд гьаму уьмризтӀан кайиб дарш, имбу вари адмийирик варитӀан пис гьялнаъ ухьу ахьа.
20Месигь, дугъриданра, чӀиви гъахьну! Думу гъачӀидаригъян сарпирди чӀиви гъахьну! 21Сар адмийилан гьаму дюнʼяйиъ аьжал абхъганси, чӀиви хьувалра сар Адмийиланмина гъафну. 22Адамдилантина вари фици йихуруш, Месигьдилантина вари гьаци чӀиви хьиди. 23Амма гьарсар чан къайдайиинди: сифте, сабпи бегьер, Месигь, хъасин, Думу кьяляхъ гъафиган, Месигьдиндар вари, ухьу, чӀиви хьиди. 24Дугъу, гьарсаб гьякимвал, гьарсаб гьюкум ва кьувват терг дапӀну, Адаш Аллагьдихьна Паччагьлугъвал тувди, хъа гьадмуган аьхир гъибди! 25Дугъу паччагьвал, Аллагьди вари душмнар Дугъан ликарикк духну дахьайизкьан, апӀиди. 26Терг апӀуз ккайи аьхиримжи душман аьжал ву. 27Фицики, Аллагьди «Гьадгъан ликарикк вари ккирчну». «Вари ккирчну» кӀуруган, Ккирчурнур ктар. 28Дугъу Гьадгъан хилиъ вари ивган, вари ва варибдиъ Аллагь хьпан бадали, Учв, Байра, Чан хилиз вари Тувурин хиликкна гъягъиди.
29Эгер думу дици дайиш, адмийир, гъийихдарихъандира штуан гьаз шула? Эгер гъийихдар чӀиви апӀуз шулдарш, гьаз дурарихъанди штуан хьидихъа? 30Гьар сяаьтнак ухьура гьаз хатӀйирикк ккахъхьа? 31Узу гьар йигъан аьжаликк ккахъраза. Узу ихь Агъа Иса Месигьдин улихь учвʼинди фици фурс апӀураш, гьациб кьувватнаъди му кӀурайибра кучӀал дариз, гъардшар. 32Эгер адмийин улариан лигураш, узу фу бадали Эфесдиъ айи вягьшйирихъди дяви гъабхидийи? Узуз дидкан фу файда ка хъа? Гъийихдар чӀиви шлуб дайиш:
«Гъачай ипӀухьа, убхъухьа,
гьапӀнура закур йикӀурайидар дарин хъа».
33Учву учвуз кӀучӀлар апӀруси дарибшри гьа: «ЧӀуру шадлугъариъ гъяни хасиятар чӀур апӀуру».
34Учвуз лайикь вуйиси, фикриз гъачай, гунгьар апӀуб гъитай, фицики ичв арайиъ гьамусра Аллагь аьгъдрудар имийичв – мици учвуз нач хьуз кӀураза.
Ихь беден фициб хьибди?
35Сари гьерхуб мумкин ву: «Дийихнайидар фици чӀиви хьиди хъа? Думуган дурарин беден фициб хьибди?» 36Фикирсузар! Уву гъубзу тум ктубчӀвбан бадали, сифте думу пуч дубхьну ккунду! 37Уву тум убзруган, вари укӀ-мукӀди убзурадарваки, хъа дидгъян – удрар, дяхнин удрар, ясана жараб гьациб. 38Хъа Аллагьди Чаз ккуниси думу тумраз – гьардиз хас вуйи жан тувра. 39Вари жанар сабстар дар, мисалназ адмийирин жараб, гьяйванатарин жараб, жакьварин жараб, балугъарин жараб ву. 40Мидлан гъайри, жанар а аьршариндар ва жилиндар. Аьршарин жанариз чпиз хас вуйи успагьивал а, хъа жилиндариз – чпин. 41Ригъдиз чан акувал а, вазлиз – чан, хядариз – жараб. Чпин нубатнаъ хядарра, крачӀрувализ дилигну, чиб-чпихьан жара шула.
42ЧӀиви шлуганра, гьаци хьибди. Ухьухъ хъайи беден тумси убтӀруб ву, хъа чӀиви шлуган, ухьухъ хъибшру беден убтӀруб хьибдар. 43Накьвдик кивру беден асккануб шулу, хъа чӀиви шлуб – успагьиб! Кивра зяифуб – чӀиви шула кьудратлуди, 44кивра рябкъру мутмусиб – чӀиви шула рюгьнанубси.
Рябкъру беден айиган, рюгьнан беденра айиб ву. 45Гирами китабариъ, сарпи адмийиз, Адамдиз, чӀиви рябкъру беден гъабхьну, хъа Исайиз, аьхиримжи Адамдиз, уьмрин булагъ Вуйириз, рюгьнан беден гъабхьну, дупна. 46Сифте гъюруб, рюгьнануб ваъ, хъа рябкъюри шлуб гъафну, ва хъасин – рюгьнануб. 47Сарпи адми жилин рюкъдикан гъахьну, хъа кьюрпи Адми – аьршариан гъафи Адми. 48Сарпи жилин адми фицир гъахьнуш, жилин адмийирра гьацдар гъахьну, хъа аьршариан гъафи Адми фицир вуш, аьршариз гъягърударра гьацдар хьиди. 49Ухьу гьаму ражари фици жилин адмийиз ухшар вуш, гьаци аьршарин Адмийиз ухшар хьидихьа.
50Учвуз кӀураза, гъардшар, ифина йикк Аллагьдин Паччагьлугъдин ирсчйир шлуб дар, ва убтӀруб дурубтӀрубдин ирсчи хьибдар. 51-52Хъебехъай, узу учвуз гьамус сир ачмиш апӀидиза: зурнайин аьхиримжи дих утӀубччву сяаьт ухьу вари йихидар, хъа хабарсузди, улар уьлчӀюкьну арццайиз, вари дигиш хьиди. Зурнайин дихнахъди дийихнайидар дурутӀру жанар хъади чӀиви хьиди, хъа ухьу дигиш хьиди. 53Вари убтӀруб дурубтӀрубдиз илтӀибкӀиди, йибкӀруб – дилибкӀрубдиз. 54Вари убтӀруб дурубтӀрубдиз ва йибкӀруб дилибкӀрубдиз илтӀибкӀган, гьаму гафар тамам хьиди:
«Аьжал гъалибвали хътӀюбкью!»
55«Эй аьжал, набшдияв гъалибвал?
Эй аьжал, набшдияв, галам?»
56Аьжалин галам – гунагь ву, гунгьин кьувват – Къанун. 57Аллагьдиз чухсагъул! Дугъу ихь Агъа Иса Месигьдиланмина ухьуз гъалибвал туврахьуз.
58Гьаддиз, йиз ккуни гъардшар, ижмиди гъузай. Минди-тинди хъахърудар махьанай. Агъа бадали вуйи ляхниз фукӀара гьяйиф мапӀанай ва аьгъю йибхьай: Агъайиз вуйи ичв ляхин давди гъюдубчӀвидар.
Currently Selected:
Коринф-1 15: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
