Itiruye 37
37
Itikyae Akpati Unju ti yer
(Itiruye 25:10-22)
1Bezalel kyae akpati unju ti yer wu ti ituku akasiya. Rikob-wu si afxen ita ti ripye pang, riyaen-wu si afxen ifaen ti ripye pang, rikob-wu ti ritsen ama si kutun kujwo kinjo ti ripye. 2Awu fxebkyi uwae ti ise akpati wu meme te riyib zinariya, ama fxeb ufuyen-wu meme te zinariya pakob. 3Ama awu kwen kunyang zinariya inje u pu sang ikub na afxen akpati wu. Kunyang ifaen ta iyen kyab ne, ifaen ama ta iyen ti ifaen. 4Ama awu pab ikum kutuku akasiya ti rikob-yi, u shi yi te zinariya. 5Awu pu ikum yine tur sang kunyang yi ti ta ufuyen akpati wu ikyaen ti a u ku su wu atang. 6Awu kyae kubur akpati wu ti si uwog itiyata ikentitibi te riyib zinariya. Rikob-wu si afxen ita ti ripye, riyaen-wu si afxen ifaen ti ripye. 7Awu kwén kerubi ifaen ti site asae pangma inung te zinariya. Awu kwen yi tsi tso iyen iyen kubur akpati wu ti si uwog itiyata ikentitibi. 8Awu kwén kerub kinjo tsi tso iyen ne, u kwen ti ifaen tsi tso iyen ti ifaen ama. Awu kwen ren yi fa ti ijwe kubur akpati wu. 9Kerubi yi pu asae-yi tso ritsen kukyi kubur akpati wu, ama pu uwe-yi tag atso ku sae akpati wu.
Itikyae Tebur
(Itiruye 25:23-30)
10Awu kyae tebur ti ituku akasiya. Rikob-wu si afxen ita, riyaen-wu si kufxen kinjo ti ripye, rikob-wu ti ritsen ama si kutun kujwo kinjo ti ripye. 11Awu shin wu te riyib zinariya, u kyae ukub ukub sangkob fuyen-wu te zinariya. 12Awu pab kutuku ti riyaen-wu pangma kuskab kujwo, u nde batin sangkob tebur wu, ama sa zinariya kyae indab-wu atang pakob. 13Awu kwen kunyang inje ana zinariya yirfa ukub inje ana afxen tebur wu. 14Kunyang yi yirfa fer ti ikum batin ikyaen ti a u pu ikum yi faesang u su tebur wu. 15Awu pab ikum kutuku akasiya, u shi yi te zinariya, ikyaen ti a u ye tebur wu te yi. 16Awu pu riyib zinariya kyae isu yine ti a pu tsitsa risu tebur wu. Ayi si ikyig ti atutong ti si ikyaen iken ti twen, kitu ti kiten si ikyaen ti a yaen rinyangwae iken ti ngwa si atang.
Itikyae ana Afxen Fitila
(Itiruye 25:31-40)
17Awu sa riyib zinariya kinjo kwen ren umbyi ti rimenn iken ti a pu fitila tsitsa atang fa ti ikum-yi ti ajwug-yi meme. Uwog ti tsi ti indab ti a kyae uwog ti tsi fitila wu meme si zinariya ti a kwén yi kwén.
18Iken wu ti a pu Fitila yi tsitsa atang site ajwo itsongnjo, ita iyen ne, ita iyen ne. 19Awu kwen iticwae ita ita ti pangma ajwug alimon ta ko kujwo titini uwae ajwo itsongnjo yi, 20ama kwen iticwae inje ti pangma ajwug alimon ta rimenn-wu ti tso kutampwa. 21Awu kyae ajwug-yi ita u pu tā imbyi iken ti ku ye su fitila wu uwog ti ajwo itsongnjo yine ren ifaen ifaen atang. 22Meme ajwug-yi ti ajwo-yi ren tag te rimenn iken wu ti a kwen ti riyib zinariya. 23Awu kyae fitila itsongfaen tsitsa ajwo itsongfaen yi, ti iken ti ku jim fitila yi, ti tire-wu te zinariya. 24Awu myae riyib zinariya ka kilo rijweta mbe itsong u kyae meme iken yi te yi.
Kuta Iken ti ku Nung Kuyang
(Itiruye 30:1-5)
25Awu pu ituku akasiya kwer kuta ti rikob-wu si kufxen kinjo ti ripye, riyaen-wu si kufxen kinjo ti ripye. Rikob-wu ti riyaen-wu pang atso. Rikob-wu ti ritsen ama si kutun kujwo ifaen. Awu kyae ishin inje tsisi ikub inje na kuta wu. 26Awu shi risu kuta wu ti iyenkyab iyenkyab-wu sangkob te riyib zinariya fa ti ishin-wu meme. Ama awu pu zinariya kyae kindab sangkob iyenkyab wu. 27Awu kwen kunyang zinariya ita sang ikub yi iyenkyab ne ti iyenkyab ne, ikyaen ti a pu ikum sang atang ku ye kuta wu te yi. 28Awu pab ikum yi te ituku akasiya, ama shin kyi yi te zinariya.
29Awu kyae kindob ti ku cwucwe na itiyerkob, fa ti iken ti ku nung kuyang pangma ti unde ti ku kyae iken ti ku nung kuyang ku kyae.
Currently Selected:
Itiruye 37: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
