Psalmyn 119
119
EVENING PRAYER.
PSAL. 119.
Beati immaculati.
[ALEPH.]
1Bannit t’adsyn ta glen ayns y raad:
as ta gimmeeaght ayns leigh yn Chiarn.
2Bannit t’adsyn ta freayll ny recortyssyn echey:
as shirrey er y hon lesh ooilley nyn gree.
3Son t’adsyn nagh vel jannoo veg yn olk:
gimmeeaght ayns e raaidyn.
4T’ow uss er haarey shin:
dy-imneagh dy reayll dt’annaghyn.
5Oh, dy beagh my raaidyn cha jeeragh shen:
dy voddin dty ’lattyssyn y reayll!
6Myr shen cha bee’m er my choyrt gys nearey:
choud as ta mee coyrt tastey da ooilley dty annaghyn.
7Ver-ym booise dhyt lesh cree firrinagh:
tra vee’m er n’ynsaghey briwnyssyn dty chairys.
8Freill-ym dty oardaghyn:
O ny treig mee dy-bollagh.
[BETH.]
In quo corriget?
9Cre’n aght nee dooinney aeg e raaidyn y reayll glen:
dy-jarroo liorish reill eh hene cordail rish dty ghoo?
10Lesh ooilley my chree ta mee er hirrey er dty hon:
O ny lhig dou goll er-shaghryn veih dty annaghyn.
11Dty ghoan ta mee er ollaghey cheu-sthie ayns my chree:
nagh jinnin peccah ’yannoo dt’oï.
12Bannit t’ow uss, O Hiarn:
O ynsee dou dty ’lattyssyn.
13Lesh my veillyn ta mee er ny ve ginsh:
jeh ooilley briwnyssyn dty veeall.
14Ta taitnys wheesh er ve aym ayns raad dty leighyn:
as ayns dy-chooilley vonney dy verchys.
15Nee’m taggloo jeh dt’annaghyn:
as ver-ym geill da dty raaidyn.
16Bee my haitnys ayns dty ’lattyssyn:
as cha jarrood-ym dty ghoo.
[GIMEL.]
Retribue servo tuo.
17O jean mie da dty harvaant:
dy voddym ’ve bio as dty ghoo y reayll.
18Foshil uss my hooillyn:
dy voddym fakin reddyn yindyssagh dty leigh.
19Ta mee my yoarree er y thalloo:
O ny jean uss keiltyn voym dty annaghyn.
20Ta m’annym brishey magh son y ghraih feer jeean:
t’eck dy-kinjagh gys dt’oardaghyn.
21T’ow er choyrt oghsan da ny mooaralee:
as cursit t’adsyn ooilley ta goll er-shaghryn veih dty annaghyn.
22O chyndaa voym’s nearey as oghsan:
son ta mee er vreaylley dty recortyssyn.
23Ren prinsyn myrgeddin soie as loayrt m’oï:
agh ta dty harvaant thaaghey eh hene ayns dty ’lattyssyn.
24Son ta ny recortyssyn ayds my voggey:
as my ir-choyrlee.
[DALETH.]
Adhæsit pavimento.
25Ta m’annym lhiantyn gys y joan:
O jean uss mish y vioghey cordail rish dty ghoo.
26Ta mee er ghoaill-rish my raaidyn, as t’ow uss er my chlashtyn:
O ynsee dou dty ’lattyssyn.
27Cur orrym toiggal raad dt’annaghyn:
as myr shen nee’m taggloo jeh dt’obbraghyn yindyssagh.
28Ta m’annym’s lheïe ersooyl son eer trimshey:
jean m'y gherjaghey cordail rish dty ghoo.
29Scugh foddey voym yn raad dy vreagyn:
as cur orrym mooar y yannoo jeh dty leigh.
30Ta mee er reih raad ny firrinys:
as dty vriwnyssyn ta mee er hoiaghey kiongoyrt rhym.
