Jabura 9
9
Ala tantu beete a la teleŋɛ la ko la
1Dauda la beete do le ka, min be donden beeti bɔɔlanu la kuntige bolo. Beete le mu min be bɔɔla iko beete min tɔgɔ «Den faga beete».
2Alatala, n si i tantu n sondoŋɛ bɛ la,
n si i la kabanakoe bɛ masifɛ mɔgɛnu ye.
3N si sɛɛwa, n ni ɲagalin i la ko la,
ile Alatala min mayɛlɛta, n ni i matɔgɔ beete tɔ.
4N jaguenu bata saagi kɔma kɔma la.
Anu to borita i la,
anu kɛŋɛ ma nɔ sabatila duge tɔ, anu bata halagi.
5Iyon, i ka n kunmafɔ teleŋɛ le butɔ;
i be majigiren mansa tintiŋɛ tɔ, i ka kiite sa teleŋɛ le butɔ.
6I bata see doenu lasogi, i be ko koron malanu halagila le,
i si anu tɔgɛ lamuttɛ le kudai.
7Jaguenu bata sama feu,
anu la saa tiɲareŋɛnu be labolokaren,
anu la ko bata ɲina mɔgɛnu la.
8Kɔnɔ Alatala la mansaya kan be sabatiren, dan bele a la.
A be majigiren a la tintiŋɛ tɔ a ni kiite sa ɲɔ.
9Ale be dunuya makiitila teleŋɛ le butɔ,
a be kiite sala seenu ma ka tɔɲa yati makɛnɛn.
10Tɔɔrɔbaganu latangalá le mu Alatala la,
anu makantalá mu ale len na anu la kɔntɔfile butɔ.
11Alatala, i lɔnná be laaren i la,
bayi minnu be i ɲinila, i te wonu boloka.
12Wo mɔ ni Alatala tantu beete bɔɔ, min be majigiren Siyɔn.#9:12 Darisalamu tɔgɔ do le mu Siyɔn na.
A bata koe minnu ma, wo mɔ ni a ɲamakaran see bɛ ye.
13Ala ka basi bɔndeŋɛ talɔn, a be wo yɔgɔla le.
A te ɲina tɔɔrɔbaganu diri kulɛ la.
14Ee Alatala kinikini n ma,
n na ɲagankata fɛlɛ min be fatanden n kɔnnanu la.
Ile min si n nakisi saya bonda ma,
15alako n ni i tantu Siyɔn saa jama bɛ tɛma,
n ni sɛɛwa kulɛ mayɛlɛ i la kise la.
16Sii koroŋɛnu ka dinka min soe, anu yɛtɛ boeta wo butɔ.
Anu ka jala min nafonti, ande yɛtɛ bitata wo la.
17Alatala be lɔnden a la teleŋɛ le la,
telenbalenu be bitala anu yɛtɛ bolo baa le sabu la.
Beeti bɔɔlá la suleŋɛ donden, serede kulɛ ni bɔɔ.
18Ko koron mala minnu be ɲinaren Ala ma,
Ala mu wo see Ala lɔnbalenu fagala, anu la ko ni ban feu.
19Iyon, Ala si naa tɔɔrɔbaganu la ko talɔn de.
Minnu be lannanteya sala a ma, a te ɲina anu ma feu.
20Alatala, yandi i ni wuli, mɔgɛ kana nɔ sɔtɔ i ma.
I ni see doenu makiiti.
21Ee Alatala, i ni anu makilan,
alako see doenu ni a lɔn ka a fɔla anu mu mɔgɔ tun de la.
Beeti bɔɔlá la suleŋɛ donden.
Currently Selected:
Jabura 9: MOG
Highlight
Copy
Compare
Share
Want to have your highlights saved across all your devices? Sign up or sign in
