Psalmyn 31
31
PSAL. 31.
In te, Domine, speravi.
1Ayn-yds, O Hiarn, ta mee er choyrt my hreishteil:
ny lhig dou dy-bragh v’er my choyrt gys nearey; livrey mee ayns dty chairys.
2Cromm sheese dty chleaysh hym:
jean siyr dy my livrey.
3As bee uss my chregg lajer, as thie my endeilys:
dy vod oo m'y hauail.
4Son uss my chregg lajer, as my chashtal:
bee uss neesht my leeideilagh, as cur mee er y raad er graih dt’Ennym.
5Tayrn mee ass y ribbeh t’ad er hoiaghey dy-follit er my hon:
son uss my niart.
6Gys dty laueyn ta mee treishteil m’annym:
son t’ow er my livrey, O Hiarn, uss Jee yn ynrickys.
7Ta dwoaie er ve aym orroosyn ta geiyrt er ny cliaghtaghyn faase-chredjuagh [dy obbeeys]:
as ta my hreishteil er ny ve ayns y Chiarn.
8Bee’m gennal, as nee’m boggey ’ghoaill ayns dty vyghin:
son t’ow er choyrt tastey da my heaghyn, as er chooinaghtyn er my annym ayns treihys.
9Cha vel oo er my yeigh seose ayns laue my noid:
agh er hoiaghey my chassyn ayns boayl dy reamys.
10Jean myghin orrym, O Hiarn, son ta mee ayns seaghyn:
as ta my hoilshey er n’aase moal lesh eer trimshey; dy-jarroo my annym as my challin.
11Son ta my vea er n’aase shenn lesh trimshey:
as my vleeantyn lesh dobberan.
12Ta my niart dy m’ailleil, kyndagh rish my vee-chraueeaght:
as ta my chraueyn er choayll nyn mree.
13Haink mee dy ve son oltooan mastey ooilley my noidyn, agh er-lheh mastey my naboonyn:
as ren adsyn jeh m’ainjys roih er-chea voym, as adsyn honnick mee er y raad, ren ad m'y haghney.
14Ta mee dy-bollagh er my yarrood, myr dooinney marroo ass cooinaghtyn:
ta mee coontit myr saagh brisht.
15Ta mee er chlashtyn jeh cooyl-chassid y sleih:
as ta aggle er dy-chooilley cheu, choud as t’ad cur nyn ghing cooidjagh, as goaill coyrle dy ghoaill ersooyl my vioys.
16Agh ta my hreishteil er ny ve ayn-yds, O Hiarn:
ta mish er ghra, She uss my Yee.
17Ta my hraa ayns dty laue; livrey mee veih laue my noidyn:
as vowesyn ta jannoo tranlaase orrym.
18Jeeagh da dty harvaant soilshey dty eddin:
as saue mee er graih dty vyghinyn.
19Ny lhig dou tuittym giare jeh my hreishteil, O Hiarn, son ta mee er n’eamagh ort:
lhig da ny mee-chrauee ve er nyn ghoyrt gys nearey, as er nyn ghoyrt nyn-dost ayns yn oaie.
20Lhig da ny meillyn breagagh ve er nyn ghoyrt nyn-dost:
ta dy-dewil, dy-mooaralagh, as dy-olkyssagh loayrt noi’n vooinjer chairagh.
21O cre cha palchey ta dty vieys, t’ow er chiarail nyn gour ocsyn ta goaill aggle royd:
as shen t’ow er n’yannoo aarloo dauesyn ta coyrt nyn dreishteil ayn-yd, dy-jarroo kiongoyrt rish mec gheiney!
22Nee oo ad y choadey ayns boayl follit dty enish veih brasnaghey dy-chooilley ghooinney:
nee oo ad y cheiltyn ayns dty chabbane veih argane chengaghyn.
23Dy row booise gys y Chiarn:
son t’eh er yeeaghyn dooys kenjallys yindyssagh ayns ard-valley lajer.
24As tra va mee ayns my hiyr, dooyrt mee:
Ta mish er my hilgey magh veih shilley dty hooillyn.
25Ny-yeih, hug oo clashtyn da coraa my phadjer:
tra ren mee geamagh ort.
26O cur-jee graih da’n Chiarn, ooilley shiuish e nooghyn:
son ta’n Chiarn coadey adsyn ta ynrick, as dy-palchey cooilleeney eshyn ta gymmyrkey eh hene dy-mooaralagh.
27Bee-jee dunnal, as nee eshyn niartaghey nyn gree:
shiuish ooilley ta coyrt nyn dreishteil ayns y Chiarn.
Currently Selected:
Psalmyn 31: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society