Itiruye 36
36
1“Bezalel ti Oholiyab ti meme ande ti Yaweh nda pu wu aba itsab ti ti nde tu iken ajwo, si aba ti u nung fengo ti a u nde wande itikyae uwog ti sisaen wu pangma ti Yaweh ri.”
2Ama Musa kunn Bezalel ti Oholiyab ti meme ande ti site utob na wande ti nde ti nee Yaweh nda pu wu aba itsab na wande ti aba na ba nde wande yi. 3Ama isim ti anyisu Isirela pu rinyangwae ba na Musa ti utob-ba, ande bane mbe yi kujwo Musa ikyaen wande na uwog ti sisaen wu. Kiskinn kiskinn, a tsikunn ti ku pu rinyangwae ti utob-ba ba na wu. 4Ayine nda meme ande ba ti site itsab wande itindetu ajwo, ya wande ti aba ku nde yi uwog ti sisaen ta, 5ama u ba tu Musa u ri te wu baa, “Isu-yi ti a pu ba ko skeb pu yi ayi ti ati ku sha ti ti u nde wande yi ti Yaweh nda ti unju baa, ati na nde.”
6Ikyaen yine Musa nda unju, a ya iskin ko aka uwog ti a nae atang baa, “Unde iki, ko urom ko unda, ā pu rinyangwae iki ba-wu ikyaen wande uwog ti sisaen wu cwucwo be.” Ikyaen yine, aba pu iken iki ba-ba cwucwo be, 7ikyaen ti, iken ti a pu ba, ko skeb pu yi iken ti a ku sha ikyaen ti a u nde cwunn wande wu.
Itikyae Kufug Uwog ti Som Yaweh
(Itiruye 26:1-37)
8Ama meme ande ti site itsab wande ti nde uwae ande ba ti ku nde wande pu atupwa rijwe ti a ndxob yi te itub lilin ti itub ti rikàen-yi ru irum titisub, ti itub ti ru tibyaen, ti itub tibyaen, ti kerubi ti a nde tsi ijwe atupwa yi, u pu yi kyae kufug uwog ti som Yaweh atang. 9Rikob atupwa yi si yadi rijwe asu inje rijwe asu inje, riyaen-yi ama si yadi ifaen ifaen. Meme-yi pang atso pang atso. 10Awu kob ren itsong uwog kinjo, ama kob ren itsong ti tsitsi uwog kinjo. 11Awu sa kutupwa ti rikàen wu ru irum tirisub kob sang unju kutupwa ti tawe, si si utso wu ti awu sa kob sang kutupwa ti ifaen ti ta ise. 12Awu kob unju atupwa yi serye atso serye atso ka mae ifaen mbe rijwe iyen ikyab ne, mae ifaen mbe rijwe iyen ti ifaen, ama atupwa yi cwu kyang kwer atso. 13Ama awu kwen ukwàb na zinariya mae ifaen mbe rijwe u pu fae ren atupwa yi tetso, ama ayi nda kufug uwog ti som Yaweh wu si kinjo amam.
14Cwucwo, awu ndxob atupwa rijwe asu kinjo iki te asing iwenten ikyaen ti a u pu burkyi kufug uwog ti som Yaweh wu. 15Rikob atupwa yi meme si yadi rijwe asu itsong rijwe asu itsong, riyaen-yi ama si yadi ifaen ifaen. Atupwa rijwe asu kinjo yi pang atso pang atso. 16Awu pu atupwa itsong kob ren atso, itsongnjo ti tsitsi ama kob ren atso. 17Awu kob unju atupwa yi serye atso serye atso ka mae ifaen mbe rijwe yi kutupwa kinjo, ama nde ahan te kutupwa ti ifaen ti sor ren te wu. 18Awu pu bronzi kwen ukwàb ka mae ifaen mbe rijwe te yi, ti atupwa yi ā fae ren atso ti kufug Uwog ti som Yaweh ā si kinjo. 19Ama awu pu apwa iwentam ti a fufwá, ti apwa ibye iki ti tutub burkyi kufug wu.
Itso ti Aba Nde Wande yi
(Itiruye 26:15-30)
20Tiri Bezalel baen ren ituku akasiya ti ndindab ifaen ifaen ama kyae kufug uwog ti som Yaweh te yi. 21Rikob ituku yi ti awu pu baen rentso ifaen ifaen ne si afxen rijwe asu itsong, riyata riyata-yi ama si afxen ifaen ifaen ti ripye. 22Awu yer ituku ti pang pang ifaen ifaen sim fa meme imbyi ituku kufug uwog ti som Yaweh wu. 23Awu pu ituku ti baen rentso baen rentso ne ka rikom sim iyen ti isi kufug uwog ti som Yaweh wu, 24ama pu azurfa kyae iken mae ifaen ti a u pu ituku ti baen rentso baen rentso ne tsi si atang. 25Ama awu pu ituku ti a baen ren tso baen ren tso ne ka rikom sim iyen ti isku kufug uwog ti som Yaweh wu, 26ti iken mae ifaen ana azurfa ti a pu ituku yi ti a baen ren tso baen ren tso ka rikom ne tsi atang. 27Ama isim kufug wu, uwe ti usir kujwo ureb a baen ren ituku ti rikob ifaen ifaen ka itsongnjo. 28Awu pu ituku ti rikob baen ren tso baen ren tso ka ifaen ifaen ikyaen ukub kufug uwog ti som yaweh wu uwe ti usir kujwo ureb. 29Awu sim ituku yi txi txi yi akub ifaen yi, ama ren risu-yi yi uwong ti ta kunyang ti tawe. Ayine ti si akub ifaen ana Uwog ti som Yaweh wu. 30Ama ituku yi iki ta atang ti baen ren tso baen ren tso ka itsongta tsi si iken rijwe asu itsongnjo ti a kyae yi te azurfa.
31Awu pu indab ituku akasiya itsong ce sang iyen kyab kufug uwog ti som Yaweh wu. 32Ituku itsong ce sang iyen kyab ti ifaen na kufug uwog ti som Yaweh wu, ituku itsong ama awu pu ca sang uwe ti usir kujwo ureb. 33Awu sa ukum ti ta kutampwa ikum yi ce sang nwunn ti iyen ike ka sang iyen akwen. 34Awu shin ituku yi ti baen ren tso baen ren tso ifaen ifaen ne te zinariya, u kwen kunyang zinariya baefa ijwe-yi ikyaen ti ayi ā ye su ituku ti risang ana iyen ikyab Uwog ti som Yaweh wu.
Atupwa ti Yerkyi Kufug Uwog ti Som Yaweh
(Itiruye 26:31-37)
35Ama awu yer atupwa lilin ti rikàen-yi ru irum titisub, ti iti ru tibyaen ti tibyaen. Awu wae kerubi si ijwe atupwa yi. 36Awu pu atupwa yi kyensi afwá ituku akasiya ti a shin yi te zinariya ti ukwab zinariya, ama kyae iken inje te azurfa u pu yi tsi si atang. 37Cwucwo, awu kob ren atupwa ti rikàen-yi ru irum titisub, ti ti ru tibyaen, ti tibyaen u pu kyensi ufu kufug wu. 38A kyae afwá-wu ka itsong ti akwàb-yi, ama shi risu-yi ti akwàb-yi meme te zinariya, ama ana iken itsong ti a pu afwá yi tsisi atang, a shi yi te bronzi.
Currently Selected:
Itiruye 36: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