31Ta mee er lhiantyn gys dty recortyssyn:
O Hiarn, ny jean mish y choyrt gys nearey.
32Nee’ms roih ayns raad dty annaghyn:
tra t’ow uss er hoiaghey my chree ec reamys.
MORNING PRAYER.
[HE.]
Legem pone.
33Ynsee dou, O Hiarn, raad dty ’lattyssyn:
as freill-ym eh gys y jerrey.
34Cur dou tushtey, as freill-ym dty leigh:
freill-ym eh dy-jarroo lesh ooilley my chree.
35Cur orrym dy immeeaght ayns cassan dt’annaghyn:
son shen y raad ta my yeearree.
36Cromm my chree gys dty recortyssyn:
as cha nee gys saynt.
37O chyndaa ersooyl my hooillyn, nagh der ad geill da fardail:
as jean mish y vioghey ayns dty raad.
38O niartee dty ghoo ayns dty harvaant:
dy voddyms aggle y ghoaill royd.
39Gow ersooyl yn kerraghey ta mee goaill aggle roish:
son ta dty vriwnyssyn mie.
40Cur-my-ner, ta my haitnys ayns dt’annaghyn:
O jean mish y vioghey ayns dty chairys.
[VAU.]
Et veniat super me.
41Lhig da dty vyghin ghraihagh cheet myrgeddin hyms, O Hiarn:
dy-jarroo dty haualtys, cordail rish dty ghoo.
42[Shen myr ver-ym ansoor da my noidyn:
son ta my hreishteil ayns dty ghoo.]
43O ny gow yn goo dy ynrickys dy-bollagh ass my veeall:
son ta my hreishteil ayns dty vriwnyssyn.
44Myr shen freill-ym dy-kinjagh dty leigh:
dy-feer, son dy-bragh as dy-bragh.
45As nee’m gimmeeaght ec my reamys:
son ta mee shirrey dt’annaghyn.
46Loayr-yms jeh dty recortyssyn myrgeddin, dy-jarroo fenish reeaghyn:
as cha jean-ym nearey ’ghoaill.
47As bee my haitnys ayns dt’annaghyn:
ta mee er ve graihagh orroo.
48My laueyn neesht trogg-ym seose gys dt’annaghyn, ta mee er ve graihagh orroo:
as bee my smooinaghtyn dowin er dty ’lattyssyn.
[ZAIN.]
Memor esto servi tui.
49O smooinee er dty harvaant cordail rish dty ghoo:
ayn t’ow er choyrt orrym dy chur my hreishteil.
50Shoh ta dy my gherjaghey ayns my heaghyn:
son ta dty ghoo er my vioghey.
51Ta mee ec ny mooaralee feer vooar ayns faghid:
ny-yeih cha vel mee er skyrraghtyn veih dty leigh.
52Son chooinee mee er dty vriwnyssyn er dyn chenn earish, O Hiarn:
as va mee er my gherjaghey.
53Ta mee fo aggle atchimagh:
er coontey ny mee-chrauee ta treigeil dty leigh.
54Ta dty ’lattyssyn er ve my arraneyn:
ayns thie my yoarreeaght.
55Ta mee er smooinaghtyn er dt’Ennyms, O Hiarn, ayns earish ny hoie:
as er vreayll dty leigh.
56Shoh va my gherjaghey:
er-y-fa dy dreill mee dty annaghyn.
[CHETH.]
Portio mea, Domine.
57Uss my eiraght, O Hiarn:
ta mee er yialldyn dy reayll dty leigh.
58Ren mee my accan imlee ayns dt’enish lesh ooilley my chree:
O bee myghinagh dou cordail rish dty ghoo.
59Deïe mee er my raaidyn hene gys cooinaghtyn:
as hyndaa mee my chassyn gys dty recortyssyn.
60Ren mee siyr, as cha lhig mee shiaghey yn traa:
dy reayll dty annaghyn.
61Ta sheshaghtyn ny mee-chrauee er my roostey:
agh cha vel mish er yarrood dty leigh.
