Jabura 86
86
Ala mataraŋɛ kinikinɛ la tɔɔrɛ butɔ
1Dauda la Ala mataraŋɛ.
Alatala, yandi i tolomasɔ, i ni n jaabi,
bayi n mu tɔɔrɔbaga fondobɔnɛ le la.
2N nɛɛ makanta,
bayi i la lannanteya mɔgɛ le mu n na.
N Marige Ala, nde i la jondeŋɛ lakisi,
min be lannanteya doniren i ma.
3N Marige, hinnɛ n na,
bayi n be n kulɛ labɔɔla ile le ma tele muru.
4N Marige, nde i la jondeŋɛ nɛɛ lasɛɛwa,
bayi n be n hakkile sɔren ile le ma.
5Ile n Marige, i kaɲin yati, i mu diɲabaga le la.
Ka minnu ka i mataran, i si i la fonisireya banba yita le wonu la.
6Alatala, n na mamataraŋɛ lamɔɛ,
i tolomasɔ n na mamade la.
7N tini be tɔɔrɛ tɔ wagate min tɔ,
n si i mataran de, bayi i si n jaabi le.
8N Marige, batufeŋɛnu bɛ tɛma, dodo bele toren iko ile.
I ka min ma, dodo te nɔ a mala.
9N Marige, i ka jamanɛnu min bɛ da,
anu bɛ si na sujudu le i kɛn kɔtɔ ka biliya dii i tɔgɛ ma.
10Tɔɲa le: i kolo, i mɛn si kabanakoenu ma.
I dɔrɔn de mu Ala yati yati la.
11Ee Alatala, i ni i la kila ɲinma yita n na,
n ni tagaman i la tɔɲa la.
I ni hanige dɔndɔ pɛti le sa n juse tɔ,
min tabɛnden kilan koe la i tɔgɛ la.
12N Marige Ala, n si i tantu le n juse bɛ la.
N si biliya dii i tɔgɛ ma kudai.
13Bayi i la fonisireya kolo n mafanna.
I ka n nɛɛ latanga n be tagala fagabaganu dula duge bɔtinɛ tɔ wagate min tɔ.
14Ee Ala, fan nakoloyalanu bata wuli n kɛlɛ koe la.
Nanbaratɔɛ kuruŋɛ be diren anu ni n faga.
Wonu bele anu mirala i ma.
15Kɔnɔ Marige Ala, i mu kinikininte nun hinnɛnte le la,
i juse te yɛlɛ teriya la,
i la kanunteya nun i la kuma dɔndɔ tigiya dan bele anu la.
16I ɲamatelen n ma, i ni kinikini n ma.
N mu i la jondeŋɛ le la, yandi sɛnbɛ dii n ma.
Nde min be maren i la jon muse la deŋɛ la, i ni n nakisi.
17I ni tɔnkuma do ma n ɲɛ seede la i la ɲinmaya la ko la,
n kɔnnɛlanu tini min yen, anu ni malu,
anu ni a lɔn ile Alatala le be n dɛmanna, i mɛn be n juse sala.
Currently Selected:
Jabura 86: MOG
Highlight
Share
Compare
Copy
Want to have your highlights saved across all your devices? Sign up or sign in
