Psalmyn 80
80
PSAL. 80.
Qui regis Israel.
1Clasht, O uss vochilley Israel, uss ta leeideil Joseph myr keyrrey:
soilshee oo hene myrgeddin, uss ta dty hoie er ny cherubimyn.
2Kiongoyrt rish Ephraim, Benjamin, as Manasses:
gleashee seose dty niart, as tarr as cooin lhien.
3Chyndaa shinyn reesht, O Yee:
jeeagh soilshey dt’eddin, as bee mayd slaane.
4O Hiarn Yee dy heshaght-chaggee flaunys:
caid vees oo corree rish dty phobble ta goaill padjer?
5T’ow beaghey ad lesh yn arran dy yheïr:
as coyrt daue palchey dy yheïr dy iu.
6T’ow uss er n’yannoo shin eer streeu da nyn naboonyn:
as ta nyn noidyn garaghtee orrin gys craid.
7Chyndaa shinyn reesht, uss Yee dy heshaght-chaggee flaunys:
jeeagh soilshey dt’eddin, as bee mayd slaane.
8T’ow er choyrt lhiat billey-feeyney magh ass Egypt:
t’ow er n’eiyrt magh ny ashoonyn-quaagh, as er hoiaghey eh.
9Ren oo ynnyd da:
as tra ve er ghoaill fraue, lhieen eh yn cheer.
10Va ny croink er nyn goodaghey lesh y scaa echey:
as va ny banganyn echey myr ny biljyn-cedar aalin.
11Heeyn ee magh ny banglaneyn eck gys yn aarkey:
as ny banganyn eck gys yn awin.
12Cre’n-fa eisht t’ow uss er lhieggal sheese yn cleiy eck:
dy vel adsyn ooilley ta goll shiaghey dy raipey j'ee e mess?
13Ta muc feïe ass y cheyll reurey seose ny fraueyn eck:
as ta maase feïe yn vagher dy chur mow ee.
14Chyndaa uss reesht, uss Yee yn cheshaght-chaggee flaunyssagh, jeeagh neose veih niau:
cur-my-ner, as jeeagh er y villey-feeyney shoh;
15As er ynnyd y gharey-feeyney ta dty laue yesh er hoiaghey:
as er y vanglane ren oo cha lajer er dty hon hene.
16Te er ny lostey lesh aile, as giarit sheese:
as nee ad cherraghtyn ec oghsan dt’eddin.
17Lhig dty laue ve er dooinney dty laue yesh:
as er mac dooinney, ren oo y yannoo cha lajer er dty hon hene;
18As myr shen cha jed mayd back voids:
O lhig dooin ’ve bio, as nee mayd geamagh er dt’Ennym.
19Chyndaa shin reesht, O Hiarn Yee jeh’n cheshaght-chaggee flaunyssagh:
jeeagh soilshey dt’eddin, as bee mayd er nyn sauail.
Currently Selected:
Psalmyn 80: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society