Psalmyn 111
111
PSAL. 111.
Confitebor tibi.
1Ver-yms booise da’n Chiarn lesh ooilley my chree:
ayns sheshaght er-lheh yn vooinjer chrauee, as ayns chaglym y pobble.
2Ta obbraghyn y Chiarn mooar:
er nyn gheddyn magh lioroosyn ooilley ta goaill taitnys ayndoo.
3Ta’n obbyr echey feeu moylley as ooashley:
as ta e chairys farraghtyn son dy-bragh.
4Ta’n Chiarn myghinagh as graysoil myr shen er n’yannoo e obbraghyn yindyssagh:
dy lhisagh ad ve freillt ayns cooinaghtyn.
5T’eh er chur beaghey dauesyn ta goaill aggle roïsh:
bee eh dy-bragh cooinaghtyn er e chonaant.
6T’eh er hoilshaghey da e phobble pooar e obbraghyn:
dy voddagh eh cur daue eiraght ny ashoonyn.
7Ta obbraghyn e laueyn ynrickys as briwnys:
ta ooilley e annaghyn firrinagh.
8T’ad shassoo shickyr son dy-bragh as dy-bragh:
as t’ad jeant ayns firrinys as corrymid.
9T’eh er choyrt feaysley da e phobble:
t’eh er haarey e chonaant son dy-bragh; casherick as arrymagh ta’n Ennym echey.
10Ta aggle y Chiarn toshiaght creenaght:
toiggal mie t’ocsyn ooilley ta dy ymmyrkey ad hene cordail rish; ta’n moylley echey farraghtyn son dy-bragh.
Currently Selected:
Psalmyn 111: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society