62Ec y vean-oie nee’m girree dy chur booise dhyt:
er coontey dty vriwnyssyn cairagh.
63Ta mee my heshey dauesyn ooilley ta goaill aggle royd:
as ta freayll dty annaghyn.
64Ta’n seihll, O Hiarn, laane jeh dty vyghin:
O ynsee dou dty ’lattyssyn.
[TETH.]
Bonitatem fecisti.
65O Hiarn, t’ow er ghellal dy-graysoil rish dty harvaant:
cordail rish dty ghoo.
66O ynsee dou toiggal as tushtey firrinagh:
son ta mee er chredjal dty annaghyn.
67Roish my row mee seaghnit, hie mee er-shaghryn:
agh nish ta mee er vreayll dty ghoo.
68T’ow uss mie as graysoil:
O ynsee dou dty ’lattyssyn.
69Ta ny mooaralee er droggal breg orrym:
agh freill-yms dt’annaghyn lesh ooilley my chree.
70Ta’n cree oc cha roauyr as saill:
agh ta my haitnys er ve ayns dty leigh.
71S’mie te er my hon dy row mee ayns seaghyn:
dy voddym gynsaghey dty ’lattyssyn.
72Ta leigh dty veeall ny smoo dy voggey dou:
na millaghyn dy airh as argid.
EVENING PRAYER.
[JOD.]
Manus tuæ fecerunt me.
73Ta dty laueyn er my chroo as er my chummey:
O cur dou tushtey, dy voddym gynsaghey dt’annaghyn.
74Bee adsyn ta goaill aggle royd, gennal tra hee ad mee:
er-yn-oyr dy vel mee er choyrt my hreishteil ayns dty ghoo.
75Ta fys aym, O Hiarn, dy vel dty vriwnyssyn cairagh:
as dy vel oo ayns eer ynrickys er choyrt seaghyn orrym.
76O lhig da dty chenjallys vyghinagh ve my gherjagh:
cordail rish dty ghoo da dty harvaant.
77O lhig da dty vyghinyn graihagh cheet hyms, dy voddym ve bio:
son ta my voggey ayns dty leigh.
78Lhig da ny mooaralee ve coodit lesh nearey, son t’ad dy-olkyssagh goll mygeayrt dy my stroie:
agh nee’ms smooinaghtyn dy-dowin er dt’annaghyn.
79Lhig dauesyn ta goaill aggle royd, as t’er hoiggal dty recortyssyn:
v’er nyn jyndaa hyms.
80O lhig da my chree v’er ny hickyraghey ayns dty ’lattyssyn:
nagh bee nearey orrym.
[CAPH.]
Defecit anima mea.
81Ta m’annym er ghoaill foddeeaght son dty haualtys:
as ta my hreishteil mie er graih dty ghoo.
82Ta my hooillyn farkiaght dy-jeean son dty ghoo:
gra, O cuinn nee oo mish y gherjaghey?
83Son ta mee shymlit myr crackan ayns y jaagh:
ny-yeih cha vel mee jarrood dty ’lattyssyn.
84Cre whilleen ta laghyn dty harvaant:
cuinn nee oo cooilleen y ghoaill orroosyn ta jannoo tranlaase orrym?
85Ta’n sleih moyrnagh er chleiy ooigyn er my hon:
nagh vel cordail rish dty leigh.
86Ta ooilley dt’annaghyn firrinagh:
t’ad jannoo tranlaase orrym dy-aggairagh; O bee uss my niart.
87V’ad faggys er n’yannoo kione orrym er y thalloo:
agh cha hreig mee dt’annaghyn.
88O jean mish y vioghey lurg dty chenjallys-ghraihagh:
as myr shen freill-ym recortyssyn dty veeall.
[LAMED.]
In æternum, Domine.
89O Hiarn, ta dty ghoo:
farraghtyn son dy-bragh ayns niau.
