aYohana 3
IZRNT

aYohana 3

3
aNikodimus tseng nufe aYeso natuk
1Aner akak tuse á tú ku yis ye, aNikodimus, akak kaye̱e̱r áko̱k kasho̱o̱n áner aYahuda, a tá se kaye̱e̱r kugung rice aFarisi. 2A tseng nufe aYeso natuk a tá fe̱ be wu ye, “Aner Kubo̱so̱p, yir ren yir ye wan nye aner kubo̱so̱p i ta ne nufe Adakunom. Kamok akak ta kyem a nye itomong azhing afe wan tá nye baꞌ, sang ke Adakunom se mak be wu baꞌ.”
3Ayong aYeso fe̱ be wu ye, “Katsak'e ne mi ta ka tak, akak kusa a ta kyem a no̱ kaye̱e̱r rigwo̱m Adakunom baꞌ, sang ke a bun a tu ku tes kutes dim ba'.”
4Ne aNikodimus ku rip ye, “Ane̱ ne a ta bun a tes anerawe aya a tan te asho̱n'e e̱? A ta san'e ane̱ a ta bun a no̱ nafa ango̱ wu nong a ta bun a tu ku tes kutes kufe afa e̱?”
5aYeso fe̱ be wu ye, “Katsak'e ne mi ta ka tak, sang ke a bun a tes anerawe be ashi ne Kabik baꞌ, a ta kyem a no̱ kaye̱e̱r rigwo̱m Adakunom baꞌ. 6Anerawe tes anerawe afudang, amma Kabik tes afe Kabik. 7Sang tu fok azhing be rife̱ mi ta fe̱ ye, ‘Ma ke a bun a ta ka tes yin baꞌ.’ 8Kuwun fe̱se̱m ne ku tseng nabas aya ku ta shim wan ta fok nawor'e, amma wan ta kyem i ren karo̱ ku ta ne ka karo̱ ku tú ku be baꞌ. Anong ne i se be koangan afe a ta be kutes Kabik.”
9aNikodimus tú rip ye, “Iyu ta san ane̱ i ta nye e̱?”
10Ayong aYeso fe̱ be wu ye, “Wan nye aner akak'e kaye̱e̱r áfe kubo̱so̱p áner Isarela'me, wan ra kyem i ren iyu gip aꞌa? 11Katsak'e ne mi ta ka tak, yir fe̱ yir natoon ike̱re̱ yir ta ren yir, ne iya yir ta di yir, gip be anong yin ti no̱o̱k yin katsak nike̱ng ife yir ta fe̱ yir baꞌ. 12Ke mi fe̱ be yin natoon ike̱re̱ kazatse yin ti no̱o̱k yin katsak rife̱ mi baꞌ, yong ane̱ ne yin tin no̱o̱k katsak ke mi fe̱ be yin natoon ike̱re̱ kaza e̱? 13Akak kun tseng naza baꞌ, ma ke aya a ta ne naza, wu ne a nye Igon Ánerawe. 14Kyo̱ndi aMusa tá sok iwhen naza kaye̱e̱r katse anong ne a tá sok Igon Anerawe naza dim. 15Nong koangan afe a tin no̱o̱k katsak ni wu tà se̱ kutser kufe izen izen.
16“Kamok kushim afe Adakunom ta shim kazatse dide̱ng, ma a no̱o̱k asuze̱r Igon wu, kamok koangan afe a tin no̱o̱k katsak ni wu, tà wei baꞌ, amma a ta se̱ kutser kufe izen izen. 17Kamok sang Adakunom tom Igon wu kaye̱e̱r kazatse nong a tà be̱ a to̱ kazatse amok baꞌ, amma nong kazatse tin se̱ kashesh ni wu. 18Koangan afe a tin no̱o̱k katsak ni wu, a tu ku to̱ amok baꞌ, amma aya a tin no̱o̱k katsak baꞌ, a mu ku to̱ amok kamok a tin no̱o̱k katsak riyerek asuze̱r Igon Adakunom baꞌ. 19Iyu ne i nye amok'e, akanang be̱ kaye̱e̱r kazatse, amma ánerawe raba akanang'e nong á ta shim awhi ingya, kamok kunye ba nye kumaan'e. 20Koangan afe a ta nye imaan'e, a rawu akanang'e. A ta shim kube̱ na akanang'e baꞌ, fan kunye wu bu wuruk de̱s. 21Amma aya a ta nye katsak shim kube̱ na akanang nong a ta tonong kanang ye kunye wu ta nye Adakunom ne a tu se̱ mo.”
Ike̱ng aYohana aner abatisma ta fe̱ natoon aYeso
22Nama anong, aYeso be álimazhiri wu tseng ni iben aYahudiya, a sor cie̱k azong be ba, ne a nye abatisma azong. 23aYohana gip a se be i nye abatisma azong na Ainon bubarak be aSalim, kamok ashi tuse whe̱re̱ azong. Ánerawe yiir be̱s nufu nong á tu ku nye ba abatisma. 24(Nizen iyong a tsang a te aYohana kaye̱e̱r itso̱m baꞌ.)
25Iyong nanan dorok natite álimazhiri aYohana ne aner aYahuda akak natoon igo̱o̱n ku naka kusu nong á tá te zhe̱l. 26Ayong álimazhiri'me tseng nufe aYohana, a tá fe̱ be wu ye, “Aner Kubo̱so̱p, aner aya yin tá se yin mak be wu nunyi isho̱ng aUrdun, aya wan tá fe̱ itak natoon wu ame, di aya a sen nye abatisma, ma koangan n tseng nufu.”
27Ayong aYohana fe̱ be ba ye, “Anerawe ta kyem a se̱ ike̱ng be rice wu ba', sang ke a tú ku no̱o̱k natoon kaza ba'. 28Yin be rice yin ta kyem i fe̱ yin ike̱ng iya mi tá fe̱ be yin ye, ‘Sang mi nye aKiristi baꞌ,’ amma a ti tom nasho̱o̱n wu. 29Abining afas nye afe aner a tu ku sok. Afertseng wu kuus kama aner a ta sok abining afas'e tsek. Ne a nye riye̱ rikan ke a fok kuto̱ aner a tá sok abining afas'e. Be anong ne riye̱ rikan'i ma shining. 30Ma wu te garang dim, ne mi te hiir.”
31“Aya a ta ne naza nar koangan. Koangan afa a ta kaye̱e̱r kazatse nye afe kazatse'me, ne a fe̱ rife̱ ike̱re̱ kazatse'me. Aya a ta ne kaye̱e̱r kaza nar koangan cice̱r. 32Ike̱re̱ iya wu ta di ne a fok ne wu fe̱ natoon'e, gip be anong ko akak shan rife̱ wu baꞌ. 33Amma aner aya a ta shan rife̱ wu tonong ye Adakunom nye katsak. 34Kamok aya Adakunom ta tom fe̱ rife̱ Adakunom, kamok Adakunom tu ku no̱o̱k Kabik wu dar igak. 35Atek'e shim Igon wu, ayong a sak koakye nubo̱k wu. 36Koangan ne a tin no̱o̱k katsak ni Igon'e, a be kutser kufe izen izen. Amma afe a ta rawu Igon'e, a tà se̱ kutser'ong baꞌ, kamok riye̱ kubeseng Adakunom se rice wu.”

© Wycliffe Bible Translators, Inc

Learn More About Izere New Testament