Nehemiya 4
4
Ande Iki Tsi Ukub te Wande Nehemiya
1Kiye ti Sanbalati fxen baa, ati Mbaibrane na bag pu ti itimbye shem na ukoh wu, awu tso rinae timambe ama u txir ti itxir. 2Yi uwe na ande ti putsa wu, ti akyirten na Samariya, awu ri baa, “Imi ti Mbaibrane ba ti fa-ba ukwab be ne ku kab ti a na u nde? Aba ku sha ti a na u mbye shem uten wu a. A u mamtag wande yi usir kinjo a. Amumunn atxom ti twen mbubub ne, a u pu yi mbye tu kusog atang, ama u twen ikentitwen u yerkob kusog wu a.”
3Tobiya, urae Amon, tsi fer wu atang, ama ri kyi baa, “Ki! Iken ti aba ku mbye ne, ujwong a tso atang, awu u kyaen pu yi si ti riben!”
4Ame jwam baa, “Aya Rimam! Fxen ititxir ti a ku txir ti ne! Nda ititxir yi ti a kafe si ti risu-ba. Ande iki ā fxaembe meme iken ti aba site yi! Ande ti rika ā pu ba ru usom apyi! 5Ya ta na-fu aba be. Tangsom ti ikentitibi ti aba ku nde, ikyaen ti, aba txun ti asu, ati ande ti ku mbye rimbye.”
6Tiri ati ru uwe ti itimbye shem na ukoh wu, ama ti ritsen ti ritsen ukoh wu mbye tso ka pu wu kapam, ikyaen ti uwae-ba tsi ti a u nde wande yi.
7Kiye ti Sanbalati ti Tobiya ti ande ti Arab ti Amon ti Ashidod fxen baa, ati na ku ru yi uwe ti itimbye shem ukoh na Urushelima wu, aba tso rinae timambe, ikyaen ti aba fxen baa, ati na mbye ren pu ti riya riya ti ku ukoh wu. 8Tiri aba byir atso u myae ira ti a na ba kunn Urushelima ti rika, u sa kyirunn sang. 9Amaa, ati jwam Rimam-ti ama u pu akyirten tsi ujwin, usir ti utitang ikyaen ande ti rika ba.
10Ande ti Yawuda sur ikwaen baa,
“Ati numtag pu ti ti isu ti su.
Acwupwe ti kyaensi
ko timambe ti kwae.
Ati u nde rimang
u mbye ukoh wu ne?”
11Ande ti rika-ti ku kab baa, ati na u sae-ti aba be, ama ati na u nung-ti iken ti aba na ku nde be. Aba na u ba gbugfa ti fa amam, u wen ti ama u nda wande yi kyaetsi. 12Kiye wu Mbaibrane ti nae ko aka fer ande ti rika-ti ba ri kob te ti baa, “Ko ati a kafe ru-yi aka, aba na u kunn ti ti rika.”#4:12 Ariki uwae ande ti ku myae ira yi unju Mbaibrane ku ri baa, imbyi ira yine ta ti. Atsepu yang-yi Mbaibrane ti ku nae ko aka uwae-ba ku jwam ti baa, ati na nwunn uwae uka ti ti na kafe ba tu ba ise. 13Ikyaen yine ame nda akyirten pu afag ti iti, ti kokuta, ama u pu ba tsi ti umyaem umyaem yi isim ukoh uwog ti a mbye tag-ba wu khika be.
14Ame sae meme iken ti ku nde, ama u nwunn ka ri te ande ti uwe, ti ande tiyang baa, “Ni kyen-ni ikyenricwu na ande ti rika-ti be. Tangsom te itso kuko na Itsekuru-ti, ti ikyenricwu ti awu ku sa ye ande. Ni ta rika ikyaen ameinja-ni, ti anyisu-ni, ti awa-ni ti anunn-ni” 15Kiye ti ande ti rika-ti fxen baa, ati na nungye pu ti kumyae ti a ku myae risu-ti ama u nung baa, Rimam na byinn mbub pu wu kumyae-ba, meme-ti kafe ru ti uwog ukoh wu ti ti mbye.
16Tsikunn kiye wu ru uwe, ripye na ande-m ku nde wande, ripye ti tsitsi u ye su iti, ti apwarika, ti apwarika ti a ku sisi, ti kokuta u som ti ujwin. Ama ande ti uwe-ti kan atso u tsi u ku ri bom 17ande ba ti ku mbye shem ukoh wu ijwe. Ande ti ku su isu ukoh wu ku nde wande ti kujwo kinjo, u ye su usu rika-ba ti kujwo ti ifaen, 18ama unde titini ti ku mbye ukoh wu sa ufag-wu cwun imbyi. Unde wu ti ku kunn kutumu ama tsi te m. 19Ame ri te ande ba ti ande tiyang-ba ti ande ti uwe-ba baa, “Wande yi ko timambe, ama ayi nda ti ta rurwen te atso uwog ukoh atang. 20Ani a fxen kutumu, ni ter ba uwog-m. Rimam-ti u ta rika ikyaen-ti.” 21Usir titini ti kiskinn fifae ba kwer ti kiye ti atitaen ku ru ye ise utitang, ripyir-ti ku nde wande yi ukoh wu, ama ripye ti ifaen ye su iti ku tsi ujwin. 22Kiye wune ame ri te ande ti ku nungkyi wande yi baa, aba na ti ande ti ku ndeya ba na som ti Urushelima utitang ikyaen ujwin, ucwe a fam si pu wu, aba na ru yi uwe ti wande ti ti nde. 23Ame ku tunn-m atupwa-m tunn be, kwer ti ameinja-m ti te m ta tetso, ti ande ti ku nde na m wande. Akyirten ti ku kyir m nde ti mbwe-yi ama. Meme ti ye su usu rika-ti ti ajwo.
Currently Selected:
Nehemiya 4: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
