Jabura 143
143
Ala mataraŋɛ ɲagankata butɔ
1Dauda la beete do le ka.
Ee Alatala, i tolomasɔ n na mamataraŋɛ la,
i tolomasɔ n diri kulɛ la.
Ile to telenta, i be beeyaren, awa n jaabi!
2Yandi, i kana nde i la jondeŋɛ makiiti!
Bayi daali yo bele telenden i ye.
3Ee, n jague be n nɛ jokkiren,
a be n nɛ tɛnna duge tɔ;
a be n natuntunna faga dibe ma,
n ni to iko minnu fagata nun bima.
4N juse be n dumɛnna n butɔ,
limaniya bata ban n bolo.
5N be n mirala lɔgɔ tanbireŋɛnu le ma,
n be n hakkile latagala i la walenu le ma,
n ni n mira koenu ma i ka minnu ma.
6N be n bolenu lafontila i mafanna le;
n be toren de i ɲatɔ iko dugu bala.
Beeti bɔɔlá la suleŋɛ donden.
7Ee Alatala, awa teriya n jaabila!
N nɛ be bɔɔ koe le tɔ ka.
I kana i kɔ sɔ n na de,
ka wo ma n si to le iko mɔgɛ min be jigila dinka butɔ.
8I ni i la hanige ɲinmaya yita n na saguma piri,
bayi n be n kuŋɛ taakuren ile len na.
Kila yita n na a bɛnta n ni tagaman min na,
bayi n hakkile be sɔren ile len ma.
9Ee Alatala, n nakisi n jaguenu ma,
n be dogonna ile le kɔma.
10N nakaran n ni i diyanan koe ma,
bayi ile le mu n Marige Ala la.
I hakkili saniyandeŋɛ ni n natagaman kila ɲinma tɔ.
11Alatala, n nakisi i tɔgɛ la ko la.
Ile le telenta, awa n bɔɔ ɲagankata tɔ.
12I la fonisireya butɔ i ni n jaguenu da balan.
Minnu bɛ be sɔren n nɛ kɔma,
i ni anu bɛ la ko lamɔdɛ,
bayi i la walilá le be tabɛnden n ma.
Currently Selected:
Jabura 143: MOG
Highlight
Share
Compare
Copy
Want to have your highlights saved across all your devices? Sign up or sign in
