Nehemiya 9
9
Aba Ritso Ikentitibi-ba
1Uwae usir ti rikom asu inje na ushaen wu, ande ti Isirela byir atso ti a na tatso utob ti beb na ikentitibi-ba yi fengo na unju ti cwe. Aba nwaen ru ye risu-ba uwae ande ti rikyen meme. 2U sī atupwa tibyir#9:2 Unju Mbaibrane a bae baa, atupwa ibae., ama u pu itong mbub risu-ba. Ama aba tsi ku fxir tso ikentitibi-ba ti ana abitse-ba ti aba nde. 3Ayi sa ba áwa ita ti a nung putsa icwe na Yaweh Rimam-ba, ama yi uwae áwa ita cwucwo a sa ku fxir ikentitibi-ba ama ku fen Yaweh Rimam-ba.
4Anyisu Lawi ti tsitsa kupam atang si Jeshuwa, Bani, Kadimiyel, Shebaniya, Buni, Sherebiya, Bani ti Kenani. Aba jwam Rimam ti fxen ujwin ti ribom uwog Yaweh Rimam-ba.
5Tiri anyisu Lawi iki kunn ande ti a na ba fen Rimam: Aba si Jeshuwa, Kadimiyel, Bani, Hashabniya, Sherebiya, Hodiya, Shebaniya, ti Petahiya. Aba ri baa: “Sunwunn ritsen ti ni teb Yaweh Rimam-ni! Ni teb wu ru fife yi uwe! Unde titini teb rinyi-wu ikyaen riyinn ti kuko-wu.”
A Jwam Rimam Risu Ikentitibi-ba
6“Afu ti si Yaweh,
afu amam ti si Yaweh.
Afu kyae apupwen,
ti ujwunn aswer ti ta apupwen.
Afu kyae utense
ti iken ti ta uwae-yi meme,
ti uyinn ti iken ti ta uwae-yi meme.
Afu nda ba unyang meme.
Atom ti apupwen
ti iken ti tsitsi apupwen
ku kú riben ku fen fu.
7Afu Yaweh Rimam ti tsab Ibram,
u pu wu ru ye uwae Ur na Kalidiya,
u fwa rinyi-wu baa Ibrahim.
8“Afu nung baa, awu na si unde ti kubenti,
u yer unju te wu baa,
afu na u nda anyisu-wu
riben ande ti Kanana,
riben ande ti Hiti
ti ana ande ti Amor,
ti ana ande ti Perizi
ti ande ti Jebusi ti Girgashi.
Afu ye su unju ti yer-fu,
ikyaen ti,
afu ku nde iken ti pang atang.#9:8 Sae kyi: Kucangtsi 15:18-21.
9Afu sae itso rikaen
ti abitse-ti ngwa uten Ejib.
Afu fxen ira ti jwub-ba
unju uyinn tibyaen.
10Afu nde iken ti ku fur ayib
uwe ukwe ti Ejib#9:10 Ukwe ti Ejib si Farawo.
ti afaen-wu ti ande-wu meme,#9:10 Sae kyi: Itiruye 7:8-25; 12:1-32.
ikyaen ti afu nung pu fu
itso rikaen ti a nde abitse-ti.
Afu nda rinyi-fu pu iten
kyife uten meme,
ba kwer ti yaka ne.
11Afu kata uyinn ifaen,
u nda ba putsa kutampwa uyinn
yi riben ti wom.#9:11 Sae kyi uwae: Itiruye 14:21-29; 15:4-5.
Aba ti rwae putsa ba ngwa byinn
uwae ambyi ti jijang.
12Yi usirtaen afu tae ba ti kubyi.
Yi kutitang afu yen urwa
tatso ba fengo,
ti aba na putsa.
13“Afu si apupwen ba
risu rikwen ti Sinai,
Afu ri ira te ande-fu
u tatso ba fengo ti ba na putsa,#9:13 Sae kyi uwae: Itiruye 19:18-25; 23:1-33.
u nda ba icwe ti pang atang,
ti icwe ti kubenti,
ti iken ti kwen ti tinyang.
14Afu nda ba icwe
risu usir ikyinn-fu ti saen kyag.
Afu nda upyi-fu
Musa unju ti a na putsa
meme icwe-fu,
ti iken ti kwen-fu.
15Kiye ti a ku fxen ti rimenn,
afu nda ba wuci ti si apupwen ba,#9:15 Sae kyi uwae: Itiruye 16:4-15.
u sa ambyi ru ye uwáe kutxú na ba
kiye ti a ku fxen ti unwaen.
Afu ri te ba ti a na sang
ka mbe riben wu
ti afu ben uben baa,
afu na u nda ba.
16“Amaa, abitse-ti ndub ijwe,
u bom risu u ye su-ba icwe-fu be.
17A pyir ti a u nae risu riben na fu,
Aba tangsom-ba te iken ti ku fur ayib
ti afu nde uwog-ba be.
Aba bom risu u tsi ukub te fu.
Aba tsab unde ti uwe
ti wu na pu ba kafe ru
ti usom upyi yi Ejib.
Amaa,
afu si Rimam ti ku yata na ande.
Afu si Rimam ti tinyang
ti site ayibrisi timambe.
Afu ku tso-fu rinae ti kufe be.
Ure-fu, ititsikunn-yi ta-yi be.
Ikyaen ayine afu ya ba ta-fu be.
18Ko kiye ti aba kyae na ijwe-ba apxin
ti pangma umbae indag u ri baa,
‘Awune ti si Rimam-ni
ti pu ni ru ye uwae uten Ejib.’
Aba ndembeb rinyi-fu.
19Amaa,
afu ya ba ta-fu uwae kutur atang be,
ikyaen ti, ayibrisi-fu ko timambe.
