Nehemiya 8

Ezra Nung Putsa Icwe na Ande Isirela

1Usir ti tawe na ushaen ti itsongfaen wu, meme-ba funn tag yi Urushelima, yi rishin Ufu Ambyi. Aba ri ira te Ezra, unde ti ku kwen na ande icwe ti Yaweh nda Musa ti awu na nda anyisu Isirela. Aba ri te wu ti wu na sa kutsingken icwe wu na ru ye na ba.

2Usir wu, Ezra wu ti sisí kukwen sa wu ba uwog ti ande ba funn atang, arom, anda, ti anyisu ti ben pu ba ayib. 3Awu nung putsa icwe yi na ba yi Ufu Ambyi yi rishin atang ti kiskinn ba tsi usirtaen, ama meme-ba fxen ira yi nyinyang.

4Ezra tsitsa kupam ti a sim tsi ikyaen úfunn wu. Ama ande ti tsi kujwo rici-wu si: Matitiya, Shema, Anayiya, Uriya, Hilikiya, ti Maseya. Ande ti tsi kujwo ife-wu si: Pedaya, Mishayel, Malikiya, Hashum, Hashibadana, Zekariya ti Meshulam.

5Ti Ezra tsitsa kupam wu, ande patag pu ayib-ba cwutsa wu. Kiye ti awu mbubta kutsingken wu, aba sunwunn ritsen. 6Ezra teb Yaweh baa, “Yaweh Rimam ti site kuko!” Meme ande ba pu ajwo tso ritsen u ri baa, “Ayi ā si ahan! Ayi ā si ahan!” A jwinn ikig riben u pu uwe-ba bur riben u fen wu, 7ama fa sunwunn ritsen kiye ti anyisu Lawi ku ri te ba imbyi icwe yi. Aba si Jeshuwa, Bani, Sherebiya, Jamin, Akub, Shabetayi, Hodiya, Maseya, Kelita, Azariya, Jozabadi, Hanan, ti Pelaya. 8Aba nung putsa kutsingken icwe Rimam, ku ri ira yi tso ise paenine, u mbubta imbyi ira yi ikyaen ti ande na nungye yi nyinyang.

9Kiye ti ande ba fxen iken ti icwe ku sha ti aba na nde, aba ndembeb utob u sang ira ti jwub. Tiri Nehemiya ti si gwamna, ti Ezra ti si kukwen u si unde ti nung icwe Rimam timambe, ti anyisu Lawi ti ku kwen na ande icwe yi, ri te meme ande ba baa “Yaka ne si usir ti sisaen ana Yaweh Rimam-ni. Ni ndembeb-ni utob u jwub ira be”.

10Nehemiya ri te ande ba baa, “Ni kafe ru kununn ti ni ka nde ukwab na wuci ti tinyang ti iken ti ngwa ti nyang itug, ti ni ka iki na ande ti site-ba ayi be. Yaka ne si usir ti sisaen ana Itsekuru-ti, ikyaen yine, ni ndembeb-ni utob be. Utob ti tsen yi Yaweh si upab ribom-ni.”

11Anyisu Lawi ama ku ri ande utob baa, Ni bwe tag skirr. Yaka ne si usir ti sisaen, ni ndembeb-ni utob be.

12Ama meme ande ba kafe ru anunn-ba ka ci u ngwa ti ushwu ti shwu, u ka iken ti aba site na ariki, ikyaen ti aba nungye pu ba imbyi icwe yi.

Ukwab na Afug

13Usir ti fa ti ifaen, ande ti uwe na umyaem umyaem, ti akwen, ti anyisu Lawi, ka uwog Ezra unde ti ku kwen na ande icwe, ti a na kaa kwen iken risu icwe yi. 14Aba nungye ti a bae uwae icwe ti Yaweh nda Musa baa, anyisu Isirela na kyae afug ti a na nae atang kiye ukwab na afug ushaen ti itsongfaen, 15ama ti a na ya iskin kyife uwae Urushelima ti uten uten-ba baa “Ni tso yi rikwen ti ni ka pye akyikya ituku olifi ti kununn ti ti kutur, ti ituku miritil, ti asaen itu, ti ituku ti site atsing tiyaen ti ni kyae afug pangma ti a bae uwae icwe.”

16Ama aba ru ka pye akyikya ituku yi ba kyae afug, ariki ba kyae ana-ba yi risu kusog-ba, ti fenkyi-ba, ti fenkyi kusog Rimam tiyang, ti rishen ti ta uwe Ufu Ambyi ti Ufu Efiremu.

17Ama meme ande ti ru uwog usom upyi kafe ba, a sim afug u nae atang. Ayine si iken ti kucangtsi ti a nde isim kiye na Jeshuwa umbae Nun, ama uwae ande meme nyang, aba tsen utob timambe.

18Ti usirsir sa ti usir ti tawe na ukwab yi ba usir ti ricwunnkyi-yi, aba nung putsa icwe Rimam. Aba ci, u ngwa, u shwu uwae usir itsongfaen ama usir ti itsongta, a nde úfunn tiyang pangma ti icwe ri.

Currently Selected:

Nehemiya 8: kubNT

Highlight

Copy

Compare