Itiruye 15

Anyisu Isirela Teb Yaweh

1Tiri Musa ti anyisu Isirela yang akyang ku teb Yaweh baa,

“Ame u teb rinyi Yaweh,

awu ci pu wu rika uwae kuko-wu.

Awu tur pu kakum

ti ande ti ku tso yi meme

si uwae uyinn.

2Yaweh ti si kpakang-m,

awu ti ame

ku yang akyang-m risu-wu.

Awu si Rimam-m.

Awu ti nwangru m.

Ame u teb rinyi Rimam na itse-m.

Ame u yetso rinyi-wu.

3Yaweh si Ukwe rika.

Yaweh ti si rinyi-wu.

4“Awu tur pu akyirten ukwe Ejib

ti kuskus ti kya fa kakum-ba,

si uwae uyinn tibyaen.

Ama ande ti uwe-ba

ti Ukwe tsitsab

ngwa cwu uwae uyinn wu.

5Ambyi ba tum munnkyi ba.

Aba si fife yi rita uyinn

pangma kutxom.

6“Ti kpakang kujwo rici-fu Yaweh,

afu ye ande rika-fu shiryae.

7Yi uwae kuko-fu ti ko timambe,

afu ci rika risu ande

ande ti tsi ukub te fu.

Afu tso rinae te ba,

u twenji ba pangma irum.

8Unyang ti ruye ruwen-fu,

nda ambyi pu funn atso.

Ambyi ti ku pupang yertsen,

u munn tso kur pangma kupwe.

Ambyi ti ritá uyinn ama kwenkyi

ma kutxom kutampwa uyinn.

9Unde rika-ti ri baa,

‘Ame u rwaetsa kaa ye ba.

Ame u rwae mbe rifunn-ba,

u ka yi na ande-m.

Ame u shirmbe

patag iken ti ame ku sha.

Ame u nwaen kisum wen-m

u wenji ba.’

10Afu nda ufunn kae,

uyinn wu munnkyi ba.

Aba ngwa byinn

uwae ambyi atang,

u si fife yi ritá

ma akyab kiser.

11“Yaweh, aye ti si pangma afu

uwae apxin meme?

Aye ti te fu pang atso uwae

riyinn na itisaenkyag-fu?

Uwae kuko-fu,

afu ku nde iken ti ku fur ayib.

12Afu ndabta kujwo rici-fu,

riben taenta

u ye pu ande rika-ti mennsi.

13“Uwae ure-fu ti tsi kukunn,

afu tae ande-fu,

aba ti afu nwangruye

ti kpakang-fu,

afu tae ba ku ru

yi uwog ti saen kyag-fu.

14Ande mbukwen ba iki fxen,

ama ijwe-ba fwer ndembeb.

Ikyenricwu ye ande ti Filisiti.

15Abikwe na uten Edom,

ikyenricwu ye ba,

ijwe-ba ku fufwer.

Aba ande ti uwe na Mowab,

ijwe-ba fwer ndembeb pu yi.

Meme ande ti Kanana yagsur

uwae ikyenricwu.

16Ikyenricwu ye ba,

ijwe-ba ku fufwer.

Kiye ti aba nung kuko-fu,

aba tsi skirr ma kutxom.

Yaweh, se kiye ti ande-fu

ti afu nwangru ye

yafe tag pu ba.

17Afu u pu ba sang ba

somkyi rikwen-fu,

uwog ti afu Yaweh

kyae ku som atang,

uwog itifen

ti afu mam ti ajwo-fu.

18Yaweh

u nae Ukwe ru fife yi uwe.”

Akyang na Mberimu

19Kiye ti kakum Ukwe ti ande ti ku tso kuskus ti kya fa kakum yi ngwa cwu uwae uyinn, Yaweh nda ambyi uyinn kafe ba munnkyi ba. Amaa anyisu Isirela kyang yen uyinn wu yi riben ti wom. 20Ama Miriyam, unda ti ku ya iski ira Yaweh, mbiya Aruna, sa cicag fa kujwo-wu. Ama meme anda putsa wu ku byinn cicag ku se ise. 21Ama Miriyam ri te ba baa,

“Ni yang akyang na Yaweh.

Awu ci pu wu rika

uwae kuko-wu.

Kakum ti ande ti ku tso yi,

awu tur pu ba si pu wu

uwae uyinn.”

Ambyi ti Mara Nungag

22Tiri Musa pu Isirela nwunn unju uyinn tibyaen ka sang uwae kutur na Shur. Aba kyang ikyin usir ita u tu-ba ambyi be. 23Ti aba ka sang Mara, aba tu ambyi. Amaa aba ngwa tu-ba ambyi wu be, ikyaen ti, awu nungag. Nee iken ti nde a ku kunn uwog wu baa, Mara. 24Ama ande ba pwen unju risu Musa, baa “Imi ti ati u ngwa.” 25Musa jwub ira tu Yaweh, ama Yaweh tso wu kutuku iki. Musa kyeb wu, u sa jwunnsi uwae ambyi wu. Ama ambyi wu kafe u nyang ti ngwa.

Yi Mara atang, Yaweh nda ba icwe, u tso ba fengo ti a putsa. Atang, awu myae kubenti-ba, 26ama ri baa, “Asiti ani a nae risu riben na m Yaweh, Rimam-ni, u nde iken ti pang atang, ama u putsa iken ti kwen ti icwe-m, ame u yaen itso acaeb iki ti ame yaensi ande ti Ejib si-m ani be. Ikyaen ti, ame si Yaweh ti ku nwangru ni.” 27Aba nwunn ka sang Elim, uwog ti ambyi ti ku kyeb tso riben rijwe asu ifaen ta atang, ti itsinn itu mae ita mbe rijwe tsi atang. Ama aba sim afug u nae atang fer unju ambyi wu.

Currently Selected:

Itiruye 15: kubNT

Highlight

Copy

Compare