Itiruye 24

Isirela Yir Bom Unju ti yer-ba Te Rimam

1Ama Yaweh ri te Musa baa, “Tso ba tu m utáen rikwèn ike. Afu ti Aruna ti Nadab ti Abihu, ti ande ndufu Isirela mae ita mbe rijwe. Meme-ni ā tsi ti fengo ti rwen ti ni fen m. 2Musa, afu amam ti u ko ba fer m, Yaweh, ande ndufu ba u ko fer-ba ame be. Isirela ti tsitsi u te fu tso ba-ba tetso utáen rikwèn ike be.”

3Musa si ka ri te ande ba icwe Yaweh, ti meme ira ti awu ri. Ama meme ande ba cwe ti unju kinjo baa, “Meme ira yi ti Yaweh ri, ati u nde yi.” 4Ama Musa bae meme ira yi ti Yaweh ri. Awu nwunn ti kiskinn fifae, u mbye kuta yi imbyi rikwen atang. Awu pu atxom rijwe asu ifaen, kob risu kumbub anyisu Isirela, u pu sim atang. 5Ama awu tom anyisu taen iki uwae anyisu Isirela ka twen indag na Yaweh ikyaen iken ti twen na kujimshwur ti risu ti ren. 6Musa nyae kapam anying ibye yi si kuseb, u sa ti tsitsi sam pakob kuta wu. 7Ama awu sa kutsingken unju ti yer, u nung putsa wu na ande ba meme. Aba cwe baa, “Meme ira ti Yaweh ri, ati u nde yi.”

8Musa sa anying yi ti ta kuseb, u sa sam tso meme ande ba ijwe u ri baa, “Ayine si anying unju ti yer ti Yaweh yer te ni, som tsa meme ira yi ti awu ri ne.”

9Tiri Musa ti Aruna ti Nadab ti Abihu ti ande ndufu Isirela mae ita mbe rijwe, nwunn u ye ikyin tso yi rikwen atang, 10u ka sae Rimam na Isirela tsitsa risu iken iki ti pataa, ku jae wur wur pangma kutxom safire, u saen paenine pangma upwa apupwen. 11Ande ndufu Isirela sae Rimam, ama Rimam wen-wu aba be. A ci u ngwa uwe Rimam.

12Yaweh ri te Musa baa, “Tso ba somji m utaen rikwen ike, ame u pu na fu afxae atxom ti ame bae icwe si atang ikyaen ti fu ku kwen na anyisu Isirela.” 13Tiri Musa ti Jeshuwa, umbae wande-wu, nwunn u tso yi utaen rikwen Rimam. 14Ama Musa ri te ande ndufu Isirela baa, “Ni somji ti tí ike, se ati a ka u ba pu ti. Aruna ti Hur ta te ni ike. Unde ti a site ira, awu ā tu ba.”

15Tiri Musa nwunn tso yi utaen rikwen, ama kubyi byi kyi tag rikwen wu meme. 16Riyinn Yaweh kukyi tag rikwen ti Sinai ama kubyi kukyi rikwen wu ka usir itsongnjo. Usir ti itsongfaen, Yaweh kunn Musa ira uwae kubyi atang. 17Kiye wu, riyinn Yaweh tatso risu rikwen atang pangma urwa ti ku twen ku ci kutur, uwe anyisu Isirela. 18Ama Musa sang uwae kubyi wu u tso yi utaen rikwen atang. Awu som utaen rikwen atang ka usir mae ifaen ti utitang mae ifaen.

Currently Selected:

Itiruye 24: kubNT

Highlight

Copy

Compare