Jabura 135
135
Alatala tantu beete a la dunuya wali banbanu la ko la
1Wo Alatala tantu!
Wo Alatala tɔgɛ tantu!
Alatala la jondeŋɛnu, wo a tantu!
2Wole minnu be sɔren wali koe la Alatala batu boŋɛ tɔ,
wole minnu be mɔ Marige Ala la boŋɛ tatta butɔ,
3wo Alatala tantu, bayi Alatala kaɲin.
Wo ni beete bɔɔ a tɔgɛ la biliya kɔtɔ, bayi a kaɲin.
4Alatala ka Yaguba le masubɛ a yɛtɛ ye,
alako bani Isirayila ni ma a yɛtɛ yati le tɛŋɛ la.
5Nde ka a lɔn aa Alatala kolo,
mɔ Marige tanbita batufeŋɛnu bɛ la.
6Alatala dita koe min bɛ ye, a be a bɛ mala le,
saŋɛ tɔ anun duge tɔ,
ba tɔ anun a dula luggɛreŋɛnu tɔ.
7Ale le be a mala luuture la tagamaŋɛ ni fɔlɔ dunuya daŋɛnu tɔ,
a ni sange nati anun sangi malaŋɛ,
a ni fɔɲɛ labɔɔ a la dahamu mandireŋɛnu tɔ.
8A ka Misira mɔgɛnu nun kolofeŋɛnu la den fɔlɛnu bɛ faga.
9A ka tɔnkumanu nun kabanakoenu ma wole Misira kaanu tɛma,
Firauna nun a la walilanu digii ma.
10A ka bɔnsɛ siyama botege le.
A ka mansa sɛnbɛmanu faga,
11iko Sihɔn, Amɔri kaanu la mansa,
Ogi, Baasan mansa,
anun Kanana mansanu bɛ.
12A ka wonu la dugenu dii kɛɛ la,
a ka anu la dugenu dii bani Isirayila ma,
anu ni ma anu tɛŋɛ la kudai.
13Alatala, i tɔgɛ te sama abada.
Alatala, mɔgɛnu hakkile si to le i la ko ma, bɔɔla bɔnsɔ ma han bɔnsɔ.
14Alatala si a la jama la ko kiite sa le,
a si kinikini le a la jondeŋɛnu ma.
15Sii gbɛtɛnu la alanu mu sanuɛ nun kaalise tun de la,
mɔgɛnu be minnu ɲiɲaren anu bolenu la.
16Da be anu ye, kɔnɔ anu te kuma.
Ɲa be anu ye, kɔnɔ anu te ɲɔ tayen.
17Tole be anu ye, kɔnɔ anu te fenfen mɔɛ.
Foofi bele anu bali kɔtɔ.
18Minnu be anu ɲiɲala,
minnu be anu kuŋɛ taakula anu la,
wonu tugun si to le iko ande.
19Bani Isirayila kaanu, wo Alatala matɔgɔ!
Harona bɔnsɛ, wo Alatala matɔgɔ!
20Lewi bɔnsɛnu, wo Alatala matɔgɔ!
Wole Ala ɲalakilannanu, wo Alatala matɔgɔ!
21Mamatɔgɛ be Alatala ye kabɔɔ Siyɔn,#135:21 Darisalamu tɔgɔ do le mu Siyɔn na.
ale min na nɔɔra be Darisalamu.
Wo Alatala tantu!
Currently Selected:
Jabura 135: MOG
Highlight
Share
Compare
Copy
Want to have your highlights saved across all your devices? Sign up or sign in