Kubyi wu tsikunn ku tae ba usirtaen,
ama urwa wu tsikunn
ku tatso ba fengo ti utitang.
20Afu nda ba kusung-fu
ti tinyang ti wu na kwen na ba.
Afu byang-fu aba Mánna ti a ci be.
Afu nda ba ambyi ti a na ngwa.
21Uwae asang mae ifaen uwae kutur
afu shi ba,
fu nda ba meme iken ti a ku sha.
Atupwa-ba kyaen mbeb-yi be.
Afxen-ba mbwe-yi mbwe
ko ayi na cicaeb be.
22Afu nda ba ci rika
risu mbukwen ande ti abikwe,
ti si ana iten ti ta ice te ba.
Aba ci rika risu Sihon
ukwe uten Heshibon
ti Og ukwe na uten ti Bashan.
23Afu nda ba mbae nghae,
u jwunn pangma aswer apupwen.#9:23 Sae kyi uwae: Itiruye 15:5; 22:17.
Afu pu ba ka sang riben wu,
ti afu yer unju te abitse-ba
baa, aba na u somkyi.
24Ama afu nda Isirela ci rika
risu ande uten Kanana
ama u ka somkyi riben wu.
Afu pu ba fa ti abikwe-ba
ti ande ti som atang meme
na Isirela kujwo
ti a na nde iken ti a ku sha te ba.
25Ande-fu ye uten uten
ti a mbye kwob yi te ukoh.
Aba ye riben ti ajib,
asog ti munn ti rifunn,
ribung ti ande iki mum mam pu ba,
ti risaen ituku anam, ituku olifi,
ti ituku ti ku waen awaen sisib.
Aba ci u kyaen, u kem,
u tsen utob te iken meme
ti tinyang ti afu nde na ba.
26“Amaa,
ande-fu nae-ba risu riben na fu be,
aba bom risu te fu.
A sa iken ti kwen-fu jwunn tika.
Aba wen atom-fu,
ti ku fwa ba kusen baa,
a na kafe ba uwog-fu.
Ande-fu nde ikentitibi beb timambe
u ku ndembeb rinyi-fu.
27Ikyaen ayine,
afu sa ba sang kujwo ande rika-ba
ti nde ba rikaen.
Uwae rikaen-ba aba jwub ira ba tu fu,
afu fxen ira ti jwub-ba apupwen.
Uwae ayibrisi-fu,
afu tom na ba ande ti nwangru ba
kujwo ande rika-ba.
28Ama isim ti aba tu unyang ti pu,
a nde kyi ikentitibi uwe-fu,
ama afu ya ba ta kujwo ande rika-ba.
Kweme ayine,
kiye ti a kafe u jwub ira tu fu,
afu fxen ira ti jwub-ba apupwen.
Kiye yang-yi afu nwangru ba
uwae ayibrisi-fu.
29Afu fa ba kusen
ti afu na u shir ba kafe ba
ti icwe-fu,
amaa, yi ijwe ti ndub-ba
a shaen icwe-fu
u ye su-ba iken ti kwen-fu be.
Asiti unde a ye su icwe-fu,
unde wu u som ti user
u tu ititiru yi uwe.
Aba bom risu u kwenkyi utob-ba
u nae-ba risu riben te fu be.
30Afu ye utob te ba asang yang-yi.
Afu tom kusung-fu na ande ti ku ya iskin
ti ba na fa ba kusen,
amaa, aba fxen-ba afu be.
Ikyaen ayine, afu sa ba
fae si kujwo ande rika-ba.
31Amaa, ikyaen ayibrisi-fu
ti ko timambe,
afu twenji-fu aba be,
u kafe isim ta-fu aba be.
Ikyaen ti, afu si Rimam ti tinyang
ti site ayibrisi timambe!
32Tine, Rimam-ti, Rimam tiyang,
Rimam ti site kuko,
Rimam ti ku nda ande ikyenricwu,
afu ti ku ye su unju ti yer-fu
u site ure ti tsi kukunn te ande-fu,
sae ru-fu rikaen ti tu ti be.
Tangsom te rikaen ti abikwe
ti afaen-ba ngwa,
akwen-fu ti atom-fu
ti ande-fu ti tsitsi meme,
sa ti kiye na abikwe Asiriya
ba kwer yaka ne.
33Afu nde pang atang
ti afu byinn ti kimbab.
Afu ye su unju ti yer-fu,
ko ti ati nde ikentitibi.
34Abikwe-ti, afaen-ti,
akwen-ti, ti abitse-ti,
ye su-ba icwe-fu be.
A naa atong fxen-ba icwe-fu
ti kusen ti fa-fu
ti afu nda ba be.
35Ko kiye ti a som usom ukwe
ti risu-ba,
afu nde ba ti tinyang,
u nda ba riben tiyaen
ti site ajib timambe,
amaa, a ya ikentitibi ta-ba be,
u fen-ba afu be.
36Tine ati kafe pu ti apyi,
yi riben ti afu nda abitse-ti
ti ba na ci utug-wu ti rinyang-wu.
37Titinyang ti ku tso riben atang,
a ku pu yi ka na-ba abikwe ba,
ti afu pu ta risu-ti
ikyaen ikentitibi-ti.
Aba ta risu-ti ti indag-ti meme.
Aba ku nde iken
ti nyang uwae-ba te ti.
Ama ati ta uwae rikaen beb timambe.
Isirela Yer Unju Uwe Rimam
38“Ikyaen meme iken ayine, ati ku yer unju uwe Rimam ti utob-ti, ama u bae yi bae tsi. Ande ti uwe-ti, ti anyisu Lawi, ti akwen-ti kwa kujwo atang.”
Currently Selected:
Nehemiya 9: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
