Itiruye 19

Anyisu Isirela Nae Imbyi Rikwen Ti Sinai

1Uwae ishaen ti ita isim ti anyisu Isirela nwunn pu ba Ejib, aba ka sang kutur ti Sinai. 2Aba nwunn Refidim u ka sang kutur ti Sinai, aba sim afug-ba imbyi rikwèn atang. 3Ama Musa tso ka tu Rimam kitaen rikwen. Ama Yaweh kunn wu ira kitaen rikwen atang, u ri baa, “Ira ti afu u ri te ishikununn Yakubu ti si anyisu Isirela ta re. 4Ani sae pu ni iken ti ame nde te ande ti Ejib, ti fengo ti ame pu ni ruye uwae Ejib, pangma ame na pu ni sang asae ikwèn ba uwog-m. 5Tine, asiti ani a nae risu riben u fxen ira-m, u ye su unju ti yer-m, ani u si rifunn-m uwae meme ande ti ta utense ikyaen ti, utense meme si ana-m. 6Ani u si mbukwen ande ti sisaen, ti u nde na m wande kukwen. Ayine si ira ti afu u ri te anyisu Isirela.” 7Tiri Musa si ba kunn funn ande ndufu anyisu Isirela, ama u pwen tag te ba meme ira yi ti Yaweh ri te wu. 8Ama meme ande ba cwetso ti unju kinjo baa, “Meme ira ti Yaweh ri, ati u nde yi.” Ama, Musa kafe ka ri te Yaweh ira ti ande ba ri.

9Ama Yaweh ri te Musa baa, “Nung ame u ba tu fu uwae kubyi ti byi tititang, ikyaen ti ande ba ā fxen ira ti ame te fu ku ri. Ayi u nda ba ru kubenti uwog-fu ru fife yi uwe.” Ama Musa ri te Yaweh ira ti ande ba ri. 10Ama Yaweh ri te Musa baa, “Ru ka ri te ande ba ti a jwosaen ijwe-ba yaka ne ti ucwe, ama ti a jwo atupwa-ba sisaen. 11Utsowen, ni som ti ujwin, ikyaen ti, utsowen, ame Yaweh u si ba risu rikwen ti Sinai, ama meme ande u sae te ayib-ba. 12Wae ice sang imbyi rikwèn atang, ti ri te ba baa, ‘Ni nung ijwe-ni nyinyang ti unde iki ā tso-wu kitaen rikwèn wu ko ā tekunn rikwèn wu be. Unde ti a tekunn rikwèn wu, ni jwunn wen kang wu. 13Kujwo unde iki ā tekunn-wu unde wu be. Aba ā jwunn wu te atxom, ko a tā wu ti awu ā cwu kang ko asiti awu a si unde ko ibye.’ Asiti aba a fxen kutumu a ku kunn shem kunn shem, aba ā tso yi rikwen atang.”

14Ikyaen yine, Musa si kitaen rikwen atang ba tu ande ba. Awu nda ande ba jwosaen ijwe-ba ti atupwa-ba. 15Ama Musa ri te ande ba baa, “Ni som ti ujwin utsowen. Unde iki ā nae te-wu unda be.”

Yaweh Si Ba Tso Risu-wu Kitaen Rikwen ti Sinai

16Ucwe fam kiskinn ana usir ti ita, imam ku táen ku jaen wur wur. Kubyi ti byi tititang kukyi risu rikwen wu. Ama a fxen kutumu ti a ku kunn ti ribom, ikyenricwu ye meme ande, ijwe-ba ku fu fwer. 17Tiri Musa pu ande ba ruye uwae afug ba tu Rimam. Aba ba tsi imbyi rikwen wu. 18Akyàng yaenkyi tag rikwèn na Sinai ikyaen ti, Yaweh si ba kitaen rikwen wu uwae urwa. Akyàng ku tso tsig tsig tsig yi apupwen, ama meme rikwen wu kyi ijwe tang tang tang. 19Ama ti ukúnn kutumu yine tso ku fufa ku fufa, Musa ri ira te Rimam, ama Rimam cwe ira uwae imam ti taen. 20Ama Yaweh si ba kitaen rikwen Sinai. Yi kitaen rikwen Sinai atang, awu kunn Musa tso ka tu wu. 21Ama Yaweh ri te Musa baa, “Si ka fa ande ba kusen, be, aba u nyatsa ice u ba sae m. Aba a nde ahan, ande yang-ba u cwu. 22Akwen ti a ku ba uwe-m, aba ā jwo saen ijwe-ba nyinyang titawe, be ame u twenji ba.”

23Ama Musa ri te Yaweh baa, “Ande ba u tso-ba ba kitaen rikwen Sinai be. Ikyaen ti, afu ti risu-fu fwa pu fu ati kusen baa, ame na wae ice pakob rikwen wu, ti ame na yerkob wu ti wu na si uwog ti sisaen.”

24Ama Yaweh ri te kyi wu baa, “Si ka pu Aruna tso ba. Amaa, akwen ti ande ti tsitsi ā nyatsa-ba ice u tso ba uwe-m be, be rinae-m u si ba risu-ba.” 25Tiri Musa si ka ri te ande ba meme ira yi.

Currently Selected:

Itiruye 19: kubNT

Highlight

Copy

Compare