Jabura 83
83
Isirayila jama la Ala mataraŋɛ anu jaguenu la ko la minnu be anu tɔɔrɔla
1Asafu la beete do le ka, beete min be bɔɔla kulɛ mayɛlɛreŋɛ la.
2Ee Ala, i kana i mɔdɛ,
i kana to i ma kuma, i kana to i ma fenfen ma!
3Bayi i jaguenu be anu lamagala,
minnu be i kɔnden anu bata anu kuŋɛ lawuli.
4Anu be bɛnna ka janfa koroŋɛ makiti i la jama kunma.
Anu be ɲɔgɔn juse lawulila i la mɔgɔ suturareŋɛnu digii ma.
5Anu be a fɔla: «Wo mɔ ma, wo mɔ ni anu la ko ban jamanɛnu tɛma,
bani Isirayila tɔgɛ ni muttɛ a ni ɲina mɔgɛnu la.»
6Anu be ɲɔgɔn makelela, anu be ɲɔgɔn juse layɛlɛla ko dɔndɔ ma,
alako anu ni lahire kiti i kunma.
7Wo mɔgɛnu mata Edɔmi kaanu nun Isumayila bɔnsɛ le la,
Mowaba kaanu anun Hagara bɔnsɛ,
8sa Gebali kaanu nun Amoni kaanu kunma, anun Amaleki kaanu,
sa Filisiti kaanu nun Tiiri kaanu tugun kunma.
9Hali Asuri kaanu yati kafuta le anu ma,
wondelen nata Luti bɔnsɛ dɛmandula.
Beeti bɔɔlá la suleŋɛ donden.
10Ee Ala, anu la ko ma iko Madiyana kaanu,
iko i ka min ma Sisera nun Yabini la, Kisɔn kɔɔ fole tɔ.
11Wonu halagita Endori le,
anu mata bangue ye tɔnɛ la.
12Anu la kuntigenu ma iko Orebi anun Sebu,
anu la ɲatɔnkanu tugun bɛ ni ma iko Sɛbaha nun Salimuna,
13minnu ka a fɔ nun: «Wo mɔ Ala la dula jigan,
a ni ma wo mɔ tɛŋɛ la.»
14N na Ala! Ande mɔgɛnu ma ba iko banbaŋɛ min be firifirila,
iko deele, fɔɲɛ be min donila,
15iko ta tini be pɔtɔŋɛ bintanna,
iko ta malaŋɛ tini kɔnkɛnu bintan gbikki.
16Anu jokki i la tunnadɛ fɔɲɛ la,
i ni anu makilan i la fɔɲɔ banba la.
17Maluya dusu anu kunma,
alako anu ni ile Alatala tɔgɛ le ɲini.
18Maluya nun kilaŋɛ ni to anu ma abada,
anu ni to jarabe tɔ, anu ni halagi.
19Anu mɛn ni a lɔn, ile le dɔrɔn tɔgɔ Alatala;
anu ni a talɔn ile le be mayɛlɛren dunuya bɛ kunma.
Currently Selected:
Jabura 83: MOG
Highlight
Share
Compare
Copy
Want to have your highlights saved across all your devices? Sign up or sign in
