Itiruye 25
25
Kusog ti A ku Fen Rimam Atang
(Itiruye 35:4-9)
1Yaweh ri te Musa baa, 2“Ri te anyisu Isirela ti a na pu rinyangwae ba na m. Mbe na m rinyangwae kujwo ko aye ti a site utob rinda ti nda. 3Itso rinyangwae ti afu u mbe kujwo-ba ta re: Zinariya ti azurfa ti bronzi, 4ti itub ti rikaen-yi ru irum titisub, ti tibyaen, tí ti ru tibyaen, ti atupwa lilin, ti asing iwenten ti mbawentam ti a fufwá 5ti apwa iwentam ti a fufwá, ti apwa ibye iki ti tutub#25:5 apwa ibye iki ti tutub Unju Mbaibrane: apwa takash. Ariki ku myae baa, takash na si ibye ti uwae ambyi ti a ku kunn wu baa, indag uyinn, ko dugong, ko manate., ti kutuku akasiya, 6ti kindob ti a u sa si fitila, ti umung iken ti ku nung kuyang ti a u sa naafa kindob itiwaekob, ti ayi ti a ku twen iken ti ku nung kuyang atang te yi, 7ti atxom onis ti atxom ti tinyang tinyang ti a pu kob baefa efod,#25:7 efod Sae foto efod iki yi Itiruye 28:4. ti jifu efod ti kukog. 8Nda anyisu Isirela ti a kyae na m ukag ti sisaen ti m som si kutampwa-ba. 9Ni kyae ukag-m wu ti isu uwae-wu pangma ti ame u tso fu.”
Fengo ti A Kyae Akpati Unju ti yer
(Itiruye 37:1-9)
10Aba ā kyae akpati te ituku akasiya. Rikob akpati wu ā si afxen ita ti ripye, riyaen-wu ā si afxen ifaen ti ripye, rikob-wu ti tso ritsen ama ā si kutun kujwo ti ripye. 11Fxebkyi wu uwae ti ise meme te riyib zinariya. Fxeb sangkob ifuyen-wu meme te zinariya. 12Kwen kunyang zinariya inje, ti fu pu yi meme sang afxen akpati wu, ifaen iyen kyaeb ne, ifaen iyen kyaeb ne. 13Pab ukum kutuku akasiya ifaen ti rikob, ti fu shi yi ti zinariya. 14Ni pu ikum yi tur sang kunyang yi ti ta iyen akpati wu, ikyaen ti ā ku su wu atang. 15Ni nwaen ruye-ni ikum yine ijwe akpati wu be. Ayi u fae kukunn ti ijwe akpati wu. 16Isim ti ani a kyae tag pu ni akpati wu, afu u pu afxae atxom unju ti yer ti ame u pu na fu cwu si uwae atang.
17Kyae kubur-wu#25:17 kubur-wu Unju Mbaibrane, kaporet. Imbyi-yi si ifaen. Kinjo si “Ubur.” Imbyi wu iki ama si “Itibur ikentitibi” ti tatso baa, risu akpati wune si uwog ti Rimam uwae ayibrisi-wu ku yata na ande ikentitibi-ba. Sae Itiruye 25:22. te zinariya. Rikob-wu ā si afxen ita ti ripye, riyaen-wu ama ā si afxen ifaen ti ripye. 18Kwén kerubi#25:18 kerubi Kerub si iken ti site unyang. Wande-ba si ti a nungkyi risaen Eden, ama ti a nungkyi uwog ti sisaen uwae kufug itifen uwog ti Yaweh si ba ku ren risu te ande-wu. ifaen ti site asae pangma inung. Kyae yi te zinariya, ti fu pu yi tsitsa iyen iyen kubur wu. 19Sa Kerub kinjo tsi ikyab kinjo, ti fu sa ti ifaen tsi ikyab ti ifaen ama. Ni nde yi ren fa kubur wu. 20Kerubi yine ā pu asae-yi tso yi apupwen ti ayi ā kukyi kubur wu, u kafe uwe-yi tag atso ku sae akpati wu. 21Pu afxae atxom ifaen na unju ti yer ti ame u pu na fu, cwu si uwae akpati wu, ama u sa kubur wu burkyi. 22Ame u tu fu risu akpati atang kutampwa kerubi ifaen yine, u nda fu meme icwe-m, ti fu nda anyisu Isirela.
Tebur Buredi ti ku Tatso Fxaefa
(Itiruye 37:10-16)
23Pu ituku akasiya ti fu kyae tebur ti rikob-wu ā si afxen ita, riyaen-wu ā si afxen kinjo ti ripye, rikob-wu ti tso ritsen ama ā si kutun kujwo ti ripye. 24Afu u shi wu ti zinariya. Pu zinariya kyae ukub ukub pakob risu-wu. 25Pab kutuku ti riyaen-wu ā pangma uskab kujwo, ti fu nde batin atang sangkob tabur wu, ama sa zinariya kyae indab-wu atang pakob. 26Kwén kunyang inje na zinariya ti fu pu yi yir fa afxen tebur wu meme inje yi. 27Yir kunyang yi fifer ti batin wu ti a u pu ikum faesang atang, u ye tebur wu te yi. 28Pab ikum ti kutuku akasiya, ti fu shi yi ti zinariya, ikyaen ti a ye tebur wu te yi. 29Pu zinariya ti fu mbye ikyig ti atutong ti kiten ti kitu, ikyaen ti a yaen rinyangwae iken ti ngwa si atang. 30Pu buredi ti ku tatso baa, ani na ta uwe-m, cwutsa risu tebur wu. Buredi yi ā ku cwutsa kukunn atang.
Fitila
(Itiruye 37:17-24)
31“Kwén iken ti a u pu fitila tsitsa atang te ayib zinariya. Afu u kwén ren umbyi wu ti utsinn-wu te zinariya kinjo fa ti itu-yi ti ajwug-yi meme. 32Ajwo-wu ayi ā si itsongnjo, ita iyen ne, ita iyen ne baefa utsinn-wu. 33Kitu ita ti a kyae yi pangma ajwug alimon ā ta ko kujwo titini uwae ajwo itsongnjo na fitila wu. 34Kitu inje ama a ta rimenn-wu ti tso kutampwa. 35Kyae ajwug ita ta rimenn fitila wu, uwog ti ajwo itsongnjo yine ren ifaen ifaen atang. 36Meme ajwug-yi ti ajwo yi u ren tag te rimenn wu ti a kwén te zinariya. 37Sa ukum zinariya kinjo ti kwen fitila itsongfaen tsitsa ajwo itsongfaen yine, ti ayi ā tso uwog ti saen-yi ru uwe-wu. 38Kyae iken ti ku jim fitila, ti tire-wu te zinariya. 39Myae zinariya ti rurob-yi ka kilo rijweta mbe itsong ti fu kyae meme iken yine te yi. 40Nung nyinyang ti fu kyae yi pangma ti a tso fu utaen rikwen.”
Currently Selected:
Itiruye 25: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