90Ta dt’irriney myrgeddin farraghtyn veih sheeloghe gys sheeloghe:
t’ow er hoiaghey undin ny hooirey, as te er-mayrn.
91T’ad tannaghtyn gys y laa t’ayn jiu cordail rish dty oardagh:
son ta dy-chooilley nhee dy dty hirveish.
92Er-be dy row my voggey ayns dty leigh:
veïn er cherraghtyn ayns my heaghyn.
93Cha jarrood-ym dt’annaghyn dy-bragh:
son lioroosyn t’ow er my vioghey.
94Ta mee lhiats; O saue mee:
son ta mee er hirrey lurg dt’annaghyn.
95Ren ny mee-chrauee lhie ayns farkiaght er my hon dy my stroie:
agh smooinee-yms er dty recortyssyn.
96Ta mee fakin dy vel jerrey er dy-chooilley nhee:
agh ta dt’annaghyn er-skyn-towse lhean.
[MEM.]
Quomodo dilexi!
97Hiarn, cre’n ghraih t’ayms er dty leigh:
fey-ny-laa ta mee smooinaghtyn er dy-dowin.
98T’ow uss trooid dt’annaghyn er my yannoo ny s’creeney na my noidyn:
son t’ad dy-kinjagh mârym.
99Ta ny smoo dy hushtey aym na t’ec my ir-ynsee:
son ayns dty recortyssyn ta mee baarail my smooinaghtyn.
100Ta mee ny s’creeney n’yn chenndeeaght:
er-yn-oyr dy vel mee freayll dt’annaghyn.
101Ta mee er chummal my chassyn veih dy-chooilley ghrogh raad:
dy voddin freayll dty ghoo.
102Cha vel mee er skyrraghtyn veih dty vriwnyssyn:
son t’ow dy my ynsaghey.
103O cre cha millish ta dty ghoan gys my vlass:
dy-jarroo, ny s’miljey na mill da my veeall!
104Trooid dt’annaghyn ta mee geddyn tushtey:
shen-y-fa ta dwoaie aym er dy-chooilley ghrogh raad.
MORNING PRAYER.
[NUN.]
Lucerna pedibus meis.
105Ta dty ghoo londeyr da my chassyn:
as soilshey da my chesmadyn.
106Ta mee er vreearrey, as ta mee dy-shickyr kiarit:
dy reayll dty vriwnyssyn.
107Ta mee seaghnit er-skyn towse:
jean mish y vioghey, O Hiarn, cordail rish dty ghoo.
108Lhig da ourallyn-arryltagh my veeall uss y wooiys, O Hiarn:
as ynsee dou dty vriwnyssyn.
109Ta m’annym dy-kinjagh ayns my laue:
ny-yeih cha vel mee jarrood dty leigh.
110Ta ny mee-chrauee er hoiaghey ribbeh er my hon:
agh ny-yeih cha jagh mee er-shaghryn veih dty annaghyn.
111Dty recortyssyn ta mee er hirrey myr m’eiraght son dy-bragh:
as cre’n-fa? t’ad eer boggey my chree.
112Ta mee er chrommey my chree dy chooilleeney dty ’lattyssyn dy-kinjagh:
dy-jarroo gys y jerrey.
[SAMECH.]
Iniquos odio habui.
113Ta dwoaie aym orroosyn ta smooinaghtyn er yn olk:
agh shynney lhiam dty leigh.
114T’ow uss my endeilagh as my choadey:
as ta my hreishteil ayns dty ghoo.
115Ass my enish, shiuish ghrogh-yantee:
freill-yms annaghyn my Yee.
116O niartee mee cordail rish dty ghoo, dy voddym ’ve beayn:
as ny lhig dou tuittym giare jeh my hreishteil.
117Jean uss mish y chummal seose, as bee’m sauchey:
bee my haitnys dy-jarroo ayns dty ’lattyssyn.
118T’ow uss er choyrt fo-chosh adsyn ooilley ta cur cooyl rish dty ’lattyssyn:
son cha vel ad smooinaghtyn agh er molteyraght.
