Psalmyn 143
143
PSAL. 143.
Domine, exaudi.
1Eaisht rish my phadjer, O Hiarn, as cur geill da my yeearree:
cur clashtyn dou er graih dty ynrickys as dty chairys;
2As ny gow er dty hoshiaght gys briwnys rish dty harvaant:
son ayns dty hilley’s cha bee dooinney erbee bio er ny heyrey.
3Son ta’n noid er n’yannoo tranlaase er m’annym; t’eh er woalley sheese my vioys gys y thalloo:
t’eh er m’eiyrt gys y dorraghys, goll roosyn ta er ve foddey marroo.
4Shen-y-fa ta my spyrryd seaghnit ayn-ym:
as ta my chree brisht cheu-sthie jee’m.
5Agh foast ta mee cooinaghtyn er y traa t’er n’gholl shiaghey; ta mee smooinaghtyn dy-dowin er ooilley dty obbraghyn:
ta mee dy-jarroo baarail mee hene ayns obbraghyn dty laueyn.
6Ta mee sheeyney magh my laueyn hoods:
ta m’annym mennuigh er dty hon myr thalloo sponkit.
7Eaisht rhym, O Hiarn, as shen dy-leah, son ta my spyrryd gannooinaghey:
ny follee voym dt’eddin, nagh bee’m casley roosyn ta goll sheese ayns yn oaie.
8O lhig dou clashtyn dty chenjallys-ghraihagh leah ’sy voghrey, son ayn-yds ta my hreishteil:
jeeagh dou yn raad ayn lhisin gimmeeaght, son hoods ta mee troggal seose m’annym.
9Livrey mee, O Hiarn, veih my noidyn:
son hoods ta mee chea dy my choadey.
10Ynsee dou dy yannoo dt’aigney, son she uss my Yee:
lhig da dty Spyrryd graihagh mish y leeideil gys y cheer dy chairys.
11Niartee lhiam, O Hiarn, er graih dt’Ennym:
as er graih dty ynrickys, jean m’annym y reaghey ass seaghyn.
12As jeh dty vieys giare sheese my noidyn:
as stroie adsyn ooilley ta jannoo tranlaase er m’annym, son mish dty harvaant.
Currently Selected:
Psalmyn 143: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society