aFilipi 2

Sok yin kuse aKiristi

1Kum yin ta se̱ yin kutsesek ye yin n te yin azining be aKiristi, kum yin ta se̱ yin kameneng riye̱ kaye̱e̱r kushim wu, kum yin ta se̱ yin kugung rice be Kabik Adakunom, be kuro̱ riye̱ ne kushim yin, 2to̱, kamok anong, mi ta nye yin izong. Won kuto̱ro̱ng yin tu se kuzining ne i naka shim yin, sor yin azining kaye̱e̱r kabik. 3Sang tu nye yin ike̱ng ikak be kushim rice baꞌ, ka be kuka baꞌ, amma be yin kumees rice ne i sok yin áfudang yin kyo̱ndi á ta nar yin. 4Sang tu daam yin be rice yin tsek baꞌ, amma daam yin be áfudang yin gip.

5Kuse yin tu se kyo̱ndi kufe aYeso Kiristi. 6Aya a ta nye Adakunom nuse, a ra sok rice wu te̱re̱ be Adakunom ding ding baꞌ, 7Amma a te kyo̱ndi wu nye ike̱ng ikak baꞌ, nong a tá sok kuse asam, ne a te kyo̱ndi anerawe ta se. 8Nizen iya a tá be̱ kaye̱e̱r kuro̱m anerawe, a mees rice wu, ma a no̱o̱k rice wu a ku, a kuus ike̱ng iya Adakunom tá shim, a tú kutigak nukon ma a ku natoon kukon'e. 9Kamok anong, Adakunom tú kutiyiik dide̱ng ne a ku te riyerek ri ta nar koakye riyerek yiik, 10kamok koangan anerawe tà tigbok akuur nasho̱o̱n riyerek aYeso na dim, natoon kaza be kaben, be aza kaye̱e̱r kaben. 11Ne koakye irem tà fe̱ ye, aYeso Kiristi nye Agwo̱m Ágwo̱m, nong a tà tiyiik Adakunom a ta nye Ada.

Se yin kanang kyo̱ndi ádar

12Kamok anong, ároneng áya mi ta shim, kyo̱ndi yin tan me̱ ne i ni fok yin ato, ko mi tu se mak be yin baꞌ, to̱, kyo̱o̱rna mi se mak be yin baꞌ. Ya yin kasho̱o̱n be kunye itomong kutonong kashesh yin be kufok inyim Adakunom ne ku sor kutek. 13Kamok Adakunom be rice wu ne a nye itomong kaye̱e̱r aye̱ yin, kuus yin ike̱ng iya i ta nye kuto̱ro̱ng wu kutek, ne i ni nye yin itomong. 14Koakye yin tana nye yin sang tu nye yin ike̱ng ikak be anyinye̱m ka be nanaan baꞌ, 15nong ase̱, yin ta se yin dar rizik ne i se yin zhe̱l, kyo̱ndi inoon Adakunom áfe sang á ta nye imaan'e nasho̱o̱n áner aya a ta nye amaan'e baꞌ. Yin ta se yin kyo̱ndi akanang ta se naro̱ ka ta se whi. 16Taas yin rife̱ kutser kaye̱e̱r katsak nong ba tà ren Adakunom, nong ase̱, mi tin tsor kafok be yin katuk kube̱ aKiristi, fan itomong'i bun te kpe̱de̱ng.

17Ei, i se gye̱r, mi ta nye riye̱ rikan be yin, a fa nyosong naso̱k'i natoon asidaka yin ne natoon itomong kuno̱o̱k katsak yin, gip be anong mi be riye̱ rikan be yin. 18Kamok anong, yin gip nye yin riye̱ rikan mak be mi.

aTimoti be Apafuroditus

19Mi mok ye Agwo̱m Ágwo̱m yir aYeso tin no̱o̱k izen iya mi tana tom aTimoti nufe yin, nong izen iya ne a be̱ a ta bin tak ike̱ng iya i ta sen tseng nong mi tin barang kuse kutsesek ke mi fok itak yin. 20Akak kuse aze kyo̱ndi wu baꞌ, a daam be yin dide̱ng. 21Kamok mi di koangan aze daam be ike̱re̱ riye̱ wu tsek sang ife aYeso Kiristi baꞌ. 22Amma yin ren yin ye, aTimoti tonong rice wu ye wu be katsak, kamok a nye itomong kutaas Rife̱ Ritek be mi kyo̱ndi igon ta nye itomong be atek wu. 23Iyong ne isak mi shim tù ku tom nufe yin, kum ke mi fok ike̱ng iya i ta sen tseng. 24Mi no̱o̱k katsak ye, sang i ta sok izen baꞌ, Agwo̱m Ágwo̱m tin karak iren nong tà be̱ be rice mi.

25Amma mi di, i bun i se gye̱r ta ka tom yin aroneng akak nikuus, Apafuroditus, ne a nye afudang itomong'i. A nye asozha aYeso, i ta sen can yir mak, aya yin tú ku tom yin nunaan nong a tá be̱ a tin se̱ mo nike̱ng iya mi ta tse̱r. 26Kyo̱o̱rna, mi bun i shim i tù ku tom nufe yin kamok a mu ku te ke a ka di yin cice̱r ma an daam dide̱ng kamok yin tá fok yin ye, sang wu nye atser baꞌ. 27Katsak'e, a nye atser baꞌ ma n te kyo̱ndi a tá ku. Amma Adakunom ro̱ riye̱ wu, wu tsek baꞌ, ma be mi gip, fan mi bu ba no̱ kaye̱e̱r riye̱ riwe gbak. 28Kamok anong, mi n te riye̱ mi ma ke a be̱ nong ase̱ ke yin tù ku di yin, aye̱ yin ta shirim ne riye̱ mi ma shirim gip. 29Ku shan yin kaye̱e̱r riyerek Agwo̱m Ágwo̱m yir aYeso be riye̱ rikan dide̱ng. Mi shim yin tu tiyiik yin áner aya a ta se kyo̱ndi wu anong gip, 30kamok cie̱k ke a ku kamok itomong aKiristi. A no̱o̱k rice wu nong a tin tobok niren iya yin tá kyem yin baꞌ.

Currently Selected:

aFilipi 2: izrNT

Highlight

Copy