Jabura 92
92
Ala tantu beete sulen lɔgɛ tɔ
1Beete do le ka, min be bɔɔla sulen luŋɛ tɔ.
2Alatala tantu koe kaɲin,
anun Ala matɔgɔ koe beete tɔ, ile Ala min mayɛlɛta.
3Ɲɔ kɛnɛta ki min na, i la fonisireya la ko ni fɔ kɛnɛ.
Sue tugun tini don, i la kuma dɔndɔ tigiya ni tafɔ,
4ka beete bɔɔ kɔndiŋɛ julukolo tan anun kɔra la.
A kulɛ mɛn ni bɔɔ basirifen julukolo nɛŋɛ do gbɛtɛnu tɔ.
5Ee Alatala, i be n nasɛɛwala i la koenu le la,
nde tugun ni ɲagalin kulɛ labɔɔ ka i la bolo la walenu matɔgɔ.
6Ee Alatala, i la walenu kolo han!
I la miranu la luggɛ, dan bele a la.
7Mɔgɔ hakkilibɔnɛ ma fenfen lɔn wo tɔ,
dakue te fahamu yo sɔtɔ kɛ koe tɔ,
8a fɔ koe la aa telenbalenu si koloya le iko bin feere,
ko koron malanu tugun si yiriwa,
kɔnɔ wo tanbi kɔma anu si naa halagi le abada.
9Ile Alatala kan be mayɛlɛren de saŋɛ tɔ abada.
10Ee Alatala i jaguenu le ka,
i jaguenu fɛlɛ anu be halagila;
minnu bɛ be ko koroŋɛ mala, anu bata malansan.
11I be n sɛnbɛ lakoloyala iko sɛgɛ ninge,
n sunsanden tulu kutaŋɛ le la.
12N mamɛlɛnnanu minnu be wulila n kɛlɛ koe la,
n be anu la bɔnɛ yenden,
n be n tole sɔren anu kutun kulɛ la.
13Telenbaganu be feerela le iko tugu lɔgɛ,
anu be koloyala le iko Liban kɔnkɔ tɔ lɔgɔ kutu banba.
14Anu be kiren Alatala la boŋɛ le butɔ,
anu be feerela mɔ Marige Ala la boŋɛ la tatta butɔ.
15Hali anu kayibayareŋɛ, anu si jiidi le iko lɔgɛ min si wolo a ɲinma la,
anu kutaŋɛ le mu, anu mɛn je siyata anu bale tɔ,
16alako anu ni to a fɔla Alatala telenta.
Ale le mu n na fata la, telenbaliya yo bele a bolo.
Currently Selected:
Jabura 92: MOG
Highlight
Share
Compare
Copy
Want to have your highlights saved across all your devices? Sign up or sign in
