Itiruye 20

Icwe Rijwe

(Itishem Icwe 5:1-21)

1Ama Rimam ri ira yine patag baa, 2“Ame ti si Yaweh, Rimam-ni, ti pu ni ruye uwae uten Ejib, uten ti ani si upyi. 3Fen-fu apxin iki fa m ifaen be. Fen nyáng ame amam.

4“Kyae-fu iken iki ti fu ku riben na yi be, ko iken ti ru iken ti ta apupwen ko ti ta riben ko ti ta uwae ambyi. 5Ku riben na-fu ayi be. Fen-fu ayi be. Ikyaen ti, ame Yaweh Rimam-fu si Rimam ti kitsinn, ame cwe-m ti ande-m na kú riben na iken iki fa m ifaen be. Ande ti cwe-ba ira-m be, ame ku pwen ba ti anyisu-ba rikwén kaa sang ti utso ti ita te ti inje. 6Amaa, ame ku tso ure-m ti tsi kukunn ba uwog ande yang-ba ti site ure te m, ku ye su icwe-m.

7“Kunn-fu rinyi Yaweh Rimam-fu ti tikong be. Ikyaen ti, unde ti a kunn rinyi Yaweh ti tikong, Yaweh u pwen kang unde wu rikwén.

8“Tangsom ti usir ikyinn, ye su wu cwucwe. 9Uwae usir itsongnjo, afu u nde wande u nde tag wande-fu atang. 10Amaa, usir ti itsongfaen si usir ikyinn. Awu si ana Yaweh Rimam-fu. Uwae usir wu, afu u nde-fu wande iki atang be, afu ko umbae-fu ti urom ko ti unda, ko upyi-fu ti urom ko ti unda, ko iken ti shi-fu, ko unde ti rikyen ti som uten-fu meme. 11Ikyaen ti, uwae usir itsongnjo, Yaweh mam apupwen ti riben ti uyinn ti iken ti ta uwae-yi meme. Ama usir ti itsongfaen, awu pu unyang atang. Ikyaen yine Yaweh nde usir wu itinyang u sa wu tsi usir ti sisaen.

12“Nda itse-fu ti iya-fu rurob, ti unyang-fu ā ko ra ru yi uwe yi uten ti Yaweh Rimam nda fu.

13“Wen-fu unde be. 14Nae-fu amae be. 15Yib-fu riyib be. 16Cwe-fu ucwé tikong uwog rikwén risu unde ice-fu be.

17“Taen-fu ayib taen yi kununn unde ice-fu be. Taen-fu ayib taen risu uwa unde ice-fu be, ko upyi-wu ti urom ko ti unda, ko indag-wu ko ikyinnsu-wu, ko meme iken ti si ana unde ice-fu, taen-fu ayib taen risu-yi be.”

18Kiye ti meme ande ba sae imam ti ku táen ku jae wur wur, ti kutumu ti ku kunn, ti akyàng ti yaenkyi risu rikwèn atang, ikyenricwu ye ba, ijwe-ba ku fufwer, ama aba tsi ti fengo ti rwen, 19u ri te Musa baa, “Ri ira, ati u fxen fu. Ayi ā si-yi Rimam ti u ri ira te ti be, be ati u cwu.” 20Musa ri baa, “Ni kyen-ni ikyenricwu be, ikyaen ti, Rimam si ba ti wu myae ni, ti ikyenricwu-wu ā ta utob-ni, ti ni nde-ni ikentitibi be.”

21Ama ande Isirela tsi ti fengo ti rwen, Musa amam ti ko ru ka fer kubyi wu ti byi titang, uwog ti Rimam ta atang.

Icwe Risu Kuta

22Ama Yaweh ri te Musa baa, “Ira ti afu u ri te anyisu Isirela ta re. ‘Ani ti risu-ni nung pu ni ti ame na ri ira te ni yi apupwen. 23Ni kyae-ni apxin ana azurfa ko ana zinariya, ti ni fen yi fa m ifaen be.

24“ ‘Iken ti ani u nde na m si kuta ti ani u mbye te ariben, u twen na m rinyangwae ikentitwen, ti rinyangwae kujimshwur, fa ti iwentam ti indag-ni, risu kuta wu. Ko aka ti ame a tsab tsi ti ni na fen m atang, ame u ba nde ni itinyang. 25Asiti ani a mbye na m kuta ti atxom, ni pab-ni atxom yi pab be. Asiti ani a sa kukyab kiser pab atxom yi, atxom yi sor ndembeb pu yi. 26Ni kyae-ni kufxàn yi kuta wu be, ikyaen ti, ani a ku tso atang, ande u sae imbyi-ni.’

Currently Selected:

Itiruye 20: kubNT

Highlight

Copy

Compare