aFilipi 1

Ashou

1Mi, aBulus ne aTimoti, i ta nye yir ásam aYeso Kiristi, ne i sen ka zibir yin kufumung na yin azhe̱l cice̱r áya a tá kuus aYeso Kiristi na aFilipi. Yir bun i nye shou yir áko̱k kasho̱o̱n ikilisiya ne ádikon.

2Ritek be kameneng riye̱ Adakunom a ta nye Ada yir ne Agwo̱m Ágwo̱m yir aYeso Kiristi se mak be yin.

Riye̱ rikan ne aduwa

3Mi tonong Adakunom mi riye̱ rikan ye̱rye̱r ke mi yiring be yin. 4Koakye izen iya ne mi ta nye aduwa, mi nye be riye̱ rikan kamok yin cice̱r. 5Kamok yin gung yin rice be mi ni itomong kutaas Rife̱ Ritek aKiristi kum ni ime̱se̱ng'e ma kyo̱o̱rna. 6Mi no̱o̱k katsak ye Adakunom afe a tan san itomong itek naye̱ yin tà ya kasho̱o̱n anong ma nigang'e nizen aYeso tana bun a be̱.

7I se gye̱r mi ta to̱ natoon yin cice̱r anong, kamok yin se yin riye̱ mi, kamok yin cice̱r gung yin rice be mi kaye̱e̱r ritek Adakunom. Mi ta se nitso̱m ka mi ta sen te̱ne̱ng ne i ti nyeseng ye Rife̱ Ritek'e nye katsak. 8Adakunom ren kuri kuto̱ mi ta to̱ natoon yin cei, be kuri kushim aYeso tin shim yir.

9Aduwa mi se ye: kushim yin tà ya kasho̱o̱n anong dide̱ng kaye̱e̱r kukyem yin ne i ren yin ike̱ng i ta se gye̱r ke a nye, 10nong ase̱ yin ta kyem i kasa yin ike̱re̱ iya i ta nar'e cei, ne kuse kuzhe̱l, dar ritok ma nizen iya aKiristi tana be̱. 11Kamok nong, yin tà shining yin be kuse kuzhe̱l'e a ta se̱ nufe aYeso Kiristi nong ase̱ Adakunom tà se̱ kuyiik be nakerek.

Kute aBulus nitso̱m ti barang kuya kasho̱o̱n Rife̱ Ritek

12Ároneng, mi shim ke yin ren yin ye, ike̱ng iya i tin se̱ sak iren kutaas Rife̱ Ritek tin barang kuya kasho̱o̱n. 13Kamok anong, ásozha áfe a ta tor ágwomna be ribir ánerawe'me cei ren ye a ti te nitso̱m kamok aKiristi. 14Ku ni te nitso̱m, sak kukap ároneng afikuus ti barang kuse̱ agap nong á ta taas rife̱ Adakunom be riye̱ rizining dar inyim.

15I nye katsak, ákak taas rife̱ natoon aKiristi be rishishim ne a tse̱r kuren, amma ákak taas kaye̱e̱r katsak. 16Áyong nye anong kaye̱e̱r kushim, ne á ren ye a ti kasa nong ta tonong katsak natoon Rife̱ Ritek'e. 17Amma áya a tá taas rife̱ aKiristi'me kaye̱e̱r kushim riye̱ ba, sang kaye̱e̱r katsak baꞌ, ba sor ye mi tin barang kufok risam nitso̱m.

18To̱, i ta daam baꞌ. Ke á taas kaye̱e̱r katsak ka be amaan kuto̱ naye̱ ba, mi ren itak aKiristi ne ba taas kaye̱e̱r koakye iren. Kamok anong, mi be riye̱ rikan.

Katsak'e, mi ta ya kasho̱o̱n be kunye riye̱ rikan. 19Kamok mi ren be aduwa yin ta nye yin ne kutobok afe Kabik aYeso Kiristi tin tobok, ni igang'e, a tin shesh. 20Mi min te riye̱ ne i mok ye, Adakunom ti te isum baꞌ, amma mi ta se̱ kutsesek dide̱ng, nong ase̱ kyo̱o̱rna be koakye izen, aKiristi ta se̱ kuyiik kaye̱e̱r koakye mi ta nye, be kutser, ka be riku. 21Kamok kuto̱ro̱ng'i nye, be mi tana sor be kutser i nye aKiristi, ke mi ku i ti nar kamok mi tà be naza. 22Ke mi tà sor nuro̱m, ne mi ya kasho̱o̱n be itomong i ta se gye̱r. To̱, mi ta nye ane̱ e̱? Mi ren iya mi tana nye baꞌ. 23I ti ro̱ ta kasa izining kaye̱e̱r'e, amma kushim mi nye ke i ku nong tà sor be aKiristi, iyong ti nar dide̱ng. 24Amma kamok nong ta ka tobok yin, i nar mi ta sor nuro̱m. 25Kum mi ta ren i se anong, mi ren mi tà sor mak be yin nong yin ta ya yin kasho̱o̱n be riye̱ rikan kaye̱e̱r kuno̱o̱k katsak yin, 26nong ase̱ kusor'i be yin gbak ta sak riye̱ rikan yin kaye̱e̱r aKiristi ta shining dide̱ng kamok'i.

27Koakye ne i nye, sor yin kusor ku ta taas kufe áner a tanin no̱o̱k katsak Rife̱ Ritek aKiristi. Mi ta be̱ ta ka di yin, ka ta fok itak yin tsek, nong mi ta ren ye yin n gung yin rice be kuto̱ro̱ng kuzining. 28Sang tu fok yin inyim áya a ta ka tabak yin kaye̱e̱r koakye iren baꞌ, be anong ne ba tà ren ye, ba tà wei, amma yin ta se̱ yin kashesh kamok Adakunom shim i tu se anong. 29Kamok Adakunom sak ritek wu anong kamok yin tin no̱o̱k yin katsak na aKiristi tsek baꞌ, amma ta so̱ yin risam kamok wu gip, 30kum yin ta sen can yin kaye̱e̱r kuri risam riya mi tin se ne i fok yin ye mi bun i se kaye̱e̱r'e.

Currently Selected:

aFilipi 1: izrNT

Highlight

Copy