Nehemiya 5
5
Itisir Ande ti Rikaen
1Kiye iki ande yang-ba akwen, arom ti anda, bag ira ti ri risu ande-ba Mbayawuda. 2Ariki uwae-ba ri baa, “Ati site anyisu ti arom ti ti anda yang-ba anunn-ti, ama wuci ko-yi ati be. Ati ku sha wuci ti ati u ci u cwu-ti rimenn be.”
3Ariki ama ri baa, “Ati sa waerikong-ti, ti risaen anam-ti, ti asog-ti na ande ti a pu na ti wuci, ikyaen ti rimenn ā wen-yi ati be.”
4Cwucwo ariki ri baa, “Ati ci ripab titawe m pae aser ukwe risu waerikong-ti ti risaen anam-ti. 5Ati si sí anyisu Isirela ama. Anyisu-ti si-ba pangma ana ba be a. Amaa ati sa anyisu-ti kafe apyi. Ariki uwae anyisu-ti ti anda, ati pu ba jabci pu ti apyi. Ati kafe akun-ajwo ikyaen ti waerikong-ti ti risaen anam-ti, a ye pu yi ru pu ba uwog-ti.”
6Ti ame fxen ira ti ri-ba yine, ame tso rinae 7ama u sa tsi ti m u nde wande risu-yi. Ame fwan ande ti uwe ti ande tiyang na Isirela kubyag u ri te ba baa “Ani ku sir ameinja-ni sir!” Ame kunn ufunn tiyang ikyaen ti m u ri ira risu iken yine 8Ame ri te ba baa, “Ati kwab u jab mbe ameinja-ti Isirela ti sa ijwe-ba jabci na ande ti rikyen. Tine, ani ku pu ameinja-ni jabci na ande ti rikyen ikyaen ti ati na u kafe ka jaeb mbe kyi ba cwucwo a?” Ande ti uwe ba bwe tag skirr u shanum te ira ti ri.
9Tiri ame ri baa, “Iken ti ani ku nde pang-yi atang be. Ani u nae-ni risu riben na Rimam u nde iken ti pang atang be a. Ayi a si-yi ahan be ani u nda ande ti si-ba Mbaibrane be, aba ande ti apxin, riyae ti a u txir ti itxir. 10Ame ti risu-m ku ci ripab aser ti wuci na ande, ayi si ahan ama uwog ande ti te m ta tetso ti ande ti ku nde na m wande. Tine, ti ya ta na ande meme iken ti a u pae na ti. 11Iken ti ande pu na ni meme, ko ayi a si waerikong ko risaen anam ko risaen olifi, ko anunn-ba, ni pu yi kafe na ba ti ritsen. Ni pu atxwa ti ni ci uwog-ba kafe na ba ti atang, ko ayi a si ripab aser ko wuci ko iken ti ngwa ko kindob.”
12Ande ti uwe ba ri baa, “Ati u nde pangma ti afu ri. Ati u pu meme iken-ba na ba ti atang.” Ame kunn akwen sang ba ama u nda ande ti uwe ba ben uben yi uwe-ba baa, aba na u ye su unju ti yer ti aba yer ne.
13Tiri ame fwer kutupwa-m, u ri baa, “Ayi si ahan ti Rimam u fwer ko aye uwae-ni ti a ye su-wu unju ti yer-wu be. Rimam u ye pu anunn-wu ti iken ti awu site meme ru, ama u ya wu ta ajwo ukaen.”
Meme ande ti som riben atang ri baa, “Ayi ā si ahan,” ama u teb Yaweh. Ande ti uwe ba ye su unju ti yer-ba.
Nehemiya Shaen Risu-wu
14Yi meme asang rijwe asu ifaen ti ame si gomna na Yawuda, nwunn ti asang ti rikom ti Aritaserke si ukwe ba kwer ti asang rijweta asu ifaen ti awu si ukwe, ame ti ande kununn-m ci-ti wuci ti ame ú ci ikyaen ti ame si gomna be.
15Aba gomna ti nde wande uwe-m nda ande rikaen, ama ku sha ayaen azurfa mae ifaen ti usirsir ikyaen wuci ti iken ti ngwa. Kwer ti ande-ba ti ku nde wande kununn gomna aba ama waen ande rikaen. Ame nde-m ahan be ikyaen ti, ame nae risu riben na Rimam.
16Ame sa meme ribom-m na wande na itimbye shem ukoh Urushelima ama u jab-m riben iki be. Unde titini ti ku nde na m wande sang fa itimbye na ukoh wu.
17Usir titini ame ku shi ande ti uwe ti ande ndufu na Isirela kumbub kinjo ti mae ifaen ka mbe rijwe fa ti ande ti uwe iki ti si-ba Isirela be.
18Usir titini ame ku wen indag kinjo ti iwentam ti rikem itsonjo, ti mbakunn yang-yi akwen, ama usir rijwe a nde, ame ku sha ambyi anam ti tsotso yang-yi ba na ba. Amaa ame nung rikaen ti ande ta uwae-yi, ama u ri-m baa a na pae na m aser ti a ku pae na kob gomna be.
19Ame ku jwam Rimam ti awu ā nde me tinyang ikyaen meme iken ti ame ku nde na ande bane.
Currently Selected:
Nehemiya 5: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