119T’ow sheebey ersooyl ooilley mee-chrauee yn thallooin myr kesh:
shen-y-fa shynney lhiam dty recortyssyn.
120Ta my eill er-creau son aggle jeeds:
as ta mee fo atchim dty vriwnyssyn.
[AIN.]
Feci judicium.
121Ta mee dellal ayns y chooish ta lowal as jeeragh:
O ny faag mee fo pooar my hranlaasee.
122Cur er dty harvaant dy ghoaill taitnys ayns shen ny ta mie:
nagh jean ny mooaralee veg yn aggair dou.
123Ta my hoilshey er vailleil lesh jeeaghyn son dty lhaynt:
as son goo dty chairys.
124O dell rish dty harvaant cordail rish dty vyghin ghraihagh:
as ynsee dou dty ’lattyssyn.
125Ta mish dty harvaant; O cur dou tushtey:
dy voddym toiggal dty ’lattyssyn.
126Te traa dhyt, Hiarn, dy hroggal dty laue:
son t’ad er choyrt naardey dty leigh.
127Son shynney lhiam dty annaghyn:
er-skyn airh as claghyn costal.
128Shen-y-fa ta mee cummal jeeragh ayns ooilley dty annaghyn:
agh son raaidyn cammey ta slane dwoaie aym orroo ooilley.
[PE.]
Mirabilia.
129Ta dty recortyssyn yindyssagh:
shen-y-fa ta m’annym dy reayll ad.
130Tra ta dty ghoo goll magh:
te coyrt soilshey as creenaght da’n vooinjer ôney.
131Doshil mee my veeall, as ghow mee ennal:
son ta my haitnys ayns dt’annaghyn.
132O jeeagh orrym, as bee myghinagh dou:
myr b’oallagh oo jannoo roosyn ta graihagh er dt’Ennym.
133Jean my chesmadyn y leeideil ayns dty ghoo:
as myr shen cha vow mee-chraueeaght erbee barriaght orrym.
134O livrey mee veih tranlaase drogh gheiney:
as myr shen freill-ym dt’annaghyn.
135Lhig da dt’eddin soilshean er dty harvaant:
as ynsee dou dty ’lattyssyn.
136Ta my hooillyn shilley lesh jeïr:
er-yn-oyr nagh vel deiney freayll dty leigh.
[TSADDI.]
Justus es, Domine.
137T’ow uss cairagh, O Hiarn:
as ynrick ta dty vriwnyssyn.
138Ny recortyssyn t’ow uss er n’oardaghey:
t’ad er-skyn-towse cairagh as firrinagh.
139Ta my ghraih’s jeean er my choyrt eer naardey:
son dy vel my noidyn er yarrood dty ghoan.
140Ta dty ghoo’s er ny phrowal gys y chooid sodjey:
as ta graih ec dty harvaant er.
141Ta mee fardalagh, as beg er ny hoiaghey jee’m:
ny-yeih cha vel mee jarrood dt’annaghyn.
142Ta’n chairys ayds cairys dy-bragh farraghtyn:
as dty leigh yn irriney.
143Ta seaghyn as trimshey er ghoaill greme orrym:
ny-yeih ta my haitnys ayns dt’annaghyn.
144Ta cairys dty recortyssyn dy-bragh farraghtyn:
O giall dou tushtey, as bee’m bio.
EVENING PRAYER.
[KOPH.]
Clamavi in toto corde meo.
145Ta mee geamagh lesh ooilley my chree:
eaisht rhym, O Hiarn, freill-ym dty ’lattyssyn.
146Hoods, dy-feer, ta mee geamagh:
cooin lhiam, as freill-ym dty recortyssyn.
147Ec brishey’n laa ta mee geamagh hoods:
son ayns dty ghoo ta my hreishteil.
148Ta my hooillyn dooisht roish arrey ny hoie:
dy voddym my hraa ’vaarail ayns dty ghoan.
