Esita 7
7
Haman Sang Uwae Rikaen
1Tiri ukwe ti Haman sang ti a kaa ci ukwab te Esita uwa ukwe. 2Ama uwae usir ti ifaen wune, ti a ku ngwa ambyi anam, ukwe rang kyi Esita baa, “Esita, uwa ukwe, imi ti afu ku jwam? A u nde yi na fu. Imi ti afu ku sha? Ko asiti ame a u kata kujwokwe-m, ame u kata na fu.”
3Tiri, Esita, uwa ukwe ri baa, “Asiti ame a tu kutxuwe tinyang uwe-fu ukwe, ama ayi a nyang uwae-fu ukwe, cwe-fu ti a wen m ti ande-m be. Ayine ti si iken ti ame ku jwam uwog-fu. 4Ikyaen ti, a ye m ti ande-m jabci pu ba ti a na u yerwen ti, u wen tag meme-ti. Á baa, ayi na si nyáng ti a na u ye ti jabci apyi, meme-ti arom ti anda, ame ú ri-m ira iki be. Ayi ú si-yi ira ti ribom ti ame ú ter ba uwog ukwe be.”
5Tiri ukwe Ahasuweru rang Esita, uwa ukwe baa, “Unde wu si aye ti ku sha ti wu nde iken yine, awu ta aka?”
6Esita ri baa, “Unde ti rika-ti ti tsi ikub te ti, si unde titibi wune Haman.” Tiri ikyenricwu ye Haman uwe ukwe ti uwa-wu.
7Ukwe nwunn uwog ukwab atang uwae rinae, u ru yi risaen ituku ti ta fenkyi-wu, amaa, Haman som ti atang ti wu jwam uwa ukwe ikyaen unyang-wu, ikyaen ti awu nungye pu wu ti ukwe u nde wu ira.
8Kiye ti ukwe ru uwae risaen ituku kafe ba uwog ukwab atang, Haman jwunnsi nae afxen Esita ku jwam ti awu na sae wu te ayibrisi. Ukwe tso ukunn baa, “Awu ku sha ti wu nda kwer ti uwa ukwe rikwae ti ayib-m, uwae kusog-m a.” Ti ti ukwe ri tag ira yine, a pu atupwa yirkyi Haman uwe.
9Tiri Habona, kinjo uwae ande ti ku nde wande fenkyi ukwe ri baa, “Fxen, Haman kyae kutuku iki ti rikob-wu ka kutun kujwo mae ifaen mbe rijwe tsi kununn-wu ti wu ye Mordekai kyensi atang.”
10Ama ukwe ri baa, “Ni ye Haman kyensi atang.” Ama a ye Haman kyensi kutuku wu ti awu kyae tsi ikyaen Mordekai. Tiri, rinae ukwe jimsi.
Currently Selected:
Esita 7: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
