Esita 6
6
Ukwe Nda Mordekai Rurob
1Utitang wu, kicwag sang-yi ukwe ayib be. Awu nda unju ti a na sa kutsingken ititangsom, uwog ti a bae kuci uten wu atang, na ba, ama ti a na nung putsa na wu. 2Atang, a ka tsotsa ira ti a bae risu Mordekai ti awu na nungye kumyae ti Bigtana ti Zereshi, ande ti ku nungkyi ufu ti ku sang fenkyi ukwe, ti ku sha ti a na u wen awu ukwe wen.
3Ama ukwe rang baa, “Wande ti Mordekai nde na m ne, a sa kujwojang iki na wu njwaa? A nda wu rurob iki a.” Apyi ukwe ti ku nde na wu wande ri baa, “A nde na-ba wu iken iki be.”
4Ama ukwe rang baa, “Aye ti tsi ise akwen?” Kiye wu, Haman ba ti wu sang uwog ukwe ti wu kaa ri te ukwe ti a na ye Mordekai kyensi ituku ti awu sha tsi ikyaen Mordekai.
5Apyi ukwe ri te wu baa, “Haman ti ta atang.” Ama ukwe ri baa, “Ri te wu ti awu ā sang ba.”
6Ama Haman sang. Ukwe rang baa, “Imi ti a u nde na unde ti ukwe tsen utob te wu, ku sha ti wu nda unde wu rurob?” Haman kab uwae-wu baa, “Si si ame amam, be aye ti nde iken nyang uwae ukwe ti ukwe u nda wu rurob?”
7Ama Haman ri te ukwe baa, “Unde wu ti nyang uwae ukwe nee ukwe ku sha ti wu nda wu rurob, 8a pu atupwa ti ukwe si pu wu awu pu ba, ti a tae kakum ti a kyae risu-wu te kindab ukwe, ti ukwe tso pu wu awu pu ba kú, 9ti a pu atupwa, ti kakum wu, na kinjo uwae ande ti rurob na ukwe, ikyaen ti awu na pu atupwa yi kyae unde wu ti nyang uwae ukwe ti ukwe sha ti wu na u nda wu rurob. Ama ti a ye unde wu somtsa kukum wu, ama shwu wu kyang uwae uten u ri baa, ‘Ne si iken ti a ku nde na unde ti nyang uwae ukwe, ti ukwe ku nda wu rurob.’ ”
10Ama ukwe ri te Haman baa, “Ti ritsen, pu atupwa yi ti kakum wu pangma ti afu ri ne ba kyae Mordekai, urae Yawuda wu ti ku som ufu ti ku sang fenkyi ukwe. Nde na wu meme ira ti afu ri ne, ya iki ta-fu ta be.”
11Tiri, Haman pu atupwa yi ti kakum wu ba, u pu atupwa yi kyae Mordekai, u ye wu somtsa kakum wu, u shwu wu kyang uwae uten, ku ya iskin baa, “Ne si iken ti a ku nde na unde ti nyang uwae ukwe, ti ukwe ku nda wu rurob.”
12Isim ayine, Mordekai kafe ru ti unju wande-wu yi fenkyi ukwe, amaa Haman kafe ru kununn-wu ti utob tibyir, ti rikwae ti wae. 13Awu tsag te uwa-wu Zereshi, ti meme arwan-wu ira ti tu wu. Ama uwa-wu Zereshi ti arwan-wu ti ben ayib bane ri te wu baa, “Ayi a si kubenti ti Mordekai wune ti afu jwunn ku si pu fu kujwo-wu ne si urae Yawuda, afu u ndetu-fu te wu be, ana-fu mam pu yi.”
14Ti ira unju ti a ku ri ne, ande ti ku nde wande fenkyi ukwe pu ra Haman ru uwog ukwab ti Esita nde tsi.
Currently Selected:
Esita 6: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