149Clasht rish my choraa, O Hiarn, cordail rish dty chenjallys-ghraihagh:
cur bree ayn-ym myr b’oallagh oo.
150T’ad tayrn er-gerrey ta dy-goanlyssagh jannoo tranlaase orrym:
as t’ad foddey veih dty leigh.
151Bee uss er-gerrey ec laue, O Hiarn:
son ta ooilley dty annaghyn firrinagh.
152Mychione dt’annaghyn, ta fys aym foddey er dy henney:
dy vel oo er hoiaghey ad er undin shickyr son dy-bragh.
[RESH.]
Vide humilitatem.
153O smooinee er my arkys, as livrey mee:
son cha vel mee jarrood dty leigh.
154Gow my chooish ayns laue as livrey mee:
jean mee y vioghey cordail rish dty ghoo.
155Ta slaynt foddey voish ny mee-chrauee:
son cha vel ad cur geill da dty ’lattyssyn.
156S’mooar ta dty vyghin, O Hiarn:
jean mee y vioghey myr b’oallagh oo.
157Shimmey adsyn ta dy my voirey as jannoo tranlaase orrym:
ny-yeih cha vel mish goll dy-lhiattee voish dty recortyssyn.
158Te trimshey dou dy akin ny drogh-yantee:
son nagh vel ad freayll dty leigh.
159Smooinee, O Hiarn, kys shynney lhiam dty annaghyn:
O jean mish y vioghey cordail rish dty chenjallys-ghraihagh.
160Ta dty ghoo’s firrinagh er dy rieau:
ta ooilley briwnyssyn dty chairys farraghtyn son dy-bragh.
[SCHIN.]
Principes persecuti sunt.
161Ta prinsyn er n’yannoo tranlaase orrym gyn oyr:
agh ta my chree shassoo ayns aggle jeh dty ghoo.
162Ta wheesh dy voggey aym jeh dty ghoo:
as t’ec fer ta cosney mooarane spooilley.
163Er son breagyn, ta feoh as dwoaie aym orroo:
agh shynney lhiam dty leigh.
164Shiaght keayrtyn ’sy laa ta mee dy dty voylley:
er graih dty vriwnyssyn cairagh.
165S’mooar ta’n shee t’ocsyn ta graihagh er dty leigh:
as cha der nhee erbee orroo eh y hreigeil.
166Hiarn, ta mee er yeeaghyn son dty haualtys slayntoil:
as er n’yannoo lurg dty annaghyn.
167Ta m’annym er vreayll dty recortyssyn:
as er choyrt graih er-skyn-towse daue.
168Ta mee er vreayll dt’annaghyn as dty recortyssyn:
son ta ooilley my raaidyn kiongoyrt rhyt.
[TAU.]
Appropinquet deprecatio.
169Lhig da my accan cheet kiongoyrt rhyt, O Hiarn:
cur dou tushtey cordail rish dty ghoo.
170Lhig da my aghin cheet gys dt’enish:
livrey mee cordail rish dty ghoo.
171Nee my veillyn fockley magh dty voylley:
tra t’ow er m’ynsaghey ayns dty ’lattyssyn;
172Dy-jarroo nee my hengey’s arrane y ghoaill jeh dty ghoo:
son ta ooilley dt’annaghyn cairagh.
173Lhig da dty laue cooney lhiam:
son ta mee er ghoaill dty annaghyn myr reih.
174Ghow mee foddeeaght son dty haualtys slayntoil, O Hiarn:
as ayns dty leigh ta my haitnys.
175O lhig da m’annym ’ve bio, as nee eh uss y voylley:
as nee dty vriwnyssyn cooney lhiam.
176Ta mee er n’gholl er-shaghryn myr keyrrey chailjey:
O cur lhiat thie dty harvaant; son cha vel mee jarrood dty annaghyn.
Currently Selected:
Psalmyn 119: PS1765
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society
